ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵜⴳⴰ ⵜⴽⵕⴹⵉ ⵎⴳⴰⵍ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⵜⵉⵕⵥⵉ ⵜⴰⵎⵇⵇⵔⴰⵏⵜ ⵏⵏⴰ ⵉⵜⵜⵎⵏⴰⵍⴰⵏ ⵉⵙⵙⴰⵔ ⴰⴼⵊⵊⵉⵊ ⵏ ⵜⵎⵖⴰⵔⵜ ⵙ ⵉⵣⵔⴼⴰⵏ ⵏⵏⵙ ⵉⴷⵙⵍⴰⵏⵏ, ⴰⵔ ⵉⵏⵇⵇⴰ ⴰⴷⴷⵓⵔ ⵏⵏⵙ, ⴰⵔ ⴷ ⵉⴼⴼⴰⵍ ⵉⴷⵔⵉⵣⵏ ⵜⵜⵎⴰⴹⴰⵍⵏⵉⵏ ⵅⴼ ⵓⵏⴳⵉⵙⵏ ⵏⵏⵙ ⴷ ⵜⵡⵏⵏⴰⴹⵜ ⵏⵏⵙⵏ.

ⵜⵔⵏⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⴳ ⵢⴰⵜ ⵜⴳⵓⵔⵉ ⵍⵍⵉ ⵉⵜⵜⵡⴰⵖⵔⴰⵏ ⴼⵍⵍⴰⵙ ⵙ ⵜⵎⵓⵔⴰⵢⵜ ⵙ ⵓⵣⵎⵎⵣⵓ ⵏ ⵓⵕⵥⵥⵓⵎ ⵏ ⵜⵙⴰⵡⵔⵜ ⵜⴰⵎⵢⴰⵖⵜ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴳ ⵜⵉⴼⴰⵡⵜ ⵏ ⵡⴰⵙⵙ ⵏ ⵓⵙⵉⵎⵡⴰⵙ 29 ⵏⵓⵡⴰⵏⴱⵉⵔ 2024, ⴳ ⵓⵙⴰⵜⵉ ⵏ ⵉⵎⵓⵙⵙⵓⵜⵏ ⵏ ⵡⵓⵙⵙⴰⵏ ⵏ ⵜⵎⵜⵜⴰ ⵉⵎⵓⵏⵏ "16 ⵏ ⵡⴰⵙⵙ ⵏ ⵉⵎⵓⵙⵙⵓⵜⵏ  ⵎⴳⴰⵍ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ", ⵎⴰⵙ ⵉⴳⴰ ⵓⴱⵓⵖⵍⵓ ⵏ ⵜⴰⵜⵉⴽⵏⵓⵍⵓⵊⵉⵜ ⵏ ⵓⵎⵍⴰⵏ ⴷ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⴷ ⵓⵏⵖⴰⵍ ⵏ ⵓⵙⵎⵔⵙ ⵏⵏⵙⵏ ⵉⵖⵉⵢ ⴰⴷ ⵢⴰⵡⵉ ⵓⵙⴷⵓⵙ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵜ ⴳ ⵓⵎⴰⴹⴰⵍ ⴰⵍⵉⴽⵟⵕⵓⵏⵉ, ⵜⵙⵙⵎⵜⵔ ⵎⴰⵙ ⴳⴰⵏ ⵉⵙⴰⵢⵔⴰⵔⵏ ⵓⵙⵍⵉⴷⵏ ⵉⴷⵖⴰⵔⵏ ⴱⴰⵀⵔⴰ ⴳ ⵜⵜⵓⴳⴰ ⵜⴽⵕⴹⵉ ⵉ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ.

ⴳ ⵓⵎⵏⵉⴷ ⴰⴷ, ⵜⵙⵙⴽⵜⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵙⵖⴹⴼ ⵏ ⵜⵎⵖⵜⴰⵙⵜ ⵜⴰⵎⵥⵍⵉⵜ ⵉⵏⵜⴰⵢⵏ ⵙ ⵜⴽⵕⴹⵉ ⵎⴳⴰⵍ ⵏ ⵜⵡⵜⵎⵉⵏ ⵎⴰⵙ ⴷ ⴰⵙⵎⵔⵙ ⵏ ⵜⴰⵜⵉⴽⵏⵓⵍⵓⵊⵉⵜ ⵏ ⵓⵎⵍⴰⵏ ⴷ ⵉⵎⵢⴰⵡⴰⴹⵏ, ⴱⵍⴰ ⵜⴰⵙⵖⵣⵏⵜ ⵏ ⵜⴱⵔⵉⴷⵜ ⴷ ⵢⵓⵙⴰⵏ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵣⵎⵔ ⴰⴷ ⵢⴰⵡⵙ ⴳ ⵜⵔⵏⴰⵡⵜ ⵏ ⵓⵙⵏⵓⵃⵢⵓ ⵉⴱⴷⴷⵏ ⵅⴼ ⵡⴰⵏⴰⵡ ⴷ ⵓⵙⴳⵓⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⵜⵔⵏⵓ ⵎⴰⵙ ⵜⵙⵙⵖⵍⴼ ⴰⴷ ⵎⵏⴰⵍⴰⵏ ⵉⵡⴰⵏⴽⵏ ⵙ ⵓⵎⵙⴰⵙⴰ ⴷ ⵓⵎⵏⵣⴰⵢ ⵏ ⵓⵏⵀⵍⵍⴰ ⵓⵛⵛⵉⵍ ⵙ ⵜⴰⵍⵖⵉⵡⵉⵏ ⵏ ⵜⴽⵕⴹⵉ ⵜⵉⵎⴰⵢⵏⵓⵜⵉⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⵉⴷⴷⵖ ⴳⴰⵏⵜ ⵜⵉⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵎⵓⵏ ⴳ ⵓⵙⴰⵜⵉ ⴰⵎⵉⵔⵉⵡ ⵏ ⵓⵙⵏⵓⵃⵢⵓ ⵎⴳⴰⵍ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ.

