ⵜⴻⵜⵜⵓⵙⵙⵉⵎⵖⵓⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI) ⵙ "ⵜⵎⴰⴷⴰⵢⵜ ⵏ ⵜⵓⴽⵍⴰⵍⵜ ⵜⴰⵣⵣⵓⵍⴰⵏⵜ ⵏ ⵓⵙⴳⴳⵯⴰⵙ 2025" ⵏⵏⴰ ⴰⵙ ⵜⴼⴽⴰ ⵜⵙⵇⵇⵉⵎⵜ ⵜⴰⵎⴰⵙⵙⴰⵏⵜ ⵏ ⵓⴱⵔⴳⵔⴰⵡ ⴰⴳⵔⴰⵖⵍⴰⵏ ⵡⵉⵙⵙ ⵜⴰⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵣⵔⴼ ⴰⵏⵙⵜⴰⵢ, ⵉ ⵓⵙⵎⵖⵔ ⵏⵏⵙ ⴷ ⵜⵓⵙⵏⵜ ⵙ ⵓⵙⵓⵖⵏ ⵏⵏⵙ ⴷ ⵜⵓⴳⴳⴰⵙ ⵏⵏⵙ ⵜⵉⵙⵓⵍⴰⵏⵉⵏ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.

ⵉⵜⵜⵓⵙⴽⴰⵔ ⵓⵙⵎⵖⵔ ⴰⴷ ⴳ ⵓⴱⵔⴳⵔⴰⵡ ⵏ ⵎⴰⴷⵔⵉⴷ/ⴽⵟⵓⴱⵕ 2025 ⵏⵏⵉ ⵜⵙⵏⵎⴰⵍⴰ ⵜⵙⴷⴰⵡⵉⵜ ⵏ ⵓⴳⵍⵍⵉⴷ ⵅⵡⴰⵏ ⴽⴰⵕⵍⵓⵙ ⴳ ⵎⴰⴷⵔⵉⴷ ⴷ ⵜⴽⴰⴷⵉⵎⵉⵜ ⵏ ⵍⵉⴷⵔ ⵉ ⵓⵙⵎⵓⵜⵜⴳ ⴰⵎⴰⵜⵜⴰⵢ, ⵙ ⵡⴰⵏⵏⴰⵍ ⵏ ⵉⵙⵍⵎⴰⴷⵏ ⴷ ⵜⵙⴷⴰⵡⵉⵢⵉⵏ ⵜⵉⵡⵕⵓⴱⴱⵉⵢⵉⵏ, ⵙⴳⵉⵙⵏⵜ ⵜⴰⵙⴷⴰⵡⵉⵜ ⵏ ⵕⵣⵉⵛⵓⴼ (ⴱⵓⵍⵓⵏⵢⴰ), ⴷ ⵜⵙⴷⴰⵡⵉⵜ ⵏ ⵍⴰⵙ ⴱⴰⵍⵎⴰⵙ ⴷⵉ ⴳⵔⴰⵏ ⴽⴰⵏⴰⵔⵢⴰ (ⵉⵙⴱⴰⵏⵢⴰ), ⴷ ⵜⵙⵏⴱⴹⴰⵢⵜ ⵜⴰⵏⵙⵜⴰⵢⵜ ⵜⴰⵎⴰⵜⵜⴰⵢⵜ ⵏ ⵜⵏⴱⴹⴰⵢⵜ ⵜⴰⴼⵉⴷⵉⵔⴰⵍⵉⵜ ⴳ ⵍⵎⵉⴽⵙⵉⴽ.

