"ⴰⵔ ⴰⵖ ⵜⵜⴰⴷⵊⴰⵏⵜ ⵜⵙⵎⵉⴳⴰⵍ ⵏⵏⵖ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷ ⵏⵣⵎⵎⴻⵎ ⵉⵎⵓⴽⵔⵉⵙⵏ ⵏⵏⵉ ⵎⵉ ⵓⵔ ⵏⵜⵜⴰⴼⴰ ⵉⵙⴱⴷⴰⴷⵏ ⵓⵍⴳⵉⵏⵏ ⵏ ⵓⵙⴱⴽⴽⵉⴹ ⵏⵏⵙⵏ ⴷ ⴰⵡⴷ ⵉⵎⴰⵙⵙⵏ ⵉⴼⴰⵡⵏ ⵉ ⵓⵙⴱⴷⴷⵉ ⵏⵏⵙ; ⴰⵔ ⵏⵙⵙⴰⴳⴳⵯ ⵅⴼ ⵓⵣⴷⴰⵢ ⵏ ⵉⴹⵕⵉⵚⵏ ⵉⵙⴳⴰⵡⴰⵏⵏ ⵙ ⵓⵎⵢⴰⵙⵙⴰ ⴰⴳⵎⴰⵎ ⴰⵏⴰⵡⴰⵢ (ⵓⵍⴳⵉⵏ) ⴰⴽⴷ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⴰⴳⵯⵎⵏ ⴷ ⵙⴳ ⵜⵉⵏⴷⵉⵜⵉⵏ ⵜⵉⵖⵣⵓⵔⴰⵏⵉⵏ ⵉⵏⵏⵖⴰⵍⵏ ⵢⵉⴳⵔ ⵏ ⵡⴰⵔⴰⵢ ⴷ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵎⴰⵕⵕⴰ ⵡⴰⵏⴰⵡⵏ ⵏ ⵜⵕⵥⵉ ⵉⵀⵔⵛⵏ ⵉ ⵢⵉⵎⴰⵏ ⵏⵏⵙⵏ ⴷ ⵜⴼⴳⴳⴰ ⵏⵏⵙⵏ". ⵉⴷⴷⴰ ⴷ ⵎⴰⵢⴰ ⵏⵏ ⴳ ⵜⴳⵓⵔⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵙⴰⵡⵔⵜ ⵜⴰⵎⵢⴰⵖⵜ ⵅⴼ "ⵜⴽⵕⴹⵉ ⵜⴰⵡⵙⵢⴰⵏⵜ ⵎⴳⴰⵍ ⵡⴰⵣⵣⴰⵏⵏ - ⵜⴰⵎⵢⴰⵇⵇⴰⵏⵜ ⵏ ⵍⴰⵏⵥⴰⵕⵓⵟ ⴷ ⵓⵙⴷⵓⵙ ⵏ ⵓⵏⴰⴳⵔⴰⵡ ⵏ ⵓⴼⵔⴰⴳ ⵏ ⵜⵎⵥⵉ ⴳ ⵍⵎⵖⵔⵉⴱ", ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴰⵙⵙ ⵏ ⵓⵙⵉⵏⴰⵙ 24 ⴽⵟⵓⴱⵕ 2023 ⴳ ⵕⵕⴱⴰⵟ. 

ⴳ ⵓⵙⴽⵜⵉ ⵏⵏⵙ ⵙ ⵓⵣⵔⴰⵢ ⵏ 30 ⵏ ⵉⵙⴳⴳⵯⴰⵙⵏ ⵅⴼ ⵜⵙⵖⵣⵏⵜ ⵏ ⵜⴳⵍⴷⵉⵏⵜ ⵏ ⵍⵎⵖⵔⵉⴱ ⵜⴰⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, "ⴷ ⵏⵜⵜⴰⵜ ⴷ ⵜⵎⵍⴷⴰ ⵏ ⵉⴱⴷⴷⵉ ⵅⴼ ⵎⴰⴷ ⵉⵜⵜⵢⴰⵡⴹⵏ ⴳ ⵓⵙⵎⵀⵍ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵓⴼⵔⴰⴳ ⵙⴳ ⵜⴽⵕⴹⵉ ⵜⴰⵡⵙⵢⴰⵏⵜ", ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵓⵙⵖⵍⵍⴰ ⴷ ⵜⴰⴷⵓⵜ ⵜⴰⵡⵙⵢⴰⵏⵜ ⴷ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵡⵉⵙⵙ ⴽⵕⴰⴹ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵉⵣⴷⵉⵏ ⵙ ⵓⵙⵎⵏⵉⴷ ⵏ ⵉⵙⵉⵡⴹⵏ. 

