ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵙ ⵓⵖⴰⵡⵍ ⵏ ⵉⴳⵉ ⵏ ⵜⵎⴳⴳⵉⵜⵉⵏ ⵏ ⵓⴼⵔⴰⴳ ⵏ ⵡⴰⵣⵣⴰⵏⵏ ⵉⵜⵜⵓⵙⵄⵚⴽⵕⵏ ⵉⴷⴷⵖ ⴳⴰⵏ ⵓⵏⴳⵉⵙⵏ ⵏ ⵜⵖⵜⴰⵙⵉⵏ ⵏ ⵉⵎⵙⵜⴳⴳⴰⵔⵏ ⴷ ⵓⴹⴼⴼⵓⵕ ⴷ ⵓⵎⵙⵉⵕⵉⴹ ⴰⵏⴱⵔⵉⴷ ⵉ ⵉⵎⵙⵄⵚⴽⵕⵏ ⵏ ⵡⴰⵣⵣⴰⵏⵏ, ⵉⵖ ⴳⴰⵏ ⵉⵎⵙⵜⴳⴳⴰⵔⵏ ⵉⵏⵡⵏⴽⴰⵏⵏ ⵏⵉⵖ ⵡⴰⵔ ⵉⵏⵡⵏⴽⴰⵏⵏ. 

ⵜⵙⵙⴼⴰⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⴳ ⵜⴽⵛⵛⵓⵎⵜ ⵏⵏⵙ ⵜⴰⵎⵉⵡⴰⵏⵜ ⴳ ⵓⵙⴰⵜⵉ ⵏ ⵓⵎⵙⴰⵡⴰⵍ ⴰⵎⵢⴰⵖ ⴰⴽⴷ ⵜⴳⵏⵙⴰⵙⵜ ⵜⴰⵎⵥⵍⵉⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵡⴰⵣⵣⴰⵏⵏ ⴷ ⵓⵎⵏⵣⴰⵖ ⴰⵎⴰⵍⴰⴼ ⵉⵜⵜⵓⵙⵏⵎⴰⵍⴰⵏ ⴳ ⵜⵙⵓⵜⵍⵜ 49 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ 16 ⵎⴰⵕⵚ 2022, "ⵜⴰⵎⵙⵜⴳⴳⴰⵔⵜ ⵏ ⵡⴰⵎⵓⵏ ⴰⴳⵔⴰⵖⵍⴰⵏ, ⴷ ⵙ ⵓⵙⵏⴰⵍ ⵅⴼ ⵎⴰⴷ ⵉⵣⵎⵎⴻⵎ ⵏ ⵓⵣⵣⵉⴳⵣ ⵏ ⵓⵙⵄⵚⴽⵕ ⵏ ⵡⴰⵣⵣⴰⵏⵏ ⴳ ⵉⴼⵔⵉⵇⵢⴰ, ⵉⵇⵇⴰⵏ ⴷ ⴰⴷ ⵜⵙⵙⴰⵎⵓ ⴰⵙⵙⵉⴷⴼ ⵏⵏⵙⵏ ⴳ ⵜⵓⵚⴽⴰ ⵏ ⵓⴼⵔⴰ ⴷ ⵉⵡⵉⵣ ⵅⴼ ⵓⵙⵎⵙⴰⵙⴰ ⴰⵙⵔⵜⴰⵏ ⵏ ⵉⵎⵏⵣⴰⵖⵏ, ⴰⵢⵍⵍⵉ ⵉⵙⵙⵓⵔⵓⴼⵏ ⴰⵍⵍⴰⵙ ⵏ ⵓⵙⵖⵔⵜ ⵏⵏⵙⵏ ⴷ ⵓⵙⵉⴷⴼ ⵏⵏⵙⵏ ⴳ ⵜⵓⴷⵔⵜ ⵜⵓⵏⵣⵉⵍⵜ".

ⵜⵙⴽⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⵙⵖⵣⵏⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵙⵓⵎⵔⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⵅⴼ "ⵓⵙⵔⵓⵙ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉ ⵓⴼⵔⴰⴳ ⵏ ⵡⴰⵣⵣⴰⵏⵏ, ⵉⴷⴷⵖ ⵢⵓⵎⵏ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ ⴳ ⵜⵓⵚⴽⴰ ⵏ ⵓⴼⵔⴰ ⴷ ⵓⵙⴱⴷⴷⵉ ⵏ ⴽⵔⴰⵢⴳⴰⵜ ⵉⴳⵉ ⵏ ⵓⵙⵄⵚⴽⵕ ⵏⵏⵙⵏ ⴰⴼⴰⴷ ⴰⴷ ⵓⵔ ⵡⵔⵔⵉⵏ ⵙ ⵓⵡⵔⵏ ⵏ ⵓⴼⴰⵔⵙ ⵏ ⵜⴼⴰⴷⵉⵡⵉⵏ ⵏ ⵉⵎⵏⵖⵉ". 

ⴳ ⵓⵎⵏⴰⴹ ⵏ ⵜⵓⵍⵖⴰ ⵏⵏⵙ ⵙ ⵜⵓⵎⴰⵢⵜ ⵏ ⵜⴰⵏⴰⴹⵜ ⵏ ⵜⴳⵏⵙⴰⵙⵜ ⵜⴰⵎⵥⵍⵉⵜ ⴷ ⵉⵙⵖⵍⴰⴼ ⵏⵏⴰ ⵢⵓⵎⴰ, ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵙⵉⴷⴼ ⵏ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵙⵉⵎⴰⵏⵉⵏ ⴳ ⵜⴰⵏⴰⴹⵉⵏ ⵏⵏⵙⵏⵜ ⵜⵉⵏⴹⴼⴰⵕⵉⵏ, ⵉⴷⴷⵖ ⴷⴰ ⵜⵜⵓⵔⴰⵔⵏⵜ ⵜⵎⵔⵙⴰⵍ ⴰⴷ ⵢⴰⵜ ⵜⵉⵍⴰⵍⵜ ⵜⴰⵎⵇⵇⵔⴰⵏⵜ ⴳ ⵡⴰⵔⴰⵢ ⵏ ⵡⴰⵣⵣⴰⵏⵏ ⴷ ⵓⴼⵔⴰⴳ ⵏⵏⵙⵏ ⵙⴳ ⵓⵙⵖⵍⵍⴰ ⴰⵡⵏⴳⵉⵎ ⴷ ⵓⴽⵍⵉⵙⵏ ⴷ ⵓⴷⵢⵓⵍⵓⵊⵉ ⵉⵙⵙⵡⵀⴰⵏⵏ ⵉ ⵉⵎⵙⵜⴳⴳⴰⵔⵏ ⴰⵙⵎⵔⵙ ⵏⵏⵙⵏ.