ⵜⵙⵏⵎⴰⵍⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵙⵎⵓⵏⵉ, ⴰⵙⵙ ⵏ ⵓⵙⵉⵏⴰⵙ 04 ⵉⵏⵏⴰⵢⵔ 2022, ⵍⵍⴰⵏ ⵏⵏ ⴳⵉⵙ ⴽⵉⴳⴰⵏ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⴷ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⵍⵏ ⵙ ⵜⵎⵢⴰⵥⴰⵏⵜ ⴷ ⵡⴰⵔ ⴰⵙⵏⵓⵃⵢⵓ ⴷ ⵜⵙⵓⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵣⴷⴰⵢ ⵏ ⵓⴹⴼⴼⵓⵕ ⵏ ⵜⵡⵓⵔⵉ ⵏⵏⵙ ⵅⴼ ⵜⵎⵙⴰⵔⵉⵏ ⵏ ⵜⴷⴰⴱⴰⵔⵜ ⵜⴰⵡⵙⵢⴰⵏⵜ ⴷ ⵓⵏⵥⵣ ⴳ ⴽⵔⴰ ⵏ ⵜⵖⵉⵡⴰⵏⵉⵏ ⴷ ⵜⵉⵏⵎⴰⵍ ⴷ ⵉⵙⵉⵏⴰⴳⵏ ⵉⵎⴰⵜⵜⴰⵢⵏ, ⴳ ⵎⴰⴷ ⵢⴰⵖⵓⵍ ⵏⵏ ⵢⵓⵙⵉ ⵙ ⴰⵙⵙⴰⵖ "ⵜⴰⵡⴰⵙⴰⵢⵜ ⵎⴳⴰⵍ ⵜⵏⵇⵇⴰⴹ", ⴹⴰⵕⴰⵜ ⵎⴰⴷ ⵙⵙⴼⵍⴷⵏⵜ ⴽⵔⴰ ⵏ ⵜⵔⵓⴱⴱⴰ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⵙⴼⵍⴷⵏⵜ ⵉ ⴽⵔⴰ ⵏ ⵜⵎⵃⴹⴰⵕⵉⵏ ⵜⵓⵏⴳⵉⵙⵉⵏ ⴳ ⵙⵟⵟⴰⵜ ⴷ ⵡⵊⴷⴰ, ⵎⴽⴷⴰ ⵙⵏⵎⴰⵍⴰⵏⵜ ⵉⵏⵎⵓⵇⵇⴰⵔⵏ ⴰⴽⴷ ⵜⵎⵙⵎⵓⵏⵉⵏ ⵏ ⵉⵎⵃⴹⴰⵕⵏ ⴷ ⴽⵔⴰ ⵏ ⵉⵙⵍⵎⴰⴷⵏ, ⵙ ⵜⵎⵔⵏⵉⵡⵜ ⵏ ⵓⴹⴼⴼⵓⵕ ⵏ ⵡⴰⴷⴷⴰⴷⵏ ⵎⵎⵔⵡⴰⵙⵏⵉⵏ ⴳ ⵜⵖⵔⵎⵉⵏ ⵏⵏⵉⴹⵏ.