ⴳ ⵢⴰⵜ ⵜⵙⴳⴰ ⵢⴰⴹⵏ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵣⵎⵎⴻⵎ ⵓⵙⵇⵇⵉⵎ ⴳ ⵎⵏⵏⴰⵡⵜ ⵏ ⵜⴰⵏⴰⴹⵉⵏ ⵜⵉⵙⴳⵯⵙⴰⵏⵉⵏ ⴷ ⵜⵙⴳⵓⵎⴰⵏⵉⵏ ⵉⴹⵉⵚ ⵉⵜⵜⵡⴰⵔⵏⴰⵏ ⵏ ⵓⵙⵎⵔⵙ ⵏ ⵜⵉⴽⵏⵓⵍⵓⵊⵉⵜ ⵜⴰⵜⵔⴰⵔⵜ ⵅⴼ ⵓⵍⵓⵢ ⵏ ⵜⴽⵕⴹⵉ ⵎⴳⴰⵍ ⵏ ⵜⵡⵜⵎⵉⵏ ⴷ ⵜⵕⵥⵉⵢⵉⵏ ⵏ ⵓⵣⵔⴼ ⴳ ⵜⵓⴷⵔⵜ ⵉⵥⵍⵉⵏ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵓⵙⴱⴷⴷⵉ ⵏ ⵓⴼⴼⵔⵜⵍ ⵙⴳ ⵜⵎⵔⵔⵓⵜ ⴷ ⵓⵍⴰ ⵜⵉⵢⴰⴼⵓⵜⵉⵏ ⵏ ⵜⴰⵏⴰⴹⵜ ⵏⵏⴰ ⴷ ⵉⵙⵙⴰⴼⵖ ⵓⵙⵇⵇⵉⵎ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴳ ⵓⵎⵏⴰⴹ ⵏ ⵓⵏⴷⵓⴷⵉ ⵏ 8 ⵛⵓⵜⴰⵏⴱⵉⵔ 2023.

ⵉⵇⵇⴰⵏ ⴷ ⴰⴷ ⵏⵙⵙⴽⵜⵉ ⵎⴰⵙ ⵜⵙⵙⵉⴷⴷ ⵜⵙⴰⵡⵔⵜ ⴰⴷ ⵜⴰⵎⵢⴰⵖⵜ, ⵏⵏⴰ ⵉⵜⵜⵡⴰⵙⵙⴰⵏ ⵙ ⵜⴷⵔⴰⵡⵜ ⵏ ⴽⵉⴳⴰⵏ ⵏ ⵉⵎⵙⵎⵓⵙⵙⵓⵜⵏ ⵉⵎⵙⵎⵓⵏⵏ, ⵅⴼ ⵉⵙⵏⵜⴰⵍ ⵣⵓⵏ ⴷ: ⵜⵉⴽⵕⴹⵉ ⵎⴳⴰⵍ ⵏ ⵜⵡⵜⵎⵉⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⴳ ⵓⵣⵎⵣ ⵏ ⵜⵙⵙⴰⵙⵉⵏ ; ⵉⴹⵉⵚ ⵏ ⵓⵙⵏⴼⵍ ⵏ ⵓⵏⴳⵉⴳⵜ ⵅⴼ ⵓⵙⴳⵓⴷⵉ ⵏ ⵜⴽⵕⴹⵉ ⴷ ⵓⵙⵏⵓⵃⵢⵓ ⵎⴳⴰⵍ ⵜⵉⵔⴱⴰⵜⵉⵏ ; ⵉⴷⵔⵉⵣⵏ ⵏ ⵜⴽⵕⴹⵉ ⵜⴰⵎⵓⵟⵟⵓⵏ ⵎⴳⴰⵍ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ; ⵉⵎⴰⵙⵙⵏ ⵏ ⵓⴹⴼⴼⵓⵕ ⴷ ⵓⵏⵏⵖⵍⴼ ⵙ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ ⵏⵏⴰ ⵉⴳⴰⵏ ⵓⵏⴳⵉⵙⵏ ⵏ ⵜⴽⵕⴹⵉ, ⴷ ⵓⴳⴳⴰⵔ.