ⴹⴰⵕⴰⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ, ⵎⴰⵙⵙ ⴰⵏⵟⵓⵏⵢⵓ ⴳⵓⵜⵉⵔⵉⵙ ⴷ ⵓⵎⴰⵡⴰⵙ ⵏ ⵜⵎⵜⵜⴰ ⴰⵏⴰⴼⵍⵍⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙ ⴼⵓⵍⴽⵔ ⵜⵓⵕⴽ, ⵜⵍⴽⵎ ⴷ ⵜⵡⴰⵍⴰ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⴰⵎ ⵜⵏⵙⵙⵉⵅⴼⵜ ⵏ ⵜⴼⵔⴳⴰⵏⵜ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴼⴰⴷ ⴰⴷ ⵜⵙⴷⴷⵉⴷ ⵅⴼ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ, ⴳ ⵓⴽⵜⵜⵓⵢ ⵡⵉⵙⵙ 20 ⵏ ⵓⵙⵔⵙ ⵏⵏⵙ.

"ⴰⵙⵙ ⴰⴷ, ⴰⵔ ⵏⵙⴼⵓⴳⵍⵓ ⵏⴽⴽⵏⵉ ⵙ ⵓⴽⵜⵜⵓⵢ ⴰⴷ", ⴰⵔ ⵜⵜⵉⵏⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, "ⴰⵔ ⵜⵜⵉⴷⵉⵔⵏ ⵡⴰⵎⵓⵏⵏ ⵏⵏⵖ ⴷⴷⴰⵡ ⵏ ⵉⴹⵉⵚ ⵏ ⵉⵙⵏⴼⵍⵏ ⵉⵏⵖⴱⴰ, ⵏⵏⴰ ⵎⵉ ⵉⴳⴰ ⵓⵣⵡⵍ ⵏⵏⵙⵏ ⴰⵎⵇⵇⵔⴰⵏ ⵜⵉⵎⵍⴷⴰⵡⵉⵏ ⴷ ⵜⵏⵥⴰⵕ ⵏ ⵓⵣⵎⵣ ⵏ ⵜⴷⴰⴱⵓⵜⵉⵏ ⵜⵉⵎⵓⵟⵟⵓⵏⵉⵏ ⴷ ⵜⵖⵉⵙⵜ ⵜⴰⵙⵎⴳⵓⵔⵜ…" ⴷ ⵏⵜⵜⴰⵜ ⴰⵔ ⵜⵜⵓⵎⴰⵍ 20 ⵏ ⵓⵙⴳⴳⵯⴰⵙ ⴷ ⵢⵓⵛⴽⴰⵏ ⵉ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵎⵔⴰⵔⴰ ⵏⵏⵙ ⴰⴽⴷ ⵉⵙⵇⵙⵉⵜⵏ ⵏ ⵉⴽⴰⴱⴰⵕⵏ ⵏ ⵉⵡⴰⵏⴽⵏ ⵉⵎⴷⵔⴰⵡⵏ ⴳ ⵓⵏⵎⵓⵇⵇⴰⵔ ⴰⴷ, ⵏⵏⴰ ⴳ ⵜⵖⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵖⵔ ⴰⵙⵓⵖⵏ ⵏ ⵓⴱⴷⴰⵔ ⵏ ⵉⵙⵏⴼⵍⵏ ⴰⴷ ⴷ ⵓⵙⵓⵜⵜⵉ ⵏ ⵜⴱⵔⵉⴷⵜ ⵏ ⵉⵙⵖⵍⴰⴼ ⵉⵣⵔⴼⴰⵏⵏ ⴱⴰⵛ ⴰⴷ ⴳⵉⵏ ⵉⵙⵖⵜⴰⴼ "ⵉⵎⵉⵖⵉⵙⵏ" ⵏⵏⴰ ⵎⵉ ⵖⵉⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵙⵎⵓⵏⵉⵏ ⴷ ⵉⵎⴳⴳⴰⵢⵏ ⴰⴷ ⵏⵄⵕⵏⵜ ⵉ ⵓⵣⵣⴳⵉⵔ ⵏⵙⵏⵜ ⴳ ⵢⴰⵏ ⵓⵣⴰⵣⵓ ⴰⵎⵖⵍⴰⵍ ⵏⵏⴰ ⵉⵜⵜⵙⵕⵚⵚⴰⵏ ⵜⴰⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ, ⴳ ⵓⴷⵖⴰⵔ ⵏⵏⴰ ⴳ ⵜⵜⵖⵉⵎⴰⵏⵜ ⴷⴰ ⵙⵙⵓⴼⵓⵖⵏⵜ  ⵉⵜⵙⵏ ⵡⵓⵟⵟⵓⵏⵏ ⵉⵎⵇⵇⵔⴰⵏⵏ ⵏ ⵉⵙⵖⵍⴰⴼ ⴱⵍⴰ ⴰⵣⵣⴳⵉⵔ ⵙ ⵜⵎⵏⵜⵉⵍⵉⵏ ⵜⵉⵥⵕⴼⴰⵏⵉⵏ ⵏⵖⴷ ⵜⵉⵏⴼⴳⴰⵏⵉⵏ.