ⵉⵖ ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⵓⵣⵔⴼ ⴳ ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ ⵎⴳⴰⵍ ⵜⵎⵖⴰⵔⵜ ⴷ ⵜⵔⴱⴰⵜ ⵢⴰⵏ ⵉⵎⵔⵙⵉ ⴰⵎⵇⵇⵔⴰⵏ ⴳ ⵜⵙⵕⴰⵜⵉⵊⵉⵜ ⵏ ⵜⵡⵓⵔⵉ ⵏⵏⵙ, ⴰⵔ ⵉⵜⵜⵣⵎⵎⴰⵎ ⵙ ⵓⴼⵓⵍⴽⵉ ⵜⴰⴷⵔⴰⵡⵜ ⴳ ⵓⵎⵣⵉⵣⵣⵍ ⴰⵏⴰⵎⵓⵔ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⵅⴼ ⵓⵙⵔⵇⴱ ⵅⴼ ⵓⵙⵙⵉⵡⴹ ⴰⴼⴰⴷ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵔⵡⵍⴰ ⵙⴳ ⵜⵎⵔⵔⵓⵜ ⵏⵏⴰ ⵉⴽⴽⴰ ⵉⵕⵥⵎ ⴳ ⵏⵓⵡⴰⵏⴱⵔ 2021. ⵅⴼ ⵜⵙⵓⵍⴰⵏⵜ ⵏ ⵓⵎⵢⴰⵖ ⴰⵣⵔⴼⴰⵏ ⴰⴽⴷ ⵜⵎⵓⵛⴰ ⵉⵜⵜⵡⴰⵏⵏⴰⵏ ⵏⵏⴰ ⴷ ⴷⴰⵔ ⴰⵣⴷⴰⵢ ⵙ ⵜⴷⴰⴱⴰⵔⵜ ⵜⴰⵡⵙⵢⴰⵏⵜ, ⵍⵓⵎⴰⵕ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵡⴰⴷⴷⵓⵔ ⵏⵏⵙ, ⴰⵔ ⵉⵜⵜⵣⵎⵎⴰⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵎⵏⵉⴳ:

• ⴰⵜⵉⴳ ⵏ ⵓⵕⵥⵥⵓⵎ ⵏ ⵜⵎⵓⵔⴰⵢⵉⵏ ⵜⵉⵎⴰⵜⴰⵢⵉⵏ ⵜⵉⵎⵥⵍⴰⵢⵉⵏ ⵉ ⵉⵙⴰⴳⴳⵯⵏ ⴰⴼⴰⴷ ⴰⴷ ⵓⵔ ⵇⴰⵎⴰⵏ ⵉⴳⵉⵜⵏ ⵉⵜⵜⵓⵎⵏⵖⴰⵢⵏ ⵙ ⵡⴰⵔ ⵜⵎⵔⵔⵓⵜ;
• ⵜⵉⵎⴳⴳⵉⵜⵉⵏ ⵜⵉⴷⵖⵢⴰⵏⵉⵏ ⵏⵏⴰ ⵜⵓⵙⵉ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵙ ⵉⴳⵉ ⵏ ⵉⵙⴰⴳⴳⵯⵏ ⵉⵎⵙⵙⵓⴳⵓⵔⵏ ⵉⵙⵓⵖⵏⵏ ⴷ ⵎⴰ ⵔⴰⴷ ⴷ ⵉⴼⴼⵖ ⵅⴼ ⵎⴰⵢⴰ ⵏⵏ ⵏ ⵜⵎⴳⴳⵉⵜⵉⵏ ⵜⵉⵏⴹⴼⴰⵕⵉⵏ. ⵙ ⵜⵓⵚⴽⴰ ⵅⴼ ⵉⵎⴷⵉⵡⴰⵍ ⵏⵏⴰ ⵉⴳⴰ ⴳ ⵉⵏⵎⵓⵇⵇⴰⵔⵏ ⵏⵏⵙ ⴷ ⵎⴰ ⵙ ⵜⴼⴼⵖ ⵜⵙⵎⵓⵏⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵙⵙ ⵏⵏⵙ:
