“ⵙ ⵜⵉⵍⵉⵜ ⵏⵏⵓⵏ ⴷ ⵜⴷⵔⴰⵡⵜ ⵏⵏⵓⵏ, ⵥⴹⴰⵕⵏ ⵡⴰⵣⵣⴰⵏⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵎⵏⴰⴹⵉⵏ ⵙ ⵙⵏⴰⵜ ⴷ ⵎⵔⴰⵡⵜ ⴰⴷ ⵚⴽⵓⵏ ⵢⴰⵜ ⵜⵉⵔⵎⵉⵜ ⵜⴰⵎⵓⴼⴰⵢⵜ ⴳ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏ ⴷ ⴰⴷ ⵙⵙⴼⴰⵡⵏ ⵢⴰⵜ ⵜⵉⵔⵎⵉⵜ ⵜⴰⵎⵣⵡⴰⵔⵜ ⴳ ⵉⴼⵔⵉⵇⵢⴰ ⴷ ⵓⵎⴰⴹⴰⵍ. ⵜⵉⵔⵎⵉⵜ ⵜⴰⵎⵣⵡⴰⵔⵜ ⵏⵏⴰ ⵜⵙⴽⵔⵎ ⴽⵯⵏⵏⵉ, ⴷ ⵉⵇⵇⴰⵏ ⴷ ⴰⴷ ⵜⵜ ⵜⵙⴱⵓⵖⵍⵓⵎ ⴷ ⴰⴷ ⵜⵜ ⵜⴼⵔⴳⵎ, ⴰⵣⵣⴰⵏⵏ ⵉⵎⴳⴳⴰⵢⵏ ⴳ ⵓⵙⴽⴽⵉⵏ ⴰⵎⴰⵜⴰⵢ ⴷ ⵡⴰⵣⵣⴰⵏⵏ ⵉⵔⴰⵏ ⴰⴷ ⴷⴷⵔⵏ ⵜⴰⵎⵥⵉ ⵏⵏⵙⵏ ⴳ ⵓⴼⵔⴰ ⴷ ⵜⵏⴼⵔⵓⵜ, ⴷ ⴰⴷ ⵎⴳⴰⵍⵏ ⵉⵎⵏⵖⴰⵏ ⴷ ⴽⵓ ⵜⴰⵍⵖⵉⵡⵉⵏ ⵏ ⵜⴽⵕⴹⵉ ⴷ ⵓⴽⵙⴰⵏ”.

ⵙ ⵜⴳⵓⵔⵉⵡⵉⵏ ⴰⴷ, ⵜⴱⵔⵔⵃ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴳ ⵜⵎⴷⵉⵏⵜ ⵏ ⵙⵎⴰⵔⴰ, ⵅⴼ ⵜⵜⵎⵉ ⵏ ⵉⵎⵛⴰⵡⴰⵕⵏ ⵉⵏⵎⵏⴰⴹⵏ ⴰⴽⴷ ⵡⴰⵣⵣⴰⵏⵏ, ⴰⵙⵙ ⵏ ⵓⵙⴰⵎⴰⵙ 24 ⴱⵕⴰⵢⵕ 2024 ⴳ ⵓⵙⵔⵙ ⵏⵏⵙ ⵡⵉⵙ ⵙⵉⵏ ⴷ ⵎⵔⴰⵡ ⴳ ⵜⵎⵏⴰⴹⵜ ⵏ ⵍⵄⵢⵓⵏ - ⵙⵙⴰⵇⵢⴰ ⵍⵃⵎⵔⴰ, ⵏⵏⵉ ⵉⵕⵥⵎⵏ ⴰⵙⵙⵏⵜⵉ ⵏⵏⵙⵏⵜ ⴳ ⵜⵣⵡⵉⵔⵉ ⵏ ⵡⴰⵢⵢⵓⵔ ⵏ ⴱⵕⴰⵢⵕ 2023 ⴳ ⴳⵯⵍⵎⵉⵎ, ⴳ ⵓⵎⵏⴰⴷ ⵏ ⵓⵙⵏⵚⴱ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ.

ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵜⵖⵉⵎⵉⵜ ⵏ ⵓⵕⵥⵥⵓⵎ ⵏ ⵓⵎⵛⴰⵡⴰⵕ ⴰⴷ, ⵏⵏⵉ ⵉⵙⵙⵏⵏ ⵜⴰⴷⵔⴰⵡⵜ ⵏ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵍⵄⵢⵓⵏ - ⵙⵙⴰⵇⵢⴰ ⵍⵃⵎⵕⴰ, ⴷ ⵓⵎⵣⴷⴰⵢ ⵏ ⵉⵎⵉⵙ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ, ⵎⴰⵙ ⴷ ⵉⴷⴷⴰ ⵓⵙⵜⴰⵢ ⵏ ⵜⵎⴷⵉⵏⵜ ⵏ ⵙⵙⵎⴰⵕⴰ ⴰⴼⴰⴷ ⴰⴷ ⵜⵜⵓⵙⵎⴷⵏ ⵉⵎⵛⴰⵡⴰⵕⵏ ⵉⵏⵎⵏⴰⴹⵏ ⴰⴽⴷ ⵡⴰⵣⵣⴰⵏⵏ ⵍⵍⵉⵖ ⵜⴳⴰ ⵙⵙⵎⴰⵕⴰ ⵜⴰⵎⴷⵉⵏⵜ ⵏ ⵜⵎⴰⵙⵙⴰⵏⵜ ⴷ ⵜⵥⵉⴹⵕⴰ, ⴷ ⵍⵍⵉⵖ ⵉⵣⴷⵉ "ⵓⵎⵣⵔⵓⵢ ⵏⵏⵙ ⵙ ⵓⵎⵏⵣⴰⵖ ⵏⵏⵙ ⵅⴼ ⵓⴼⵔⴰⴳ ⵏ ⵜⵎⴰⴳⵉⵜ ⵏⵏⵙ ⵜⴰⴷⵍⵙⴰⵏⵜ ⴷ ⵓⵎⵣⴰⵖ ⵅⴼ ⵜⴰⵎⵓⵏⵜ ⵏⵏⵙ ⵜⴰⴽⴰⵍⴰⵏⵜ... ⵜⵎⵎⴰⵖ ⴰⵔ ⵜⵜⴷⵔ ⵜⵉⵔⵎⵉⵜⵉⵏ ⵜⵉⵏⴼⴳⴰⵏⵉⵏ ⵜⵉⵎⵣⵔⴰⵢⵉⵏ ⵉⵛⵇⵇⴰⵏⵏ ⴷⴰⵜ ⴰⴷ ⴷ ⵜⴰⵖⵓⵍ ⵖⵔ ⵡⴰⵎⵓⵔ ⵏⵏⵙ ⴳ 1976".