ⴰⴷ ⴳⵉⵏ ⵉⵙⴰⵢⵔⴰⵔⵏ ⵉⵎⵓⵟⵟⵓⵏⵏ ⴷ ⵜⵖⵉⵙⵜ ⵜⴰⵙⵎⴳⵓⵔⵜ ⴷ ⵉⵙⵏⴼⵍⵏ ⵏⵏⴰ ⴰⴷ ⵙⵙⴰⵍⴰⵢⵏ, ⵙ ⵉⵙⴷⵉⴷⴷⵉⵢⵏ ⵏⵏⵙⵏ ⴷ ⵓⵢⵏⵏⴰ ⵉⵣⵉⵍⵏ ⴳⵉⵙⵏⵜ, ⵅⴼ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴱⵍⴰ ⵜⵓⵔⴷⴰ ⵢⴰⵏ ⵓⵎⴳⴳⴰⵢ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⴰⵏ ⵣⴳ ⵉⵎⴰⵙⵙⵏ ⵏ ⵓⵙⵎⵀⵍ ⵏⵏⵙ. ⵉⵅⵚⵚⴰ ⴰⵙ ⵉ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵜⵜⴰ ⵉⵎⵓⵏⵏ, ⴰⵔ ⵜⵜⵉⵏⵉ, ⴱⵍⴰ ⵜⵓⵔⴷⴰ ⴰⴷ ⵉⵎⵄⴰⵍⴰ ⴷ ⵢⴰⵏ ⵓⵙⴰⵢⵔⴰⵔ ⴰⵎⵙⴽⵉⵍ ⵙ ⵢⴰⵜ ⵜⵍⵖⴰ ⵜⴰⵅⴰⵜⴰⵔⵜ ⵙⵓⵎⵣⴰⵣⴰⵍ ⴰⴽⴷ ⵓⵢⵏⵏⴰ ⵏⴷⴷⵔ ⴳ ⵎⵔⴰⵡ ⵉⵙⴳⴳⵯⴰⵙⵏ ⵉⵣⵔⵉⵏ.

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, ⵉⴳⴰⵏ ⵜⴰⵏⵙⵙⵉⵅⴼⵜ ⵏ ⵜⴼⵔⴳⴰⵏⵜ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵜⵉⵍⴰⵍⵜ ⴰⴷⵙⵍⴰⵏ  ⵏⵏⴰ ⵙ ⵜⵜⴳⴳⴰⵏⵜ ⴰⵎ ⵢⴰⵏ ⵓⵎⴳⴳⴰⵢ ⴰⴷⵙⵍⴰⵏ ⴳ ⵓⵙⴷⵓⵙ ⵏ ⵓⵏⴳⵔⴰⵡ ⴰⴳⵔⴰⵖⵍⴰⵏ ⴷ ⵓⵙⴱⵓⵖⵍⵓ ⵏⵏⵙ ⵙ ⵜⵎⵙⴽⴰⵔ ⴷ ⵜⵡⵏⴳⵉⵎⵉⵏ ⵏⵏⴰ ⴷ ⵉⴼⴼⵖⵏ ⵣⴳ ⵜⵉⵔⵎⵉⵜⵉⵏ ⵜⵉⵏⴰⵎⵓⵔⵉⵏ ⴷ ⴰⵡⴷ ⴳ ⵓⵙⵓⵖⵍ ⵏ ⵉⵔⵎⵎⵓⵙⵏ ⵉⵣⵔⴼⴰⵏ ⵉⵖⵣⵓⵔⴰⵏⵏ ⴷ ⵓⵏⵄⴰⵕ ⴱⴰⵛ ⴰⴷ ⵓⵙⵎⵀⵍ ⴳ ⵉⵎⵏⴰⴹⵏ ⵉⵏⴰⵎⵓⵔⵏ ⴷ ⵉⴷⵖⵔⴰⵏⵏ.