• ⴰⵔ ⵉⵜⵜⴰⵍⵙ ⵓⵙⵇⵇⵉⵎ ⵉ ⵓⵙⵖⵍⴼ ⵏⵏⵙ ⵏⵏⴰ ⵢⴰⴷ ⵉⵙⴷⴷⵉⴷ ⵅⴼ ⵡⴰⴷⴷⴰⴷⵏ ⵏ ⵓⵙⵙⵉⵡⴹ ⵣⵖ ⴷⴰⵔ ⵜⵓⵏⴳⵉⵙⵉⵏ ⵏ ⵜⴰⴷⵓⵜⵉⵏ ⵜⵉⵡⴰⵙⴰⵢⵉⵏ ⴳ ⵎⴰⴷ ⵉⵣⵔⵉⵏ ⵙ ⵜⵖⵍⴰⴼⵜ ⵜⴰⵏⵣⵔⴰⴼⵜ ⵙ ⵜⵓⵏⴳⵉⵙⵉⵏ ⵏ ⵉⴱⴽⴽⵉⴹⵏ ⴷ ⵜⵉⵙⵙⵍⵉⵏ ⵜⵉⵡⴰⵙⴰⵢⵉⵏ, ⵉⵖ ⵉⴳⴰ ⴰⵡⴷ ⴰⵏⵀⵍⵍⴰ ⴰⵎⵙⵏⵉⵊⵊⵉ ⴷ ⵓⴽⵍⵉⵙ ⵏ ⵜⵓⵏⴳⵉⵙⵉⵏ, ⵙ ⵓⵙⵎⵀⵍ ⵏ ⵉⵎⵉⵔ 117 ⵏ ⵓⴷⵓⵙⵜⵓⵔ;
• ⵉⵊⵊⵓⴱⵍ ⴰⵏⵅⵅⵍ ⵏ ⴽⵉⴳⴰⵏ ⵏ ⵜⵎⵙⵙⵓⴳⵓⵔⵉⵏ ⵏ ⵜⵎⵔⵙⴰⵍ ⵜⵉⵙⴷⴰⵡⴰⵏⵉⵏ ⵉ ⵜⵏⵓⵔⵣⵉⵏ ⵏ ⵜⵎⵃⴹⴰⵕⵉⵏ ⴷ ⵡⴰⵔ ⵉⵙⵉⵜⵜⵉ ⵏⵏⵙⵏⵜ ⵙ ⵜⴷⵖⵔⵉⵜ ⵉⵜⵜⵓⵙⵓⵖⵏⵏ;
• ⵉⵣⵎⵎⴻⵎ ⴰⵎⵢⴰⵏⴰⵡ ⴷ ⵓⵎⵣⴰⵔⴰⵢ ⵏ ⵜⴱⵔⵉⴷⵉⵏ ⵉⵜⵜⵓⴱⵔⵔⴰⵃⵏ ⴳ ⵜⵎⵔⵙⴰⵍ ⵜⵉⵙⴷⴰⵡⴰⵏⵉⵏ ⴹⴰⵕⴰⵜ ⴰⵙⵙⵉⵡⴹ ⵏ ⵜⵓⵏⴳⵉⵙⵉⵏ ⵉ ⵜⴷⴰⴱⴰⵔⵜ ⵜⴰⵡⴰⵙⴰⵢⵜ ⵏⵏⴰ ⴰⵙⵏⵜ ⴳⴰⵏ ⵉⵙⵍⵎⴰⴷⵏ;
• ⴰⵔ ⵉⵙⴰⵇⵙⴰ ⵅⴼ ⵜⵏⴰⴱⴱⴰⵢⵜ ⵏ ⵉⴼⵔⴷⵉⵙⵏ ⵉⵎⵙⵙⵓⴳⵓⵔⵏ ⴷ ⵉⵙⴳⵎⴰⵏⵏ ⴷ ⵢⵓⵙⴰⵏ ⴷ ⵓⵎⵢⴰⵖ ⴰⴽⴷ ⵡⴰⴷⴷⴰⴷⵏ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⴷⴰⴱⴰⵔⵜ ⵜⴰⵡⴰⵙⴰⵢⵜ;
• ⴰⵔ ⵉⵜⵜⵙⴷⴷⵉⴷ ⵅⴼ ⵡⴰⵜⵉⴳ ⵏ ⵉⴱⴷⴷⵉ ⵅⴼ ⵜⵎⴰⴳⵍⴰⵢⵉⵏ ⴷ ⵜⵎⵙⴽⴰⵔⵉⵏ ⵖⵓⴷⴰⵏⵉⵏ ⵉⵙⵡⵓⵜⵜⵙⵏ ⴰⴼⵔⴰⴳ ⵏ ⵜⵓⵏⴳⵉⵙⵉⵏ ⴷⴰⵜ ⴰⵏⵖⴰⵍ ⵏ ⵉⵏⵖⵎⵉⵙⵏ ⵏ ⵉⵎⵙⴰⵙⴰⵜⵏ.

ⵉⵖ ⴷⴰ ⵉⵙⵙⴽⵜⴰⵢ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵎⵣⵉⵣⵣⵍ ⵏⵏⵙ "ⴰⴷ ⵓⵔ ⵏⴼⵉⵙⵙ ⵅⴼ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ" ⵃⵎⴰ ⴰⴷ ⵉⵙⵙⵔⵇⴱ ⵅⴼ ⵓⵙⵙⵉⵡⴹ ⴷ ⵓⵙⴱⴷⴷⵉ ⵏ ⵜⵔⵡⵍⴰ ⵙⴳ ⵜⵎⵔⵔⵓⵜ ⴷ ⵏⵏⴰ ⵔⴰⴷ ⵢⵉⵍⵉ ⵅⴼ ⵓⵙⴳⴳⵯⴰⵙ ⵉⵙⵎⴷⵏ, ⴷ ⵉⴷⴷⵖ ⵉⴳⴰ ⵓⵙⵙⵍⵎⴷ ⴳ ⵓⵙⴰⵢⵔⴰⵔ ⴰⵙⴷⴰⵡⴰⵏ ⵉⴼⵔⴰⴳⵏ ⵓⴷⵎⴰⵡⵏ ⵏⵏⵙⵏ ⴷ ⵜⵏⴼⵔⵓⵜ ⵏⵏⵙⵏ ⵜⴰⴽⵎⴰⵎⵜ ⴷ ⵜⵓⴽⵍⵉⵙⵜ ⴰⵣⵔⴼ ⵏ ⵜⵎⵃⴹⴰⵕⵉⵏ ⴷ ⵉⵎⵃⴹⴰⵕⵏ, ⵉⴷⴷⵖ ⵜⴳⴰ ⵜⵉⵍⴰⵍⵜ ⵏ ⵓⵙⵍⵎⴰⴷ ⴰⵙⵙⵍⵎⴷ ⵙ ⵓⵎⵙⴰⵙⴰ ⴰⴽⴷ ⵉⵍⴳⴰⵎⵏ ⵉⵣⵣⵓⵍⴰⵏⵏ ⵜⵜⵡⴰⵙⵙⵏⵏⵉⵏ ⵏⵏⴰ ⵙⵙⵕⵚⴰⵏⵜ ⵜⵎⵢⵓⵔⵉⵏ ⵜⵉⵙⴷⴰⵡⴰⵏⵉⵏ ⵜⵉⵎⵖⵔⵉⴱⵉⵢⵉⵏ:

• ⴰⵔ ⵉⵙⵙⵓⵜⵓⴳ ⵜⵉⵕⵥⵉ ⵏ ⵉⴼⵙⵜⵉ ⵏ ⵜⵓⵏⴳⵉⵙⵉⵏ ⴷ ⵓⵙⵙⵉⵡⴹ ⵏ ⵜⴰⴷⵓⵜⵉⵏ ⵏⵏⴰ ⵉⴽⴽⴰⵜⵏ ⴳ ⵓⴷⵎⴰⵡⵏ ⵏⵏⵙⵏⵜ ⴷ ⵜⵓⴷⵔⵜ ⵏⵏⵙⵏⵜ ⵎⵇⵇⴰⵔ ⵉⵣⵎⵔ ⵎⴰⵢⴰ ⵏⵏ ⴰⴷ ⵜⵏⵜ ⵉⵙⴱⴽⴽⴹ ⴷ ⵓⵇⵕⴰⴹ ⵙⵔⵙⵏⵜ ⴷ ⵓⵙⵉⵎⵎⵕ ⵎⴳⴰⵍ ⵏⵏⵙⵏⵜ;
• ⴰⵏⵣⴳⵓⵎ ⵏⵏⵙ ⵉⵖⴱⴰⵏ ⵅⴼ ⵓⴳⵓⴷⵉⵢ ⵏ ⵡⴰⴷⴷⴰⴷⵏ ⵏ ⵜⴷⴰⴱⴰⵔⵜ ⴷ ⵜⴽⵕⴹⵉ ⵜⴰⵡⴰⵙⴰⵢⵜ ⴷ ⵜⴽⵕⴹⵉ ⴳ ⵡⴰⵎⵓⵏ ⵏⵏⵖ;
• ⴰⵔ ⵉⵜⵜⵍⴰⵖⴰ ⴰⵣⵣⵉⴳⵣ ⵏ ⵓⴹⴼⴼⵓⵕ ⵏ ⵜⵎⵙⵍⴰⵢⵉⵏ ⵏ ⵜⴷⴰⴱⴰⵔⵜ ⵜⴰⵡⴰⵙⴰⵢⵜ ⵎⴳⴰⵍ ⵜⵎⵃⴹⴰⵕⵉⵏ, ⵉⵖ ⵉⴳⴰ ⴳ ⵓⵣⵎⵣ ⵏ ⵉⵎⵚⵉⵕⵉⴹⵏ ⵏⵉⵖ ⵎⴰⵏⵉ ⵢⴰⴹⵏⵉⵏ;
• ⴰⵔ ⵉⵜⵜⵙⴷⴷⵉⴷ ⵎⴰⵙ ⵙⵖⴰⵡⵙⴰⵏ ⵡⴰⴷⴷⴰⴷⵏ ⵏ ⵜⵕⵥⵉ ⵏ ⵉⴼⵙⵙⵜⵉ ⵏⵏⴰ ⴳⴰⵏⵜ ⵜⵎⵃⴹⴰⵕⵉⵏ ⵙ ⵉⵙⵡⵓⴷⴷⵓⵜⵏ ⵉⴳⴳⵓⵜⵏ ⴰⴼⴰⴷ ⴰⴷ ⵜⵜⵡⴰⵣⵔⴰⵢⵏⵜ ⵜⵢⴰⴼⵓⵜⵉⵏ ⵏⵏⵙ ⵜⵓⴷⵔⵉⵙⵉⵏ ⵅⴼ ⵜⵙⴷⴰⵡⵉⵜ ⴷ ⵉⵙⵍⵎⴰⴷ ⴷ ⵉⵎⵃⴹⴰⵕⵏ ⵙ ⵎⴰⴷ ⵉⵙⴷⵓⵙⵏ ⵜⴰⴼⵍⵙⵜ ⴳ ⵓⵙⴰⴷⴼ ⵖⵔ ⵜⵎⵔⵙⴰⵍ ⴰⴼⴰⴷ ⴰⴷ ⵢⵉⵍⵉ ⵓⵙⵙⵓⵎⵓ;
• ⴰⵔ ⵉⵇⵇⴰⵔ ⵉ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵙ ⵓⵙⵎⴰⵜⴰ ⵏ ⵓⴱⵕⵓⵜⵓⴽⵓⵍ ⵏ ⵡⴰⵍⵖⵓ ⵏ ⵎⵕⵕⴰⴽⵛ ⵅⴼ ⵓⴼⵔⴰⴳ ⵏ ⵜⵎⵃⴹⴰⵕⵉⵏ ⵙⴳ ⵜⴽⵕⴹⵉ ⴷ ⵓⵏⵥⵣ ⴷ ⵓⵙⵔⵓⵙ ⵏ ⵉⵎⴰⵙⵙⵏ ⵉⵥⵍⵉⵏ ⵙ ⵓⵙⵙⵉⵡⴹ ⵅⴼ ⵜⴷⴰⴱⴰⵔⵜ ⵎⴽⵏⵏⴰ ⴽⴰ ⵉⴳⴰ ⵡⴰⵏⴰⵡ ⵏⵏⵙ ⴷ ⵜⵖⵍⴰⴼⵜ ⵙ ⵜⵓⵏⴳⵉⵙⵉⵏ;
• ⴰⵔ ⵉⵜⵜⴰⵏⵏⴰⵢ ⵎⴰⵙ ⴳⴰⵏ ⵉⵎⵣⵉⵣⵣⵍ ⵏ ⵓⵇⵕⴰⴹ ⴷ ⵓⵏⵥⵣ ⴷ ⵉⵡⵖ ⵎⴳⴰⵍ ⵜⵎⵃⴹⴰⵕⵉⵏ ⵏⵏⴰ ⵉⵙⴽⵔⵏ ⴰⵙⵙⵉⵡⴹ, ⵎⴽⴷⴰ ⵙ ⵉⵜⵜⵓⵣⵎⵎⴰⵎ ⴳ ⵡⴰⴷⴷⴰⴷⵏ ⵏ ⵜⴽⵕⴹⵉ ⵜⴰⵡⴰⵙⴰⵢⵜ ⵉⵣⵡⴰⵔⵏ, ⵏⵏⴰ ⵅⴼ ⵉⵙⵎⵔⵔⴰⵜ ⵓⵙⵍⴳⵏ, ⵜⵉⵕⵥⵉ ⵜⴰⵎⵇⵇⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ;
