ⵉⴼⴹⵏ ⵏ ⵉⵏⵔⵣⴰⴼ ⴷ ⵉⵏⵎⵢⴰⵖⵏ, ⵜⵉⵎⵉⴹⵉⵡⵉⵏ ⵏ ⵉⵏⵎⵙⴰⵡⴰⵍⵏ, ⴰⵣⵣⴰⵏⵏ ⴷ ⵉⵎⵓⵣⴰⵢⵏ, ⵜⵉⵎⵔⴰⵡⵉⵏ ⵏ ⵉⵎⵓⵙⵙⵓⵜⵏ, ⵎⵔⴰⵡ ⵏ ⵡⵓⵙⵙⴰⵏ, ⵢⴰⵏ ⵓⵙⴰⵢⵔⴰⵔ ⴷ ⵢⴰⵏ ⵓⵙⵏⵜⵍ : ⵜⴰⴷⵍⵙⴰ ⴷ ⵉⵡⵏⵏⵉⵜⵏ ⵉⴷⵍⵙⴰⵏⵏ ⴷ ⵜⴰⵎⵙⵙⵉⵍⵉⵜ ⵏ ⵉⵣⵔⴼⴰⵏ ⴷ ⵜⴳⵎⵉ

ⵕⵕⴱⴰⵟ, 27 ⵉⴱⵔⵉⵔ 2025 – ⵉⵙⵎⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⴷⴳⴳⵯⴰⵜ ⵏ ⵡⴰⵙⵙ ⵏ ⵓⵙⴰⵎⴰⵙ ⴰⴷ ⵉⵎⵓⵙⵙⵓⵜⵏ ⵏ ⵓⴳⵎⵎⴰⴹ ⵏⵏⵙ ⴳ ⵜⵙⵓⵜⵍⵜ ⵜⵉⵙ 30 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ. ⵎⵔⴰⵡ ⵏ ⵡⵓⵙⵙⴰⵏ ⵏ ⵉⵎⴹⴰⴽⴰⵕⵏ ⴷ ⵜⵉⵏⴰⵡⵉⵏ ⵜⵉⵡⵏⴳⵉⵎⵉⵏ ⴷ ⵜⵙⴰⵡⵔⵉⵏ ⴷ ⵉⵡⵏⵏⵉⵜⵏ ⵉⴷⵍⵙⴰⵏⵏ ⵉⵎⵖⵔⵉⴱⵉⵢⵏ ⵙ ⴰⴽⴽⵯ ⵉⵎⵓⵖⵍⵏ ⵏⵏⵙⵏ, ⴱⵍⴰ ⴰⵙⵍⵉⴷ, ⵉⴽⴽⴰ ⵉⴳⴰ ⵉ ⵉⵏⵔⵣⴰⴼ ⵏ ⵓⵙⴼⵙⵔ ⴰⵎⵙⴰⴳⴰⵔ ⴰⴽⵓⵢⴰⵙⵙ ⵉⵕⵚⴰⵏ ⵉ ⵓⵏⵎⵓⵇⵇⴰⵔ ⴰⴽⴷ 250 ⵏ ⵡⴰⵣⵣⴰⵏ ⵙⴳ ⵜⵎⵏⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⵙ 12, ⴷ 100 ⵏ ⵉⵎⴰⵔⴰⵜⵏ ⴷ ⵉⵎⵏⴳⴰⵍⵏ ⴷ ⵉⵏⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵙⴽⴰⵔ ⴰⴷⵍⵙⴰⵏ, ⵙⴳ ⵍⵎⵖⵔⵉⴱ ⴷ ⴱⵕⵕⴰ ⵏⵏⵙ, ⴷⵔⵓⵏ ⴳ 70 ⵏ ⵉⵎⵓⵙⵙⵓⵜⵏ ⵉⵜⵜⵓⴱⴹⴰⵏ ⵅⴼ ⵙⵎⵎⵓⵙ ⵏ ⵉⵙⴰⵢⵔⴰⵔⵏ ⵉⵎⵥⵍⴰⵢⵏ, ⴳ ⵓⴳⵎⵎⴰⴹ ⴳ ⵍⵍⴰⵏ ⵉⵙⴰⴷⴰⴼⵏ ⴷ ⵉⵏⵏⵓⵕⵥⵎⵏ.