ⵉ ⵓⵙⵙⴽⵜⵉ, ⵜⴳⴰ ⵜⵎⴰⴷⴰⵢⵜ ⵏ ⵜⵓⴽⵍⴰⵍⵜ ⵜⴰⵣⵣⵓⵍⴰⵏⵜ ⴰⵙⵎⵖⵔ ⴰⴽⴽⴰⵏ ⵉ ⵉⴽⴰⴷⵉⵎⵉⵢⵏ ⴷ ⵉⵎⵓⵣⴰⵢⵏ ⴷ ⵉⵏⴱⴹⴰⵢⵏ ⵉ ⵓⵙⵎⵖⵔ ⵅⴼ ⵉⵙⴰⴽⴰⵜⵏ ⵉⵎⵥⵍⴰⵢⵏ ⴳ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ. ⵉⴽⴽⴰ ⵉⵜⵜⵓⴼⴽⴰ ⵓⵙⵎⵖⵔ ⴰⴷ ⵉ ⵎⴰⵙⵙ ⵔⵓⴱⵉⵔⵜⵓ ⴷⵉ ⴽⴰⵍⴷⴰⵙ, ⴰⵏⵙⵙⵉⵅⴼ ⴰⵣⴰⵢⴽⵓ ⵏ ⵜⵙⵏⴱⴹⴰⵢⵜ ⵜⴰⵎⵉⵔⵉⴽⴰⵏⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵎⴰⵙⵙⴰ ⵔⴰⴽⵉⵍ ⴽⴰⴱⴰⵢⵉⵔⵓ, ⵜⴰⵎⵣⴰⵖⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵙⵙⴰⵍⴼⴰⴹⵓⵕ.

ⴳ ⵜⴷⵔⴰⵡⵜ ⵙⴳ ⵜⵓⴳⴳⵓⴳⵜ, ⴳ ⵢⴰⵜ ⵜⴳⵓⵔⵉ ⵏ ⵜⴳⵉⵔⴰ ⵏ ⵓⴱⵔⴳⵔⴰⵡ, ⵜⵙⵎⵏⵉⴷ ⵎⴰⵙⵙⴰ ⴱⵓⵄⵢⵢⴰⵛ ⴰⵙⵎⵖⵔ ⵏⵏⵙ ⵉⵖⴱⴰⵏ ⵉ ⵜⵙⵇⵇⵉⵎⵜ ⵜⴰⵎⴰⵙⵙⴰⵏⵜ ⵏ ⵓⴱⵔⴳⵔⴰⵡ ⵅⴼ ⵓⵙⵎⵖⵔ ⴰⴷ, ⵜⵉⵏⵉ ⵎⴰⵙ ⵜⴳⴰ ⵜⵎⴰⴷⴰⵢⵜ ⴰⴷ ⴰⵢⴷⴰ ⵏ ⴰⴽⴽⵯ ⵜⵉⵏⵎⵣⴰⵖⵉⵏ/ⵉⵏⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ, ⴳ ⵓⵙⴰⴽⴰ ⵏ ⵜⵖⵏⵙⴰ ⵜⴰⵎⴰⵣⴰⵔⵜ ⴷ ⵜⴽⵓⵢⴰⵙⵙⵜ ⵉ ⵓⵏⵀⵍⵍⴰ ⵏ ⵡⴰⴷⴷⵓⵔ ⴰⵏⴼⴳⴰⵏ ⴷ ⵜⵣⵔⴼⵜ ⴷ ⵢⵉⵙⴽⵉⵍ.

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵓⵏⵎⵓⵇⵇⴰⵔ ⵉⵙⵎⵓⵏⵏ ⵢⴰⵜ ⵜⵓⴼⵔⵉⵏⵜ ⵏ ⵉⵎⵙⴽⴰⵔⵏ ⵉⴽⴰⴷⵉⵎⵉⵢⵏ ⴷ ⵉⵎⵔⵙⴰⵍⵏ ⴷ ⵉⵎⵓⵣⴰⵢⵏ ⴳ ⵢⵉⴳⵔ ⵏ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴼⵔⵉⵙⵜ ⵏⵏⵙ ⴷ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⴷⴰ ⵎⵎⴰⵍⵏ ⵉⵙⵜⴰⵢⵏ ⵜⵉⵔⴰⵜ ⵏ ⵉⴳⴷⵓⴷⵏ, ⵎⴰⵛⴰ ⵓⵔ ⵓⴷⴰⵏ ⵡⴰⵃⴷⴰⵏ ⵉ ⵜⵏⴼⵔⵓⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ, ⵜⵔⵏⵓ ⵎⴰⵙ "ⵓⵔ ⵜⴳⵉ ⵜⴷⵉⵎⵓⵇⵕⴰⵟⵉⵜ ⵖⴰⵙ ⵜⵉⵣⵉ ⵏ ⵓⵙⵜⴰⵢ, ⵎⴰⵛⴰ ⵜⴳⴰ ⴰⵙⴰⴽⴰ ⴰⵙⵓⵍⴰⵏ ⵅⴼ ⵜⵜⵓⵚⴽⴰⵏⵜ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵅⴼ ⵜⵔⵙⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ".

