ⴰⵔ ⵉⵙⴼⵓⴳⵍⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ 25 ⵏⵓⵡⴰⵏⴱⵉⵔ 2022, ⴰⵙⵙ ⴰⴳⵔⴰⵖⵍⴰⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⵏⵏⵉ ⵉⵎⵙⴰⴳⴰⵔⵏ ⴰⴽⴷ ⵓⵎⵣⵉⵣⵣⵍ ⵏ ⵜⵎⵜⵜⴰ ⵉⵎⵓⵏⵏ "ⵎⵓⵏⴰⵜ ⵅⴼ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⴰⵎⵖⴰⵔⵜ", ⵏⵏⵉ ⵉⴳⴰⵏ ⵜⴰⵙⵏⵜⴰⵢⵜ ⵉⵣⴷⵉⵏ ⵅⴼ 16 ⵏ ⵡⵓⵙⵙⴰⵏ, ⵉⵍⵉⵏ ⴳⵉⵙ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⵏ ⵓⵙⴼⵔⴽ ⵅⴼ ⵓⵙⵓⵖⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⵜⵙⵎⴷ ⴰⵙⵙ ⵏ 10 ⴷⵓⵊⴰⵏⴱⵉⵔ ⵏⵏⵉ ⵖ ⵉⵙⴼⵓⴳⵍⵓ ⵓⵎⴰⴹⴰⵍ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. 

ⵙ ⵜⵎⵍⴷⴰ ⴰⴷ, ⵉⵙⵙⵏⵜⵉ ⵓⵙⵇⵇⵉⵎ ⵙ ⵓⵙⵙⵉⴷⴷ ⵏ ⵓⴷⵎⴰⵡⵏ ⵏ ⵓⵙⵖⵉⵎ ⵏⵏⵙ ⴰⵏⴰⵎⵎⴰⵙ ⴳ ⵕⵕⴱⴰⵟ ⴷ ⵉⵙⵖⵉⵎⵏ ⵏ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵙ 12 ⵙ ⵓⴽⵍⵓ ⴰⵍⴷⵛⵉⵏⵉ ⴰⴼⴰⴷ ⴰⴷ ⵉⴳ ⴰⵡⵏⵏⵉ ⵅⴼ ⵜⴷⵔⴰⵡⵜ ⵏⵏⵙ ⴳ ⵓⵎⵣⵉⵣⵣⵍ ⵏ ⵜⵎⵜⵜⴰ ⵉⵎⵓⵏⵏ ⵏⵏⴰ ⵉⵕⵥⵎ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴰⵙⴳⴳⵯⴰⵙ ⴷⴰ ⵉⵣⵔⵉⵏ ⴷⴷⴰⵡ ⵜⵎⴰⵜⴰⵔⵜ "ⴽⵍⵓ ⴰⵎⴰⴹⴰⵍ ⵙ ⵓⵍⴷⵛⵉⵏⵉ : ⵙⵎⴷⴰⵜⴰⵖ ⵜⵉⴽⵕⴹⵉ ⵎⴳⴰⵍ ⵜⴰⵎⵖⴰⵔⵜ ⵖⵉⵍⴰⴷ". ⵉⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵕⵥⵎ ⵏⴹⴰⴹⴰⵏⵉ, ⵙ ⵓⵙⴼⵓⴳⵍⵓ ⵙ ⵡⴰⵙⵙ ⴰⴷ ⴰⴳⵔⴰⵖⵍⴰⵏ, ⴰⵎⵣⵉⵣⵣⵍ ⵏⵏⵙ ⴰⵏⴰⵎⵓⵔ ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⵙⴳ 25 ⵏⵓⵡⴰⵏⴱⵉⵔ 2021 ⴷⴷⴰⵡ ⵜⵎⴰⵜⴰⵔⵜ "ⴰⴷ ⵓⵔ ⵏⴼⵉⵙⵙ ⵅⴼ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ". 