 

ⵅⴼ ⵓⵡⵜⵜⴰⵙ ⵙⴳ ⵉⵎⵛⴰⵡⴰⵕⵏ ⴰⴷ ⴰⴽⴷ ⵡⴰⵣⵣⴰⵏⵏ, ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷ ⴰⵙⵓⵖⴷ ⴰⵙⵜⵔⴰⵜⵉⵊⵉ ⵏ ⵓⵙⵇⵇⵉⵎ ⴷ ⴰⵙⵔⵙ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ, ⵙ ⵓⵙⵙⴹⵕⵚ ⵏⵏⵙ ⴳ ⵓⵙⵍⴳⵏ, ⴷ ⵓⵙⵎⵓⵜⵜⴳ ⵏ ⵜⴰⵏⴰⴹⵜ ⵍⵍⵉ ⵔⴰⴷ ⵙⴽⵔⵏ ⵡⴰⵣⵣⴰⵏⵏ ⴹⴰⵕⴰⵜ ⵏ ⵓⵎⵛⴰⵡⴰⵕ ⴰⵏⴰⵎⵓⵔ ⴳ ⵉⵎⴰⵍⴰⵙⵙⵏ ⴷ ⵢⵓⵛⴽⴰⵏ, ⴰⴼⴰⴷ ⴰⴷ ⵜⴻⵜⵜⵓⵙⵎⵏⵉⴷ ⴳ ⵜⴳⵉⵔⴰ ⵏ ⵓⵙⴳⴳⵯⴰⵙ ⵏ 2024 ⵉ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴳ ⵊⵓⵏⵉⴼ, ⵍⵍⵉ ⵉⵜⵜⴳⴳⴰⵏ ⴰⴹⴼⴼⵓⵕ ⴷ ⵓⵙⵜⴰⵍ ⵏ ⵓⵙⵖⴰⵍ ⵏ ⵓⵙⵎⵀⵍ ⵏ ⵉⵡⴰⵏⴽⵏ ⵉ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⴳ ⵉⵙⵡⵉⵔⵏ ⵉⵏⴰⵎⵓⵔⵏ. ⵜⵣⵎⵎⴻⵎ ⵎⴰⵙ ⴳⴰⵏ ⵉⵎⵛⴰⵡⴰⵕⵏ ⴰⴷ ⵜⵉⵎⵙⴽⵔⵜ ⵜⴰⵎⵓⴼⴰⵢⵜ ⴳ ⵓⵙⵡⵉⵔ ⴰⴼⵔⵉⵇⵉ ⴷ ⵓⵙⵡⵉⵔ ⴰⵄⵕⴰⴱ.

ⵜⴰⵍⵍⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵙⵡⵉⵔ ⵏ ⵉⵎⵛⴰⵡⴰⵕⵏ ⵉⵣⵔⵉⵏ "ⵏⵏⴰ ⵉⵙⵏⵎⴰⵍⵏ ⵜⴰⵡⵉⵜ ⵏ ⵡⴰⵣⵣⴰⵏⵏ ⴷ ⵜⴳⵎⵉ ⵏⵏⵙⵏ ⴷ ⵜⵣⵎⵔⵜ ⵏⵏⵙⵏ ⵅⴼ ⵓⵙⵜⴰⵍ ⵏ ⵜⵙⵔⵜⵉⵜⵉⵏ ⵜⵉⴳⴷⵓⴷⴰⵏⵉⵏ ⵏⵏⵉ ⴰⵙⵏ ⵉⵜⵜⵓⵙⵡⴰⵍⴰⵏ, ⴷ ⴰⴷ ⵎⴹⴰⴽⴰⵕⵏ ⵅⴼ ⵉⵙⵍⴳⴰⵏⵏ ⵉⵣⴷⵉⵏ ⴷ ⵉⵣⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ, ⴷ ⵙⵉⵍⴰⵡⵏ ⵉⵙⵖⵍⴰⴼ ⵓⵎⵀⵉⵍⵏⵏ ⴷ ⵉⴽⵙⵡⴰⵜⵏ". ⴳ ⵓⵣⵎⵣⵣⵓ ⴰⴷ, ⵜⵙⵎⵖⵔ ⵎⴰⵙⵙⴰ ⴱⵓⵄⵢⵢⴰⵛ ⵜⴰⵡⵓⵔⵉ ⵏ ⵇⴰⵃ ⵜⵙⵓⵜⴰⵢⵉⵏ ⴷ ⵉⵙⵓⵜⴰⵢ ⴷ ⵜⵎⵙⴳⵎⵉⵜⵉⵏ ⴷ ⵉⵎⵙⴳⵎⵉⵜⵏ ⴷ ⵇⴰⵃ ⵉⵎⵙⵡⵓⵔⵉⵏ ⵉⵏⴰⵎⵓⵏⵏ ⵏⵏⵉ ⵉⴹⴼⵕⵏ ⴰⵙⵇⵇⵉⵎ ⴳ ⵓⵣⵎⵣⵣⵓ ⵏ ⵉⵎⵛⴰⵡⴰⵕⵏ ⴰⴷ ⵉⵏⵎⵏⴰⴹⵏ ⴰⴽⴷ ⵡⴰⵣⵣⴰⵏⵏ.

