ⵙⵙⵏⵜⵉⵏⵜ ⴰⵙⵙ ⴰⴷ ⴳ ⵜⵎⴷⵉⵏⵜ ⵏ ⵜⴳⵎⵎⵉ ⵜⵓⵎⵍⵉⵍⵜ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⵙⴳⴰⵡⴰⵏ ⵅⴼ "ⴰⵙⴷⵓⵙ ⵏ ⵜⵏⴼⵔⵓⵜⵉⵏ ⵜⵓⵣⵔⵉⴼⵉⵏ ⵜⵉⵏⴰⵎⵓⵔⵉⵏ ⵅⴼ ⵓⵙⴱⴷⴷⵉ ⴷ ⵓⵙⴳⴷⵍ ⵏ ⵓⵙⵔⴼⵓⴼⵏ ⴷ ⵓⴷⵔⵡⵙ" ⵏⵏⵉ ⵉⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵜⵎⵏⴰⴹⵜ ⵏ ⵓⴳⵎⵎⵓⴹ ⴰⵏⴰⵎⵎⴰⵙ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.
ⴳ ⵜⵣⵡⵉⵔⵉ ⵏ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⴷ ⴰⵙⴳⴰⵡⴰⵏ, ⴱⵉⴷⴷⵏ ⵉⵎⴷⵔⴰⵡⵏ ⵢⴰⵜ ⵜⵓⵙⴷⵉⴷⵜ ⵉ ⵜⵎⵍⵍⴰ ⵅⴼ ⵢⵉⵎⴰⵏⵏ ⵏ ⵓⴳⵎⵎⵓⴹ ⴰⵏⴰⵎⵎⴰⵙ.
ⴳ ⵜⴳⵓⵔⵉ ⵏⵏⵙ ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⴷ, ⵜⵙⵙⵓⵜⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴷ ⵉⴳ 2025 ⴰⵙⴳⴳⵯⴰⵙ ⵏ ⵓⵙⵎⴰⴷ ⵏ ⵜⵙⵖⵣⵏⵜ ⵜⴰⵖⵣⵓⵔⴰⵏⵜ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵓⵏⵄⴰⵕ ⴷⴰⵔ 11 ⵏ ⵓⵡⴰⵏⴽ ⵉⵙⵙⴳⵎⴹⵏ ⴰⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵉ ⵜⵙⵖⵣⵏⵜ ⵏⵏⵙ. ⵜⵔⵏⵓ ⵎⴰⵙ "ⵍⴰⵃ ⴰⴷⴷⵓⵔ ⴷ ⵜⵏⴰⴼⴳⴰⵏⵜ ⴷ ⵜⵏⵎⵓⵔⵉ ⴳ ⵓⵡⴰⵏⴽ ⵏⵉⵖ ⵉⵡⴰⵏⴽⵏ ⵓⵔ ⵉⵙⵙⵓⵖⵓⵏⵏ ⴰⵡⵓⵜⵜⵓ ⴰⵏⴰⴷⴷⴰⵡ ⵏ ⵓⵙⵓⵖⵏ ⵙ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵓⵙⴳⴷⵍ ⵏⵏⵙ".
ⵜⵔⵏⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ "ⵓⵙⵔⵙ ⵏ ⵜⵏⴼⵔⵓⵜⵉⵏ ⵜⵓⵣⵔⵉⴼⵉⵏ ⵉⴷⵓⵙⵏ ⵉ ⵓⵙⴱⴷⴷⵉ ⴷ ⵓⵙⵔⴼⵓⴼⵏ ⵏ ⵡⴰⵔⴰⵢ ⵙⴳⵉⵙ ⵢⴰⵜ ⵜⵖⵎⵔⵜ ⵙⴳ ⵜⵖⵎⵔⵉⵏ ⵏ ⵜⵓⵚⴽⴰ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ, ⴷ ⵓⴷⵉⵡⵍ ⴳⵉⵙ ⵓⵔ ⵉⴳⵉ ⵖⴰⵙ ⵢⴰⵏ ⵓⵎⴹⴰⴽⴰⵕ ⵅⴼ ⵓⵙⵖⵍ ⵏ ⵜⵙⵏⵙⵉ ⵏ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ...ⵎⴰⵛⴰ ⵉⴳⴰ ⵢⴰⵏ ⵓⵎⴹⴰⴽⴰⵕ ⵏⵏⴰ ⵉⵜⵜⵟⵟⴰⵚⵏ ⴳ ⵜⵓⵥⵥⵓⵎⵜ ⵏⵏⵙ ⴷ ⵜⴼⵍⵙⴰⴼⵜ ⵏⵏⵙ ⵜⵉⵏⴼⵔⵓⵜⵉⵏ ⵏ ⵜⵓⵚⴽⴰ ⵏ ⵡⴰⵎⵓⵏ ⵉⵜⵜⵏⴼⵔⵓⵏ ⴰⴷⴷⵓⵔ ⵏ ⵓⴼⴳⴰⵏ ⵉⴳ ⵢⴰⵏ ⵓⵙⴰⵜⵉ ⵏ ⴰⵡⵏⴳⵉⵎ ⴷ ⵓⵍⴳⵉⵏ ⵏ ⵓⵍⴽⴰⵎ ⵙ ⵓⵙⵓⵎⵓ ⴷ ⵜⵣⵔⴼⵜ".
