ⵙ ⵡⴰⴳⴳⵓⴳ ⵏ ⵙⵏⴰⵜ ⵜⵙⵔⴰⴳⵉⵏ ⵣⴳ ⵜⵎⴷⵉⵏⵜ ⵏ ⵎⵉⴽⵙⵉⴽⵓ, ⴷ ⴳ ⵡⴰⵎⵎⴰⵙ ⵏ ⵜⴳⵔⴰⵡⵜ ⵏ "ⵊⴰⵏⵜⵉⵜⵉⵍⵉⴽⵓ" ⵜⴰⵎⵣⵔⵓⵢⵜ, ⵉⵜⵜⵡⴰⵙⵙⵏⵏ ⵎⴰⵙ ⵜⴳⴰ ⵢⴰⵏ ⵓⵙⴰⵢⵔⴰⵔ ⵏ ⵜⵎⴽⵜⵉⵜ ⴷ ⵓⵏⵄⴰⵕ ⴰⵖⵣⵣⴰⴼ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵎⵓⵇⵇⴰⵔⵏ ⵉⵎⵙⵜⴳⴳⴰⵔⵏ ⵉⵎⵉⴽⵙⵉⴽⵉⵢⵏ ⴷ ⵜⵏⴱⴰⴹⵉⵏ ⵜⵉⴷⵖⴰⵔⴰⵏⵉⵏ ⴷ ⵉⵏⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⵙⴷⴰⵡⵏ ⴷ ⵉⵙⵍⵡⴰⵢⵏ ⵏ ⵡⴰⵎⵓⵏⵏ ⵉⴷⵖⴰⵔⴰⵏⵏ ⴷ ⵜⵏⴰⵎⵓⵔⴰ ⴷ ⵉⵏⴰⵎⵓⵔⵏ ⵣⴳ ⵜⵖⵔⵎⵜ ⴱⴰⵛ ⴰⴷ ⵙⵎⵖⵔⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⴰⴷ ⴰⵙ ⴼⴽⵉⵏ ⵜⴰⵙⴰⵔⵓⵜ ⵏ ⵜⵖⵔⵎⵜ, ⵙ ⵓⵙⵓⴳⵎ ⵙ "ⵓⵏⵄⴰⵕ ⵏⵏⵙ ⴰⵖⵣⵣⴰⴼ ⴷ ⵓⵎⵣⴰⵖ ⵏⵏⵙ ⵓⵔ ⵉⵜⵜⴱⴷⴷⴰⵏ ⴷ  ⵓⵙⵓⵍⴰⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵓⵔ ⵉⵍⵍⵉⵏ ⵖⴰⵙ ⴳ ⵜⵎⵓⵔⵜ ⵏⵏⵙ ⵍⵎⵖⵔⵉⴱ, ⵎⴰⵛⴰ ⴰⵡⴷ ⴳ ⵓⵙⵡⵉⵔ ⴰⵙⴳⵉⵡⴰⵏ ⴷ ⵓⵎⵏⵥⴰⵡ ⴷ ⵓⵎⴰⴹⵍⴰⵏ", ⴰⵔ ⵉⵜⵜⵉⵏⵉ ⵓⵏⵙⵙⵉⵅⴼ ⵏ ⵜⵖⵔⵎⵜ ⵎⴰⵙⵙ ⴰⵏⵅⵉⵍ ⵓⴳⵓⵙⵜⵓ ⴷⵓⵎⵉⵏⵉⴳⵉⵜ ⵙⴰⵏⵛⵉⵜ.
ⵜⵜⵓⴳⴰ ⵜⴼⵓⵍⴳⴰ ⵏ ⵓⵙⵎⵖⵔ ⴳ ⵜⵖⵔⵎⵜ ⵏ ⵊⴰⵏⵜⵉⵜⵉⵍⵉⴽⵓ ⵜⴰⵎⵣⵔⵓⵢⵜ,ⵙ ⴰⵙⴼⵓⴳⵍⵓ ⵙ ⵢⴰⵏ ⵓⵣⴰⵣⵓ ⴰⵖⵣⵣⴰⴼ ⴳ ⵓⵎⵣⴰⵖ ⵅⴼ ⵡⴰⴷⴷⵓⵔ ⴷ ⵜⵣⵔⴼⵜ ⴷ ⵉⵙⴽⵉⵍ.