ⴳ ⵓⵎⵏⴰⴹ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙⵣⵎⵔⵏⵜ ⵜⵎⵢⴰⵇⵇⴰⵏⵉⵏ ⴰⴷ ⵙ ⵙⵏⴰⵜ "ⴰⴷ ⵙⴷⵓⵙⵏⵜ ⴰⵏⴰⴳⵔⴰⵡ ⴰⵏⴰⵎⵓⵔ ⵏ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵜⴽⵕⴹⵉ ⵜⴰⵡⵙⵢⴰⵏⵜ ⵏⵏⵉ ⵉⵎⵢⴰⴷⴰⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏⵙ ⵓⴹⴼⴼⵓⵕ ⴷ ⵓⵙⵓⵜⴳ ⵏ ⵓⵙⵖⵍ ⵏ ⵡⴰⴷⴰⴼ ⵏ ⵡⴰⵣⵣⴰⵏⵏ ⵙ ⵓⵣⵔⴼ ⵏⵏⵙⵏ ⴳ ⵓⴼⵔⴰⴳ ⴰⵎⵙⵙⵓⵎⵓ", ⵜⵔⵏⵓ ⵎⴰⵙ ⵉⵙⵖⴰⵡⵙⴰ ⵍⵎⵖⵔⵉⴱ, ⵅⴼ ⵉⴳⴳⵉ ⵏ ⵓⵙⵎⴰⴷ ⵏ ⵜⵓⵎⵙⵉⵙⵜ ⵏ ⴽⵔⴰ ⵏ ⵜⵙⴳⴳⵯⵉⵏ ⵜⵉⵣⵣⵔⴰⴼⵉⵏ ⵜⵉⵏⴰⵎⵓⵔⵉⵏ ⴰⴽⴷ ⵢⵉⵎⴰⵏ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵙⵍⴰⵡⴰⵏ ⴰⴽⴽⵯ ⴰⵙⵎⵀⵍ ⴷ ⵓⵙⵎⴰⵜⴰ ⵏ ⵉⴳⵎⴰⵎⵏ ⵉⴽⴰⵍⴰⵏⵏ ⵉⵎⵙⵙⵓⵎⵓⵜⵏ ⵍⵍⴰⵏⵉⵏ ⴳ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⵜⴰⵎⵙⵙⵓⵎⵓⵜ ⵏ ⵓⴼⵔⴰⴳ ⵏ ⵜⵎⵥⵉ 2015-2025". ⵙⴳ ⵜⵙⴳⴰ ⵏⵏⵙ, ⴰⵔ ⵜⵜⴰⵏⵏⴰⵢ ⵜⵏⵙⵙⵉⵅⴼⵜ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ, ⵎⴰⵙⵙⴰ ⴽⴰⵔⵎⵏ ⴳⵓⵎⵉⵣ, ⵎⴰⵙ ⵜⴳⴰ ⵜⵎⵢⴰⵇⵇⴰⵏⵜ ⵏ ⵍⴰⵏⵥⴰⵕⵓⵟ ⵉⵥⵍⵉⵏ ⵙ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵓⵙⵖⵍⵍⴰ ⴷ ⵜⴰⴷⵓⵜ ⵜⴰⵡⵙⵢⴰⵏⵜ ⵢⴰⵜ ⵜⵙⵓⵔⵉⴼⵜ ⵜⴰⴽⵙⵡⴰⵜ ⴳ ⵢⵉⴳⵔ ⵏ ⵡⴰⵔⴰⵢ ⵙⴳ ⵉⴱⴽⴽⵉⴹⵏ ⵉⵡⵙⵢⴰⵏⵏ ⵎⴳⴰⵍ ⵡⴰⵣⵣⴰⵏⵏ ⴷ ⵓⴹⴼⴼⵓⵕ ⵏ ⵉⵎⴰⴷⵓⵜⵏ ⴷ ⵓⴼⵔⴰⴳ ⵏ ⵡⴰⵣⵣⴰⵏⵏ ⵓⵏⴳⵉⵙⵏ. 