ⵎⵇⵇⴰⵔ ⵜⴳⴰ ⵜⴰⵎⴰⵜⴰⵔⵜ ⵏ ⵜⴷⵔⴼⵉ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵓⵔ ⴷⴰ ⵜⵜⵏⴼⵔⵓⵏ ⵉⵙⵜⴰⵢⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵡⵓⵔⵎⴰⵏ, ⴷⴰⵜ ⴰⴷ ⵜⵔⵏⴰ ⵎⴰⵙ "ⵜⴱⴷⴷ ⵜⴷⵉⵎⵓⵇⵕⴰⵟⵉⵜ ⵜⴰⵎⵢⴰⴳⴰⵏⵜ ⵅⴼ ⵜⵎⵔⵙⴰⵍ ⵜⵉⴷⵓⵙⵏⵉⵏ ⴷ ⵜⵓⵙⵙⵏⴰ ⵜⴰⵣⵔⴼⴰⵏⵜ ⵉⵕⵚⴰⵏ ⴷ ⵜⴷⵔⴰⵡⵜ ⵜⴰⵏⵎⵓⵔⵉ ⵜⴰⵙⵓⵍⴰⵏⵜ".

ⴳ ⵓⵙⴼⵙⵉ ⵏⵏⵙ ⵉ ⵉⵙⵏⴼⵍⵏ ⵏⵏⴰ ⵜⵜⴷⴷⵔⵏ ⵡⴰⵎⵓⵏⵏ ⵉⵜⵔⴰⵔⵏ, ⵜⵙⵙⴼⴰⵡ ⴱⵓⵄⵢⵢⴰⵛ ⵎⴰⵙ ⵓⵔ ⵢⴰⴷ ⴰⵖⵓⵍⵏ ⵡⴰⵏⴰⵡⵏ ⵏ ⵓⵡⵏⵏⵉ ⴷ ⵓⵙⵓⵜⵔ ⵏ ⵉⵣⵔⴼⴰⵏ ⵜⵜⵓⵙⴽⵔⴼⵏ ⴳ ⵉⵙⵓⵜⴰⵢ ⵉⵕⵚⵍⵉⵢⵏ ⵏ ⵉⴽⴰⴱⴰⵔⵏ ⴷ ⵉⵎⵓⵍⵍⵉⵜⵏ ⴷ ⵜⵎⵙⵎⵓⵏⵉⵏ ⵜⵉⵄⵔⵔⵉⵎⵉⵏ, ⵉⴷⴷⵖ ⴰⵖⵓⵍⵏⵜ(ⵏ) ⵜⵉⵏⵎⵓⵔⵉⵢⵉⵏ/ⵉⵏⵎⵓⵔⴰⵏ ⴰⵔ ⵜⵜⴰⵖⵓⵍⵏ ⵖⵔ ⵜⴰⵍⵖⵉⵡⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵙⵏⵎⴰⵍⴰ ⴷ ⵜⴷⵔⴰⵡⵜ, ⵙⵍⴰⵡⴰⵏ ⴰⴽⴽⵯ ⵙ ⵜⴷⴰⴱⵓⵜⵉⵏ ⵜⵉⵎⵓⵟⵟⵓⵏⵉⵏ ⴷ ⵓⵙⵎⵓⵙⵙⵓ ⴰⵏⵉⵎⴰⵏ.

