ⵜⴻⵜⵜⵓⵙⵎⵖⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵎⵡⴰⵙ 10 ⵉⵏⵏⴰⵢⵔ 2024, ⵙ ⵜⵙⵎⵖⵓⵔⵜ ⵏ ⵢⵉⵍⵍ ⴰⴳⵔⴰⴽⴰⵍ ⵜⴰⴽⵙⵡⴰⵜ ⵏⵏⵉ ⴰⵙ ⵜⴼⴽⴰ ⵜⵎⵔⵙⵍⵜ "ⵉⵡⴰⵏⴽⵏ ⵏ ⵓⵎⴰⴹⴰⵍ ⵉⵎⵓⵏⵏ" ⴷ ⵓⵏⴳⵎⴰⵎ ⵏ ⵜⵏⴼⵔⵉⵜ ⵏⵏⵙ ⵜⴰⴳⵔⴰⵖⵍⴰⵏⵜ, ⴳ ⵓⵙⵖⵉⵎ ⵏ ⵜⵎⵔⵙⵍⵜ ⴳ ⵏⴰⴱⴱⵓⵍⵉ, ⵟⴰⵍⵢⴰⵏ, ⵜⴳ ⵜⵓⵙⵏⵜ ⴷ ⵓⵙⵙⵉⵎⵖⵔ ⵉ ⵜⵖⵏⵙⴰ ⵏⵏⵙ ⴷ ⵓⵎⵣⴰⵖ ⵏⵏⵙ ⵉⵣⴷⵉⵏ ⵅⴼ ⵉⵣⵔⴼⴰⵏ ⴷ ⵡⴰⴷⴷⵓⵔ ⴰⵏⴼⴳⴰⵏ.
"ⵜⵙⵎⵖⵓⵔⵜ ⵏ ⵢⵉⵍⵍ ⴰⴳⵔⴰⴽⴰⵍ" ⴷ ⵜⴰⵙⵎⵖⵓⵔⵜ ⵜⴰⴽⵙⵡⴰⵜ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴰⵔ ⵜⵜ ⵜⵜⵓⴹⴼⴰⵕⵏⵜ ⴽⵉⴳⴰⵏ ⵏ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ, ⴰⵔ ⵜⵙⵏⵉⴳⵍ ⵙ ⵓⵎⵙⴰⵡⴰⵍ ⴷ ⵜⵡⵉⵙⵉ ⴳⵔ ⵉⵎⴰⴷⴰⵏⵏ, ⵜⴳ ⴰⵡⴷ ⵜⴰⵎⴰⵜⴰⵔⵜ ⵏ ⵜⵓⵙⵏⵜ ⴷ ⵓⵙⵎⵖⵔ ⵉ ⵡⵓⴷⵎⴰⵡⵏ ⵏⵏⴰ ⵉⵜⵜⴰⵡⵙⵏ ⴳ ⵓⵙⴷⵓⵙ ⵏ ⵜⵓⵚⴽⴰ ⵜⴰⵎⵓⵏⴰⵏⵜ ⴷ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴳⵎⵉ ⵏ ⵓⴼⴳⴰⵏ.
ⴳ ⵜⴳⵓⵔⵉ ⵏⵏⵙ ⴳ ⵓⵣⵎⵣⵣⵓ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ "ⵎⴰⵙ ⵉⴳⴰ ⵓⵙⵎⵖⵔ ⴰⴷ ⵙ ⵡⵓⴷⵎ ⵉⵏⵓ ⵏⴽⴽⵉ ⵏⵏⵉ ⵉⴳⴰⵏ ⵜⴰⵎⵖⴰⵔⵜ ⴷ ⵜⵎⵖⵏⴰⵙⵜ, ⴰⵔ ⵜ ⵥⵕⵕⴰⵖ, ⴷⴰⵜ ⵏ ⵇⵇⴰⵃ, ⴰⵙⵎⵖⵔ ⵉ ⵜⵎⵓⵔⵜ ⵉⵏⵓ, ⵍⵎⵖⵔⵉⴱ, ⴷ ⵜⵓⵙⵏⵜ ⵙ ⵓⵙⵓⵖⵏ ⵏⵏⵙ ⵉⴷⵓⵙⵏ ⵙ ⵜⵉⵏⴷⵉⵜⵉⵏ ⵜⵉⵖⵣⵓⵔⴰⵏⵉⵏ ⵉⵍⵍⴰⵏ ⴳ ⵡⴰⴷⴷⵓⵔ, ⵜⴰⵣⵔⴼⵜ ⴷ ⵢⵉⵙⴽⵉⵍ."
