ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵕⵥⵥⵓⵎ ⵏ ⵜⵙⴷⴷⵉⵜ ⵜⵉⵙⵙ ⵙⵎⵎⵓⵙⵜ ⵏ ⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵕⵕⴱⴰⵟ, ⵅⴼ ⵓⵙⵉⵣⵡⵔ ⵏ ⵓⴼⵔⴰⴳ ⵏ ⵉⵡⵏⵏⵉⵜⵏ ⵉⴷⵍⵙⴰⵏⵏ ⴳ ⵍⵎⵖⵔⵉⴱ. "ⴰⵙⴽⴽⵉⵏ ⴰⴷ ⵓⵔ ⵉⴳⵉ ⴰⵎⵙⵜⴰⵢ ⵏⵖ ⵜⴰⵎⵙⴰⵔⵜ ⵜⴰⵙⵉⵏⴰⵏⵜ", ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, "ⵎⴰⵛⴰ ⵉⴳⴰ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⵙⴳ ⵜⵔⵙⴰⵍ ⵏ ⵜⵏⴼⵔⵓⵜ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⵏ ⵉⵏⴰⵎⵓⵔⴰⵏ ⴷ ⵜⵏⴰⵎⵓⵔⵉⵢⵉⵏ".
ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, ⵏⵏⴰ ⵉⴽⴽⴰⵏ ⵜⵙⴰⵡⵍ ⴳ ⵢⴰⵜ ⵜⵙⴷⴷⵉⵜ ⵏ ⵓⵎⴹⴰⴽⴰⵕ ⵉⵙⵏⵎⴰⵍⴰ ⵓⵙⵇⵇⵉⵎ ⵉⵙⵏⵓⴱⴳ ⵜⵜ, ⵎⴰⵙ ⵍⵎⵖⵔⵉⴱ, ⵎⵉ ⵉⵚⴰⵃⴰ ⵡⴰⵢⴷⴰ ⵏ ⵓⵎⵣⵔⵓⵢ ⵏⵏⵙ ⵉⵏⴱⵖⵓⵔⵏ ⵙ ⵡⴰⵟⵟⴰⵙ ⵏ ⵉⵎⵓⵖⵍⵏ ⵏⵏⵙ ⵉⵎⴰⵣⵉⵖⵏ ⴷ ⵉⵄⵕⴰⴱⵏ ⴷ ⵉⵚⵃⵕⴰⵡⵉⵢⵏ ⵉⵃⵙⵙⴰⵏⵉⵢⵏ ⴷ ⵉⴼⵔⵉⵇⵉⵢⵏ ⴷ ⵉⵏⴷⴰⵍⵓⵙⵉⵢⵏ ⴷ ⵉⴳⵔⴰⴽⴰⵍⵏ, ⵉⵙⵙⵓⵜⵔ ⵓⴳⴳⴰⵔ ⵏ ⴽⵔⴰ ⵏ ⵜⵉⵣⵉ ⵢⴰⴹⵏ ⵢⴰⵜ ⵜⵙⵜⵔⴰⵜⵉⵊⵉⵜ ⵉⴼⴰⵡⵏ ⵉ ⵓⴼⵔⴰⴳ ⵏ ⵓⵎⵢⴰⵏⴰⵡ ⵏⵏⵙ ⴰⴷⵍⵙⴰⵏ ⴷ ⵓⵙⴷⵓⵙ ⵏⵏⵙ. ⵜⵙⴷⴷⵉⴷ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵎⴰⵙ ⵥⴹⴰⵕⵏ ⵉⵡⵏⵏⵉⵜⵏ ⵉⴷⵍⵙⴰⵏⵏ ⴰⴷ ⴳⵉⵏ ⵢⴰⵏ ⵉⵎⵉⵙⵙ ⴰⴷⵙⵍⴰⵏ ⵉ ⵜⴳⵎⵉ ⵜⴰⵙⵓⵍⴰⵏⵜ, ⵜⵖⵔ ⵙ ⵓⵙⵓⵖⵏ ⵏ ⵓⵙⵉⴷⴼ ⵏⵏⵙⵏ ⴳ ⵜⵙⵓⵜⵍⵜ ⵜⴰⴷⵎⵙⴰⵏⵜ, ⵍⵓⵎⴰⵔ ⵙ ⵓⴱⵓⵖⵍⵓ ⵏ ⵜⵎⴳⵓⵔⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵓⵙⴷⵓⵙ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵢⵉⴳⵔ ⴰⴷ ⴷ ⵓⵙⵙⴰⵔⵓ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵜⵖⵉⵙⵜ ⵜⵉⵎⵍⵥⵉⵜ...
ⴰⵔ ⵉⵜⵜⴳⴰⵏⵏⴰ ⵍⵎⵖⵔⵉⴱ ⴰⴷ ⵉⵙⵏⵓⴱⴳ ⵉⵎⵓⵙⵙⵓⵜⵏ ⵉⴳⵔⴰⵖⵍⴰⵏⵏ ⵉⵅⴰⵜⴰⵔⵏ ⴳ ⵜⵎⵔⴰⵡⵜ ⴰⴷ, ⵜⵔⵏⴰ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ... ⴰⵢⵍⵍⵉ ⵉⴳⴰⵏ ⵢⴰⵏ ⵓⵣⵎⵣ ⵏ ⵓⵙⴱⵓⵖⵍⵓ ⵏ ⵓⵙⵖⵍ ⴷ ⵉⵙⴰⴷⴰⴼⵏ ⵏ ⵜⵎⴳⵓⵔⵉ ⵜⴰⴷⵍⵙⴰⵏⵜ ⵜⴰⵎⵖⵔⵉⴱⵉⵜ. ⵉⵙⵖⴰⵡⵙⴰ ⵓⵎⵓⵔⵙ ⵏ ⵜⵡⵓⵔⵉ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, ⵙ ⵢⴰⵜ ⵜⵖⴰⵔⴰⵙⵜ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴹⵎⵏ ⵜⴰⵏⵣⵔⵓⴼⵜ ⵜⴰⴼⵔⴽⴰⵏⵜ ⴷ ⵡⴰⴷⴰⴼ ⵙ ⵓⵢⴷⴰ ⴰⴷⵍⵙⴰⵏ ⵉⵛⵛⴰⵔⵏ.
ⵉⵎⵛⵉ, ⵜⵙⵙⵉⴷⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵏⵥⴰⵕ ⵏⵏⴰ ⵉⵜⵜⵎⵏⴰⵍⴰⵏ ⴰⵢⴷⴰ ⴰⴷ, ⴰⵎ ⴰⵙⴱⴹⵍ ⴷ ⵓⵡⵏⵓⵍ ⵏⵏⴰ ⵉⵙⴷⵓⴷⴷⵉⵢⵏ ⵜⴰⵥⵓⵕⵉ ⴷ ⵜⴳⵣⵣⴰⵢⵉⵏ ⵏ ⵉⵥⵕⴰⵏ ⵉⵍⵍⵓⵣⵣⴰⵏ ⴳ ⵜⵎⵏⴰⴹⵉⵏ ⵜⵉⵎⵢⴰⵏⴰⵡⵉⵏ ⴳ ⵍⵎⵖⵔⵉⴱ, ⵙⴳ ⵓⴳⵎⵎⵓⴹ ⵏ ⵜⴳⵍⴷⵉⵜ ⴰⵔ ⵉⴼⴼⵓⵙ ⵏⵏⵙ, ⵙ ⵓⵣⵔⴰⵢ ⵅⴼ ⵉⴷⵓⵔⴰⵔ ⵏ ⵡⴰⵟⵍⴰⵙ.