ⵜⵙⵙⴽⵕⵥ ⵙ ⵜⵎⵍⴷⴰ ⴰⴷ ⵎⴰⵙ ⵉⵣⵎⵔ ⴰⴷ ⵉⵜⵜⵓⴳⴰ ⵓⵙⵖⵍⵍⴰ ⴷ ⵜⴰⴷⵓⵜ ⵜⴰⵡⵙⵢⴰⵏⵜ ⵅⴼ ⵡⴰⵣⵣⴰⵏⵏ ⴳ ⵜⴰⴷⴷⴰⵔⵜ ⵏⵉⵖ ⵜⵉⵏⵎⵍ ⵏⵉⵖ ⴳ ⵓⵣⵎⵣ ⵏ ⵜⵉⵍⴰⵍ ⵜⵉⵎⵙⴷⴰⵖⵉⵏ ⵏ ⵜⵉⵏⵎⵍ ⵏⵉⵖ ⴳ ⵡⴰⵙⵓⴽ ⵏⵉⵖ ⴳ ⵜⵜⵉⵍⵉⴼⵓⵏ ⵏⵉⵖ ⴳ ⵍⴰⵏⵜⵉⵔⵏⵉⵜ ⴷ ⵎⴰⵙ ⵜⵓⴳⵜ ⵏ ⵡⴰⴷⴷⴰⴷⵏ (70 ⴰⵔ 85%) ⴰⵔ ⵜⵏ ⵉⵜⵜⴳⴳⴰ ⴽⵔⴰ ⵏ ⵓⴳⴳⵉⴷ ⵙⴳ ⵓⵡⵏⵏⴰⴹ ⵉⵏⵎⴰⵍⴰⵏ ⵏ ⵡⴰⵣⵣⴰⵏ, ⴰⵔ ⵙⵎⵏⵜⵉⵍⵏ ⵙ ⵓⵎⴰⵍⴰⴷ ⵅⴼ ⵜⴷⵓⵙⵉ ⵜⴰⴽⵎⴰⵎⵜ ⴷ ⵜⵎⵏⵍⵍⵉⵜ ⵏ ⵡⴰⵣⵣⴰⵏ ⵎⴰⴷ ⵜⵍⵍⴰ ⵜⵓⴷⵔⵜ, ⵜⵔⵏⵓ ⵎⴰⵙ ⴷ 90% ⵏ ⵡⴰⴷⴷⴰⴷⵏ ⵓⵔ ⴷⴰ ⵉⵜⵜⵓⴳⴰ ⵓⵙⵙⵉⵡⴹ ⵏ ⵜⵡⵓⵔⵉⵡⵉⵏ ⴰⴷ. ⵙⴳ ⵜⵙⴳⴰ ⵏⵏⵙ, ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵎⵢⴰⵇⵇⴰⵏⵜ ⵏ ⵍⴰⵏⵥⴰⵕⵓⵟ, ⵎⴰⵙⵙⴰ ⵎⴰⵕⵉⵢⵢⴰ ⵅⵓⵙⵉ ⴽⴰⵙⵉⵍⵍⵓ ⴱⵔⴰⵏⴽⵓ, ⴰⴷⴷⵓⵔ ⵏ ⵜⵎⵢⴰⵇⵇⴰⵏⵜ ⴷ ⵜⵎⵍⵉⵍⵜ ⵏ ⵜⵙⵇⵇⵉⵎⵜ ⴳ ⵓⴹⴼⴼⵓⵕ ⵏ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏ ⵜⵎⵢⴰⵇⵇⴰⵏⵜ ⴳ ⵓⵙⵡⵉⵔ ⵏ ⴽⵓ ⴰⵡⵏⴽ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵙ ⵓⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵉⵍⵎⵎⴰ ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ. ⵜⵜⵡⴰⵙⵙⴰⵏ ⵜⵙⴰⵡⵔⵜ ⴰⴷ ⵜⴰⵎⵢⴰⵖⵜ ⵙ ⵜⴷⵔⴰⵡⵜ ⵏ ⵉⴳⵏⵙⴰⵙ ⵏ ⵜⵓⴳⵜ ⵏ ⵢⵉⴳⵔⴰⵏ ⵉⵎⴰⵡⵙⴰⵙⵏ ⴷ ⵉⵎⵓⵣⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴷ ⴽⵔⴰ ⵏ ⵜⵎⵙⵎⵓⵏⵉⵏ ⵉⵏⵜⴰⵢⵏ ⵙ ⵜⵖⴰⵡⵙⵉⵡⵉⵏ ⵏ ⵜⵎⵥⵉ ⴷ ⵜⴳⵔⵓⵎⵎⴰ ⵏ ⵡⴰⵣⵣⴰⵏⵏ ⵏⵏⵉ ⵉⴷⵔⵓⵏ ⴳ ⵉⵎⵛⴰⵡⴰⵕⵏ ⵉⵏⵎⵏⴰⴹⵏ ⵏⵏⵉ ⵜⵕⵥⵎ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵓⵎⵏⵣⴰⵢ ⵏ ⵜⴷⵔⴰⵡⵜ. 

ⵉ ⵓⵙⴽⵜⵉ, ⵜⵓⵡⵉ ⴷ ⵜⵙⴰⵡⵔⵜ ⴰⴷ, ⵏⵏⵉ ⵉⵙⵡⵓⵜⵜⵙⵏ ⵉⴱⴷⴷⵉ ⵅⴼ ⵜⵉⵏⴷⵉ ⵉⵜⵜⵡⴰⵔⵏⴰⵏ ⵏ ⵜⵎⵢⴰⵇⵇⴰⵏⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵓⵙⵖⵍⵍⴰ ⴷ ⵜⴰⴷⵓⵜ ⵜⴰⵡⵙⵢⴰⵏⵜ ⴷ ⵓⵙⵙⵉⴷⴷ ⵅⴼ ⵡⴰⴷⴷⵓⵔ ⵏ ⵜⵙⵖⵣⵏⵜ ⵏⵏⵙ ⴷ ⵜⵡⵎⴰⵏⵉⵜ ⴳⵉⵙ ⴳ ⵓⵙⴷⵓⵙ ⵏ ⵓⵏⴰⴳⵔⴰⵡ ⵏ ⵓⴼⵔⴰⴳ ⵏ ⵜⵎⵥⵉ ⴳ ⵍⵎⵖⵔⵉⴱ, (ⵜⵓⵡⵉ ⴷ) ⵅⴼ ⵜⴳⵔⵓⵎⵎⴰ ⵏ ⵉⵙⵓⴳⴰⵎ ⵙⴳⵉⵙⵏ ⴰⴼⵔⴰⴳ ⵏ ⵡⴰⵣⵣⴰⵏⵏ ⴷ ⵓⵙⴰⵜⵉ ⵓⵍⴳⵉⵏ ⴰⴳⴰⵔⵖⵍⴰⵏ ⴷ ⵓⵙⴳⴰⵡⴰⵏ (ⵜⴰⵎⵢⴰⵇⵇⴰⵏⵜ ⵏ ⵍⴰⵏⵥⴰⵕⵓⵟ) ⴷ ⵓⴱⵟⵟⵓ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵏ ⵡⴰⵎⵓⵏ ⵓⵖⵔⵉⵎ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵜⵎⵥⵉ ⵙⴳ ⵜⴽⵕⴹⵉ ⵜⴰⵡⵙⵢⴰⵏⵜ ⵙ ⵓⴼⵙⴰⵔ ⵏ ⵜⵉⵔⵎⵉⵜⵉⵏ ⵏ ⵜⵎⵙⵎⵓⵏⵉⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ.