ⴰ. ⴱⵓⵄⵢⵢⴰⵛ : "ⴰⵙⵙⵉⵡⴹ ⴷ ⵉⵎⵉⵙ ⴰⵖⵔⵎⴰⵏ ⵉⵕⵡⴰⵏ ⵉ ⵓⵙⵎⵓⵙⵙⵓ ⵏ ⵡⴰⵎⵓⵏ ⵅⴼ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ” ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⴳⴰ ⵓⵙⵙⵉⵡⴹ ⵢⴰⵏ ⵉⵎⵉⵙ ⴰⵖⵔⵎⴰⵏ ⵉⵕⵡⴰⵏ ⵉ ⵓⵙⵎⵓⵙⵙⵓ ⵏ ⵡⴰⵎⵓⵏ ⵅⴼ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵓⵙⵓⵖⵏ ⵏ ⵓⵎⵢⴰⵙ ⴳ ⵓⴳⵏⵙ ⵏ ⵡⴰⵎⵓⵏ ⵉⴼⵔⴰⴳⵏ ⵜⵉⵡⵜⵎⵉⵏ ⵏⵏⵙ ⴷ ⵜⵔⴱⴰⵜⵉⵏ ⵏⵏⵙ ⵙⴳ ⵜⵕⵥⵉ ⵉⵀⵔⵛⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ, ⴷ ⵎⴰⵙ ⵓⵔ ⴷ ⵅⵙ ⵜⴰⵎⵖⴰⵔⵜ ⵏⵉⵖ ⵜⴰⵔⴱⴰⵜ ⴰⴷ ⵉⴳⴰⵏ ⵜⵓⵏⴳⵉⵙⵜ, ⵎⴰⵛ ⴰⵎⵓⵏ ⵇⴰⵃ.

ⵜⵙⵙⴽⵕⵥ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵜⴳⵓⵔⵉ ⵏⵏⵙ ⵏ ⵓⵕⵥⵥⵓⵎ ⴳ ⵓⵏⵎⵓⵇⵇⴰⵔ ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ ⵜⵉⴼⴰⵡⵜ ⵏ ⵡⴰⵙⵙ ⴰⴷ ⴰⵙⵉⵎⵡⴰⵙ 10 ⵎⴰⵕⵚ 2023, ⵃⵎⴰ ⴰⴷ ⵉⵙⵎⵏⵉⴷ ⵜⴰⵢⴰⴼⵓⵜ ⵏ ⵜⴰⵏⴰⴹⵜ ⵏⵏⵉ ⵉⵙⵎⵓⵜⵜⴳ ⵅⴼ ⵓⵎⵣⵉⵣⵣⵍ ⵏⵏⵉ ⵉⵕⵥⵎ ⴳ 25 ⵏⵓⵡⴰⵏⴱⵉⵔ 2021 ⴷⴷⴰⵡ ⵜⵎⴰⵜⴰⵔⵜ “ⴰⴷ ⵓⵔ ⵏⴼⵉⵙⵙ ⵅⴼ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ”, ⴷⴷⴰⵡ ⵓⵣⵡⵍ “ⵜⵉⴽⵕⴹⵉ ⴷ ⵡⴰⵔ ⴰⵙⵓⵎⵓ ⴰⴷ ⵉⵏⵇⵇⴰⵏ ⵜⵉⵔⴰⵜ ⵜⴰⵏⴼⴳⴰⵏⵜ ⵏ ⵜⵎⵖⴰⵔⵜ”, ⵅⴼ ⵡⴰⴷⴷⵓⵔ ⵏ ⵓⵙⵔⵇⴱ ⵏ ⵜⵓⵏⴳⵉⵙⵉⵏ ⵜⵓⵏⵊⵉⵎⵉⵏ ⵅⴼ ⵓⵙⵔⵇⴱ ⵅⴼ ⵓⵙⵙⵉⵡⴹ ⵏ ⵇⴰⵃ ⵡⴰⵏⴰⵡⵏ ⵏ ⵜⴽⵕⴹⵉ”, ⵜⵔⵏⵓ ⵎⴰⵙ ⵉⵃⵇⵇⴰ ⴳ ⴽⵉⴳⴰⵏ ⵏ ⵜⵉⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ ⵎⴰⵙ ⵉⴳⴰ ⵓⵙⵙⵉⵡⴹ ⵢⴰⵏ ⵉⵎⵉⵙ ⵉⵕⵡⴰⵏ ⵉ ⵓⵙⵎⵓⵙⵙⵓ ⵏ ⵡⴰⵎⵓⵏ ⵉ ⵓⵙⴱⴷⴷⵉ ⵏ ⵜⴽⵕⴹⵉ ⴷ ⵓⵥⵍⵍⴻⵍ ⴷ ⵜⴷⴰⴱⴰⵔⵜ”.

ⵜⵣⵎⵎⴻⵎ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵜⵙⴰⵇⵙⴰ ⵜⴰⵏⴰⴹⵜ ⵏ ⵓⵎⵣⵉⵣⵣⵍ ⴰⴷ, ⵏⵏⵉ ⵉⴽⴽⴰⵏ ⴰⵙⴳⴳⵯⴰⵙ ⵉⵙⵎⴷⵏ, ⴰⵙⵇⵇⵉⵎ ⵅⴼ ⵜⵎⵀⴰⵍ ⴳⴳⵓⵜⵏⵉⵏ ⵏⵏⵉ ⵉⴳⴰ, ⴳ ⵜⵖⵉⵎⵉⵜⵉⵏ ⵏ ⵓⵙⵙⴼⵍⴷ ⵏⵉⵖ ⴳ ⵉⵏⵎⵓⵇⵇⴰⵔⵏ ⵓⵙⵔⵉⴷⵏ ⵏⵉⵖ ⵜⵉⵏⴰⵡⵉⵏ, ⵅⴼ “ⴰⵙⵡⵉⵔ ⵏ ⵓⵙⵔⵇⴱ ⵏ ⵉⴹⵕⵉⵚⵏ ⵓⵍⴳⵉⵏⵏ ⵉⵎⵙⵖⴰⵔⵓⵜⵏ ⴷ ⵓⵎⵀⵉⵍⵏ ⴷ ⵜⵎⵙⴽⵉⵔⵉⵏ ⵉ ⵜⵏⴼⵔⵓⵜ ⵏ ⵓⵣⵔⴼ ⵏ ⵜⵓⵏⵊⵉⵎⵉⵏ ⵙⴳ ⵜⴽⵕⴹⵉ ⵃⵎⴰ ⴰⴷ ⴰⵡⴹⵏⵜ ⴰⵙⵙⵉⵡⴹ ⵙ ⵎⴰⴷ ⵉⵜⵜⵏⴼⵔⵓⵏ ⵜⴰⵎⵢⴰⴳⴰⵏⵜ ⵏ ⵓⵣⵔⴼ ⴳ ⵓⵙⵉⴷⴼ ⵏⵏⵙⵏⵜ ⵙ ⵜⵏⴱⴹⴰⵢⵜ ⴷ ⵓⵙⵎⴰⵎⵎⵉ, ⵃⵎⴰ ⴰⴷ ⵉⵜⵜⵓⵙⴱⴷⴷⵉ ⵓⴼⴼⵔⵜⵍ ⵙⴳ ⵜⵎⵔⵔⵓⵜ ⴷ ⵉⴱⴷⴷⵉ ⵅⴼ ⵉⵎⵓⴽⵔⵉⵙⵏ ⵓⵎⵀⵉⵍⵏ ⵏⵏⵉ ⵜⵜⵎⵏⴰⵍⴰⵏⵜ ⵜⵓⵏⵊⵉⵎⵉⵏ ⴳ ⵓⵣⵎⵣ ⵏ ⵓⵙⵙⵉⵡⴹ ⴷ ⵓⵎⴷⴰⵢⵏ ⵜⵉⵔⵎⵉⵜⵉⵏ ⵖⵓⴷⴰⵏⵉⵏ... ⴷ ⵓⵎⴷⴰⵢ ⵏ ⵉⵣⴰⴽⴰⵏ ⵏⵏⵉ ⵓⵔ ⵉⵙⵙⵡⵀⴰⵏ ⵜⴰⵎⵢⴰⴳⴰⵏⵜ ⵏ ⵡⴰⴷⴰⴼ ⵏ ⵜⵡⵜⵎⵉⵏ ⵜⵓⵏⵊⵉⵎⵉⵏ ⵏ ⵜⴽⵕⴹⵉ ⵙ ⵓⵙⵎⴰⵎⵎⵉ, ⴷ ⵜⵙⵓⵎⵔⵜ ⵏ ⵉⵙⵖⵍⴰⴼ ⵉⵎⵏⴰⵡⴰⵢⵏ ⵏⵏⵉ ⵜⵜ ⵉⵜⵜⵏⴼⵔⵓⵏ ⴳ ⵓⵣⵎⵣ ⵏ ⵓⵣⵣⵔⴰⵢ ⵅⴼ ⵓⵙⵍⴳⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵓⵙⵍⴳⵏ ⴰⵏⴱⴽⴰⴹ ⴷ ⵉⵙⵍⴳⵏⵏ ⵢⴰⴹⵏⵉⵏ ⵏⵏⵉ ⴷ ⴷⴰⵔ ⴰⵣⴷⴰⵢ”.

ⴳ ⵓⵙⵉⵡⵍ ⵏⵏⵙ ⵅⴼ ⴽⵔⴰ ⵏ ⵜⴼⵔⴽⵉⵡⵉⵏ ⵏ ⵓⵎⵣⵉⵣⵣⵍ ⴰⴷ ⴰⵙⴳⵯⵙⴰⵏ, ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⴷⴷⵓⵔ ⵏ ⵓⴼⵔⴰⴽ ⴰⵎⴳⵔⵓ ⵉ ⵓⵙⴱⴷⴷⵉ ⵏ ⵜⵓⵎⴰⵏⵜ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵓⵎⵢⴰⵖ ⵏ ⵉⵎⴰⵙⵙⵏ ⵓⵏⴱⵉⴹⵏ ⴷ ⵓⵣⵔⵉⴼⵏ ⴷ ⵉⵎⵔⵙⴰⵍⵏ ⵣⵎⵔⵏⵉⵏ ⴰⴷ ⵏⴼⵔⵓⵏ ⴰⵎⴷⴰⵢ ⴷ ⵜⵓⵎⵙⵉⵙⵜ ⴷ ⵓⴼⵔⴰⴳ ⴷ ⵡⴰⵔⴰⵢ", ⵜⵣⵎⵎⴻⵎ ⴰⵡⴷ ⵎⴰⵙ ⵍⵍⴰⵏ "ⵉⵙⵇⵙⵉⵜⵏ ⵏ ⵓⵖⵉⵍⵓⴼ ⵏⵏⵉ ⵉⵙⵓⵍⵏ ⴷⴰ ⴰⵖ ⵙⴰⵇⵙⴰⵏⵜ ⵅⴼ ⵉⵎⵓⴽⵔⵉⵙⵏ ⵏⵏⵉ ⵜⵜⵎⵏⴰⵍⴰⵏⵜ ⵜⵓⵏⵊⵉⵎⵉⵏ ⵏ ⵜⴽⵕⴹⵉ ⴳ ⵓⵙⵙⵉⵡⴹ ⴷ ⵜⴽⵚⵚⴰⴹ ⵙⴳ ⵜⵉⵖⴰⵡⵜ ⵜⵓⴽⵕⵉⴹⵜ ⴷ ⵓⵥⴰⵥⴰ ⵏ ⵉⴱⵔⴷⴰⵏ ⵏ ⵓⵙⵎⴰⵎⵎⵉ ⴷ ⵡⴰⵔ ⵉⴳⵉ ⵏ ⵜⵎⴳⴳⵉⵜⵉⵏ ⵉⵜⵜⵡⵇⵇⴰⵔⵏ ⵜⴰⵥⵍⴰⵢⵜ ⴷ ⵜⵏⵜⵍⴰ ⴷ ⵡⴰⵔ ⴰⵙⵎⵀⵍ ⵏ ⵉⵙⵡⵓⴷⴷⵓⵜⵏ ⵏ ⵓⴼⵔⴰⴳ ⵏ ⵓⵏⴳⵉⵙⵏ ⴷ ⵉⵏⴰⴳⴰⵏ ⴷ ⵉⵎⵙⵙⵉⵡⵉⴹⵏ ⴷ ⵓⵥⴰⵥⴰ ⵏ ⵜⵉⵍⴰⵡⵜ, ⵙⵓⵍ ⴷ ⵉⵣⴰⴽⴰⵏ ⵉⵚⵓⵚⵢⵓ ⵉⴷⵍⵙⴰⵏⵏ ⵏⵏⵉ ⵉⵙⵙⵉⵔⵉⵡⵏ ⵜⵓⵙⵙⵏⴰ ⵏ ⵡⴰⵔ ⴰⵙⵙⵉⵡⴹ ⵙ ⵜⵎⵏⵜⵉⵍⵉⵏ ⵜⵓⵍⴳⵉⵏⵉⵏ ⴷ ⵜⵓⵎⵀⵉⵍⵉⵏ ⴷ ⵜⵏⵉⵍⴰⵡⵉⵏ, ⵏⵏⵉ ⵓⵔ ⵉⵜⵜⴰⴷⵊⴰⵏ ⵜⵓⵏⵊⵉⵎⵉⵏ ⵙⴳ ⵜⴽⵕⴹⵉ ⴰⴷ ⴰⵡⴹⵏⵜ ⵉⴱⵔⴷⴰⵏ ⵏ ⵓⵙⵎⴰⵎⵎⵉ, ⴷ ⵜⵙⵓⵍⴰⵏⵜ ⵏ ⵜⵎⵍⵍⵉⵢⵉⵏ ⵜⵓⵍⴳⵉⵏⵉⵏ ⵅⴼ ⵓⵙⴱⴽⴽⵉⴹ ⵏ ⵡⴰⵏⴰⵡⵏ ⴳⴳⵓⵜⵏⵉⵏ ⵏ ⵜⴽⵕⴹⵉ ⴷ ⵡⴰⵔ ⵜⵓⵎⵙⵉⵙⵜ ⵏ ⵢⴰⵏ ⵓⴳⵣⵣⵓⵎ ⵙⴳ ⵉⵣⵣⵔⴰⴼⵏ ⵏⵏⵖ ⴰⴽⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ...".