ⵜⵉⵏⵉ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵎⴰⵙ ⴷⴰ ⵉⵎⵎⴰⵍ ⵓⵙⵏⴼⵍ ⴰⴷ ⵙⴳ ⵢⴰⵜ ⵜⵙⴳⴰ ⵓⵖⵓⵍ ⵏ ⵜⴼⵍⵙⵜ ⴳ ⵜⴷⴰⴱⵓⵜⵉⵏ ⵜⵉⵣⴰⵢⴽⵓⵜⵉⵏ, ⴷ ⵙⴳ ⵜⵙⴳⴰ ⵢⴰⴹⵏⵉⵏ ⴰⵔⵣⵣⵓ ⵅⴼ ⵉⵙⴰⵢⵔⴰⵔⵏ ⵉⵎⴽⴽⵉⵙⵏ ⵉ ⵓⵡⵏⵏⵉ ⵅⴼ ⵉⵙⵓⵜⵔⵏ ⵉⵏⴰⵎⵓⵏⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⵙⵍⴰⵏⵏ.

ⴳ ⵓⵙⴰⵜⵉ ⵏ ⵓⵎⵙⴰⵡⴰⵍ ⵏⵏⵙ ⵅⴼ ⵜⵏⵥⴰⵕ ⵜⵉⵜⵔⴰⵔⵉⵏ, ⵜⴱⴷⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⴷⵔⵉⵣ ⵏ ⵜⵖⵉⵙⵜ ⵜⵉⵎⵍⵥⵉⵜ ⴷ ⵜⵉⵜⵉⵇⵏⵉⵢⵉⵏ ⵜⵉⵎⴰⵢⵏⵓⵜⵉⵏ ⵅⴼ ⵉⵏⴰⴳⵔⴰⵡⵏ ⵉⵏⵙⵜⴰⵢⵏ ⴷ ⵅⴼ ⵜⵎⵙⴽⵔⵉⵏ ⵏ ⵜⴷⵔⴰⵡⵜ ⵜⴰⵙⵔⵜⴰⵏⵜ, ⵜⵙⴷⴷⵉⴷ ⵎⴰⵙ ⵓⵔ ⵉⵅⵚⵚⴰ ⴰⴷ ⵉⴱⴷⴷ ⵓⵙⵍⵍⵡⵉ ⴳ ⵢⵉⴳⵔ ⴰⴷ ⵖⴰⵙ ⵅⴼ ⵉⵎⴰⵙⵙⵏ ⵉⵜⵉⵇⵏⵉⵢⵏ, ⵎⴰⵛⴰ ⵉⵅⵚⵚⴰ ⴰⴷ ⵉⵙⵢⴰⴼⴰ ⵖⵔ ⵓⵙⵏⴼⵍ ⵏ ⵓⵏⴰⴳⵔⴰⵡ ⴰⵏⵙⵜⴰⵢ ⵖⵔ ⵓⵙⴰⵢⵔⴰⵔ ⴰⵎⵢⴰⴳⴰⵏ ⵏ ⵜⵎⵓⵔⵉ ⴷ ⵜⴷⵔⴰⵡⵜ, ⵓⵔ ⴷ ⵖⴰⵙ ⵉⵎⵉⵙ ⵏ ⵓⵙⵎⴷⵢⴰ.

ⵎⴽⴷⴰ ⵜⵙⴷⴷⵉⴷ ⵅⴼ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⴰⵍⴰ ⵏ ⵉⵙⵏⴼⵍⵏ ⴰⴷ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⴳ ⵉⵎⵏⴰⴹⵏ ⵏ ⵓⵙⵏⴼⵍ ⵉⵣⵔⴱⵏ, ⵜⵖⵔ ⵙ ⵜⵖⴱⵉ ⵏ ⵓⵎⵙⴰⵡⴰⵍ ⵏⴳⵔ ⵉⵎⵔⵣⴰ ⴷ ⵉⵎⵙⴽⴰⵔⵏ ⵉⵣⵔⴼⴰⵏⵏ ⴷ ⵜⵎⵔⵙⴰⵍ ⵉ ⵓⵎⵏⴰⵍⴰ ⵏ ⵜⵏⵥⴰⵕ ⵜⵉⵎⴰⵢⵏⵓⵜⵉⵏ ⵏⵏⴰ ⵜⵙⵙⵓⵖⵏ ⵜⴳⵔⴰⵡⵍⴰ ⵜⴰⵎⵓⵟⵟⵓⵏⵜ ⴷ ⵉⵙⵏⴼⵍⵏ ⵉⵏⴰⵎⵓⵏⵏ ⵉⵖⴱⴰⵏ.