ⴳ ⵓⵙⴰⵜⵉ ⵏ ⵜⵏⵥⴰⵕ ⴰⴷ, ⵜⵙⵎⴰⵢⵏⵓ ⵎⴰⵙⵙⴰ ⴱⵓⵄⵢⵢⴰⵛ ⵜⴰⵖⵓⵔⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⵖⵓⵏ ⵏ ⵓⵙⵔⵙ ⵏ ⵢⴰⵜ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵉⵙⵎⴷⵏ ⵉ ⵓⴼⵔⴰⴳ ⵏ ⵡⴰⵢⴷⴰ, ⵉⴱⴷⴷⵏ ⵅⴼ ⵓⵙⴷⵓⵙ ⵏ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵓⵙⵔⵙ ⵏ ⵜⵔⵙⴰⵍ ⵏ ⵜⵎⴳⵓⵔⵉ ⵜⴰⴷⵍⵙⴰⵏⵜ ⵜⴰⵏⴰⵎⵓⵔⵜ ⴷ ⵜⴼⵔⴽⴰⵏⵜ.
ⵜⴰⵡⵉⵜ ⴳ ⵜⴳⵎⵉ ⵏ ⵜⵎⴳⵓⵔⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵓⵙⵎⵓⵙⵙⵓ ⵏ ⵉⵙⵓⴳⴰⵎ ⵉⵥⵕⴼⴰⵏⵏ ⵢⵓⴷⴰⵏ, ⵙⴳ ⵢⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ, ⴷ ⵓⵕⵥⵥⵓⵎ ⵅⴼ ⵎⴰ ⵜⵙⵙⵓⵊⴷ ⵜⵖⵉⵙⵜ ⵜⵉⵎⵍⵥⵉⵜ ⴷ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ ⴳ ⵓⵙⵙⵉⵍⵉ ⵏ ⵡⴰⵜⵉⴳ ⵉⵔⵏⴰⵏ ⵉ ⵜⵎⴳⵓⵔⵉ ⵜⴰⴷⵍⵙⴰⵏⵜ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, "ⵉⵅⵚⵚⴰ ⴰⴷ ⵜⵉⵍⵉ ⵜⴰⵎⵓⵏⵜ ⵏⵏⵙ ⵉⵎⵖⵓⵔⵏ ⴰⴽⴷ ⵅⴼ ⵓⵣⴷⴰⵢ ⵏ ⵜⵙⵜⵔⴰⵜⵉⵊⵉⵜ ⵏ ⵜⵎⴳⵓⵔⵉ ⵜⴰⴷⵍⵙⴰⵏⵜ ⵙ ⵓⵏⴰⴳⵔⴰⵡ ⵏ ⵜⵉⵏⴷⵉⵜⵉⵏ ⴷ ⵉⵣⵔⴼⴰⵏ ⴳ ⵜⵙⴽⵯⴼⵍⵜ ⵜⴰⵎⵣⵡⴰⵔⵓⵜ".
ⵉⵎⵛⵉ, ⵜⵖⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵙⵓⵖⵏ ⵏ ⵓⵙⴷⵓⵙ ⵏ ⵓⴼⵔⴰⴳ ⵏ ⵉⵡⵏⵏⵉⵜⵏ ⵉⴷⵍⵙⴰⵏⵏ ⵏⵏⵉ ⵉⴳⴰⵏ ⵜⴰⵎⵙⵜⴳⴳⴰⵔⵜ ⵜⴰⵎⴳⵔⵓⵜ ⵉⵙⵙⵓⵜⵔⵏ ⵜⵓⴳⴳⴰⵣ ⵏ ⴰⴽⴽⵯ ⵉⵎⵙⴽⴰⵔⵏ ⴰⴼⴰⴷ ⴰⴷ ⵉⵜⵜⵓⵃⴹⴰ ⵡⴰⵢⴷⴰ ⴰⵖⵔⵎⴰⵏ ⴰⴷ ⴷ ⵓⵙⵙⵉⵜⴳ ⵏⵏⵙ.
