ⵉⵕⵥⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵎⵡⴰⵙ 29 ⵎⴰⵕⵚ 2024, ⵢⴰⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⵙⵏⵜⵍ "ⴰⵙⵏⴼⵍ ⵏ ⵓⵏⴳⵉⴳⵜ.. ⴰⵙⴷⵉⴷⴷⵉ ⴰⵎⴰⴹⵍⴰⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ", ⴳ ⵓⵙⵖⵉⵎ ⵏⵏⵙ ⴰⵏⴰⵎⵎⴰⵙ ⴳ ⵕⵕⴱⴰⵟ, ⴳ ⵓⵙⴰⵜⵉ ⵏ ⵜⵙⵓⵜⵍⵜ ⵜⵉⵙⵙ ⴽⵕⴰⴹⵜ ⵏ ⵜⵙⵓⵜⵍⵉⵏ ⵏ "ⴰⴳⵓⵔⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵍⵍⵉ ⵉⵜⵜⵡⴰⵙⵙⴰⵏⵏ ⵙ ⵜⴷⵔⴰⵡⵜ ⵏ ⵉⴳⵏⵙⴰⵙ ⵏ ⵢⵉⴳⵔⵏ ⵏ ⵜⵏⴱⴰⴹⵜ ⴷ ⵡⴰⵎⵓⵏ ⵓⵖⵔⵉⵎ ⴷ ⵉⵎⵔⵣⵓⵜⵏ ⴷ ⵉⵎⵓⵙⵏⴰⵡⵏ ⴳ ⵉⴳⵔⴰⵏ ⵉⵎⵢⴰⵏⴰⵡⵏ ⵏ ⵓⵙⵏⴼⵍ ⵏ ⵓⵏⴳⵉⴳⵜ.

ⴳ ⵜⴳⵓⵔⵉ ⵏⵏⵙ ⵏ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴰⴷ, ⵉⵙⴰⵡⵍ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵜⵎⵓⴽⵔⵉⵙⵉⵏ ⵜⵉⴷⵙⵍⴰⵏⵉⵏ ⵍⵍⵉ ⵢⵓⴷⵊⴰⵏ ⴰⵙⵇⵇⵉⵎ ⴰⴷ ⵉⵙⵙⴽⵜⵉ ⵙ ⵓⵎⴹⴰⴽⴰⵕ ⵏ ⵓⵙⴳⵓⵎ ⴰⴷ, ⵉⵙⴷⴷⵉⴷ ⵎⴰⵙ "ⴷⴰ ⵜⵜⴹⵉⵚ ⵜⵙⵔⵜⵉⵜ ⵏ ⵓⵏⴳⵉⴳⵜ ⴽⵉⴳⴰⵏ ⵅⴼ ⵜⵓⴳⵜ ⵏ ⵉⵙⵏⵜⴰⵍ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵎⴰⵏ ⴰⵢⴰ ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏⵏⵉ ⴳⴰⵏⵉⵏ ⵜⵉⵎⵏⵜⴰⵢⵉⵏ ⴷ ⵜⵖⵓⵔⵉ ⵏ ⵓⵎⵙⴰⴳⴰⵔ ⵏⵏⵙⵏⵜ ⴷ ⵓⵙⵖⵍ ⵏ ⵜⵕⵡⵉ ⵏⵏⵙⵏⵜ".

