ⴳ ⵢⴰⵏ ⵓⵏⵎⵓⵇⵇⴰⵔ ⴰⵎⵢⴰⵖ ⵅⴼ "ⵢⵉⵙⴽⵉⵍ ⴷ ⵓⵙⵉⴷⴼ: ⵜⵉⵙⵏⵜⴰⵢⵉⵏ ⴷ ⵉⵙⴰⴽⴰⵜⵏ ⵉⵡⵜⵎⴰⵏⵏ"
ⵉⵖⵔⴰ "ⵉⵣⵔⴼⴰⵏ ⵏ ⵓⴼⴳⴰⵏ ⵍⵎⵖⵔⵉⴱ" ⵙ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⵎⵖⴰⵔⵜ ⴳ ⵜⵎⵙⵙⵏⵜⵉⵜ ⴷ ⵓⵙⵣⵎⵔ ⵏⵏⵙⵏⵜ ⵉ ⵜⴷⵔⴰⵡⵜ ⵉⵕⵡⴰⵏ ⴳ ⵜⴳⵎⵉ
ⵕⵕⴱⴰⵟ, 25 ⵎⴰⵕⵚ 2025 - "ⵉⵎⵙⴰⵔⴰⵙⵏ ⵎⵇⵇⵓⵔⵏ, ⴷ ⵜⵎⵙⵜⴳⴳⴰⵔⵜ ⵜⴳⴰ ⵜⴰⵏⵊⵎⵓⵜ"… ⵙ ⵎⴽⴰ ⵜⵕⵥⵎ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⵉⵣⵔⴼⴰⵏ ⵏ ⵓⴼⴳⴰⵏ ⵍⵎⵖⵔⵉⴱ) ⴰⵏⵎⵓⵇⵇⴰⵔ ⵏⵏⴰ ⵉⵙⵏⵓⴱⴳ ⵓⵙⵉⵏⴰⴳ ⵏ ⵕⵕⴱⴰⵟ ⴷⵔⵉⵙ ⴱⵏⵣⴽⵔⵉ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵉⵍⴰⵍⵉⵏ ⵏ ⵜⵎⵙⵙⵏⵜⵉⵜ ⴳ ⵓⵙⴷⵓⵙ ⵏ ⵓⵙⵉⴷⴼ ⴷ ⵜⵏⴽⵔⴰ ⵙ ⵢⵉⵙⴽⵉⵍ, ⵜⵖⵔⴰ ⵙ ⵓⵙⵖⵓⵏ ⵏ ⵓⵎⵢⴰⵙⵙⴰ ⵏ ⵜⵓⴳⴳⴰⵣ ⵏ ⴰⴽⴽⵯ ⵉⵎⵙⴽⴰⵔⵏ ⵉ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵜⵎⵖⴰⵔⵜ ⴳ ⵜⵎⵙⵙⵏⵜⵉⵜⵉⵏ ⵜⵉⵎⵖⵔⵉⴱⵉⵢⵉⵏ.
ⵓⵔ ⵉⵣⵎⵉⵔ ⵍⵎⵖⵔⵉⴱ, ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ "ⴰⴷ ⵉⵍⴽⵎ ⵜⵉⴳⵎⵉ ⵏⵏⵙ ⵉⵜⵜⵡⴰⵜⵜⵙⵏ ⴱⵍⴰ ⵜⴰⴷⵔⴰⵡⵜ ⵉⵙⵎⴷⵏ ⴷ ⵉⵎⴳⴳⴰⵢⵏ ⵏ ⵜⵡⵜⵎⵉⵏ", ⵎⴽⴷⴰ ⵓⵔ ⵉⵣⵎⵉⵔ ⴰⴷ ⵢⵉⵍⵉ ⵓⵎⵓⵔⵙ ⵏ ⴽⵔⴰ ⵏ ⵡⴰⵏⴰⵡ ⴰⵏⴳⵎⵓ ⴱⵍⴰ ⴰⵙⵣⵎⵔ ⴰⴷⵎⵙⴰⵏ ⵏ ⵜⵡⵜⵎⵉⵏ ⴷ ⵜⵏⴼⵔⵓⵜ ⵏ ⵢⵉⵙⴽⵉⵍ ⵉ ⴰⴽⴽⵯ, ⴰⴷ ⵜⵔⵏⴰ.
ⵉⵙⵙⵓⵎⵓⵏ ⴰⵖ ⵖ ⵎⴰⵢⴰⴷ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵎⵖⵔⵉⴱ ⵉⵙⴰⴽⴰⵜⵏ ⵏ ⵓⵙⵏⴰⵎ ⵏⵏⴰ "ⵉⵎⵎⴰⵍⵏ ⵜⵉⵔⴰⵜ ⵜⴰⵙⵔⵜⴰⵏⵜ ⵜⴰⵎⴰⴼⴰⵡⵜ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ", ⵙ ⵓⵙⵙⵏⵜⵉ ⵙⴳ ⵓⴷⵓⵙⵜⵓⵔ ⵉⵙⴷⵓⵙⵏ ⵢⵉⵙⴽⵉⵍ ⴷ ⵜⵙⵓⵎⵓⵜ ⴷ ⵡⴰⵔⴰⵙⵏⵓⵃⵢⵓ, ⴷ ⵓⵙⴰⵡⵔ ⵏ ⵓⵣⵣⵔⴰⵢ ⵉ ⵓⵙⵍⴳⵏ ⵏ ⵜⵡⵊⴰ, ⴰⵔ ⴰⵡⴰⴹ ⵖⵔ ⵜⵎⵔⵉⵙⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵉⵣⴷⵉⵏ ⵙ ⵢⵉⵙⴽⵉⵍ ⴳ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ… ⴷ ⵓⵍⴽⴰⵎ ⵙ ⵢⵉⵙⴽⵉⵍ ⵏ ⵉⵣⵎⴰⵣ ⵏⴳⵔ ⵜⴰⴳⴳⴰⵢⵉⵏ.
ⵎⵇⵇⴰⵔ ⵜⵍⵍⴰ ⵜⴰⵣⵣⵉⴳⵣⵜ ⵉⵜⵜⵡⴰⵍⴽⴰⵎⵏ ⴳ ⵢⵉⴳⵔ ⴰⴷ, ⵜⵙⴷⴷⵉⴷ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵅⴼ ⵜⵉⵍⵉⵜ ⵏ ⵜⵉⴼⵉⴽⴰⵛ ⵉⵙⴱⵉⴹⵉⵕⵏ ⴰⵍⴽⴰⵎ ⵙ ⵢⵉⵙⴽⵉⵍ ⴰⵎⵢⴰⴳⴰⵏ, ⴳ ⵢⴰⵎⵓ ⴰⵡⴷ ⵓⵍⵎⴰⴹ ⵏ ⵓⵙⵎⴷⵢⴰ ⵏ ⵜⵎⵖⴰⵔⵜ ⴳ ⵓⴳⴰⴷⴰⵣ ⵏ ⵜⵡⵓⵔⵉ ⴷ ⵉⵎⵣⴰⵔⴰⵢⵏ ⴳ ⵓⵙⵡⵉⵔ ⵏ ⵜⵖⵔⴰⴷ, ⴷ ⵜⴱⴱⴰⵢⴹⴰⵕⵉⵏ ⵏⵏⴰ ⵜⵜⵎⵏⴰⵍⴰⵏⵜ ⵜⵎⵙⵙⵏⵜⵉⵜⵉⵏ ⵜⵉⵡⵜⵎⴰⵏⵉⵏ, ⴷ ⵓⵍⵎⴰⴹ ⵏ ⵓⵙⵡⵉⵔ ⵏ ⵜⵎⵙⵙⵏⵜⵉⵜⵉⵏ ⵏⵏⴰ ⴷⴰ ⵙⵡⵓⴷⴷⵓⵏⵜ ⵜⵡⵜⵎⵉⵏ, ⵙ ⵜⵡⵉⵍⴰ ⵏⵏⴰ "ⵓⵔ ⴷⴰ ⵉⵎⵎⴰⵍⵏ ⵜⵉⵥⴹⴰⵕⵉⵏ ⵜⵉⵎⵢⴰⴳⴰⵏⵉⵏ ⵏ ⵜⵡⵜⵎⵉⵏ ⵜⵉⵎⵖⵔⵉⴱⵉⵢⵉⵏ".
ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵍⴽⴰⵎ ⵙ ⵢⵉⵙⴽⵉⵍ ⴷ ⵓⵙⵉⴷⴼ ⵜⴰⵎⵙⵜⴳⴳⴰⵔⵜ ⵜⴰⵏⵊⵎⵓⵜ ⵏⵏⴰ ⵉⵍⵍⴰⵏ ⵅⴼ ⵓⴳⵕⴹ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⵏⴱⴰⴹⵉⵏ ⴷ ⵢⵉⴳⵔ ⵓⵙⵍⵉⴳ ⴷ ⵡⴰⵎⵓⵏ ⵓⵖⵔⵉⵎ. ⴳ ⵓⵎⵏⴰⴹ ⴰⴷ ⵜⵖⵔⴰ ⵜⵏⵙⵙⵉⵅⴼⵜ ⵏ "ⵉⵣⵔⴼⴰⵏ ⵏ ⵓⴼⴳⴰⵏ ⵍⵎⵖⵔⵉⴱ" ⵙ ⵓⵙⵔⵙ ⵏ ⵜⵙⵔⵜⴰⵢ ⵉⴽⴰⵢⵍⴰⵍⵏ ⵉ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⵎⵖⴰⵔⵜ ⴳ ⵓⵎⴰⴹⴰⵍ ⵏ ⵜⵡⵓⵔⵉⵡⵉⵏ ⴷ ⵓⵙⵙⴰⵔⵓ, ⴷ ⵓⵙⴽⴰⵔ ⵏ ⵜⵡⵏⵏⴰⴹⵜ ⵏ ⵜⵡⵓⵔⵉ ⴳ ⵓⵔ ⵉⵍⵍⵉ ⵓⵙⵏⵓⵃⵢⵓ, ⴷ ⵓⵙⵣⵎⵔ ⵏ ⵜⵡⵜⵎⵉⵏ ⵉ ⵓⵙⵙⵉⵡⴹ ⵖⵔ ⵓⵙⵙⵥⵕⴼ ⴷ ⵜⵎⵙⵙⵏⵜⵉⵜ ⴷ ⵜⵎⵣⵡⴰⵔⵜ ⵏ ⵜⵡⵓⵔⵉⵡⵉⵏ.
ⵉ ⵓⵙⵙⴽⵜⵉ, ⴰⵏⵎⵓⵇⵇⴰⵔ ⵏⵏⴰ ⵉⵙⵏⵓⴱⴳ ⵓⵙⵉⵏⴰⴳ ⵏ ⵕⵕⴱⴰⵟ, ⵉⵙⵏⵎⴰⵍⴰ ⵜ ⵓⵙⵇⵇⵉⵎ ⴳ ⵓⵙⴰⵜⵉ ⵏ ⵓⵏⵏⵓⵎⵙ ⵏⵏⵙ ⵅⴼ ⵜⵎⵙⴰⵔⵉⵏ ⵏ ⵜⵎⵙⵙⵏⵜⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵢⴰⵜ ⵜⵙⴳⴰ, ⴷ ⵉⵙⵉⵣⵡⵉⵔⵏ ⵏ ⵢⵉⵙⴽⵉⵍ ⴷ ⵓⵙⵉⴷⴼ ⴷ ⵉⵣⵔⴼⴰⵏ ⵏ ⵜⵎⵖⴰⵔⵉⵏ, ⵙⴳ ⵜⵙⴳⴰ ⵢⴰⴹⵏⵉⵏ. ⵉⵜⵜⵓⵙⵏⵎⴰⵍⴰ ⵓⵏⵎⵓⵇⵇⴰⵔ ⵙ ⵓⵣⵎⵣⵣⵓ ⵏ ⵓⵣⴷⴰⵢ ⵏ ⵓⵙⴼⵓⴳⵍⵓ ⵏ ⵓⵙⵇⵇⵉⵎ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ (ⵎⴰⵕⵚ 2025).
