ⵉⵙⴷⴷⵉⴷ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵕⵥⵥⵓⵎ ⵏ ⵢⴰⵜ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵏ ⵓⵙⵏⵎⵍ ⵙⵉⵎⵏⵣⴰⵢⵏ ⵏ ⵎⵉⵏⴷⵉⵣ, ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵓⵕⵓⴱⴱⴰ ⴳ 14 ⴷ 15 ⵎⴰⵕⵚ 2024 ⴳ ⵕⵕⴱⴰⵟ, ⵎⴰⵙ ⵜⴳⴰ "ⵜⴰⵎⵓⵜⵏ ⵍⵎⵖⵔⵉⴱ ⴳ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵏ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⵜⴰⵢⴰⴼⵓⵜ ⵏ ⵜⵓⴳⴳⴰⵣ ⵉⵙⵓⵍⴰⵏ ⵏ ⵎⵏⵏⴰⵡ ⵏ ⵉⵎⴳⴳⴰⵢⵏ, ⴳ ⵢⴰⵎⵓ ⴰⵡⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⴰⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵎⴰⴷ ⵉⵣⵔⵉⵏ)". ⵢⵉⵏⵉ ⴷⴰⵖ ⵎⴰⵙ ⵜⴳⴰ ⵜⴳⵯⵎⴰⵏⵉⵜ ⴰⴷ ⴰⵡⴷ ⴰⵣⵣⴳⵉⵔ ⵏ ⵢⴰⵏ ⵙⴳ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵍⵍⵉ ⵎⵉ ⵏⵙⴼⵓⴳⵍⵓ ⴰⵙⴳⴳⵯⴰⵙ ⴰⴷ ⵙ ⵓⴽⵜⵜⵓⵢ ⵡⵉⵙ 20 ⵏ ⵜⵍⴰⵍⵉⵜ ⵏⵏⵙ.

ⵉⵙⵉⵙⴼⵉⵡ ⵎⴰⵙⵙ ⴱⵏⵚⴰⵍⵃ ⴳ ⵜⴳⵓⵔⵉ ⵏⵏⵙ ⵏ ⵓⵕⵥⵥⵓⵎ ⵎⴰⵙ ⴰⴷⴷⵓⵔ ⵏ ⵓⵙⴳⵓⵎ ⵏ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵏⵏⵉ ⵉⴳⴰⵏ ⵢⴰⵜ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⴰⵏ ⵉⵎⵉⵙ ⴰⵏⴰⵎⵓⵔ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ, ⵉⵙⵙⴼⵔⵓ ⵎⴰⵙ ⵜⴳⴰ "ⵜⵎⵀⵍⵜ ⵏ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵍⵎⵖⵔⵉⴱ ⵜⴰⵢⴰⴼⵓⵜ ⵏ ⵎⵏⵏⴰⵡ ⵏ ⵜⵣⵣⵉⴳⵣⵉⵏ ⵓⵍⴳⵉⵏⵏ ⴷ ⵉⵏⴱⵔⴷⴰⵏⵏ ⴷ ⵉⵏⵎⵙⵖⴰⵏⵏ".

ⴳ ⵓⵎⵏⴰⴹ ⴷⴷⵖ, ⵉⵙⴷⴷⵉⴷ ⵓⵏⴼⵍⵓⵙ ⴰⵎⴰⵜⴰⵢ ⵅⴼ ⵜⵉⵔⴰⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵓⵙⴷⵓⵙ ⵏ ⵜⵡⵓⵔⵉ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵙ ⵓⵙⵏⵎⴰⵍⴰ ⵏ ⵜⵙⵓⵜⵍⵉⵏ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⴳⵎⴰⵎⵏ ⵏⵏⵙ ⴷ ⵓⵉⵙⵓⵜⴰⵢ ⵏⵏⵙ, ⴷ ⵉⵙⴰⵡⵍ ⵅⴼ ⵡⴰⴷⴷⵓⵔ ⵏ ⵓⵍⵎⵎⵓⴷ ⵏ ⵜⵉⵏⴷⵉⵜⵉⵏ ⵙⴳ ⵜⵉⵔⵎⵉⵜⵉⵏ ⵉⵣⵔⵉⵏ ⴷ ⵓⵏⵏⵓⵕⵥⵎ ⵅⴼ ⵜⵎⵢⴰⴷⴰⵙⵉⵏ ⴷ ⵉⵎⴰⵙⵙⵏ ⵉⵎⴰⵢⵏⵓⵜⵏ ⵏ ⵓⵙⴷⵓⵙ ⵏ ⵜⵓⴳⴳⴰⵣ ⵉⵜⵜⵓⴳⴰⵏ ⵉ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ. ⵉⵙⴰⵡⵍ ⴳ ⵓⵙⴰⵜⵉ ⴷⴷⵖ ⵅⴼ ⵜⵖⵓⵔⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵡⴰⵏⵏⴰⵍ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵉ ⵉⵎⵏⵣⴰⵢⵏ ⴰⴷ, ⵎⴰⵢⴰ ⴰⴷ ⵉⵜⵜⵙⴷⴷⵉⴷⵏ ⵅⴼ ⵓⵙⵖⵓⵏ ⴰⵔⵎⵙⴽⵉⵍ ⵏ ⵓⵙⵇⵇⵉⵎ ⵙ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ.

ⵓⵔ ⵉⵜⵜⵓ ⵎⴰⵙⵙ ⴱⵏⵚⴰⵍⵃ, ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⴰⴷ ⵉⵙⴷⴷⵉⴷ ⵅⴼ ⵓⴷⵔⵉⵣ ⵉⵖⵓⴷⴰⵏ ⵏ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⴳ ⵎⴰⴷ ⵉⵥⵍⵉⵏ ⵙ ⵓⵔⵎⴰⵙ ⴷ ⵓⵙⵎⵔⵙ ⵏ ⵉⵎⵏⵣⴰⵢⵏ ⵏ ⵎⵉⵏⴷⵉⵣ, ⵙⵍⴰⵡⴰⵏ ⴰⴽⴽⵯ ⴳ ⵓⵎⵏⴰⴹ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ.