ⴳ ⵓⵙⴰⵜⵉ ⵏ ⵓⵏⵄⴰⵕ ⵏⵏⴰ ⵉⵜⵜⴳⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵃⵎⴰ ⴰⴷ ⵉⵙⵖⵣⵏ ⵍⵎⵖⵔⵉⴱ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵏⵎⴰⵍⴰ ⵓⵙⵇⵇⵉⵎ, ⴰⵙⵙ ⵏ ⵓⵙⵉⵏⴰⵙ 13 ⵉⴱⵔⵉⵔ 2022, ⵢⴰⵏ ⵓⵏⵎⵓⵇⵇⴰⵔ ⴰⵎⵢⴰⵖ ⴷ ⵓⵙⴳⵓⵎⴰⵏ ⴰⴽⴷ ⵜⴰⴹⴰⵡⵉⵏ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⵏⴰⵎⵓⵔⵉⵏ ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵓⵎⵙⴰⵡⴰⵍ ⵉⵏⴳⵔ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⴷ ⵡⴰⵎⵓⵏ ⵓⵖⵔⵉⵎ ⴰⵏⴰⵎⵓⵔ ⵙ ⵓⵙⵏⵎⵍ ⵙ ⵜⵙⵎⵉⴳⴰⵍ ⵏⵏⵙ ⴷ ⵜⵓⵎⴰⵢⵉⵏ ⵏ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷ ⵉⵎⴰⵙⵙⵏ ⵏ ⵓⵎⵢⴰⵖ ⴰⴽⴷ ⵓⵏⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴰⴷ, ⵏⵏⴰ ⴳ ⵉⴷⵔⵓ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵎⴰⵙⵙ ⵔⵉⵎⵉ ⵏⴳⵓⵢ ⵍⵓⵎⴱⵓ, ⴷ ⴽⵕⴰⴹ ⵉⵎⴰⵍⴰⵍⵏ ⵙⴳ ⵜⵙⵇⵇⵉⵎⵜ ⴷ ⵉⵎⴳⴳⴰⵢⵏ ⵏ ⵡⴰⵎⵓⵏ ⵓⵖⵔⵉⵎ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵅⴼ ⵡⴰⴷⴷⵓⵔ ⵏ ⵓⵙⴼⵔⴽ ⴷ ⵓⵙⴷⵔⵓ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴳ ⵓⵏⵄⴰⵕ ⴰⴼⴰⴷ ⴰⴷ ⵉⵙⵖⵣⵏ ⵍⵎⵖⵔⵉⴱ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⵎⴰⵙ “ⵔⴰⴷ ⵉⵏⵏⴰⵍ ⴰⴷⴰⴼ ⵏ ⵍⵎⵖⵔⵉⴱ ⵙ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⴷ ⵓⵎⵢⴰⵖ ⵏ ⵡⴰⵎⵓⵏ ⵓⵖⵔⵉⵎ ⴰⵏⴰⵎⵓⵔ ⴰⴽⴷ ⵓⵏⴰⴳⵔⴰⵡ ⴰⴼⵔⵉⵇⵉ, ⵙ ⵡⴰⵔ ⵜⵓⵔⴷⴰ, ⵉⵎⴰⵙⵙⵏ ⵏⵏⵖ ⴷ ⵓⵏⴳⵔⴰⵡ ⵏⵏⵖ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ” ⵉⴷⴷⵖ ⵍⴰⵏ ⵉⵎⵔⵙⵉⵜⵏ ⵏⵏⴰ ⴷ ⵉⴷⴷⴰⵏ ⴳ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵏⵎⵓⵇⵇⴰⵔ ⴰⴷ ⴰⵜⵉⴳ ⵎⵇⵇⵓⵔⵏ ⴳ ⵓⴱⵔⵉⴷ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ, ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴳⴰⵏ ⵉⵎⵔⵙⵉⵜⵏ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⴰⴷⵔⴼⵉ ⵏ ⵓⵡⵏⵏⵉ, ⴰⵙⵉⴷⴼ ⵙ ⵓⵎⵍⵉ ⴷ ⵜⵎⵙⴰⵔⵉⵏ ⵏ ⵓⴳⴳⵉⴷⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴳⴰⵏ ⴰⵡⴷ ⵜⵉⵎⵙⴰⵔⵉⵏ ⴳ ⵜⵏⵜ ⵓⵡⵉⵏⵜ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ. ⵙⴳ ⵜⵙⴳⴰ ⵏⵏⵙ ⵜⵙⵎⵏⵉⴷ ⵎⴰⵙⵙⴰ ⴰⵏⴰ ⴼⵓⵔⵙⵜⵔ, ⵜⴰⵏⵎⵀⴰⵍⵜ ⵜⴰⵎⵣⵣⴳⴰⵔⵜ ⵏ ⵡⴰⵎⵎⴰⵙ ⴰⴼⵔⵉⵇⵉ ⵉ ⵜⴷⵉⵎⵓⵇⵔⴰⵟⵉⵜ ⴷ ⵜⵖⵓⵔⵉⵡⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵢⴰⵜ ⵜⴽⵛⵛⵓⵎⵜ ⵅⴼ ⵉⵎⵔⵙⵉ "ⵜⵉⵡⵉⵍⴰⵜⵉⵏ ⵏ ⵓⵎⵢⴰⵖ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴰⴽⴷ ⵓⵏⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵜⵙⵎⵏⵉⴷ ⴳⵉⵙ ⵢⴰⵏ ⵉⵥⵕⵉ ⵅⴼ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⴷ ⵜⵉⵍⴰⵍⵉⵏ ⵏⵏⵙ ⴷ ⵉⵣⵔⵉⵔⵉⴳⵏ ⵉⵎⵇⵇⵔⴰⵏⵏ ⵏ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵜⵙⵎⵏⵉⴷ ⵉⵎⴰⵙⵙⵏ ⴷ ⵜⵎⴳⴳⵉⵜⵉⵏ ⵏ ⵜⴷⵔⴰⵡⵜ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴷ ⵜⵣⵎⵔⵜ ⵏ ⵜⵉⴽⴽⵉ ⵏ ⵜⴼⵔⵉⵙⵜ ⵏ ⵓⴳⵎⴰⵎ ⵉⵎⵏⵥⵉ ⴳ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⴷ ⵜⵎⵉⵜⴰⵔ ⵏⵏⴰ ⵔⴰⴷ ⴼⵍⵍⴰⵙ ⵢⴰⴳⴳⵯ. ⵓⵔ ⵜⴻⵜⵜⵓ ⵎⴰⵙⵙⴰ ⴼⵓⵔⵙⵜⵔ ⴰⴷ ⵜⴰⵍⵖ ⵙ ⵜⵉⵍⴰⵍⵜ ⵏⵏⴰ ⵜⵜⵓⵔⴰⵔⵏⵜ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴳ ⵓⵎⴷⴰⵢ ⴷ ⵓⴹⴼⴼⵓⵕ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ, ⴷ ⵓⵍⴰ ⴰⵎⵢⴰⵖ ⴷ ⵓⵏⵄⴰⵕ ⵅⴼ ⵜⵎⵙⴰⵔⵉⵏ ⵏ ⵜⵉⵍⴰⵡⵜ ⵏ ⵡⴰⵎⵓⵏ ⵙ ⵡⴰⵍⵍⴰⵍ ⵏ ⵜⴰⵏⴰⴹⵉⵏ ⴷ ⵉⵙⵖⵍⴰⴼ ⵣⴷⵉⵏⵉⵏ ⵙ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵜⵙⵇⵇⵉⵎⵜ. ⵙ ⵓⵎⵢⴰⵙⵙⴰ ⵙ ⵓⵎⵢⴰⵖ ⴷ ⵜⴷⵔⴰⵡⵜ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴳ ⵓⵙⴳⵔⴰⵡ, ⵉⵙⴷⴷⵉⴷ ⵎⴰⵙⵙ ⵎⵓⵍⴰⵢ ⵍⵃⴰⵙⴰⵏ ⵏⵏⴰⵊⵉ, ⴰⵎⵣⴷⴰⵢ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴳ ⵡⴰⵎⵎⴰⵙ ⴰⴼⵔⵉⵇⵉ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⵖⵓⵔⵉⵡⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵜⵉⵍⴰⵍⵜ ⵏⵏⴰ ⵜⵜⵓⵔⴰⵔⵏⵜ ⵜⵎⴰⴷⴷⴰⵙⵉⵏ ⴰⴷ ⴳ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ, ⵜⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵜⴷⵔⴰⵡⵜ ⵏ ⵉⵎⴳⴳⴰⵢⵏ ⵏ ⵡⴰⵎⵓⵏ ⵓⵖⵔⵉⵎ ⴳ ⵜⵡⵓⵔⵉ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵙ ⵓⴱⵟⵟⵓ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵉⵏⴳⵔ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⴼⵔⵉⵇⵉⵢⵉⵏ ⴳ ⵓⵙⴳⵔⴰⵡ. ⵙⴳ ⵜⵙⴳⴰ ⵏⵏⵙⵏ, ⵙⴷⴷⵉⴷⵏ ⵉⴷ ⵎⴰⵙⵙ, ⵉⴷⵔⵉⵙⴰ ⵙⵓ, ⴰⵎⴰⵍⴰⵍ ⴷ ⵓⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵉⵎⵚⵉⵕⵉⴹⵏ ⴱⵕⵕⴰ ⵏ ⵓⵙⴰⵜⵉ ⵏ ⵜⵏⴱⴹⴰⵢⵜ ⵏⵉⵖ ⵜⵉⵎⴳⴳⵉⵜⵉⵏ ⴳⵣⵣⵓⵍⵏⵉⵏ ⵏⵉⵖ ⴰⴷⴰⴳⴰⵣ ⴳ ⵉⴼⵔⵉⵇⵢⴰ, ⴷ ⵎⴰⵙⵙⴰ ⵎⴰⵔⵉ ⵍⵡⵉⵙ ⴰⴱⵓⵎⵓ, ⵜⴰⵎⴰⵍⴰⵍⵜ ⴷ ⵜⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵅⴼ ⵉⵣⵔⴼⴰⵏ ⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵉⴼⵔⵉⵇⵢⴰ, ⴷ ⵎⴰⵙⵙⴰ ⵓⴼⵉⵏⴰ ⵊⵉⵔⵉⵛⴰ ⵜⵓⴱⵙⵉ-ⵙⵓⵏⵓ, ⵜⴰⵎⴰⵍⴰⵍⵜ, ⵜⴰⵏⴽⴽⴰⴹⵜ ⵜⴰⵎⵥⵍⵉⵜ ⵉⵏⵜⴰⵢⵏ ⵙ ⵜⴷⵔⴼⵉ ⵏ ⵓⵡⵏⵏⵉ ⴷ ⵓⵙⵉⴷⴼ ⵙ ⵓⵎⵍⵉ ⴳ ⵉⴼⵔⵉⵇⵢⴰ ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵅⴼ ⵉⵎⴰⵙⵙⵏ ⵏ ⵓⵎⵢⴰⵖ ⴰⴽⴷ ⵜⵎⵜⵜⴰⵏⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴰⴼⴰⴷ ⴰⴷ ⴰⵍⵍⵏⵜ ⵜⴰⵏⴰⴹⵉⵏ ⴷ ⵉⵙⵖⵍⴰⴼ ⴷ ⵜⵏⵓⵔⵣⵉⵏ ⵣⴷⵉⵏⵉⵏ ⵙ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵙⴼⴰⵡⵏ ⵜⵉⵍⴰⵍⵜ ⵏ ⵜⵙⵇⵇⵉⵎⵜ ⴳ ⵓⵙⵖⴹⴼ ⵉ ⵉⵡⴰⵏⴽⵏ ⴳⴰⵏⵉⵏ ⵜⵉⴼⵓⵍⵉⵏ ⵅⴼ ⵡⴰⴷⴷⴰⴷⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⵏⵥⴰⵡ ⴷ ⵜⵖⵓⵔⵉ ⵏⵏⵙ ⵙ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴷ ⵓⵙⴷⵓⵙ ⵏ ⵜⴷⵔⴼⵉ ⵏ ⵓⵡⵏⵏⵉ ⴷ ⵓⵙⵉⴷⴼ ⵙ ⵓⵎⵍⵉ ⴷ ⵓⵙⴱⴷⴷⵉ ⵏ ⵉⵏⵖⵎⵉⵙⵏ ⵏ ⵓⵙⵃⵉⵍⵍⴻⵍ ⴷ ⵜⵉⵏⴰⵡⵜ ⵏ ⵓⴽⵙⴰⵏ ⴷ ⵜⴽⵏⴷⴰⵡⵜ, ⵙⵓⵍ ⴷ ⵓⴳⴳⴰⵔ. ⵉⵜⵜⵡⴰⵙⵙⵏ ⵓⵏⵎⵓⵇⵇⴰⵔ ⴰⴷ ⵙ ⵓⵎⵢⴰⵖ ⵏ ⵉⴳⵏⵙⴰⵙ ⵏ ⵡⴰⵎⵓⵏ ⵓⵖⵔⵉⵎ ⴰⴽⴷ ⵜⴽⵛⵛⵓⵎⵉⵏ ⵜⵜⵓⵙⵎⵏⵉⴷⵏⵉⵏ, ⴷⴷⵓⵏ ⴷ ⴽⵉⴳⴰⵏ ⵏ ⵉⵙⵇⵙⵉⵜⵏ ⴷ ⵜⴽⵛⵛⵓⵎⵉⵏ ⵅⴼ ⴽⵔⴰ ⵏ ⵉⴱⴹⵉⵢⵏ ⵏ ⵜⵎⵜⵜⴰⵏⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵣⴷⵉⵏⵉⵏ ⵙ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⵍⵍⴰⵏⵉⵏ ⴳ ⵓⵙⴰⵔⴰⴳ ⴰⵏⴰⵎⵓⵔ, ⴷ ⵓⵍⴰ ⵉⵣⵎⴰⵣ ⴷ ⵜⵎⵔⵉⵙⵉⵏ ⵏⵏⴰ ⵔⴰⴷ ⴷ ⵉⴳⴳⵔⵓ ⵉ ⵜⵙⵖⵣⵏⵜ ⵏ ⵍⵎⵖⵔⵉⴱ, ⴷ ⵜⴱⵔⵉⴷⵉⵏ ⵏ ⵓⵙⵢⵉⵡⵏ ⵏ ⵜⵓⴳⴳⴰⵙ ⴷ ⵓⴱⵟⵟⵓ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴰⴼⴰⴷ ⴰⴷ ⵜⴻⵜⵜⵓⵙⴷⵓⵙ ⵜⵡⵓⵔⵉ ⵏ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵉ ⵓⵙⴽⵜⵉ, ⵜⴰⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⴰⵏⴰⴳⵔⴰⵡ ⴰⵙⵉⵎⴰⵏ, ⴰⵙⵖⵉⵎ ⵏⵏⵙ ⴳ ⴱⴰⵏⵊⵓⵍ ⴳ ⴳⴰⵎⴱⵢⴰ, ⵜⴻⵜⵜⵓⵙⵔⵓⵙ ⵙ ⵓⵣⵣⴳⵉⵔ ⵏ ⵜⵎⵜⵜⴰ 30 ⵏ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵏⵏⴰ ⵉⵙⵖⵣⵏ ⵓⴳⵔⴰⵡ ⵏ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⴷ ⵜⵏⴱⴰⴹⵉⵏ ⵏ ⵜⵎⴰⴷⴷⴰⵙⵜ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ (ⵜⴰⵎⵓⵏⵉ ⵜⴰⴼⵔⵉⵇⵉⵜ) ⴰⵙⴳⴳⵯⴰⵙ ⵏ 1981.