ⴳⴰⵏⵜ ⵜⵎⵔⵙⴰⵍ ⴰⴷ, ⴰⵔ ⵜⵜⵉⵏⵉ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ, ⵢⴰⵏ ⵜⵍⴳⴳⵯⵉⵜ ⵜⴰⵣⵔⴼⴰⵏⵜ ⴳⵔ ⵓⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⵙ ⵜⵎⵍⴷⴰ ⵏ ⵢⴰⵏ ⵓⵎⵙⴳⴷⴰⵍ ⴱⵓ ⵓⵙⵡⵉⵔ ⴰⵏⴰⴼⵍⵍⴰ ⵏⵏⴰ ⵉⵙⵙⵉⵅⴼ, ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵎⵜⵜⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵎⵍⴷⴰ ⵏ ⵓⴽⵜⵜⵓⵢ ⵡⵉⵙⵙ 20 ⵏ ⵓⵙⵔⵙ ⵏ ⵓⵙⵇⵇⵉⵎ ⴰⵣⵔⴼⴰⵏ ⵜⵎⵜⵜⴰ ⴳ ⵊⵓⵏⵉⴼ, ⴰⵙⵙⵏⵏⴰⵟ 19 ⵢⵓⵏⵢⵓ ⴰⴷ.

ⵜⵙⵎⴰⵜⵔ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ, ⴳ ⵓⵎⵏⴰⴹ ⴰⴷ, ⵎⴰⵙ ⴷⴰ ⵉⵙⵙⵉⵡⵉⵙ ⴰⵎⵢⴰⵡⴰⵙ ⵉⴷⵓⵙⵏ ⴳⵔ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵜⵙⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵜⵖⴰⵔⴰⵙⵉⵏ ⵜⵉⵥⵍⴰ, ⴷ ⵜⴼⵔⴳⴰⵏⵜ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵥⴹⵡⴰⵏ ⵉⵙⴳⴰⵡⴰⵏⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵢⴰⵜ ⵜⴰⵍⵖⴰ ⵜⴰⵅⴰⵜⴰⵔⵜ ⴳ ⵜⵓⵚⴽⴰ ⵏ ⵢⴰⵏ ⵓⵏⴳⵔⴰⵡ ⴰⵣⵔⴼⴰⵏ ⵙ ⵓⴳⴰⵔ ⵏ ⵉⵎⵙⵉⴷⴼⵏ ⴷ ⵜⵎⴷⵔⴰⵡⵉⵏ, ⴰⵔ ⵜⵙⵎⴰⵜⴰⵔ ⵎⴰⵙ ⵏⵥⴹⴰⵕ ⴳ ⵓⵣⵎⵣ ⵏ 20 ⵓⵙⴳⴳⵯⴰⵙ, ⴰⴷ ⵏⵣⵔⵉ ⵣⴳ ⵡⴰⵜⵜⴰⵢ ⵏ ⵙⵉⵏ ⵡⴰⴳⵏⴰⵔⵏ ⴷ ⵎⵔⴰⵡ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵖⵔ ⵡⴰⵜⵜⴰⵢ ⵏ 120 ⵏ ⵜⵎⵔⵙⵍⵜ ⴰⵙⵙ ⴰⴷ. ⴰⵎ ⵓⵢⵏⵏⴰ ⵏⵎⵓⵔⵙ, ⴰⵔ ⵜⵜⵔⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴳ ⵓⵏⵄⴰⵕ ⴱⴰⵛ ⴰⴷ ⵏⵙⴷⵓⵙ ⴰⵏⵙⴰ ⵏ ⵜⵎⵔⵙⴰⵍ ⴰⴷ ⵜⵉⵏⴰⵎⵓⵔⵉⵏ ⴳ ⵓⵏⴳⵔⴰⵡ ⴰⵣⵔⴼⴰⵏ ⵏ ⵜⵎⵜⵜⴰ, ⴰⵢⴰ ⴰⵔ ⵉⵙⵎⴰⵜⴰⵔ ⵜⵓⵙⵏⵜ ⵙ ⵜⵉⵍⴰⵍⵜ ⵏ ⵜⵎⵔⵙⴰⵍ ⴰⴷ ⴰⵎ ⵢⴰⵜ ⵜⴰⵍⴳⴳⵯⵉⵜ ⵏ ⵓⵎⵢⴰⵡⴰⴹ ⴰⴷⵙⵍⴰⵏ ⴳⵔ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.

