ⴷⴰ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⵉⵣⵉ ⵜⴰⵣⴳⵔⴰⵔⵜ ⵉⵏⴳⵔ 11 ⴷ 14 ⴽⵟⵓⴱⵕ 2022, ⵢⴰⵏ ⵓⴽⴰⴱⴰⵔ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⴷⵓⴷⴰⵏⵜ ⵏ ⵎⴰⵍⵉ, ⴳ ⵉⵍⵍⴰ ⵎⴰⵙⵙ ⴰⴽⵉⴱⵓ ⴱⵡⴰⵔⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ; ⵎⴰⵙⵙ ⵣⵓⵎⴰ ⴷⵢⴰⵔⴰ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵙⵇⵇⵉⵎⵜ; ⵎⴰⵙⵙ ⴼⵓⵙⵉⵏⵉ ⵙⵉⴱⵉ, ⴰⵎⵙⵜⴳⴳⴰⵔ ⴰⵏⵥⵕⴰⴼ ⴷ ⵎⴰⵙⵙ ⵜⵉⵔⵏⵓ ⵜⵢⴰⵎ, ⴰⵎⴰⵍⴰⵍ.

ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵙ ⵜⵎⵍⴷⴰ ⴰⴷ, ⵜⵙⵉⵙⴼⵉⵡ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⴳⴰ ⵓⵔⵣⴰⴼ ⴰⴷ ⴰⵙⵏⵜⵉ ⵏ ⵓⵎⵢⴰⵡⴰⵙ ⵉⵕⵡⴰⵏ ⵢⴰⴽⴽⴰⵏ ⵜⴰⵢⴰⴼⵓⵜ ⵅⴼ ⵜⵏⴼⵔⵓⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⵓⵔ ⴷ ⵅⵙ ⴳ ⵓⵙⵡⵉⵔ ⵏ ⵜⵎⵔⵙⴰⵍ ⵙ ⵙⵏⴰⵜ ⵎⴰⵛ ⴰⵡⴷ ⴳ ⵓⵙⵡⵉⵔ ⵏ ⵓⵎⵏⵥⴰⵡ. ⴳ ⵎⵏⴰⴹ ⴰⴷ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵟⵟⴰⴼⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵓⵙⵖⵥⵏ ⴳ ⵜⴼⵓⵍⵜ "ⴰ" ⵢⴰⵜ ⵜⵉⵍⴰⵍⵜ ⵜⴰⴽⵙⵡⴰⵜ ⴳ ⵉⵏⴰⴳⵔⴰⵡⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⴳⴰⵏ ⴰⵎⴳⴳⴰⵢ ⵉⵏⴳⵔ ⵡⴰⵎⵓⵏ ⵓⵖⵔⵉⵎ ⴷ ⵜⵓⴳⵜ ⵏ ⵜⵎⵔⵙⴰⵍ ⵏ ⵓⵡⴰⵏⴽ (ⴰⴱⵕⵍⴰⵎⴰⵏ, ⵜⴰⵏⴱⴰⴹⵜ, ⴷ ⵓⴳⴳⴰⵔ).

ⴳ ⵓⵙⴰⵜⵉ ⵏ ⵜⵓⵙⵏⵜ ⵉⴳⴳⵓⴷⵉⵢⵏ ⵙ ⵜⵉⵍⴰⵍⵜ ⴰⴷ ⵉⴼⴰⵡⵏ ⵙⴳ ⴽⵉⴳⴰⵏ ⵏ ⵜⵖⵜⴰⵙⵉⵏ ⵏ ⵜⵎⵜⵜⴰ ⵉⵎⵓⵏⵏ ⵉⵜⵜⵡⴰⵙⵖⵥⴰⵏⵏ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷ ⵜⴰⵖⵜⵙⵜ ⵜⴰⵎⴳⴳⴰⵔⵓⵜ ⵜⵜⵡⴰⵙⵖⵥⵏⵏⵉⵏ, ⵙ ⵡⴰⵏⵏⴰⵍ ⵏ ⵍⵎⵖⵔⵉⴱ, ⵉⵣⴷⵉ ⵙ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏⵓⴼⴳⴰⵏ ⴳ ⵓⵎⵏⴰⵍⴰ ⵏ ⵉⵙⵏⴼⵍⵏ ⵏⵓⵏⵣⵡⵉ. ⵜⵙⴷⴷⵉⴷ ⵅⴼ ⵡⴰⴷⴷⵓⵔ ⵏⵓⴱⵟⵟⵓ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴷ ⵜⵙⵜⵔⴰⵜⵉⵊⵉⵢⵉⵏ ⵏ ⵓⵏⵄⴰⵕ ⵣⵎⵔⵏⵉⵏ ⴰⴷ ⵏⴼⵔⵓⵏⵜ ⴰⴼⵊⵊⵉⵊ ⵏ ⵇⴰⵃ ⵓⴳⴳⵉⴷⵏ ⵙ ⵉⵣⵔⴼⴰⵏ ⵏⵏⵙⵏ ⵙⵎⴷⵏⵉⵏ.

ⵙⴳ ⵜⵙⴳⴰ ⵏⵏⵙ, ⵉⵙⵉⵙⴼⵉⵡ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⴷⵓⴷⴰⵏⵜ ⵏ ⵎⴰⵍⵉ ⵎⴰⵙ ⵉⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵙⴳ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵎⵣⵡⴰⵔⵉⵏ ⴳ ⵉⴼⵔⵉⵇⵢⴰ ⵏⵏⵉ ⵉⵙⴳⵓⴷⵉⵢⵏ ⵢⴰⵜ ⵜⵉⵔⵎⵉⵜ ⵜⴰⴽⵙⵡⴰⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⵢⴰⵍⵍⵖ ⵙ ⵜⵎⴳⴳⵉⵜⵉⵏ ⵏⵏⴰ ⵉⵜⵜⴳⴳⴰ ⵓⵙⵇⵇⵉⵎ ⴳ ⵓⵙⴰⵜⵉ ⴰⴷ. ⵎⴽⴷⴰ ⵉⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵓⵙⴷⵓⵙ ⵏ ⵉⵎⵢⴰⵙⵙⴰⵜⵏ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵢⵓⴳⴰⵏ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ.