ⵊⵓⵏⵉⴼ, 12 ⵎⴰⵕⵚ 2025 – ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI), ⵢⴰⵏ ⵓⵏⵎⵓⵇⵇⴰⵔ ⴰⵎⵢⴰⵖ ⴳ ⵜⴳⴰⴷⵉⵔⵜ ⵏ ⵜⵎⵜⵜⴰ ⴰⴽⴷ ⵉⵎⵖⵜⴰⵙⵏ ⵉⵏⵎⵜⵜⴰⵏ ⴷ ⵜⵎⴳⴳⵉⵜⵉⵏ ⵜⵉⵏⴰⵎⵜⵜⴰⵏⵉⵏ ⵉⵥⵍⵉⵏ, ⴷ ⵢⵓⵡⵉⵏ ⵅⴼ ⵜⵎⴰⵎⴽⵉⵏ ⵏ ⵓⵙⴱⵓⵖⵍⵓ ⵏ ⵓⵎⵢⴰⵡⴰⵙ ⴷ ⵜⵡⵓⵔⵉ ⵉⵛⵛⴰⵔⵏ ⵏⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⴰⵍ ⵜⵉⵏⵎⵜⵜⴰⵏⵉⵏ ⵉⵥⵍⵉⵏ, ⵉⵜⵜⵓⵙⵏⵎⴰⵍⴰⵏ ⵙ ⵡⴰⵏⵏⴰⵍ ⵏ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵜⴳⵓⵔⵉ ⵏⵏⵙ ⵏ ⵓⵕⵥⵥⵓⵎ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⵙⵉⵣⵡⵔ ⵏ ⵓⵎⵢⴰⵡⴰⵙ ⴰⴷ, "ⵏⵏⴰ ⵏⴳⴰ ⴳ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⴰⵏ ⵙⴳ ⵉⵡⵜⵜⴰⵙⵏ ⵏⵏⵖ ⵉⵙⵜⵔⴰⵜⵉⵊⵉⵢⵏ", ⵜⵏⵏⴰ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⴳ ⵜⵉⵣⵉ ⵏ ⵜⵏⵥⴰⵕ ⵊⵊⵓ ⵜⵜ ⵉⵏⵏ ⵉⴽⴽⴰⵏ ⵉⵙⴷⵉⴷⴷⵉⵢⵏ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⵖⵣⵓⵔⴰⵏ.
ⵅⴼ ⵉⴳⴳⵉ ⵏ ⵉⴳⵏⵙⴰⵙⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵓⵣⴰⵢⵏ ⴷ ⵓⵙⵓⵜⴰⵢ ⵏ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⵏⵏⴰ ⵜⵕⵥⵎ ⵜⵏⵙⵙⵉⵅⴼⵜ ⵏ ⵜⴰⴹⴰ, ⵙ ⵜⴷⵔⴰⵡⵜ ⵏ ⵎⴰⵙⵙⴰ ⵎⴰⵎⴰ ⴼⴰⵟⵉⵎⴰ ⵙⴰⵏⴳⴰⵜⴰ, ⵜⴰⵎⵖⵜⴰⵙⵜ ⵜⴰⵏⵎⵜⵜⴰⵏⵜ ⵜⴰⵎⵥⵍⴰⵢⵜ ⵉⵏⵜⴰⵢⵏ ⵙ ⵓⵣⵣⵏⵣ ⵏ ⵡⴰⵣⵣⴰⵏⵏ ⴷ ⵓⵙⵖⵍⵍⴰ ⵏⵏⵙⵏ ⴰⵡⵙⵢⴰⵏ , ⴷ ⵎⴰⵙⵙⴰ ⴰⵙⵜⵔⵉⴷ ⴱⵓⵢⵏⵜⵉⵙ ⵔⵢⴰⵏⵢⵓ, ⵜⴰⵎⵖⵜⴰⵙⵜ ⵜⴰⵏⵎⵜⵜⴰⵏⵜ ⵜⴰⵎⵥⵍⴰⵢⵜ ⵉⵏⵜⴰⵢⵏ ⵙ ⵓⵣⵔⴼ ⴳ ⵜⵡⵏⵏⴰⴹⵜ ⵉⴷⵓⵙⵏ, ⴷ ⵎⴰⵙⵙⴰ ⵏⴰⵟⴰⵍⵉ ⵔⵓⵏⴷⵓ, ⵜⴰⵏⴼⵍⵓⵙⵜ ⵏ ⵜⵙⵇⵇⵉⵎⵜ ⵏ ⵓⵣⴷⴰⵢ, ⵜⴰⵥⴰⵢⵕⵜ ⵏ ⵜⵎⴳⴳⵉⵜⵉⵏ ⵜⵉⵎⵥⵍⴰⵢⵉⵏ, ⵜⴰⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ.
ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵡⴰⴷⴰⵙ ⵏⴳⵔ ⵜⵙⵎⵉⴳⴰⵍ ⵏ ⵜⵎⴳⴳⵉⵜⵉⵏ ⵜⵉⵎⵥⵍⴰⵢⵉⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⴷ ⵜⵉⵏⵏⴰ ⵙⴽⴰⵔⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⴰⵎ ⵜⵉⴹⴼⵕⵉ, ⴰⵙⵎⵏⵉⴷ ⵏ ⵜⵡⵉⵙⵉ ⴷ ⵛⵛⵡⴰⵕ, ⵜⴰⵣⵡⵓⵔⵜ ⴷ ⵓⴽⵛⵛⵓⵎ ⴳ ⵡⴰⴷⴷⴰⴷⵏ ⵏ ⵉⵖⴰⵡⵍⵏ, ⴰⵙⴼⵔⴽ ⴷ ⵓⵎⵢⴰⵖ ⴰⴽⴷ ⵉⵡⴰⵏⴽⵏ ⴷ ⵜⵎⵔⵙⴰⵍ ⴷ ⴰⴽⴷ ⵓⵏⴳⵉⵙⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ. ⵜⵉⵏⵉ ⴳ ⵓⵙⴰⵜⵉ ⴰⴷ "ⵎⴰⵙ ⵉⵍⵍⴰ ⵢⴰⵏ ⵓⵣⴷⴰⵢ ⵉⴷⵓⵙⵏ ⴷ ⵓⵙⵎⴰⴷ ⵏⴳⵔⴰⵏⵖ ⴷ ⵏⴳⵔ ⵜⵙⵎⵉⴳⴰⵍ ⵏⵏⴰ ⵏⵙⴽⴰⵔ, ⵎⵇⵇⴰⵔ ⵏⵙⵡⵓⵔⵉ ⴳ ⵉⵙⵡⵉⵔⵏ ⵉⵎⵢⴰⵏⴰⵡⵏ, ⵎⴰⵢⴰ ⴰⴷ ⵉⵙⴷⵓⵙⵏ ⵜⵉⵍⴰⵍ ⵏⵏⵖ ⴳ ⵓⵙⴷⵓⵙ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵡⵉⵍⴰ ⵜⴰⵏⴰⵎⵓⵔⵜ ⴷ ⵜⴰⴳⵔⴰⵖⵍⴰⵏⵜ".
"ⴰⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵉⵎⴰⵙⵙⵏ ⴰⴷ ⵉⵏⵎⵜⵜⴰⵏⵏ ⴷ ⴰⵙⵖⵓⵏ ⴷ ⵓⴷⵙⵍⴰⵏ", ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ. ⴳ ⵜⵉⵣⵉ ⵏ ⵜⵏⵥⴰⵕ ⴷ ⵉⵙⴷⵓⴷⴷⵉⵢⵏ ⵉⵜⵔⴰⵔⵏⵏ ⵏⵏⴰ ⵏⵜⵜⵎⵏⴰⵍⴰ ⴰⵙⵙ ⴰ, ⵉⵥⴹⴰⵕ ⵓⵎⵢⴰⵡⴰⵙ ⴰⴷ, ⵜⵔⵏⴰ, "ⴰⴷ ⵉⴳ ⵉⵎⵉⵙ ⴰⵎⵖⵜⴰⵙ ⵉ ⵓⵎⵏⴰⵍⴰ ⵏ ⵜⵕⵥⵉⵢⵉⵏ ⴷ ⵓⵙⴷⵓⵙ ⵏ ⵓⴼⵔⴰⴳ ⴳ ⵜⵉⵍⴰⵡⵜ, ⵜⵙⴷⴷⵉⴷ ⵎⴰⵙ ⵉⴳⴰ ⵖⴰⵢⴰⴷ ⴰⵙⵖⵓⵏ ⵉ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴳ ⵜⵓⴳⴳⴰⵣ ⵏⵏⵙⵏⵜ ⵃⵎⴰ ⴰⴷ ⵙⵏⴼⵍⵏⵜ ⵉⵙⴰⴷⵎⵔⵏ ⵉⵎⵢⴰⴳⴰⵏⵏ ⵉⵎⵙⴰⵙⴰⵏ ⴰⴽⴷ ⵜⵉⵍⴰⵡⵜ ⴷ ⵉⵎⵏⴰⴹⵏ ⵉⴷⵖⵔⴰⵏⵏ ⵏⵉⵖ ⵉⵏⴰⵎⵓⵔⵏ.
ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⵜⵙⵎⴰⵢⵏⵓ ⵎⴰⵙⵙⴰ ⴱⵓⵄⵢⵢⴰⵛ ⵜⴰⵖⵓⵔⵉ ⵙ ⵜⵖⴱⵉ ⵏ ⵜⴷⵔⴰⵡⵜ ⵏⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵜⵎⴳⴳⵉⵜⵉⵏ ⵜⵉⵎⵥⵍⴰⵢⵉⵏ, ⵙ ⵜⵡⵉⵍⴰ ⵏⵏⴰ ⵔⴰⴷ ⴷⴰⵔⵙ ⵢⵉⵍⵉ "ⵢⴰⵏ ⵓⴷⵔⵉⵣ ⵉⵜⵜⵓⵙⵙⵏⵏ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ.” ⵉ ⵓⵙⵙⴽⵜⵉ, ⵉⴷⴷⴰ ⴷ ⵓⵙⵏⵎⴰⵍⴰ ⵏ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵜⵉⵍⴰⵍⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⴳ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴳ ⵜⵉⵣⵉ ⵏ ⵜⵏⵥⴰⵕ ⵉⵜⵜⵡⴰⵔⵏⴰⵏ, ⴳ ⵜⴱⵔⵉⴷⵜ ⵏⵏⵙ ⵉⵥⵍⵉⵏ ⴳ ⵢⵉⵎⵉⵔ ⵏ 2025.