ⵣⴳ ⵢⴰⵜ ⵜⵏⵉⵍⴰ ⵢⴰⴹⵏ, ⵜⵙⴼⴳⴳⴷ ⵎⴰⵙⵙⴰ ⴱⵓⵄⵢⵢⴰⵛ ⵖⵔ ⵜⴰⵙⵙⴰⵙⵜ ⵏ ⵜⵎⵢⵉⵎⴰⵏⵜ ⵉⵜⵜⵉⵎⵖⵓⵔⵏ, ⴳ ⵓⵙⵡⵉⵔ ⴰⵎⴰⴹⵍⴰⵏ, ⵜⴰⵏⵏⴰⵢ ⵎⴰⵙ ⵓⵔ ⴷⴰ ⵜⵜⴰⴳⵯⵉⵏ ⵉⵏⴰⵎⵓⵔⴰⵏ ⵜⵉⵎⵔⵙⴰⵍ, ⵉⴳⴰⵏ ⵜⴰⴳⵔⴰⵖⵍⴰⵏⵜ ⵏⵖⴷ ⵜⴰⵏⴰⵎⵓⵔⵜ, ⴷ ⴰⴽⴽⵯ ⵎⴰⵜⵜⴰ ⵏⵜⵜⴰⵜ, ⵎⴰⵛⴰ ⴰⵔ ⵜⵜⵙⵇⵙⴰⵏ ⵅⴼ ⵜⵣⵎⵔⵜ ⵏⵏⵙⵏⵜ ⴳ  ⵜⵙⴽⵔⴰⵡⵜ ⵏ ⵜⵢⴰⴼⵓⵜⵉⵏ ⵜⵉⴽⵎⴰⵎⵉⵏ ⴷ ⵓⵙⴰⴷⵎⵔ ⵉ ⵉⵏⴰⵔⵓⵣⵏ ⵏⵏⵙⵏ, ⵍⵓⵎⵎⵏ ⴳ ⵓⵎⵏⴰⴹ ⵏ ⵜⴰⵙⵙⴰⵙⵜ ⵏ ⵓⵅⵔⵔⵎ ⵏ ⵜⵡⵓⵔⵉ ⵜⴰⴳⵔⴰⵖⵍⴰⵏⵜ ⵜⴰⴳⵜⵉⵔⴰⵏⵜ ⴷ ⵜⵓⴽⵢⴰ ⵓⵔ ⴷⵊⵉⵏ ⵉⴽⴽⵉⵏ ⵅⴼ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴰⵙⵙⴰⵙⵜ ⵏ ⵓⵙⵥⵕⴼ ⵏ ⵉⵣⵔⴼⴰⵏ... ⴰⵜⵉⴳ ⵏ ⵉⵣⵔⴼⴰⵏ ⴷ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ, ⴰⵔ ⵜⵜⵔⵏⵓ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ, ⵓⵔ ⴷⴰ ⵉⵜⵜⵓⵙⵖⴰⵍ ⵖⴰⵙ ⵙ ⵓⵎⵙⴰⵡⴰⵍ ⴷ ⵉⵙⵖⵍⴰⴼ, ⵎⴰⵛⴰ ⵙ ⵜⵎⵢⴰⴳⴰⵏⵜ ⵏⵏⵙⵏ ⴷ ⵓⵣⵣⴳⵉⵔ ⵏⵏⵙⵏ ⴷ ⵢⵉⴹⵉⵚ ⵏⵏⵙⵏ ⴳ ⵜⵓⴷⵔⵜ ⵜⴰⴽⵓⵢⴰⵙⵙⵜ.

ⵎⵇⵇⴰⵔ ⵍⵍⴰⵏⵜ ⵜⵏⴰⵥⴰⵕ ⵓⵔ ⵉⵜⵜⵡⴰⵙⵙⵏⵏ ⵏⵏⴰ ⴷⴰ ⵏⵜⵜⵎⵏⴰⵍⴰ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵜⴼⵔⴳⴰⵏⵜ ⵜⴰⵎⴰⴹⵍⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⴷⴰ ⵜⵜⵖⵉⵎⴰⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷⴰ ⵜⵜⵇⴰⵡⴰⵍⵏⵜ ⵢⴰⵏ ⵜⴰⵎⵔⵉⵙⵜ ⵉⵕⵚⴰⵏ ⴳ ⵓⵙⵎⴷ ⵏ ⵜⴱⵣⴰⵔⵜ ⴳ ⵜⵡⵓⵔⵉ ⵏ ⵓⵙⵇⵇⵉⵎ ⵏ ⵜⵎⵜⵜⴰ ⴷ ⵓⵙⵙⵔⵇⴱ ⵏ ⵓⵙⵎⵀⵍ ⵏ ⵉⵙⵖⵍⴰⴼ ⵏⵏⵙ, ⴳ ⵉⵎⵏⴰⴹⵏ ⵉⵏⴰⵎⵓⵔⵏ ⵉⵎⵔⴰⵢⵏ ⴳ ⵎⵏⵏⴰⵡ ⵏ ⵜⵉⵔⵎⵉⵜⵉⵏ ⵜⵉⵙⴳⴰⵡⴰⵏⵉⵏ.

ⴳ ⵜⴳⵉⵔⴰ ⵏ ⵜⴽⵛⵛⵓⵎⵜ ⵏⵏⵙ, ⵜⵖⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵉ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴳ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ ⴷ ⵓⵙⵕⵚⵚⵓ ⵏ ⵓⵣⴷⴷⵓⵢ ⴳⵔ ⴰⵙ ⴷ ⵉⵎⴰⵙⵙⵏ ⵉⵎⵢⴰⵏⴰⵡⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴳⵔⴰⵖⵍⴰⵏⵏ, ⴰⵔ ⵜⵙⴷⴷⵉⴷ ⵎⴰⵙ ⴷ ⴰⴷ ⵉⵜⵜⵓⴳ ⵣⴳ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵎ ⵢⴰⵜ ⵜⴷⴰⴱⵓⵜ ⵉⵙⵎⵓⵏⵏ ⴳ ⵓⴳⵏⵙⵓ ⵏ ⵓⵏⴳⵔⴰⵡ ⵏ ⵡⴰⵔⴰⵢ ⴰⴳⵔⴰⵖⵍⴰⵏ ⵔⴰⴷ ⵉⵙⴷⵓⵙ ⵜⴰⵣⵎⵔⵜ ⵏⵏⵙ ⵅⴼ ⵓⵎⵏⴰⵍⴰ ⵏ ⵜⵏⴰⵥⴰⵕ ⵏ ⵖⵉⵍⴰⴷ ⴷ ⵓⵕⵚⵚⴰ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵎⵏⵏⴰⵡ ⵉⴷⵖⴰⵔⵏ ⵏ ⵓⵎⴰⴹⴰⵍ.

ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵉⵙⵡⵉⵔⵏ ⵉⵏⴰⵎⵓⵔⵏ ⴷ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ ⵏ ⵜⵎⵜⵜⴰ, ⵜⴽⴽⴰ ⵜⵜ ⵉⵏⵏ ⴷ ⵔⴰⴷ ⵜⵇⵇⵉⵎ ⵢⴰⵏ ⵓⵎⴰⵏⴰⵔ ⵏ ⵜⵡⵓⵔⵉ ⵏⵏⵖ, ⴷ ⵏⴽⴽⵏⵉ ⴰⵔ ⵏⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙⵙ 20 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ ⴷ ⴰⵔ ⵏⵜⵜⵓⵎⴰⵍ 20 ⵓⵙⴳⴳⵯⴰⵙ ⵏⵏⵙ ⴷ ⵢⵓⵛⴽⴰⵏ ⴳ ⵢⴰⵏ ⵓⵎⴰⴹⴰⵍ "ⴰⵎⵓⵟⵟⵓⵏ".