ⵜⴰⴷⴳⴳⵯⴰⵜ ⵏ ⵓⵢⵏⴰⵙ 20 ⵎⴰⵕⵚ 2023, ⵉⵙⵏⴱⴳⵉ ⵓⵏⵙⵙⵉⵅⴼ ⵏ ⵍⴰⵕⵊⵓⵏⵜⵉⵏ, ⵎⴰⵙⵙ ⴰⵍⴱⵉⵕⵟⵓ ⴼⵉⵔⵏⴰⵏⴷⵉⵣ, ⴳ ⵜⴳⴰⴷⵉⵔⵜ ⵏ ⵜⵏⵙⵙⵉⵅⴼⵜ ⴳ ⵜⵎⴰⵥⵓⵏⵜ ⵜⴰⵕⵊⵓⵏⵜⵉⵏⵉⵜ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴷⴰⵜ ⴰⵙⵏⵜⵉ ⴰⵎⴰⴷⴷⵓⴷ ⵏ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⴱⵢⵓⵏⵉⵙ ⴰⵢⵕⵉⵙ, 20-24 ⵎⴰⵕⵚ 2023). 

ⵉⵙⵏⴱⴳⵉ ⵓⵏⵙⵙⵉⵅⴼ ⵏ ⵍⴰⵕⵊⵓⵏⵜⵉⵏ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵢⴰⵜ ⵜⴼⵓⴳⵍⴰ ⵉⵥⵍⵉⵏ ⵙ ⵡⵓⴷⵎⴰⵡⵏ ⵉⵎⵇⵇⵔⴰⵏⵏ ⴷⵔⵓⵏⵉⵏ ⴳ ⵓⵙⴳⵔⴰⵡ ⴳ ⵓⵙⴰⵔⴰⴳ ⴰⵏⴰⵎⵓⵔ ⴷ ⵓⵍⴰⵜⵉⵏⵉ-ⴰⵎⴰⵔⵉⴽⴰⵏ. ⵙⴳⵉⵙⵏ ⴰⵏⵙⵙⵉⵅⴼ ⵏ ⵖⵉⵍⴰⴷ ⵏ ⵓⵡⴰⵏⴽ ⵏ ⵍⴱⴰⵕⴰⴳⵡⴰⵢ ⴷ ⵉⵏⵙⵙⵉⵅⴼⵏ ⵉⵎⵣⵡⴰⵔⵏ ⵏ ⵉⵡⴰⵏⴽⵏ ⴰⴷⵊⴰⵕⵏ (ⴽⵓⵍⵓⵎⴱⵢⴰ, ⴱⵓⵍⵉⴼⵢⴰ,...) ⴷ ⵓⵏⵙⵙⵉⵅⴼ ⴰⵎⵣⵡⴰⵔ ⵏ ⵜⵏⴱⴰⴹⵜ ⵜⴰⵚⴱⵍⵢⵓⵏⵉⵜ ⵅⵓⵚⵉ ⵍⵡⵉⵙ ⵜⴰⴱⴰⵟⵉⵕⵓ ⴷ ⵜⴰⴹⴰ ⵜⴰⵎⵏⵥⴰⵡⵜ ⵏ ⵉⵎⵙⵜⴰⵏⵏ... ⵙⵍⴰⵡⴰⵏ ⴰⴽⴽⵯ ⴹⴰⵕⴰⵜ ⵜⴰⵖⵍⴰⵖⴰⵍⵜ ⵏⵏⵉ ⴷ ⵉⴼⵍ ⵓⵙⴳⵔⴰⵡ ⵏ ⵕⵕⴱⴰⵟ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⴱⵕⴰⵢⵕ 2023) ⴳ ⵍⴰⵕⵊⵓⵏⵜⵉⵏ ⴷ ⵜⵎⵏⴰⴹⵜ ⵜⴰⵍⴰⵜⵉⵏⵓ-ⵜⴰⵎⴰⵔⵉⴽⴰⵏⵜ ⵙ ⵓⵥⵍⴰⵢ, ⴷ ⵓⵎⵓⵔⵙ ⵏⵏⵙ, ⵉⵎⴽⵏⵏⴰ ⴷ ⵉⴷⴷⴰⵏ ⴳ ⵜⵓⴳⵜ ⵏ ⵉⵙⵓⴳⴰⵎ ⴳ ⵍⴰⵕⵊⵓⵏⵜⵉⵏ, ⴳ ⵓⵏⵄⴰⵕ ⵅⴼ ⵓⵙⵉⵙⴼⵉⵡ ⵏ ⵜⵉⵍⴰⵍⵉⵏ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⴳ ⵓⵙⴱⵓⵖⵍⵓ ⵏ ⵉⵔⵎⵎⵓⵙⵏ ⵉⵣⵔⴼⴰⵏⵏ ⴷ ⵜⴷⵔⴰⵡⵜ ⴳ ⵜⵙⵉⵍⴰⵡⵜ ⵏⵏⵙⵏ ⴳ ⵉⵎⵓⵙⵙⵓⵜⵏ ⵉⴳⵔⴰⵖⵍⴰⵏⵏ. 

