ⵉⴷⵔⵓ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵙⵙ ⵏ ⵓⴽⵕⴰⵙ 19 ⵉⴱⵔⵉⵔ 2023, ⴳ ⵉⵎⵓⵙⵙⵓⵜⵏ ⵏ ⵜⵔⴳⵍⴰ ⵏ ⵓⵎⵣⵉⵣⵣⵍ (IDONT) "ⵓⵔ ⵔⵉⵖ" ⵎⴳⴰⵍ ⴰⵙⵜⵉⵀⵍ ⵏ ⵡⴰⵣⵣⴰⵏⵏ, ⵏⵏⵉ ⵜⵙⵏⵎⴰⵍⴰ ⵜⴼⵏⵉⵇⵜ ⵏ ⵜⵎⵜⵜⴰ ⵉⵎⵓⵏⵏ ⵙ ⵓⵎⵢⴰⵡⴰⵙ ⴰⴽⴷ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ. ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵢⵓⵍⵙ ⵎⴰⵙⵙ ⴱⵏⵚⴰⵍⵃ ⴰⵙⴷⴷⵉⴷ ⵅⴼ ⵡⴰⵏⵏⴰⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵓⵎⵣⵉⵣⵣⵍ ⴰⴷ ⴷ ⵓⵙⵓⵖⵏ ⵏⵏⵙ ⵙ ⵓⵎⵢⴰⵡⴰⵙ ⵉⵙⵎⴷⵏ ⵃⵎⴰ ⴰⴷ ⵜⵜⵡⴰⴼⵔⴰⴳⵏ ⵡⴰⵣⵣⴰⵏⵏ ⵙⴳ ⵍⵉⵜⵉⵀⴰⵍ ⵏ ⵣⵉⴽⴽ ⵙ ⵜⵡⵉⵍⴰ ⵜⴰⵎⵢⴰⵀⴰⵏⵜ ⴷ ⵜⵎⵖⵍⴰⵍⵜ. ⵉⵔⵏⵓ ⵎⴰⵙⵙ ⴱⵏⵚⴰⵍⵃ ⵎⴰⵙ ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⵢⵉⵡⵍ ⵏ ⵣⵉⴽⴽ ⵏ ⵡⴰⵣⵣⴰⵏⵏ ⵢⴰⵜ ⵜⵡⵉⵍⴰ ⵙⴳ ⵜⵡⵉⵍⴰⵜⵉⵏ ⵏ ⵜⴽⵕⴹⵉ ⵜⴰⵡⵙⵢⴰⵏⵜ, ⴷ ⵎⴰⵙ ⵉⴳⴰ ⵢⴰⵜ ⵙⴳ ⵜⵡⵉⵍⴰⵜⵉⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵓⴱⵓⵔⵣ ⵏⵏⵙ ⴷ ⵜⵏⴼⵔⵓⵜ ⵏ ⵜⴼⴳⴳⴰ ⵏⵏⵙ ⴷ ⵓⵏⵏⵍⵉ ⵏⵏⵙ ⴷ ⵜⴳⵎⵉ ⵏⵏⵙ, ⵙⵍⴰⵡⴰⵏ ⴰⴽⴽⵯ ⴰⴼⵊⵊⵉⵊ ⵏⵏⵙ ⵙ ⵉⵣⵔⴼⴰⵏ ⵏⵏⵙ ⵉⴷⵙⵍⴰⵏⵏ, ⵉⵙⴷⴷⵉⴷ ⵎⴰⵙ ⵓⵔ ⵉⵙⵖⴰⵡⵙⴰ ⵓⵙⴱⴷⴷⵉ ⵏ ⵜⵓⵎⴰⵏⵜ ⵏ ⵓⵙⵢⵉⵡⵍ ⵏ ⵡⴰⵣⵣⴰⵏⵏ ⵖⴰⵙ ⵙ ⵜⵉⵔⴰⵜ ⵜⴰⵙⵔⵜⴰⵏⵜ ⵎⴰⵛ ⴰⵡⴷ ⴰⵙⵎⵓⵙⵙⵓ ⴰⵏⴰⵎⵓⵔ ⵉⴱⴷⴷⵏ ⵅⴼ ⵜⵙⴰⵖⵓⵍⵜ ⵉⵛⵛⴰⵕⵏ, ⵜⵜ ⵉⴳⴰⵏ ⴷ ⵜⵎⵢⴰⴷⴰⵙⵜ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵡⴰⵣⵣⴰⵏ. ⴳ ⵓⵙⵉⵡⵍ ⵏⵏⵙ ⵅⴼ ⵜⴱⵔⵉⴷⵉⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵡⴰⵣⵣⴰⵏⵏ, ⵉⵙⵉⵙⴼⵉⵡ ⵎⴰⵙⵙ ⴱⵏⵚⴰⵍⵃ ⵎⴰⵙ ⵉⴳⴰ ⴷ ⵉⵇⵇⴰⵏ ⴷ ⴰⴷ ⵜⴻⵜⵜⵓⵙⵖⵣⵏ ⵜⵎⵢⴰⴷⴰⵙⵜ ⵜⴰⵍⴳⴷⵉⵙⵜ ⵉⵜⵜⵓⵙⵎⵣⴷⴰⵢⵏ ⵜⴰⴳⵜⵥⵍⵉⵜ ⵉⵏⵏⴰⵍⵏ ⵅⴼ ⵉⵣⵔⴼⴰⵏ ⵏ ⵡⴰⵣⵣⴰⵏ ⴳ ⴰⵎⵓⵏ ⵇⴰⵃ ⵉⵎⴳⴳⴰⵢⵏ ⵏⵜⴰⵢⵏⵉⵏ ⵙ ⵓⴼⵔⴰⴳ ⵏ ⵡⴰⵣⵣⴰⵏ ⴷ ⵡⴰⵣⵣⴰⵏⵏ ⴰⵡⴷ ⵏⵉⵜⵏⵉ. ⴳ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵓⵙⵎⵙⴰⵙⴰ ⵏ ⵓⵙⵍⴳⵏ ⵏ ⵜⵡⵊⴰ ⴰⴽⴷ ⵢⵉⵎⴰⵏ ⴷ ⵉⵙⴱⴷⴰⴷⵏ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵓⵙⴷⴷⵔⴼ ⵏ ⵓⵙⴷⴷⵉ ⵏ ⵓⵙⵔⵓⵙ ⵏ ⵓⵙⵍⴳⵏ ⵏ ⵜⵎⵥⵉ ⵏⵏⵉ ⵉⴳⴰⵏ ⴰⵙⴰⵜⵉ ⵓⵣⵔⵉⴼ ⴰⵎⴰⴷⴷⴰⵙ ⴰⵖⵣⵓⵔⴰⵏ. ⵎⴽⴷⴰ ⵉⵙⵖⵍⴼ ⵓⵙⵇⵇⵉⵎ ⵙ ⵓⵙⵔⵓⵙ ⵏ ⵓⵙⵎⵍ ⴰⵎⵏⴰⵡⴰⵢ ⵅⴼ ⵉⵜⵜⵓⵎⵙⴰⵙⴰ ⵅⴼ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ ⵜⵏⴼⵔⵓⵜ ⵏ ⵓⵙⴽⴰⵔ ⵙⵉⵔⵙ ⴳ ⵇⴰⵃ ⵜⵎⴳⴳⵉⵜⵉⵏ ⴷ ⵜⵙⵏⵜⴰⵢⵉⵏ ⵉⵜⵜⵓⴳⴰⵏ ⵎⴳⴰⵍ ⵜⵓⵎⴰⵏⵜ ⴰⴷ. ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵜⵜⵡⴰⵕⵥⴰⵎ ⵓⵎⵣⵉⵣⵣⵍ (IDONT) "ⵓⵔ ⵔⵉⵖ" ⴳ ⵓⵙⴳⴳⵯⴰⵙ ⵏ 2022 ⵙ ⵜⵎⴷⵔⴰⵡⵜ ⵏ 50 ⵏ ⵓⵎⵙⵎⵓⵙⵙⵓ ⴷ ⵜⵎⵙⵎⵓⵙⵙⵓⵜ ⵅⴼ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵉⴳⵏⵙⴰⵙ ⵉⵎⵔⵙⴰⵍⵏ ⴷ ⵉⵏⴰⵥⵓⵕⵏ ⴷ ⵉⵏⵖⵎⴰⵙⵏ ⴷ ⵉⵎⴹⵉⵚⵏ. ⵉⵙⵙⵉⴷⴷ ⵓⵙⵎⵓⵙⵙⵓ ⴰⴷ ⴰⴽⵙⵡⴰⵜ ⵅⴼ ⵉⵎⵉⵣⵉⵜⵏ ⵏⵏⵉ ⵉⵜⵜⴰⵡⵉⵏ ⵖⵔ ⵓⵙⵢⵉⵡⵍ ⵏ ⵡⴰⵣⵣⴰⵏⵏ ⴷ ⵜⵓⵙⵓⵔⵉⵏ ⵏⵏⵙ ⵉⵕⵥⵥⴰⵏ ⵉⵣⵔⴼⴰⵏ ⴷ ⵜⴷⵓⵙⵉ ⴷ ⵓⵙⵍⵎⴷ ⴷ ⵢⵉⵎⴰⵍ ⵏ ⵉⵙⵜ ⵎⵔⴰⵡⵜ ⵏ ⵢⵉⴼⴹⵏ ⵏⵏⵉ ⵉⵜⵜⵓⵙⵜⵉⵀⵍⵏ ⴽⵓ ⴰⵙⴳⴳⵯⴰⵙ. ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⴰⴷ ⵙ ⵜⴷⵔⴰⵡⵜ ⵏ ⵜⵓⴳⵜ ⵏ ⵉⵎⵙⵜⴳⴳⴰⵔⵏ, ⵙⴳⵉⵙⵏ ⵜⴰⵎⴰⵡⵙⴰⵙⵜ ⵏ ⵜⴱⴷⴰⴷⵜ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵊⴰ, ⵜⴰⵎⵙⵇⴰⴷⵜ ⵏ ⴽⴰⵏⴰⴷⴰ ⴳ ⵍⵎⵖⵔⵉⴱ, ⵜⴰⵎⵣⴷⴰⵢⵜ ⵜⴰⵎⵣⴷⴰⵖⵜ ⵏ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⴳ ⵍⵎⵖⵔⵉⴱ, ⴰⴳⵏⵙⴰⵙ ⵏ ⵜⴼⵏⵉⵇⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵎⵣⴷⴰⵖⵏ ⴳ ⵍⵎⵖⵔⵉⴱ, ⵜⴰⴳⵏⵙⴰⵙⵜ ⵜⴰⵎⴰⵡⴰⵙⵜ ⵏ ⵍⵢⵓⵏⵉⵙⵉⴼ ⴷ ⵓⵏⵎⵀⴰⵍ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.