ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⵉⴼⴰⵡⵜ ⵏ ⵡⴰⵙⵙ ⴰⴷ, ⴰⵙⵉⵎⵡⴰⵙ 24 ⵎⴰⵢⵢⵓ 2024, ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵜⵉⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵏ ⵜⴹⴼⵕⵉ ⵏⵏⵙ ⵉ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴳ ⵓⵎⵏⴰⴹ ⵏ ⵓⵏⴷⵓⴷⵉ ⵏ ⵡⴰⵟⵍⴰⵚ ⴰⵎⵇⵇⵔⴰⵏ ⵢⵓⵙⵉⵏ ⵙ ⵓⵣⵡⵍ "ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⴳ ⵓⵎⵏⴰⴹ ⵏ ⵓⵏⴷⵓⴷⵉ ⵏ 8 ⵛⵓⵜⴰⵏⴱⵉⵔ 2023: ⵉⵙⵖⵍⴰⴼ ⵏ ⵓⵙⵇⵇⵉⵎ ⵙ ⵜⴹⴼⵕⵉ ⵏⵏⵙ ⵉ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵉⵔⵣⴰⴼⵏ ⵏⵏⵙ ⴳ ⵓⴱⴰⵔⴰⵣ", ⵙ ⵜⵉⵍⵉⵜ ⵏ ⵉⴳⵏⵙⴰⵙ ⵏ ⵢⵉⴳⵔⴰⵏ ⵓⵏⴱⵉⴹⵏ ⵏⵜⴰⵢⵏⵉⵏ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⴳⵔⵓⵎⵎⴰ ⵏ ⵡⴰⵣⵣⴰⵏⵏ, ⵙ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⵎⴷⵔⴰⵡⵜ ⵏ ⵡⴰⵣⵣⴰⵏ, ⵍⵍⵉ ⵅⴼ ⵉⵜⵜⵏⵄⴰⵕ ⵓⵙⵇⵇⵉⵎ ⵅⴼ ⵓⵙⵎⵔⵙⵍ ⵏⵏⵙ.

ⵣⴷⵉⵏⵜ ⵜⵢⴰⴼⵓⵜⵉⵏ ⴷ ⵉⵙⵖⵍⴰⴼ ⴰⴷ ⵙ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⴱⵕⵕⴰ ⵏⵏⵙ ⵙ ⵓⵙⵏⵜⵉ ⵙⴳ ⵜⵙⴳⵓⵎⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵙ ⵉⵎⵏⴰⴷⵏ ⵏⵏⵙ ⵙ ⴽⵕⴰⴹ, ⴰⵎⵏⴰⵡⴰⵢ ⴷ ⵓⵏⴱⵔⵉⴷ ⴷ ⵡⵉⵏ ⵜⵉⵏⴷⵉⵜⵉⵏ,  ⴷ ⵡⴰⴷⴷⵓⵔ ⵏ ⵓⴼⵔⴰⴳ ⴰⴷ ⴰⵎⵥⵍⴰⵢ ⴳ ⵉⵏⵉⵍⴰⵏⵏ ⵉⵎⵣⵡⵓⵔⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⵏ ⵓⵎⴷⴰⵢ ⴷ ⵓⴹⴼⴼⵓⵕ ⴷ ⵓⵙⵙⵓⵎⵓ, ⵉⵖ ⵉⴳⴰ ⴳ ⵜⵎⵙⵓⵜⴰⵍ ⵜⵓⵏⵣⵉⵍⵉⵏ ⵏⵉⵖ ⴳ ⵜⵉⵣⵉ ⵏ ⵜⴰⵙⵙⴰⵙⵉⵏ.

ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵉ ⵓⵏⵎⵓⵇⵇⴰⵔ, ⵉⵙⴷⴷⵉⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ, ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⵎⴰⵙ ⴳⴰⵏⵜ ⵜⵢⴰⴼⵓⵜⵉⵏ ⴰⴷ ⴷ ⵉⵙⵖⵍⴰⴼ ⴰⴷ, ⵍⵍⵉ ⵎⵉ ⵉⵎⵙⴰⴳⴰⵔ ⵓⵙⵎⵏⵉⴷ ⵏⵏⵙⵏⵜ ⴷ ⵓⵙⴼⵓⴳⵍⵓ ⵙ ⵡⴰⵙⵙ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⴷⴷⴰⵏⵜ ⴷ ⵙⴳ ⵜⵖⴰⵔⴰⵙⵜ ⵜⴰⵙⵜⵔⴰⵜⵉⵊⵉⵜ ⵏ ⵓⵙⵇⵇⵉⵎ ⵏⵏⵉ ⵉⴹⴼⵕ ⴳ ⵜⵎⵢⴰⴷⴰⵙⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵓⴹⴼⴼⵓⵕ ⴷ ⵜⴹⴼⵕⵉ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴹⴰⵕⴰⵜ ⴰⵄⴷⵔⵉⵇ ⵏ 8 ⵛⵓⵜⴰⵏⴱⵉⵔ,  ⴷ ⵙⴳ ⵉⵔⵣⴰⴼⵏ ⵏ ⵓⴱⴰⵔⴰⵣ ⴷ ⵜⵖⵉⵎⵉⵜⵉⵏ ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⴽⴷ ⵡⴰⵣⵣⴰⵏⵏ ⴷ ⵜⵎⵙⵎⵓⵏⵉⵏ ⵜⴰⵔⵓⵏⴱⵉⴹⵉⵏ ⴷ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⵏⵜⴰⵢⵏⵉⵏ, ⵉⵣⴷⵉⵏ ⵙ ⵓⵄⴷⵔⵉⵇ ⵏ 8 ⵛⵓⵜⴰⵏⴱⵉⵔ ⴷ ⵓⴹⴼⴼⵓⵕ ⵏ ⵉⴷⵔⵉⵣⵏ ⵏⵏⵙ ⵅⴼ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏⵏ, ⵉⴷⴷⵖ ⴳⴰⵏ ⵢⴰⵏ ⵙⴳ ⵉⵙⵎⵉⵍⵏ ⴱⴰⵀⵔⴰ ⴽⵓⴽⴹⵏⵉⵏ ⴳ ⵜⵉⵣⵉ ⵏ ⵉⵄⴷⵔⵉⵇⵏ.

ⴳ ⵜⴳⵓⵔⵉ ⵏⵏⵙ ⵜⴰⵎⵙⵎⵏⵉⴷⵜ ⵏ ⵜⵏⵜⴰⵎⵜ ⴰⴷ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⵙⵡⵓⵜⵜⵙ ⵓⵙⵇⵇⵉⵎ, ⵙ ⵓⵙⵎⵏⵉⴷ ⵏ ⵉⵙⵖⵍⴰⴼ ⴰⴷ ⵉⵣⴷⵉⵏ ⴷ ⵓⵎⵏⴰⴷ ⵓⵍⴳⵉⵏ ⴷ ⵓⵎⵀⵉⵍ ⴷ ⵓⵏⵎⵙⴰⴳⴰⵔ ⴳ ⵜⵙⵔⴰⵜⵢ ⵜⵉⴳⴷⵓⴷⴰⵏⵉⵏ ⵉⵜⵜⵓⵙⵡⴰⵍⴰⵏ ⵉ ⵡⴰⵣⵣⴰⵏⵏ, ⵍⵍⵉ ⵉⵙⵖⵣⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵙⵇⵇⵉⵎ ⴳ ⵜⵙⵓⵜⵍⵜ ⵏ ⴽⵟⵓⴱⵕ 2023 ⴳ ⵓⴳⴰⴷⵉⵔ, ⴰⵙⴷⵓⵙ ⵏ ⵜⵙⵉⵣⵡⵔⵜ ⴷ ⵜⵥⵥⵉⴹⵕⴰ ⴳ ⵓⵎⵏⴰⵍⴰ ⵏ ⵉⵄⴷⵔⵉⵇⵏ, ⴷ ⵓⵙⴷⵓⵙ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ ⴷ ⵓⵙⴷⵓⵙ ⵏ ⵜⴼⴰⴷⵉⵡⵉⵏ ⵏ ⵜⵡⵏⵏⴰⴹⵜ ⵜⴰⵎⵓⵟⵟⵓⵏⵜ ⵉⵏⵏⴼⵔⵓⵏ ⵉ ⵡⴰⵣⵣⴰⵏⵏ ⵉⵙⵡⵓⵜⵜⵓⵏ ⵜⵓⵎⴰⵏⵜ ⵏ ⵜⴽⵏⴷⴰⵡⵜ.