ⵓⵔ ⵉⵜⵜⵓ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ ⴰⴷ ⵉⵙⵙⴽⵜⵉ ⵙ ⵉⴹⵉⵚⵏ ⵏ ⵉⵙⵏⴼⵍⵏ ⵏ ⵓⵏⴳⵉⴳⵜ ⵅⴼ ⵓⵣⵔⴼ ⴳ ⵜⴷⵓⵙⵉ ⴷ ⵓⵣⵔⴼ ⴳ ⵜⵡⵏⵏⴰⴹⵜ ⵉⵖⵓⴷⴰⵏ ⴷ ⵉⵣⴷⴷⵉⴳⵏ ⴰⵎⴽ ⵍⵍⵉ ⵜ ⵉⵙⵖⵥⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴳ ⵜⵉⴽⵍⵉⵜ ⵜⴰⵎⵣⵡⴰⵔⵓⵜ ⴳ ⵓⵙⴳⴳⵯⴰⵙ ⵏ 2021, ⵉⵙⴷⴷⵉⴷ ⵎⴰⵙ ⵉⵏⵏⵓⵔⵣ ⵓⵙⵇⵇⵉⵎ ⴰⴷ ⵉⵙⵏⵎⴰⵍⴰ ⴰⵎⴹⴰⴽⴰⵕ ⴰⴷ ⴰⴷ ⵉⵎⵢⴰⵖ ⴰⴽⴷ ⵉⵎⵥⵍⴰⵢⵏ ⴳ ⵢⵉⴳⵔ ⵏ ⵉⵙⵏⴼⵍⵏ ⵏ ⵓⵏⴳⵉⴳⵜ ⴷ ⴽⵉⴳⴰⵏ ⵏ ⵉⵎⵙⵡⵓⵔⵉⵢⵏ ⴳ ⵢⵉⴳⵔ ⴰⴷ ⴷ ⵉⵙⴷⵉⴷⴷⵉⵢⵏ ⵏⵏⵙ ⵉⵎⵔⴷⵓⵜⵏ ⵅⴼ ⵜⵓⴳⵜ ⵏ ⵉⵣⵔⴼⴰⵏ, ⵉⵙⵎⵏⵉⴷ ⴳ ⵓⵎⵏⵉⴷ ⴰⴷ ⴰⴷⴷⵓⵔ ⵏ ⵉⵙⵏⴼⴰⵔ ⵏ ⵜⵥⴹⴰⵕⵜ ⵉⵜⵜⵓⵙⵎⴰⵢⵏⵓⵏ ⵍⵍⵉ ⵉⵙⴽⵔ ⵍⵎⵖⵔⵉⴱ ⵃⵎⴰ ⴰⴷ ⵉⵜⵜⵡⴰⵔⵏⴰⵡ ⵓⵎⵙⴰⵔⴰⵙ ⵏ ⵓⵙⵙⵉⴷⵔⵓⵙ ⵏ ⵉⴳⴰⵣⵏ ⵉⵔⵖⴰⵏ.

ⴳ ⵓⵎⵏⵉⴷ ⴰⴷ, ⵙⵙⵓⵜⵔⵏ ⵉⵎⵙⴰⵡⴰⵍⵏ ⴰⴷ ⵉⵣⴷⵉ ⵓⵙⴼⵔⴽ ⵏ ⵉⵎⵣⴷⴰⵖⵏ, ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ, ⵙ ⵉⵙⴷⵉⴷⴷⵉⵢⵏ ⵣⴷⵉⵏⵉⵏ ⵙ ⵉⵙⵏⴼⵍⵏ ⵏ ⵓⵏⴳⵉⴳⵜ, ⴷ ⴰⴷ ⵙⴽⵔⵏ ⴰⵙⵏⴰⵍ ⴰⵎⴰⵙⵙⴰⵏ ⴷ ⵢⵓⵙⴰⵏ, ⵙⴽⴽⵕⵥⵏ ⵅⴼ ⵡⴰⴷⴷⵓⵔ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵜⴰⵜⵉⴽⵏⵓⵍⵓⵊⵉⵜ ⴳ ⵓⵙⴱⴷⴷⵉ ⵏ ⵉⵙⵏⴼⵍⵏ ⵏ ⵓⵏⴳⵉⴳⵜ. ⵙⵙⵓⵜⵔⵏ ⴰⵡⴷ ⴰⵙⵔⵓⵙ ⵏ ⵢⴰⵜ ⵜⵙⵜⵔⴰⵜⵉⵊⵉⵜ ⵜⴰⵖⵣⵓⵔⴰⵏⵜ ⴰⴼⴰⴷ ⴰⴷ ⵜⵜⵓⵙⴱⵉⴷⴷⵏⵜ ⵜⵓⵙⵓⵔⵉⵏ ⵏ ⵓⵣⵏⴼⵍ ⵏ ⵓⵏⴳⵉⴳⵜ, ⵙⵙⴽⵕⵥⵏ ⵅⴼ ⵜⵏⴱⵣⴰⵣⵜ ⵏ ⵉⴳⵉ ⵏ ⵜⵎⵢⴰⴷⴰⵙⵜ ⵜⴰⵏⵊⵎⵓⵜ ⵉⵙⵡⵓⵜⵜⵙⵏ ⴰⵙⵙⵉⴷⵔⵓⵙ ⵏ  ⵉⵎⵣⴰⵔⴰⵢⵏ ⵉⵍⵍⴰⵏ ⴳⵔ ⵜⵎⵉⵣⴰⵔ ⴳ ⵜⴳⴳⵓⵜ ⵜⵎⴳⵓⵔⵉ ⴷ ⵜⵉⴷ ⴳ ⵜⴷⵔⵓⵙ.