• ⴰⵔ ⵉⵜⵜⵙⴷⴷⵉⴷ ⵅⴼ ⵓⵙⵓⵖⵏ ⵏ ⵡⴰⵏⵏⴰⵍ ⵏ ⵓⵙⵙⵉⵡⴹ ⵏⵏⴰ ⵉⴳⴰⵏ ⵉⴳⵉ ⴰⵏⴰⵎⵓⵔ ⵉⴷⴷⵖ ⵍⴰ ⴷ ⵉⴼⴼⴰⵍ ⵜⵉⵎⴰⵖⵓⵍⵉⵏ ⴷ ⵜⵎⵉⵜⴰⵔ ⵏ ⵓⵎⵙⴰⵙⴰ ⵉⴱⴷⴷⵏ ⵅⴼ ⵓⵙⵙⵓⴽⵉ ⴳ ⵓⵙⵎⵔⵙ ⵏ ⵓⵏⴱⴰⴹ;
• ⴰⵔ ⵉⵇⵇⴰⵔ ⵙ ⵓⵙⵎⵀⵍ ⵏ ⵉⵙⵡⵓⴷⴷⵓⵜⵏ ⵏ ⵓⴼⵔⴰⴳ ⵏ ⵜⵓⵏⴳⵉⵙⵉⵏ ⵙ ⵓⵎⵙⴰⵙⴰ ⴰⴽⴷ ⵓⵙⵍⴳⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵓⵙⵉⵜⵜⵉ ⵏ ⵉⵙⵡⵓⴷⴷⵓⵜⵏ ⵏ ⵓⴼⵔⴰⴳ ⵏ ⵜⵎⵙⵙⵉⵡⵉⴹⵉⵏ ⴷ ⵉⵏⴰⴳⴰⵏ;
• ⴰⵔ ⵉⵇⵇⴰⵔ ⵉ ⵉⵎⴰⵙⵙⵏ ⵏ ⵓⵙⵏⵖⵎⵙ ⵙ ⵜⵏⴽⵔⴰ ⵙ ⵜⵉⵍⴰⵍⵜ ⵏⵏⵙ ⵜⴰⵏⵖⵎⴰⵙⵜ ⴷ ⵓⵙⴷⵍⵙ ⴱⵍⴰ ⵜⵉⵢⵜⵉ ⴳ ⵓⴷⵎⴰⵡⵏ ⵏ ⵜⵓⵏⴳⵉⵙⵉⵏ ⴷ ⵉⴳⵉ ⵏ ⵉⴼⴰⵙⵔⵏ ⵉⵏⴰⵎⵓⵏⵏ ⵏⵉⵖ ⵉⴷⵍⵙⴰⵏⵏ ⵏⵉⵖ ⴰⵇⵕⴰⴹ ⵏⵉⵖ ⴰⵣⴰⵡⵔ.

ⵔⴰⴷ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⴰⵜⵉ ⵏ ⵜⵎⵢⴰⵇⵇⴰⵏⵉⵏ ⵉⵜⵜⵓⵙⴳⵎⴹⵏ ⴰⴽⴷ ⵜⵙⴷⴰⵡⵉⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ, ⵜⵉⵙⵇⵇⴰⵢⵎⵓⵜⵉⵏ ⵅⴼ ⵜⵎⵙⴰⵔⵉⵏ ⵏ ⵜⴽⵕⴹⵉ ⴷ ⵓⵏⵥⵣ ⴷ ⵜⴷⴰⴱⴰⵔⵜ ⵜⴰⵡⴰⵙⴰⵢⵜ ⴷ ⵜⵎⴰⵎⴽⵜ ⵏ ⵓⴼⵔⴰⴳ ⵏ ⵜⵓⵏⴳⵉⵙⵉⵏ ⴷ ⵉⵎⵙⵙⵉⵡⵉⴹⵏ ⴷ ⵓⴼⵔⴰⴳ ⵏ ⵓⵙⴰⵢⵔⴰⵔ ⵏ ⵜⵙⴷⴰⵡⵉⵜ ⵉⴷⴷⵖ ⵉⴳⴰ ⴰⵙⴰⵢⵔⴰⵔ ⵏ ⵜⵓⵙⵙⵏⴰ.