ⵙⴳ ⵉⵙⵖⵍⴰⴼ ⵏⵏⵉ ⵉⵙⵎⵏⵉⴷ ⵓⵙⵇⵇⵉⵎ ⴳ ⵓⵎⵏⴰⴹ ⴰⴷ:

•    ⴰⵙⴷⵖⵉ ⵏ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵙⵡⵓⴷⴷⵓ ⵏ ⵉⵎⵉⵣⵉⵜⵏ ⴷ ⵉⵄⴷⵔⵉⵇⵏ ⵉⴳⴰⵎⴰⵏⵏ 2020-2030, ⴷ ⵢⵉⵡⵉⵣ ⵅⴼ ⵓⵙⵎⵀⵍ ⵏ ⵜⵎⵢⴰⴷⴰⵙⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵓⵙⴷⵔⴰⵡ ⵏ ⵜⵎⵙⵎⵓⵏⵉⵏ ⵉⵎⵢⴰⴳⴳⴰⵏⵏ ⴳ ⵢⵉⴳⵔ ⵏ ⵜⵎⵥⵉ;
•    ⴰⵙⴷⴷⵔⴼ ⵏ ⵓⵙⵙⵓⴼⵖ ⵏ ⵓⵙⵍⴳⵏ ⵉⵥⵍⵉⵏ ⵙ ⵡⴰⵎⵎⴰⵙⵏ ⵏ ⵓⴼⵔⴰⴳ ⵏ ⵜⵎⵥⵉ, ⴷ ⵓⵙⴽⴰⵔ ⵙ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⵅⴼ ⵓⵙⵏⵜⵉ ⵏ ⵓⵙⵍⴳⵏ ⵍⵍⵉ ⵢⴰⴷ ⵉⵙⵎⵏⵉⴷ ⵉ ⵜⵎⴰⵡⴰⵙⵜ ⵉⵏⵜⴰⵢⵏ;
•    ⴰⵙⵎⵓⵜⵜⴳ ⵏ ⵢⴰⵏ ⵓⵙⵎⵎⴰⵍ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵉⵄⴷⵔⵉⵇⵏ ⵉⴳⴰⵎⴰⵏⵏ ⴳ ⵓⵙⵡⵉⵔ ⵏ ⵡⴰⵎⵎⴰⵙⵏ ⵏ ⵓⴼⵔⴰⴳ ⵏ ⵜⵎⵥⵉ;
•    ⴰⵣⵔⴰⴽ ⵏ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏⵏ, ⵙ ⵓⵏⴰⵎⴽ ⵏⵏⵙ ⴰⵎⴰⵜⴰⵢ ⴷ ⴳ ⴽⵓⵍⵍⵓ ⵜⵙⴳⴳⵯⵉⵏ ⵏⵏⵙ ⴷ ⵉⵙⴰⴷⴰⴼⵏ ⵏⵏⵙ, ⴳ ⵡⴰⵎⵎⴰⵙ ⵏ ⵜⴽⵛⵛⵓⵎⵉⵏ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ, ⴷ ⵜⵡⵙⵙⵏⴰ ⵏ ⴽⵓⵍⵍⵓ ⵉⵎⵏⴰⴷⵏ ⵉⵥⵍⵉⵏ ⵙ ⵡⴰⵔⴰⵢ ⴷ ⵓⵙⴼⵙⵉⵙ ⵏ ⵓⴷⵔⵉⵣ ⵉⵜⵜⵓⴷⵎⴰⵏ ⵏ ⵜⴽⵛⵛⵓⵎⵉⵏ ⴰⴷ, ⵙ ⵢⴰⵜ ⵜⵡⵉⵍⴰ ⵉⵜⵜⴰⵔⵉⵏ ⴰⵣⵣⴰⵏⵏ ⵙⴳ ⵉⵎⵉⵣⵉⵜⵏ ⵏⵏⵉ ⵉⵣⵎⵔⵏ ⴰⴷ ⵜⵏ ⵙⴷⵉⴷⴷⵉⵢⵏ ⵙ ⵜⵎⵏⵜⵉⵍⵜ ⵏ ⵓⵙⵎⴰⵜⵜⵉ ⵏⵏⵙⵏ ⵙⴳ ⵜⵡⵏⵏⴰⴹⵜ ⵏⵏⵙⵏ ⵜⴰⵕⵚⵍⵉⵜ;
•    ⴰⵙⵔⵓⵙ ⵏ ⵜⵎⵢⴰⴳⴰⵏⵜ ⵏ ⵡⴰⵔⴰⵢ ⵙⴳ ⵜⵕⵥⵉⵢⵉⵏ ⴷ ⵉⵎⵉⵣⵉⵜⵏ ⵜⵜⵓⴷⵎⴰⵏⵉⵏ ⵅⴼ ⵡⴰⵣⵣⴰⵏⵏ ⴷ ⵉⵣⵔⴼⴰⵏ ⵏⵏⵙⵏ ⴳ ⵓⵙⵉⵣⵡⵔ ⴰⴽⵙⵡⴰⵜ ⵏ  ⵜⵓⵥⵥⵓⵎⵜ ⵏ ⵜⵣⵔⵜⵉⵜ ⵜⴰⴳⴷⵓⴷⴰⵏⵜ ⵜⴰⵎⵙⵙⵉⴷⴼⵜ ⵏ ⵓⴼⵔⴰⴳ ⵏ ⵜⵎⵥⵉ ⴳ ⵓⵎⵏⴰⴷ ⵏⵏⵙ ⵏ ⵡⴰⵔⴰⵢ ⵏⵏⵉ ⵉⵙⵡⵓⵜⵜⵙⵏ ⴰⵣⵣⴰⵏⵏ ⴳ ⵓⵙⵓⵔⵙ ⵏ ⵓⴽⵓⴽⴹ;
•    ⴰⵙⵖⵉⵡⵙ ⵏ ⵉⵙⵎⵓⵜⵜⴳⵏ ⵉⵥⵍⵉⵏ ⵙ ⵓⵙⴰⵜⵉ ⴰⵎⵏⴰⵡⴰⵢ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵉⵚⴰⵃⴰⵏ ⵉ ⵉⵏⵖⵎⴰⵙⵏ ⴷ ⴽⵓⵍⵍⵓ ⵉⵎⵙⵡⵓⵔⵉⵢⵏ ⴳ ⵢⵉⴳⵔ ⴰⵏⵖⵎⴰⵙ;
•    ⵉⵡⵉⵣ ⵅⴼ ⵜⴷⵔⴰⵡⵜ ⴳ ⵓⵙⵙⵓⵊⴷ ⵏ ⵜⵡⵏⵏⴰⴹⵜ ⵜⴰⵎⵓⵟⵟⵓⵏⵜ ⵉⵏⵏⴰⵍⵏ ⴷ ⵉⵙⴷⵓⵙⵏ ⴷ ⵉⴼⵔⴰⴳⵏ ⵉⵣⵎⴰⵣ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ ⵙ ⵜⵡⵍⴰⴼⵜ ⵜⴰⵎⵏⴼⵔⵓⵜ ⴷ ⵜⵎⵙⵓⵎⵓⵜ, ⴷ ⵓⴳⴳⴰⵔ.