ⵜⴰⵏⵎⵎⵉⵔⵜ ⵉ ⵡⴰⵣⵣⴰⵏⵏ, ⵜⴰⵏⵎⵎⵉⵔⵜ ⵉ ⵉⵎⵙⴽⴰⵔⵏ, ⴷ ⵜⴰⵏⵎⵎⵉⵔⵜ ⵉ ⵉⵏⵔⵣⴰⴼ ⵅⴼ ⵓⵎⵢⴰⵖ ⵏⵏⵙⵏ ⴰⵅⴰⵜⴰⵔ ⴰⴽⴷ ⵓⵖⴰⵡⴰⵙ ⵏⵏⵖ ⴰⴽⵓⵢⴰⵙⵙ ⴳ ⵓⵙⴼⵙⵔ ⵏ ⵓⴷⵍⵉⵙ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴳ ⵓⵣⵎⵣ ⵏ ⵎⵔⴰⵡ ⵏ ⵡⵓⵙⵙⴰⵏ, ⵜⵔⵏⴰ, “ⵏⵙⴼⵓⴳⵍⵓ ⴰⴽⴽⵯ ⵙ ⵓⵎⵢⴰⵏⴰⵡ ⵏ ⵜⴷⵍⵙⴰ ⵏⵏⵖ ⵜⴰⵎⵖⵔⵉⴱⵉⵜ ⵜⴰⵏⴱⵖⵓⵔⵜ ⵙ ⵉⵎⵓⵖⵍⵏ ⵏⵏⵙ, ⴷ ⵙ ⵜⵉⵍⴰⵍⵜ ⵏⵏⵙ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⴷ ⵜⴳⵎⵉ.

"ⵏⵙⵜⵉ ⴰⵙⴳⴳⵯⴰⵙ ⴰⴷ ⴰⴷ ⵏⴻⵏⵏⵓⵎⵙ ⵅⴼ ⵜⴷⵍⵙⴰ ⴷ ⵉⵡⵏⵏⵉⵜⵏ ⵏⵏⵖ ⵉⴷⵍⵙⴰⵏⵏ ⵉⵎⵖⵔⵉⴱⵉⵢⵏ, ⵉⴱⵖⵓⵔⵏ ⵙ ⵉⵎⵓⵖⵍⵏ ⵏⵏⵙⵏ ⵉⵄⵕⴰⴱⵏ-ⵉⵎⵓⵙⵍⵎⵏ, ⵉⵎⴰⵣⵉⵖⵏ, ⵉⵚⵃⵕⴰⵡⵉⵢⵏ ⵉⵃⵙⵙⴰⵏⵉⵢⵏ, ⵉⵄⵉⴱⵔⵉⵢⵏ, ⵉⴳⵔⴰⴽⴰⵍⵏ, ⴷ ⵉⴼⵔⵉⵇⵉⵢⵏ – ⵙ ⵜⵓⵎⵏⵜ ⵙ ⵜⵥⴹⴰⵕⵜ ⵏⵏⵙⵏ ⵅⴼ ⵜⴷⵔⴰⵡⵜ ⴳ ⵓⵙⴷⵓⵙ ⵏ ⵓⵎⵢⴰⵎⴰⵥ ⴰⵏⴰⵎⵓⵏ ⴷ ⵓⵏⵏⵓⵕⵥⵎ, ⴷ ⵜⵏⵎⴰⴳⵓⵜ, ⵎⴰⵢⴰ ⴰⴷ ⵉⵎⵎⴰⵍⵏ ⴰⵡⵇⵇⵔ ⵏ ⵜⵎⴰⴳⵉⵜ ⴷ ⵡⴰⴷⴷⵓⵔ ⴷ ⵜⵎⴽⵜⵉⵜ ⵜⴰⴳⵔⴰⵡⴰⵏⵜ."

ⵎⴰ ⵖ ⵜ ⵏⵜⵜⴰⵡⵉ ⴽⵓ ⴰⵙⵙ, ⵙ ⵜⴷⵔⴰⵡⵜ ⴳ ⵉⵎⵓⵙⵙⵓⵜⵏ ⵉⵏⴰⵎⵓⵔⵏ ⵉⵕⵥⵎⵏ, ⴰⵎ ⴰⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴳⴰ ⵜ "ⴰⵎⵢⴰⵖ ⴰⵡⵓⵔⵎⴰⵏ ⴷ ⵡⴰⵣⵣⴰⵏⵏ ⴷ ⵉⵎⴰⵔⴰⵡⵏ ⴷ ⵉⵏⵔⵣⴰⴼ ⵅⴼ ⵜⵎⵙⴰⵔⵉⵏ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ". ⴰⵙⴼⵙⵔ ⵖⵓⵔⵏⵖ "ⴷ ⴰⵙⵓⵍⴼ ⵉ ⵓⵙⴷⵓⵙ ⵏ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ". ⵏⵎⵎⵔ ⵙ ⵓⴱⵓⵖⵍⵓ ⵏ ⵜⵙⵓⵎⵔⵉⵏ ⴷ ⵉⵙⵇⵙⵉⵜⵏ ⴷ ⵡⴰⵕⵕⴰⵥ ⵏ ⵜⵎⵙⴰⵔⵉⵏ ⵜⵉⵜⵔⴰⵔⵉⵏ ⵏⵡⴰⵜⵜⵙ ⴰⴷ ⵏⵙⴷⵓⵙ ⴰⵎⵢⴰⵖ ⵅⵉⴼⵙⵏⵜ, ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ.

ⵙⴳ ⵓⵡⵔⵉⴽ ⵏ ⵃⴷⵉⴷⴷⴰⵏ, ⵏⵏⴰ ⵉⵙⴼⵊⵊⵉⵊⵏ ⴰⵣⵣⴰⵏⵏ ⴷ ⵉⵏⵔⵣⴰⴼ, ⵉⴳ ⵜⴰⴷⴰⴱⵓⵜ ⵏ ⵓⵙⵙⴼⵔⴽ ⵅⴼ ⵡⴰⵢⴷⴰ ⵏⵏⵖ ⴰⴷⵍⵙⴰⵏ, ⵖⵔ ⵉⵡⵏⵏⵉⵜⵏ ⵏⵉⵜ ⵏ ⵡⴰⵣⵣⴰⵏⵏ, ⵙⴳ ⵜⵏⴼⵓⵙⵜ ⴷ ⵜⵎⴷⵢⴰⵣⵜ ⴷ ⵓⵎⵣⴳⵓⵏ ⴷ ⵓⵖⵏⵏⵉⵊ ⴷ ⵜⴰⴹⵚⴰ ⵅⴼ ⵓⵙⵏⵜⵍ ⵏ ⵉⵣⵔⴼⴰⵏ ⴷ ⵓⵣⵔⴼ ⴳ ⵜⴷⵍⵙⴰ, ⵖⵔ ⵓⵎⴹⴰⴽⴰⵕ ⵏ ⵓⵣⵔⴼ ⴳ ⵜⵖⵔⵎⵜ ⴷ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵣⵔⴰⵢ ⵅⴼ ⵜⵥⵕⵉⴳⵉⵏ ⵏ ⵉⵎⴰⵔⴰⵜⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ, ⵉⵎⵙⴰⵙⴰⵏ ⵅⴼ ⵢⴰⵏ ⵓⴱⵔⵉⴷ: ⵜⴰⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵍⴰⵍⵜ ⵏ ⵜⴷⵍⵙⴰ ⴷ ⵉⵡⵏⵏⵉⵜⵏ ⵉⴷⵍⵙⴰⵏⵏ ⴳ ⵜⴳⵎⵉ ⴷ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ.

ⵙ ⵎⴽⴰ, ⵉⵙⵏⵓⴱⴳ ⵓⴳⵎⵎⴰⴹ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵓⴳⴳⴰⵔ ⵏ 30 ⵏ ⵜⵙⴰⵡⵔⵉⵏ ⵉⵥⵍⵉⵏ ⵙ ⵡⴰⵣⵣⴰⵏⵏ ⴷ ⵉⵡⵏⵏⵉⵜⵏ ⵏⵏⵙⵏ, 11 ⵏ ⵜⵉⵏⴰⵡⵉⵏ ⵜⵉⵡⵏⴳⵉⵎⵉⵏ ⵅⴼ ⵡⴰⵢⴷⴰ ⴰⵎⵙⵙⵓⵍⴻⵍ, ⵜⵉⵔⵔⴰ ⴳ ⵉⵖⵣⵓⵜⵏ, ⵙⵙⵉⵏⵉⵎⴰ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵣⵔⴼ ⴳ ⵜⵖⵔⵎⵜ, ⵜⴰⵖⵣⵓⵔⴰⵏⵜ ⵏ ⵉⵣⵔⴼⴰⵏ, ⵜⴰⴷⵍⵙⴰ ⴷ ⵓⵙⴷⵓⵙ ⵏ ⵉⵣⵔⴼⴰⵏ, ⵜⴰⵎⴳⵓⵔⵉ ⵏ ⵜⴷⵍⵙⴰ ⴷ ⵓⵙⵏⴼⵍⵓⵍ, ⴰⵙⵉⵜⴳ ⵏ ⵡⴰⵢⴷⴰ, ⴰⵎⵢⴰⵏⴰⵡ ⴰⴷⵍⵙⴰⵏ ⴷ ⵉⵣⵔⴼⴰⵏ, ⵜⵉⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵢⵉⴳⵔ ⵏ ⵜⴷⵍⵙⴰ, ⴷⴼⴼⵉⵔ ⵎⴽⴰ ⵜⵉⵍⴰⵍⵜ ⵏ ⵜⵏⵖⵎⴰⵙⵜ ⴳ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ, ⵅⴼ ⵉⴳⴳⵉ ⵏ ⵜⵎⵔⴰⵡⵉⵏ ⵏ ⵉⵏⵎⵓⵇⵇⴰⵔⵏ ⴷ ⵉⵎⵓⵙⵙⵓⵜⵏ ⵅⴼ ⵜⵉⵔⵔⴰ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵡⵏⵏⵉⵜⵏ ⵉⵏⴰⵥⵓⵕⵏ ⴷ ⵉⵎⵙⵏⴼⵍⵓⵍⵏ ⴷ ⵜⵥⵕⵉⴳⵉⵏ ⵜⵉⵎⵢⴰⵏⴰⵡⵉⵏ.

ⵉ ⵓⵙⵎⵀⵍ ⵉ ⵜⴼⵍⵙⴰⴼⵜ ⵏ ⵓⴳⵎⵎⴰⴹ ⴰⵎⵙⵙⵉⴷⴼ, ⵉⵙⴽⵔ ⵓⴳⵎⵎⴰⴹ ⵏ ⵓⵙⵇⵇⵉⵎ ⴳ ⵓⵙⴼⵙⵔ ⵏ ⵓⴷⵍⵉⵙ  ⵉⵙⴰⴷⴰⴼⵏ ⴰⴽⴽⵯ ⵉⵏⴱⵣⴰⵣⵏ ⵉ ⵓⴳⴳⵉⴷⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ, ⵖ ⵜⴰⵎⵓ ⵜⵙⵓⵖⵍⵜ ⵜⴰⵎⵖⴰⵡⵍⵜ ⴷ ⵜⵓⵜⵍⴰⵢⵜ ⵏ ⵓⵙⵉⵍⴼ ⴳ ⵎⴰⵕⵕⴰ ⵜⵉⵏⴰⵡⵉⵏ ⴷ ⵉⵏⵎⵓⵇⵇⴰⵔⵏ, ⵅⴼ ⵉⴳⴳⵉ ⵏ ⵉⵙⴰⴽⴰⵜⵏ ⵉⵜⵜⵡⴰⵥⵍⴰⵢⵏ ⵉ ⵉⴷⵔⵖⴰⵍⵏ ⴷ ⵡⵉⴷⴰ ⵎⵉ ⵉⴷⵔⵓⵙ ⵉⵥⵕⵉ, ⴷ ⵡⴰⵏⵙⵉⵡⵏ ⴷ ⵢⵓⵙⴰⵏ ⵉ ⵓⵙⵏⵓⴱⴳ ⵏ ⵉⵙⵎⵉⵍⵏ ⵇⴰⵃ. ⵎⴽⴷⴰ ⵜⵜⵓⵣⵓⵣⵣⵔⵏ ⵉⵎⵓⵙⵙⵓⵜⵏ ⴰⴽⴽⵯ ⵏ ⵓⴳⵎⵎⴰⴹ ⵙ ⴰⵙⵔⵉⴷ.

ⵜⴰⵏⵎⵎⵉⵔⵜ ⵉ ⴰⴽⴽⵯ ⵜⵉⵎⴷⵔⴰⵡⵉⵏ/ⵉⵎⴷⵔⴰⵡⵏ ⴷ ⵉⵏⵔⵣⴰⴼ ⵏⵏⴰ ⵉⴷⵔⵓⵏ ⴳ ⵓⵙⵎⵓⵔⵙ ⵏ ⵉⵎⵓⵙⵙⵓⵜⵏ ⵏ ⵓⴳⵎⵎⴰⴹ.

ⴰⵏⵎⵉⵍⴰ ⵏⵏⵖ ⵔⴰⴷ ⵉⵜⵜⵓⵙⵎⴰⵢⵏⵓ ⴳ ⵜⵙⵓⵜⵍⵜ ⵜⵉⵙⵙ 31, ⴳ ⵓⵏⵄⴰⵕ ⵏⵏⵖ ⴰⵎⴰⵢⵏⵓ ⴷ ⵓⵙⵓⵍⴰⵏ ⵉ ⵜⵎⵢⴰⴳⴰⵏⵜ ⴷ ⵉ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵜⴷⵔⴼⵉⵏ ⴷ ⵉⵣⵔⴼⴰⵏ.

ⵉⵣⵔⴼⴰⵏ. ⵜⵉⴷⵔⴼⵉⵏ. ⵜⴰⵎⵢⴰⴳⴰⵏⵜ.

.