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⴳⴰ ⵜⵙⵏⵜⴰⵢⵜ ⴰⴷ ⴰⵣⵎⵣⵣⵓ ⵏ ⵓⵎⵢⴰⵖ ⵓⵙⵔⵉⴷ ⴷ ⵡⴰⵣⵣⴰⵏⵏ ⵅⴼ ⵉⵙⵏⵜⴰⵍ ⵍⵍⵉ ⵙⵉⵔⵙⵏ ⵉⵣⴷⵉⵏ ⴷ ⵎⴰⵎⵏⴽ ⵙ ⵜⵜⴰⵏⵏⴰⵢⵏ ⵜⴰⵏⴼⵔⵓⵜ ⵏ ⵉⵣⵔⴼⴰⵏ ⵏⵏⵙⵏ ⴳⵉⵙⵏ, ⵜⴼⴽⴰ ⵙ ⵓⵎⴷⵢⴰ ⴰⵙⵏⵜⵍ ⵏ "ⵓⵙⵢⵉⵡⵍ ⵏ ⵜⴰⵣⵣⴰⵏⵉⵏ", ⵍⵍⵉ ⵉⵜⵜⴰⵏⵏⴰⵢ ⵓⵙⵇⵇⵉⵎ ⴳ ⵓⵙⴰⵜⵉ ⵏ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ, ⵉⵣⴷⵉ ⵜ ⵙ ⵓⵣⵔⴼ ⴳ ⵓⴼⵔⴰⴳ, ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ 19 ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵎⴽⴷⴰ ⵜ ⵉⵣⴷⴰⵢ ⴷ ⵓⵎⵏⵣⴰⵢ ⵏ ⵜⴷⵔⴰⵡⵜ ⵍⵍⵉ ⵉⵜⵜⵓⵙⴹⵕⵚⵏ ⴳ ⵜⵎⵜⵜⴰ 12 ⵏ ⵜⵎⵢⴰⵇⵇⴰⵏⵜ ⴰⴷ, ⵎⴰⵙ ⵉⴳⴰ "ⵡⴰⵣⵣⴰⵏ ⴰⵎⴷⵔⴰⵡ ⴷ ⵓⵎⴳⴳⴰⵢ ⴰⴷⵙⵍⴰⵏ ⴳ ⵓⵙⵎⵓⵜⵜⴳ ⵏ ⵓⵏⴰⴳⵔⴰⵡ ⴰⵏⴰⵎⵓⵔ ⵏ ⵓⴼⵔⴰⴳ, ⴷ ⵓⵔ ⵉⴳⵉ ⵖⴰⵙ ⵢⴰⵏ ⵓⵏⴱⵖⵓⵔ ⵙⴳ ⵜⵏⴰⴼⵓⵜⵉⵏ ⵏⵏⵙ, ⵖⵉⴽ ⵍⵍⵉ ⵏⵜⵜⵖⴰⵍ ⵉⵜⵙⵏⵜ ⵜⵉⴽⴽⴰⵍ".

ⵜⵔⵏⵓ ⵎⴰⵙ ⵜⵙⵙⵖⵓⵏ ⵜⵎⵜⵜⴰ ⴰⴷ ⵉⵡⴰⵏⴽⵏ ⵏ ⵜⴼⵓⵍⵉⵏ ⴳ ⵜⵎⵢⴰⵇⵇⴰⵏⵜ ⴰⴷ ⵙⵙⴼⵍⴷⵏ ⵙ ⵡⴰⵣⵣⴰⵏⵏ, ⵙⴽⵔⵏ ⵙ ⵜⴰⵏⵏⴰⵢⵉⵏ ⵏⵏⵙⵏ ⴳ ⵜⵙⵉⵍⴰⵡⵜ ⴷ ⵉⴳⵉ ⴷ ⵓⵙⵜⴰⵍ ⵏ ⵜⵙⵔⵜⵉⵜⵉⵏ ⵜⵉⴳⴷⵓⴷⴰⵏⵉⵏ ⴷ ⴳ ⵓⵙⵎⵓⵜⵜⴳ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ. ⵜⵙⵢⴰⴼⴰ ⵎⴰⵙ ⴷ ⴳ ⵓⵙⵏⵜⵍ ⵏ ⵓⵙⵢⵉⵡⵍ ⵏ ⵜⴰⵣⵣⴰⵏⵉⵏ ⵡⴰⵍⴰ ⵉⵙⵏⵜⴰⵍ ⵢⴰⴹⵏⵉⵏ, ⵉⵃⵇⵇⴰ ⵎⴰⵙ ⵟⵟⴰⴼⵏ ⵡⴰⵣⵣⴰⵏⵏ ⵎⴰ ⵉⵣⵎⵔⵏ ⴰⴷ  ⵢⴰⵡⵙ ⵉ ⵓⵙⵇⵇⵉⵎ ⴳ ⵓⵙⴱⵓⵖⵍⵓ ⵉⴼⵔⴷⵉⵙⵏ ⵏ ⵓⵏⵄⴰⵕ ⵏⵏⵙ ⴰⴼⴰⴷ ⴰⴷ ⵉⵜⵜⵓⵙⵙⵔ ⵓⵙⵢⵉⵡⵍ ⵏ ⵜⴰⵣⵣⴰⵏⵉⵏ.
 

ⵉⵜⵜⵡⴰⵙⵙⴰⵏ ⵓⵎⵛⴰⵡⴰⵕ ⴰⴷ ⵙ ⵜⵖⵉⵎⵉⵜ ⵜⴰⵎⵢⴰⵖⵜ ⵉⵏⴳⵔ ⵡⴰⵣⵣⴰⵏⵏ ⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵅⴼ ⵓⵙⵍⴳⵏ ⵏ ⵜⵡⵊⴰ ⴷ ⵜⵉⵣⵣⵉⴳⵣⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵙⵏⴼⵍ ⵏ ⵓⵙⵏⴼⴰⵔ ⵏ ⵓⵙⵏⴼⵍ ⵏⵏⵙ. ⵉⵙⵎⵏⵉⴷ ⵎⴰⵙⵙ ⵄⴱⴷⵍⴽⵔⵉⵎ ⴰⵍⴰⵄⵣⴰⵏⵉ ⵉⵎⵉⵙ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⴷ ⵜⵙⵎⵉⴳⴰⵍ ⵏⵏⵙ. ⵉⵙⵙⵏ ⵓⵙⵎⵏⵉⴷ ⴰⴷ ⴰⵎⵢⴰⵖ ⴰⴽⴷ ⵡⴰⵣⵣⴰⵏⵏ, ⵍⵍⵉ ⴳⴰⵏⵉⵏ ⵓⴳⴳⴰⵔ ⵏ 30 ⵏ ⵡⴰⵣⵣⴰⵏ ⵉⵙⵎⴷⵢⴰⵏ ⵇⴰⵃ ⵉⵙⵎⵉⵍⵏ ⵉⵜⵜⵓⵙⴱⵖⵔⵏ, ⵉⵖ ⴳⴰⵏ ⴰⵣⵣⴰⵏⵏ ⴳ ⵓⵙⵓⵔⵙ  ⵉⵎⵎⵔⵏⵏ, ⴰⵣⵣⴰⵏⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵡⴰⵣⵣⴰⵏⵏ ⵉⴱⵕⵕⴰⵏⵉⵢⵏ, ⵎⴽⴷⴰ ⵙⵎⴷⵢⴰⵏ ⵇⴰⵃ ⵜⵙⴳⴳⵯⵉⵏ ⵏ ⵜⵎⵏⴰⴹⵜ.