ⵙⴳ ⵜⵙⴳⴰ ⵏⵏⵙ, ⵉⴼⵙⵔ ⵎⴰⵙⵙ ⵎⵓⵃⵎⵎⴰⴷ ⴷⵅⵅⵉⵙⵉ, ⴰⵏⵎⵀⴰⵍ ⵏ ⵍⴱⵓⵍⵉⵙ ⴰⵏⴱⴽⴰⴹ ⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵜⴰⵣⵣⵉⴳⵣⵜ ⵏⵏⴰ ⵜⴳⴰ ⵜⴳⵍⴷⵉⵜ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴷⴷⵉⴷ ⵎⴰⵙ "ⴷⴰ ⵉⵎⵎⴰⵍ ⵓⵣⵣⴳⵉⵔ ⵏ 90% ⵙⴳ ⵉⵙⵖⵍⴰⴼ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴰⵙⵖⵓⵏ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵙ ⵓⵙⵖⵓⴷⵓ ⵏ ⵜⵎⵙⵓⵜⴰⵍ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⴱⵓⵖⵍⵓ ⵏ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ ⴷ ⵓⵙⵓⵊⴷ ⵏ ⵓⵙⵎⵓⵜⵜⴳ ⴰⵙⵓⵍⴰⵏ ⴷ ⵓⵎⵥⵍⴰⵢ ⴷ ⵢⵓⵙⴰⵏ ⵉ ⵉⵎⵙⵡⵓⵔⵉⵏ..."
ⴰⵔ ⵉⵜⵜⴰⵏⵏⴰⵢ ⵎⴰⵙⵙ ⵎⴰⵣⵉⵏ ⵛⴰⵇⵓⵕⴰ, ⴰⴳⵏⵙⴰⵙ ⴰⵙⴳⴰⵡⴰⵏ ⵏ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⴳⵎⵎⵓⴹ ⴰⵏⴰⵎⵎⴰⵙ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⵎⴰⵙ ⵉⵙⵖⴰⵡⵙⴰ "ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵓⴷⵔⵡⵙ ⵜⴰⴱⵔⵉⴷⵜ ⵜⴰⵖⵣⵓⵔⴰⵏⵜ ⵉ ⵓⵙⴱⴷⴷⵉ ⵏ ⵜⵕⵥⵉⵢⵉⵏ, ⴰⵙⴳⴷⵍ ⵏⵏⵙⵏⵜ, ⴰⵙⴰⴳⴳⵯ ⴳⵉⵙⵏⵜ, ⴰⵙⵇⵙⵉ ⵏ ⵉⵎⵙⴽⴰⵔⵏ ⵏⵏⵙⵏⵜ, ⴷ ⵜⵏⴼⵔⵓⵜ ⵏ ⵓⵙⴳⴳⴷ ⵏ ⵓⵎⴰⵍⴰⴷ ⵏ ⵓⵏⴳⵉⵙⵏ".
ⵔⴰⴷ ⵉⴽⴽ ⵓⵏⵎⵓⵇⵇⴰⵔ ⴰⴷ ⵙⵉⵏ ⵡⵓⵙⵙⴰⵏ (19-20 ⵏⵓⵡⴰⵏⴱⵉⵔ 2024), ⵉⵙⵡⴰⵜⵜⵙ ⵜⴰⵖⵓⵔⵉ ⵏ ⵉⵖⴰⵔⴰⵙⵏ ⵏ ⵓⵙⴱⵓⵖⵍⵓ ⵏ ⵉⵙⵍⴳⵏⵏ ⵉⵏⴰⵎⵓⵔⵏ ⴳ ⵜⵎⵉⵣⴰⵔ ⵏ ⵜⵎⵏⴰⴹⵜ ⵙ ⵓⵎⵙⴰⵙⴰ ⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ, ⴷ ⵓⵍⴰ ⴰⵎⵔⴰⵔⴰ ⵏ ⵜⵎⵓⵣⴰⵢⵉⵏ ⵅⴼ ⵜⵔⴳⵍⴰ ⵏ ⵜⴰⵔⴰⵖⵉⵏ ⵜⵓⵍⴳⵉⵏⵉⵏ ⴷ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵡⴰⵔⴰⵢ ⴷ ⵓⵙⵇⵙⵉ, ⵙ ⵎⴰⴷ ⵉⵜⵜⵏⴼⵔⵓⵏ ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵓⵏⴳⵉⵙⵏ ⴷ ⵓⵙⴷⵓⵙ ⵏ ⵜⵣⵔⴼⵜ ⴷ ⵓⵏⴱⴰⴷ ⵏ ⵓⵙⵍⴳⵏ.
ⵖⵔ ⵓⴳⴳⴰⵔ