ⵜⵙⵙⵎⵜⵔ ⴳ ⵓⵎⵏⴰⴹ ⴰⴷ ⵎⴰⵙ ⵉⵙⵉⵍⴰⵡ ⵍⵎⵖⵔⵉⴱ ⵎⴰⵙ ⵉⴳⴰ ⴰⵎⵙⴽⴰⵔ ⴰⵅⴰⵜⴰⵔ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵍⵉⵖ ⵉⴳⴰ ⵜⵉⵍⴳⴳⵯⵉⵜ ⴳⵔ ⵜⵎⵏⵥⴰⵡⵉⵏ ⴷ ⵜⵓⵙⵙⵏⵉⵡⵉⵏ ⴷ ⵉⵙⴳⴷⴰⵏ, ⵙ ⵉⵡⵉⵣ ⵏⵏⵙ ⵅⴼ ⵓⵙⴷⵓⵙ ⵏ ⵜⴰⵏⵏⴰⵢⵜ ⵉⵏⵏⵓⵕⵥⵎ ⴷ ⵉⵎⵙⵙⵓⵔⵓⴼⵏ, ⵉⴱⴷⴷⵏ ⵅⴼ ⵓⵎⵢⴰⵏⴰⵡ ⴷ ⵓⵙⵉⴷⴼ, ⵉⴷⴷⵖ ⵉⵙⵙⵏⵜⵉ, ⵣⵖ ⵓⵙⴳⴳⵯⴰⵙ ⵏ 1999, ⴰⴷ ⵉⵙⵖⵣⵏ ⵉⵎⵓⴽⵏⵏ ⵓⵚⴽⵉⵡⵏ ⵜⵉⵎⴰⵣⵓⵍⵉⵏ, ⴰⵎ ⴳ ⵓⵙⵡⵉⵔ ⴰⴷⵙⵜⴰⵔ ⵏⵖ ⵓⵣⵔⵉⴼ ⵏⵖ ⴰⵎⵔⵙⴰⵍ, ⵙ ⵓⵙⵎⵀⵍ ⵏ ⵉⵎⵏⵣⴰⵢⵏ ⵉⵎⴰⴹⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵉⴳ ⴰⵙⴰⴽⴰ ⵉⵜⵜⵓⵙⵎⵖⵔⵏ ⴰⵙⴳⴳⵯⴰⵙ ⵏ 2024 ⵙ ⵓⵍⴽⴰⵎ ⵏ ⵜⵙⵓⵔⵉⴼⵜ ⵜⴰⵎⵣⵔⴰⵢⵜ ⵜⴰⵏⴰⵎⵓⵔⵜ ⵏⵏⴰ ⵉⵍⵍⴰⵏ ⴳ ⵓⵙⵜⴰⵢ ⵉⵚⴰⵃⴰⵏ ⵉ ⵓⵙⴱⵉⴷⴷ ⴰⵎⴰⴹⵍⴰⵏ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵎⴰⵢⴰ ⴷⴰ ⵉⵜⵜⵙⴷⴷⵉⴷ ⴰⵙⵓⵖⵏ ⵏ ⵜⴳⵍⴷⵉⵜ ⵉⵕⵚⴰⵏ ⵉ ⵉⴷⵓⵙⵏ ⵙ ⵡⴰⴷⴷⵓⵔ ⴰⵏⴼⴳⴰⵏ, ⴷ ⵡⵉⵢⵢⴰⴹ.