ⵉⵙⴷⵓⵙ ⵓⵙⴳⵔⴰⵡ ⵏ ⵕⵕⴱⴰⵟ, ⵙ ⵓⵎⵙⴰⵙⴰ ⴷ ⵉⵎⴳⴳⴰⵢⵏ ⵏ ⵍⴰⵕⵊⵓⵏⵜⵉⵏ, ⴰⵙⵎⴰⵇⵇⵍ ⴰⴳⵔⴰⵖⵍⴰⵏ ⵉ ⵓⵙⴳⵔⴰⵡ ⴰⵎⴰⴹⵍⴰⵏ ⴷⴰⵜ ⵜⴰⵙⵓⵜⵍⵜ ⵏ ⵍⴰⵕⵊⵓⵏⵜⵉⵏ (ⵙⵍⴰⵡⴰⵏ ⴰⴽⴽⵯ ⴹⴰⵕⴰⵜ ⵜⴰⴷⵔⴰⵡⵜ ⵉⵕⵡⴰⵏ ⴷ ⵉⵥⴹⴰⵢⵏ ⴳ ⵕⵕⴱⴰⵟ ⵙⴳ ⵜⵓⴳⵜ ⵏ ⵜⵎⵏⴰⴹⵉⵏ ⴷ ⵉⵎⵏⵥⴰⵡⵏ ⴷ ⵉⵏⴳⵎⴰⵎⵏ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵉⵏ ⵜⵎⵜⵜⴰ ⵉⵎⵓⵏⵏ). ⴰⵙⴳⵔⴰⵡ ⵏ ⵜⵎⴰⵥⵓⵏⵜ ⵏ ⵜⴼⴰⵡⵉⵏ ⵜⵉⵎⵖⵔⵉⴱⵉⵢⵉⵏ ⵉⵎⵓⵔⵙ ⴳ ⵡⴰⴽⴰⵎ ⵏ ⵜⴷⵔⴰⵡⵜ ⵜⴰⴳⵔⴰⵖⵍⴰⵏⵜ ⴳ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡ, ⵏⵏⵉ ⵉⴳⴰⵏ ⴰⵡⴷ ⵜⵉⵍⴳⴳⵯⵉⵜ ⵏ ⵓⵎⵓⵜⵜⵉ ⵙ ⵓⵙⵏⵎⴰⵍⴰ ⵏ ⵓⵎⵓⵙⵙⵓ ⴰⴷ ⴰⵎⴰⴹⵍⴰⵏ ⵙⴳ ⵍⵎⵖⵔⵉⴱ (ⵎⵕⵕⴰⴽⵛ 2014), ⴰⵙⴳⴳⵯⴰⵙ ⴹⴰⵕⴰⵜ ⴰⵙⵏⵎⴰⵍⴰ ⵏⵏⵙ ⴳ ⵍⴱⵕⴰⵣⵉⵍ (ⴱⵕⴰⵣⵉⵍⵉⵢⴰ 2013). 

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵜⵏⴱⴹ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⵓⴽⴰⴱⴰⵕ ⴰⵣⵔⴼⴰⵏ ⴳ ⵍⵍⴰⵏ ⵉⵎⴳⴳⴰⵢⵏ ⴳ ⵓⵙⵡⵉⵔ ⴰⵏⴰⵎⵓⵔ (ⵍⵎⵖⵔⵉⴱ) ⴷ ⵓⵙⴳⴰⵡⴰⵏ (ⴰⴼⵔⵉⵇⵉ ⴷ ⵓⵄⵕⴰⴱ) ⴷ ⵓⴳⵔⴰⵖⵍⴰⵏ, ⵉ ⵓⵙⴷⵓⵙ ⵏ ⵓⵏⵄⴰⵕ ⴰⵖⵣⵓⵔⴰⵏ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ, ⴳ ⵜⵉⵣⵉ ⵏ ⵉⵎⴰⵍⴰⵙⵙ ⵏ ⵓⵎⴹⴰⴽⴰⵕ ⴷ ⵜⵖⵉⵎⵉⵜⵉⵏ ⵏ ⵜⵡⵓⵔⵉ ⴷ ⵉⵎⵓⵙⵙⵓⵜⵏ ⴷ ⵉⵏⵎⵓⵇⵇⴰⵔⵏ.