ⵉⵜⵜⵡⴰⵙⵙⴰⵏ ⵓⵎⵣⵉⵣⵣⵍ ⵏ ⵓⵙⵇⵇⵉⵎ, ⵏⵏⵉ ⵉⵙⵡⵓⵜⵜⵙⵏ ⴰⵙⵔⵇⴱ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⵜⵓⵏⴳⵉⵙⵉⵏ ⵏ ⵜⴽⵕⴹⵉ ⵅⴼ ⵓⵙⵉⵡⴹ ⴷ ⵓⵙⴱⴷⴷⵉ ⵏ ⵜⵔⵡⵍⴰ ⵙⴳ ⵜⵎⵔⵔⵓⵜ, ⵙ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵉ ⵜⵓⴳⵜ ⵏ ⵉⵎⵓⵙⵙⵓⵜⵏ ⵏ ⵓⵙⴼⵔⴽ ⴷ ⵡⵓⵙⵙⴰⵏ ⵉⵏⵎⵍⴰⵏⵏ ⴳ ⵇⴰⵃ ⵜⵎⵏⴰⴹⵉⵏ ⵏ ⵍⵎⵖⵔⵉⴱ. ⵅⴼ ⴽⵉⴳⴰⵏ ⵏ ⵜⵙⴳⴳⵯⵉⵏ ⵣⴷⵉⵏⵉⵏ ⵙ ⵜⴽⵕⴹⵉ ⵎⴳⴰⵍ ⵜⴰⵎⵖⴰⵔⵜ, ⵍⵓⵎⵎⵏ: ⵜⵉⴱⵔⵉⴷⵉⵏ ⵜⵓⵍⴳⵉⵏⵉⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵉⵡⵜⵎⵉⵏ; ⵉⵎⴰⵙⵙⵏ ⵏ ⵓⴼⵔⴰⴳ ⴷ ⵓⵙⵎⴰⵎⵎⵉ; ⴰⴼⵔⴰⴳ ⴰⵏⴰⵎⵓⵏ ⴷ ⵓⴼⵔⴰⴳ ⵓⵍⴳⵉⵏ; ⴰⴷⴰⴼ ⵏ ⵜⵡⵜⵎⵉⵏ ⵙ ⵜⵣⵔⴼⵜ; ⴰⵙⴰⵜⵉ ⵓⵍⴳⵉⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ; ⴰⵙⴱⴷⴷⵉ ⵏ ⵓⵥⵍⵍⴻⵍ ⴳ ⵓⵙⴰⵢⵔⴰⵔ ⴰⵙⴷⴰⵡⴰⵏ; ⵜⴰⵏⴼⵔⵓⵜ ⴳ ⵓⵙⴰⵢⵔⴰⵔ ⴰⵎⴰⵜⴰⵢ ⴷ ⵜⵎⵓⴽⵔⵉⵙⵜ ⵏ ⵓⵙⵉⵡⴹ ⴷ ⵡⴰⴷⴰⴼ ⵙ ⵓⵙⵎⴰⵎⵎⵉ ⴰⵎⵢⴰⴳⴰⵏ ⴷ ⵉⵎⵕⵡⵉ, ⴷ ⵓⴳⴳⴰⵔ. ⴳ ⵓⵙⴰⵜⵉ ⴰⴷ ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴳ ⵢⴰⵏ ⵓⵏⵎⵓⵇⵇⴰⵔ ⵅⴼ ⵉⵎⵔⵙⵉ "ⵜⵉⵍⴰⵍⵜ ⵏ ⵉⵣⵣⵓⵍⴰⵏⵏ ⵏ ⵜⴷⵓⵙⵉ ⴳ ⵓⵙⵎⴰⴳⴰⵍ ⵙ ⵜⵡⵜⵎⵉⵏ ⵜⵓⵏⴳⵉⵙⵉⵏ ⵏ ⵜⴽⵕⴹⵉ", ⵅⴼ "ⵡⴰⴷⴷⵓⵔ ⵏ ⵉⵣⵣⵓⵍⴰⵏⵏ ⵏ ⵜⴷⵓⵙⵉ ⴳ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ, ⵓⵔ ⴷ ⵅⵙ ⴰⵎ ⵉⵎⴳⴳⴰⵢⵏ ⵉⵏⵉⵎⴰⵏⵏ ⵎⴰⵛ ⴰⵎ ⵜⵉⵡⵏⵏⴰⴹⵉⵏ ⵉⵏⵏⴰⵍⵏ ⵉⵙⵙⵔⵇⴰⴱⵏ ⵜⵓⵏⵊⵉⵎⵉⵏ ⵙⴳ ⵜⴽⵕⴷⵉ ⵅⴼ ⵓⵙⵙⵉⵡⴹ ⵅⴼ ⵉⴱⴽⴽⵉⴹⵏ ⵉⵜⵜⵓⴳⴰⵏ ⵎⴳⴰⵍ ⵏⵏⵙⵏⵜ, ⵙ ⵓⵙⵏⴱⴳⵉ ⵏⵏⵙⵏⵜ ⴷ ⵢⵓⵙⴰⵏ ⴷ ⵓⵙⵡⴰⵍⴰ ⴷ ⵡⴰⵏⵏⴰⵍ ⴷ ⵓⵡⵇⵇⵔ ⵏ ⵓⵣⵔⴼ ⴳ ⵜⵥⵍⴰⵢⵜ ⴷ ⵜⵏⵜⵍⴰ ⴳ ⵇⴰⵃ ⵜⵎⴳⴳⵉⵜⵉⵏ, ⴰⵎ ⴰⵔⵣⵣⵓ ⴷ ⵓⵙⴰⴳⴳⵯ ⴷ ⵓⵎⵚⴰⵕⴰⴹ". 

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵙⵡⵓⵜⵜⵙ ⵓⵎⵣⵉⵣⵣⵍ ⴰⴷ, ⵏⵏⵉ ⵉⵃⵔⵉ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴷ ⵓⵏⴳⵎⴰⵎ ⵏ ⵜⵎⵜⵜⴰ ⵉⵎⵓⵏⵏ ⵏ ⵜⵎⵖⴰⵔⵜ ⵙⴳ ⵓⵙⴳⴳⵯⴰⵙ ⵏ 2008, ⴰⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴳ ⵇⴰⵃ ⵜⵙⴳⴳⵯⵉⵏ ⵏ ⵓⵎⴰⴹⴰⵍ, ⴰⵔ ⵜⵇⵇⴰⵔ ⵉ ⵜⵏⴱⴰⴹⵉⵏ ⴷ ⵉⵡⴰⵏⴽⵏ ⵙ ⵉⴳⵉ ⵏ ⵜⵎⴳⴳⵉⵜⵉⵏ ⵜⵓⵎⵀⵉⵍⵉⵏ ⵉ ⵓⵙⴱⴷⴷⵉ ⵏ ⵜⵓⵎⴰⵏⵜ ⴰⴷ ⴷ ⵓⵙⵡⵓⵔⵉ ⵅⴼ ⵓⵙⴼⵔⴽ ⵅⴼ ⵉⵎⵉⵣⵉ ⵏⵏⵙ ⵅⴼ ⵜⵣⵣⵉⴳⵣⵜ ⵏ ⵡⴰⵎⵓⵏ.