ⴰⵎⵓⵏⵜ ⴳ ⵓⵏⵎⵓⵇⵇⴰⵔ ⴰⴷ ⵏ ⵓⵎⵛⴰⵡⴰⵕ  ⴽⵕⴰⴹⵜ ⵜⵙⵓⵡⴰⵔ ⵅⴼ ⵜⵙⵔⵜⵉⵜⵉⵏ ⵜⵉⴳⴷⵓⴷⴰⵏⵉⵏ (ⵜⴰⴷⵓⵙⵉ ⴷ ⵓⵙⵍⵎⴷ ⴷ ⵜⵣⵔⴼⵜ ..), ⴷ ⵓⴼⵔⴰⴳ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ, ⴷ ⵓⵙⵉⴷⴼ ⵙ ⵓⵎⵍⵉ ⴷ ⵜⴷⵔⴰⵡⵜ. ⵉⵣⵡⵓⵔ ⵉ ⵓⵏⵎⵓⵇⵇⴰⵔ ⴰⴷ ⴰⵏⵎⵏⴰⴹ ⵏ ⵓⵎⵛⴰⵡⴰⵕ ⴰⴽⴷ ⵡⴰⵣⵣⴰⵏⵏ ⵏ ⵜⵎⵏⴰⴹⵜ ⵏ ⵍⵄⵢⵓⵏ - ⵙⵙⴰⵇⵢⴰ ⵍⵃⵎⵕⴰ ⵢⴰⵏ ⵓⵏⵎⵓⵇⵇⴰⵔ ⵏ ⵓⵙⵎⵓⵜⵜⴳ ⵉ ⵉⵙⵓⵜⴰⵢ ⵉⵜⵜⵓⵙⵎⴰⴳⵍⵏ ⵙ ⵓⵙⵎⵓⵙⵙⵓ ⵏ ⵜⵙⵓⵡⴰⵔ, ⵃⵎⴰ ⴰⴷ ⵉⵙⴰⵏⵏ ⵉⵎⵏⵣⴰⵢⵏ ⴷ ⵉⵎⴰⵙⵙⵏ ⴷ ⵜⴱⵔⵉⴷⵉⵏ ⵜⵉⵏⴱⵣⴰⵣⵉⵏ ⵉ ⵓⵙⵡⵓⴷⴷⵓ ⵏ ⵓⵏⵎⵓⵇⵇⴰⵔ ⴰⴷ.

ⵉⵙⵎⴷ ⵓⵎⵛⴰⵡⴰⵕ ⴰⴷ ⴰⵏⵎⵏⴰⴹ ⵙ ⵓⵙⵏⵎⴰⵍⴰ ⵏ ⵢⴰⵜ ⵜⴼⵓⴳⵍⴰ ⵏ ⵜⴳⵉⵔⴰ ⵙ ⵜⵙⵏⵜⴰⵢⵜ ⵏ ⵡⴰⵣⵣⴰⵏⵏ ⵏ ⵜⵎⵏⴰⴹⵜ,  ⵍⵍⵉⵖ ⵙⵎⵏⵉⴷⵏ ⵜⵉⵡⵍⴰⴼⵉⵏ ⵜⵉⵥⵓⵕⴰⵏⵉⵏ ⵉⵣⴷⵉⵏ ⵙ ⵉⵙⵏⵜⴰⵍ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏⵏ, ⴷⴼⴼⵉⵔ ⴰⴷ ⵜ ⵜⴹⴼⵕ ⵜⵙⴷⴷⴰⵔⵜ ⵏ ⵓⵕⵥⵥⵓⵎ ⵉ ⵜⴱⴰⵍⵓⵏⵉⵏ ⵏ ⵜⴷⵔⴼⵉ ⵙⴳ ⵜⵎⴷⵉⵏⵜ ⵏ ⵙⵎⵎⴰⵕⴰ.