ⵉ ⵓⵙⴽⵜⵉ, ⵜⵙⵎⵏⵉⴷ ⵜⴰⵏⴰⴹⵜ ⵙⵎⵎⵓⵙ(5) ⵏ ⵉⵙⵖⵍⴰⴼ ⵓⵚⴽⵉⵡⵏ ⵅⴼ ⵜⵎⵙⴽⵉⵔⵉⵏ ⵜⵉⵎⵢⴰⵇⵇⴰⵏⵉⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵙⵖⵍⴰⴼ ⵉⵜⵜⵓⵙⵡⴰⵍⴰⵏ ⵉ ⵜⵎⵔⵙⴰⵍ ⵎⵎⴽⵛⴰⵎⵏⵉⵏ ⴳ ⵜⵙⵓⵎⴰⵔ ⵏ ⵜⵎⵙⴰⵔⵉⵏ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵉⵍⴰⵍⵜ ⵏ ⵜⵏⵖⵎⴰⵙⵜ ⴷ ⵓⵙⵏⵖⵎⵙ, ⴷ ⵓⵍⴰ ⵢⴰⵜ ⴷ ⵎⵔⴰⵡⵜ ⵏ ⵜⵢⴰⴼⵓⵜⵉⵏ (11) ⵜⵉⴷⵙⵍⴰⵏⵉⵏ, ⵙⴳⵉⵙⵏⵜ : ⴰⵏⵎⵔⵉ ⵏ ⵜⴱⵔⵉⴷⵉⵏ ⴳⴳⵓⵜⵏⵉⵏ ⵏ ⵓⵙⵙⵉⵡⴹ ⵏ ⵜⴽⵕⴹⵉ, ⵏⵏⵉ ⴳ ⴰⵎⵓⵏⵜ ⵜⵎⵓⴽⵔⵉⵙⵉⵏ ⵏ ⵜⵥⵍⴰⵢⵜ ⵜⴰⴷⵖⴰⵔⴰⵏⵜ; ⵜⵓⵜⵜⵔⴰ ⵙⴳ ⵜⵡⵜⵎⵉⵏ ⵜⵓⵏⵊⵉⵎⵉⵏ ⵙⴳ ⵜⴽⵕⴹⵉ ⴰⵥⴰⵥⴰ ⵏ ⵜⵉⵍⴰⵡⵜ, ⵎⴰⵢⴰ ⵏⵏ ⴰⴷ ⵉⵜⵜⴹⵉⵚⵏ ⵅⴼ ⵓⴱⵔⵉⴷ ⵏ ⵓⵙⵙⵉⵡⴹ; ⴰⵎⵣⴰⵔⴰⵢ ⵏ ⵜⵙⵏⴱⴹⴰⵢⵉⵏ ⵍⵍⴰⵏⵉⵏ ⴳ ⵢⴰⵜ ⵜⵙⴽⵯⴼⵍⵜ ⴷ ⵉⵏⴳⵔ ⵜⵙⵏⴱⴹⴰⵢⵉⵏ ⵎⵣⴰⵔⴰⵢⵏⵉⵏ ⴳ ⵜⵙⴽⵯⴼⵍⵉⵏ, ⵅⴼ ⵓⵙⵎⵙⴰⵙⴰ ⵏ ⵜⴳⵔⵓⵎⵎⴰ ⵏ ⵉⵎⵢⴰⴳⴰⵏ ⵎⵎⵔⵡⴰⵙⵏⵉⵏ ⵉⴷⴷⵖ ⵓⵔ ⴼⴰⵡⵏ ⵉⵙⵏⵎⵍⵏ ⴷ ⵡⴰⵔ ⴰⵙⴱⴽⴽⵉⴹ ⵏ ⵜⴳⵔⵓⵎⵎⴰ ⵏ ⵉⵎⵢⴰⴳⵏ; ⵜⵉⵍⵉⵜ ⵏ ⵜⴱⵔⵉⴷⵜ ⵏ ⵜⵓⴽⴽⵉ ⵏ ⵓⵙⴰⵜⵉ ⵏ ⵜⵉⵙⵙⵍⵜ ⵉ ⵜⵎⵙⴰⵔⵉⵏ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⵉⵥⴹⴰⵕ ⴰⴷ ⵉⴳ ⴰⵙⵏⵓⵎⵎⵍ ⵏ ⵉⵣⵏⵏⵉⵔⵏⴽ, ⴷ ⵓⴳⴳⴰⵔ.