ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⵉⴳⴰ ⵓⵙⵎⴽⵍ ⵏ ⵜⵏⵓⵔⵣⵉⵜ ⵉⵜⵜⵟⵟⴰⵚⵏ ⴰⵣⵔⴼ ⵏ ⵡⴰⵣⵣⴰⵏ ⴳ ⵜⵎⴰⴳⵉⵜ ⴷ ⵓⵎⵢⴰⵖ ⴷⵉⴷⵙ ⴷ ⵓⵙⴰⴷⴼ ⴰⴷⵙⵍⴰⵏ ⵉ ⵓⵃⵇⵇⴰ ⵏ ⵓⵙⵡⵉⵔ ⵏ ⵓⵙⵎⵙⴰⵙⴰ ⵏ ⵉⵙⵍⴳⵏⵏ ⵉⵏⴰⵎⵓⵔⵏ ⴰⴽⴷ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵍⵓⵎⵎⵏ ⴰⵙⵍⴳⵏ ⵏ ⵜⵡⵊⴰ, ⴷ ⵓⵙⵓⵜⴳ ⵏ ⵓⵙⵡⵉⵔ ⵏ ⵡⴰⴷⴰⴼ ⵏ ⵡⴰⵣⵣⴰⵏⵏ ⵉⵜⵜⵓⴼⴰⵜⵉⵢⵏ ⵙⴳ ⵓⵣⵔⴼ ⴳ ⵜⵎⴰⴳⵉⵜ ⵙ ⵉⵣⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ ⵙⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵍⴰ ⴰⵙⵡⵉⵔ ⵏ ⴰⴼⵔⴰⴽ ⵏ ⵇⴰⵃ ⵉⵎⴳⴳⴰⵢⵏ ⴳ ⵢⵉⴳⵔ ⵏ ⵜⵎⵥⵉ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵍⵓⵎⵎⵏ ⵉⵎⴳⴳⴰⵢⵏ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵜⵣⵔⴼⵜ". 

ⵉⴷⴷⴰ ⴷ ⵎⴰⵢⴰ ⵏⵏ ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵡⴰⵙⵙ ⴰⵏⵎⵍⴰⵏ ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ/ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵅⴼ "ⵓⵣⵔⴼ ⴳ ⵜⵎⴰⴳⵉⵜ, ⵎⴰⵏ ⵜⴰⵙⴰⵖⵓⵍⵜ?" ⵙ ⵜⴷⵔⴰⵡⵜ ⵏ ⵉⴳⵏⵙⴰⵙ ⵏ ⵜⵣⵓⵏⴰ ⵏ ⵜⵎⴰⵡⴰⵉⵏ ⴷ ⵉⵏⴳⵎⴰⵎⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵡⴰⵎⵓⵏ ⵓⵖⵔⵉⵎ, ⴰⵙⵙ ⵏ ⵓⵙⵉⵎⵡⴰⵙ 16 ⴷⵓⵊⴰⵏⴱⵉⵔ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ. 

ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵢⴰⵜ ⵜⴳⵓⵔⵉ ⵏⵏⵉ ⵉⵖⵔⴰ ⵙ ⵜⵙⵎⵉⵔⵉⵜ, ⵎⴰⵙⵙ ⵎⵓⵕⴰⴷ ⵕⵕⴰⵖⵉⴱ, ⴰⵏⵎⵀⴰⵍ ⵏ ⵓⴱⵔⵙⵉⵔⴰ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵎⴰⵙ ⵜⴼⴰⵡ ⵜⵎⵓⴽⵔⵉⵙⵜ ⵏ ⵓⵣⵔⴼ ⴳ ⵜⵎⴰⴳⵉⵜ ⵉⴷⴷⵖ ⵜⴰⵎⵓ ⴳ ⵓⵎⴹⴰⴽⴰⵕ ⴰⵏⴰⵎⵓⵔ ⴰⵎⴰⵜⴰⵢ ⵅⴼ ⵓⵙⵍⴳⵏ ⵏ ⵜⵡⵊⴰ ⵙ ⵉⵎⵏⴰⴷⵏ ⵏⵏⵙ ⵙ ⴽⵕⴰⴹ: ⴰⵎⵏⴰⴷ ⵏ ⵜⵉⵏⴷⵉⵜⵉⵏ (Axiologique) ⴷ ⵓⵎⵏⴰⴷ ⴰⵙⴰⵖⵓⵍ (Référentiel) ⴷ ⵓⵎⵏⴰⴷ ⴰⴱⵔⴷⴰⵏ (Procédural), ⵉⴷⴷⵖ ⵉⵜⵜⵡⴰⵙⵙⴰⵏ ⵓⵎⵢⴰⵙⵙⴰ ⵉⵏⴳⵔ ⵉⵎⵏⴰⴷⵏ ⴰⴷ ⵙ ⴽⵕⴰⴹ ⵙ ⴽⵉⴳⴰⵏ ⵏ ⵓⵙⵎⵥⴹⴰⵢ. ⴳ ⵓⵙⵉⵡⵍ ⵏⵏⵙ ⵅⴼ ⵡⴰⴷⴷⵓⵔ ⵏ ⵓⵙⵙⵉⵡⴹ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⵣⵎⵔ ⵜⵏⵓⵔⵣⵉⵜ, ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏ, ⴰⴷ ⵜⴳ ⵢⴰⵜ ⵜⵎⵏⵜⵉⵍⵜ ⵏ ⵜⵙⵉⵍⴰⵡⵜ ⴷ ⵉⴳⵉ ⵏ ⴽⵉⴳⴰⵏ ⵏ ⵜⵉⵍⴰⵍ, ⵓⵔ ⴷ ⵅⵙ ⴳ ⵓⵙⵡⵉⵔ ⵏ ⵓⴼⵔⴰⴳ ⵎⴰⵛ ⴰⵡⴷ ⴳ ⵓⵙⵡⵉⵔ ⵏ ⵓⴹⴼⴼⵓⵕ ⵏ ⵓⵙⵎⵙⴰⵙⴰ ⵏ ⵉⵣⵣⵔⵉⴼⵏ ⵉⵏⴰⵎⵓⵔⵏ ⴰⴽⴷ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ; ⴰⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵜⵎⵢⴰⴷⴰⵙⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵜⵙⵉⵙⴼⵉⵡ ⴳ ⵓⵙⴰⵜⵉ ⴰⴷ ⵎⴰⵙ ⴹⵉⵚⵏ ⵉⵏⵎⵓⵇⵇⴰⵔⵏ ⵉⵎⵢⴰⵖⵏ ⵏⵏⵉ ⵜⵙⵏⵎⴰⵍⴰ ⴷ ⵡⴰⵣⵣⴰⵏ ⵅⴼ ⵓⵙⵡⵉⵔ ⵏ ⵓⵙⵡⵓⴷⴷⵓ ⴰⵎⵔⵙⴰⵍ ⴷ ⵓⵣⵔⴼⴰⵏ. 

ⴳ ⵓⵎⵏⴰⴹ ⴰⴷ, ⵜⵓⵍⵍⵖ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵎⵢⴰⵖ ⵏ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵏ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴰⴽⴷ ⵓⵏⴰⴳⵔⴰⵡ ⵏ ⵓⴼⵔⴰⴳ ⴰⵏⴰⵎⵓⵔ ⴳ ⵓⵙⵡⵉⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵓⵚⴽⵉⵡⵉⵏ ⵏⵏⵙ ⵉⵎⵓⵔⴰⵏⵏ ⴷ ⵉⵙⴳⵓⵎⴰⵏⵏ ⵏⵉⵖ ⴰⴽⴷ ⵜⵎⵔⵙⴰⵍ ⴷ ⵉⵏⴳⵎⴰⵎⵏ ⵉⵏⴰⵎⵓⵔⵏ ⴷ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ. ⵜⵣⵎⵎⴻⵎ, ⵙ ⵓⵎⵏⵉⴳ, ⴰⵎⵢⴰⵖ ⵏ ⵉⵎⵉⵙ ⴰⴽⴷ ⵜⵏⵓⵔⵣⵉⵜ ⵣⴷⵉⵏⵉⵏ ⵙ ⵓⵣⵔⴼ ⴳ ⵜⵎⴰⴳⵉⵜ ⵏⵏⵉ ⵜⵜ ⴷ ⵉⴳⵓⵍⴰⵏ ⵣⵖ ⴷⴰⵔ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ, ⵜⵙⵙⵓⵜⴳ ⵜⴰⵙⵏⵜⴰⵢⵜ ⵏ ⵉⵎⵉⵙ ⵏ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴰⴽⴷ ⵉⵎⴳⴳⴰⵢⵏ ⵉⵎⵔⵙⴰⵍⵏ ⵣⴷⵉⵏⵉⵏ ⵙ ⵉⵎⵔⵙⵉ ⴷ ⴰⴽⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵜⵎⵥⵉ. 

ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⵄⴱⴷ ⵍⵍⴰⵟⵉⴼ ⵡⴰⵀⴱⵉ, ⴰⵎⴰⵡⴰⵙ ⵏ ⵜⵣⵔⴼⵜ, ⴳ ⵢⴰⵜ ⵜⴳⵓⵔⵉ ⵏⵏⵉ ⵜⵙⵎⵏⵉⴷ ⵙ ⵜⵙⵎⵉⵔⵉⵜ ⵜⵎⵛⵛⵉⵡⵕⵜ ⵏⵏⵙ ⵎⴰⵙⵙⴰ ⴼⴰⵟⵉⵎⴰ ⵣⵣⴰⵀⵔⴰ ⵎⴰⵍⵄⴰⵢⵏⴰⵢⵏ, ⵎⴰⵙ ⵜⵙⵡⵓⵔⵉ ⵜⵎⴰⵡⴰⵙⵜ ⴰⴽⴷ ⵜⵣⵓⵏⴰ ⵜⵓⵏⴱⵉⴹⵉⵏ ⵏⵜⴰⵢⵏⵉⵏ ⴷ ⵜⵓⴳⵜ ⵏ ⵉⵎⴷⵔⴰⵡⵏ ⵅⴼ ⵓⵙⴷⵓⵙ ⵏ ⵜⵙⴳⴰ ⵜⴰⵎⵔⵙⴰⵍⵜ ⴷ ⵜⵎⵙⵙⵓⴳⵓⵔⵜ ⵉ ⵓⵙⴷⵓⵙ ⵏ ⵓⴼⵔⴰⴳ ⵏ ⵓⵣⵔⴼ ⵏ ⵡⴰⵣⵣⴰⵏ ⴳ ⵜⵎⴰⴳⵉⵜ, ⵉⵙⴷⴷⵉⴷ ⵎⴰⵙ ⴷⴰ ⵜⵙⴽⴰⵔ ⵜⵎⴰⵡⴰⵙⵜ ⴳ ⵜⵙⵔⵜⵉⵜ ⵏⵏⵙ ⵜⵓⵣⵔⵉⴼⵜ ⴰⵎⵏⵣⴰⵢ ⵏ ⵡⴰⵔ ⴰⵙⵏⵓⵃⵢⵓ ⴷ ⵓⵎⵏⵣⴰⵢ ⵏ ⵓⵚⴰⵃⴰ ⴰⵎⵓⴼⴰⵢ ⵏ ⵡⴰⵣⵣⴰⵏ ⵏⵏⵉ ⵉⴱⴷⴷⵏ ⵅⴼ ⵓⵙⵙⵉⴷⵉⵔ ⵏ ⵓⵚⴰⵃⴰ ⵏ ⵡⴰⵣⵣⴰⵏ ⴷ ⵓⵙⵉⵣⵡⵔ ⵏⵏⵙ ⴳ ⵎⴰⵕⵕⴰ ⵉⵣⵎⴰⵣ ⴷ ⵡⴰⴷⴷⴰⴷⵏ. ⵉⵙⵉⵙⴼⵉⵡ ⵎⴰⵙ ⴷⵉⴳⵏⵖ ⵉⵙⵙⵓⵜⵔ ⵉⵎⵔⵙⵉ ⵏ ⵓⵣⵔⴼ ⴳ ⵜⵎⴰⴳⵉⵜ ⵙ ⵓⵙⵎⵀⵍ ⴰⵙⵎⵀⵍ ⵏ ⵓⵙⵡⵉⵏⴳⵎ ⴰⵎⴳⵓⵔⴰⵏ ⵉ ⵓⵔⵣⵣⵓ ⵏ ⵓⵙⴰⵜⵉ ⴷ ⵉⴳⵔⴰⵏ ⵢⴰⴹⵏⵉⵏ ⵏ ⵓⵙⵎⵙⴰⵙⴰ ⵏ ⵓⵔⵣⴰⴼ ⴰⵏⴰⵎⵓⵔ ⴰⴽⴷ ⵜⵓⵎⴰⵢⵉⵏ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⴰⴷ ⴰⴷ ⵉⵙⴰⴷⵎⵔ ⵉ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⴷ, ⴷ ⵜⵙⵖⵣⵏⵜ ⵏ ⵢⴰⵜ ⵜⵎⵢⴰⴷⴰⵙⵜ ⵜⴰⴳⵜⵉⵎⵏⴰⴷⵏ ⵉⵏⵏⴰⵍⵏ ⵅⴼ ⵡⴰⵔⴰⵢ ⴷ ⵓⴼⵔⴰⴳ, ⴷ ⵓⵙⵢⵉⵍⵉ ⵏ ⵓⵎⵏⴰⴷ ⴰⵎⵓⵔⴰⵏ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ. 

ⵉⵙⵙⵏ ⵓⵏⵎⵓⵇⵇⴰⵔ, ⵏⵏⵉ ⵉⵙⵡⵓⴷⴷⴰ ⵎⴰⵙⵙ ⵄⴱⴷ ⵍⴽⵔⵉⵎ ⴰⵍⴰⵄⵣⴰⵏⵉ, ⴰⵎⵣⴷⴰⵢ ⵏ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵜⴰⵎⵢⴰⴷⴰⵙⵜ ⵏ ⵉⵎⵔⵙⵉ ⵙⴳ ⵙⵎⵎⵓⵙⵜ ⵏ ⵜⴽⵛⵛⵓⵎⵉⵏ : ⴰⵎⵏⴰⴹ ⴰⵏⴰⵎⵓⵔ ⵏ ⵓⴼⵔⴰⴳ ⵉ ⵓⵣⵔⴼ ⴳ ⵜⵎⴰⴳⵉⵜ; ⴰⵣⵔⴼ ⵏ ⵡⴰⵣⵣⴰⵏ ⴳ ⵜⵎⴰⴳⵉⵜ ⴳ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ; ⴰⵣⵔⴼ ⵏ ⵡⴰⵣⵣⴰⵏ ⴳ ⵜⵎⴰⴳⵉⵜ ⴷ ⵜⵉⵍⴰⵍⵜ ⵏ ⵡⴰⵎⵓⵏ ⵓⵖⵔⵉⵎ ⴳ ⵓⴼⵔⴰⴳ ⵏⵏⵙ; ⵜⴰⵢⵢⴰⵡⵜ ⴷ ⵡⴰⵎⴰⵙ ⵉⵏⴳⵔ ⵉⴱⴹⵉⵢⵏ ⵏ ⵓⵙⵍⴳⵏ ⵏ ⵜⵡⵊⴰ ⴷ ⵜⵡⵓⵔⵉ ⵏ ⵜⵏⴱⴹⴰⵢⵜ; ⵜⵉⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵣⵔⴼ ⴳ ⵜⵎⴰⴳⵉⵜ. 

ⵉ ⵓⵙⴽⵜⵉ, ⴷⵔⵓⵏ ⴳ ⵡⴰⵙⵙ ⴰⴷ ⴰⵏⵎⵍⴰⵏ ⵉⴳⵏⵙⴰⵙ ⵏ ⵜⵣⵓⵏⴰ ⵏ ⵜⵎⴰⵡⴰⵙⵉⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵓⵣⴰⵢⵏ, ⴰⴼⴰⴷ ⴰⴷ ⴷⵉⵡⵍⵏ, ⵎⴹⴰⴽⴰⵕⵏ ⵅⴼ ⵜⵙⵉⵍⴰⵡⵜ ⵏ ⵢⴰⵏ ⵓⵎⵏⴰⴷ ⵉⴼⴰⵡⵏ ⵉⴼⵔⴰⴳⵏ ⴰⵣⵔⴼ ⵏ ⵡⴰⵣⵣⴰⵏⵏ ⴳ ⵜⵎⴰⴳⵉⵜ, ⵏⵏⵉ ⵉⴳⴰⵏ ⴰⵙⴰⴷⴼ ⴰⴷⵙⵍⴰⵏ ⴷ ⵓⵏⴰⵎⵎⴰⵙ ⵉ ⵓⴼⵊⵊⵉⵊ ⵙ ⵉⵣⵔⴼⴰⵏ ⵏⵏⵙⵏ ⵓⵍⴳⵉⵏⵏ ⴳ ⵓⵙⵡⵉⵔ ⴰⵖⵣⵓⵔⴰⵏ ⴷ ⵓⴷⵙⵜⴰⵔ, ⴷ ⵓⵍⴰ ⴰⵔⵣⵣⵓ ⵅⴼ ⵉⵙⴰⴷⴰⴼⵏ ⵕⵡⴰⵏⵉⵏ ⵉ ⵓⴼⵓⵖ ⵙ ⵉⵙⵖⵍⴰⴼ ⵉⵜⵜⴰⵡⵉⵏ ⵙ ⵓⵎⵏⵉⴷ ⵏ ⵓⵡⴰⴹ ⵏ ⵓⵚⴰⵃⴰ ⴰⵎⵓⴼⴰⵢ ⵏ ⵡⴰⵣⵣⴰⵏ.