ⴳ ⵢⴰⵜ ⵜⴳⵓⵔⵉ ⵙ ⵜⵎⵍⴷⴰ ⴰⴷ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵓⵙⵏⵜ ⴷ ⵓⵙⵏⵉⵎⵎⵔ ⵏⵏⵙ ⵅⴼ ⵓⵙⵎⵖⵔ ⴰⴷ "ⵏⵏⴰ ⵉⵢⵉ ⵉⵜⵜⵙⵡⴰⵔⵏ ⵢⵉⵍⵉ ⴰⵡⴷ ⵢⴰⵏ ⵓⵏⴰⵎⴽ ⴰⵏⵖⴱⵓ", ⴰⵔ  ⵜⵜⵙⴷⴷⵉⴷ ⵎⴰⵙ ⴰⵔ ⵜⵣⵔⵔⵉ ⵜⵙⵏⵜⴰⵢⵜ ⴰⴷ ⴰⴷⵔⵉⵣ ⴰⴱⵕⵓⵟⵓⴽⵓⵍⵉ ⴰⴼⴰⴷ ⴰⴷ ⵜⵙⵙⵔⵚⵓ "ⵜⴰⵎⴰⵜⴰⵔⵜ ⵏ ⵜⵎⵢⵉⵎⴰⵏⵜ ⴷ ⵜⵉⴷⴷⵓⴽⴽⵍⴰ ⴷ ⵡⴰⵜⵉⴳⵏ ⵉⵎⴳⵔⴰ" ⴳⵔ ⵍⵎⵖⵔⵉⴱ ⴷ ⵎⵉⴽⵙⵉⴽ, ⵣⴳ ⵢⴰⵜ ⵜⵙⴳⴰ, ⴷ ⴳⵔ ⵜⵏⵎⵣⴰⵖⵉⵏ ⴷ ⵉⵏⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵓⵔⴰ ⴰⴷ ⵙ ⵙⵏⴰⵜ ⴷ ⵓⵎⴰⴹⴰⵍ.

ⵜⵙⴷⴷⵉⴷ ⵜⵎⵙⵜⴳⴳⴰⵔⵜ ⵏ ⵉⵣⵔⴼⴰⵏ ⵎⴰⵙ ⴰⵔ ⵜⵜⴼⴼⵖ ⵜⵖⵏⵙⴰ  ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵍⵎⵖⵔⵉⴱ ⵎⴽⵏⵏⴰ ⴳ ⵎⵉⴽⵙⵉⴽ, ⵣⴳ ⵡⴰⵎⵓⵏⵏ ⵉⴷⵖⴰⵔⴰⵏⵏ ⴷ ⵓⵎⵣⵔⵓⵢ ⵏⵏⵙⵏⵜ, ⴰⵔ ⵜⵜⵉⵏⵉ ⵎⴰⵙ " ⵓⵔ ⵉⴳⵉ ⵡⵓⴷⴷⵓⵔ ⴷ ⵜⵣⵔⴼⵜ ⴷ ⵉⵙⴽⵉⵍ ⵉⵎⵏⵣⴰⵢⵏ ⵉⴳⴳⵓⴳⵏ, ⵎⴰⵛⴰ ⴳⴰⵏ ⵜⵉⵔⵙⴰⵍ ⵉⵜⵜⵓⵚⴽⵓⵏ ⵙ ⵜⵎⴳⵍⴰⵢⵉⵏ ⵜⵉⵎⴳⵔⵓⵜⵉⵏ".
 

.

ⵎⴽⵍⵍⵉ ⵜⵙⵎⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⴰⵎⵣⵔⵓⵢ ⴰⵇⴱⵓⵔ ⵏ ⵜⵎⴷⵉⵏⵜ ⵏ ⵊⴰⵏⵜⵉⵜⵉⵍⵉⴽⵓ ⴷ ⵜⵉⵍⴰⵍⵜ ⵏⵏⵙ ⴳ ⵜⵙⵉⵎⴰⵏⵜ ⵏ ⵎⵉⴽⵙⵉⴽ ⴷ ⵉⵎⵓⵙⵙⵓⵜⵏ ⵉⵏⴼⵍⴰⵃⵏ ⴷ ⵜⵖⵏⵙⵉⵡⵉⵏ ⵜⵉⵏⴰⵎⵓⵏⵉⵏ, ⴰⵎ ⵓⵢⵍⵍⴰ ⵜⴳⴰ  "ⵢⴰⵏ ⵓⵙⴰⵢⵔⴰⵔ ⵏ ⵜⵎⴽⵜⵉⵜ ⴷ ⵜⴰⵏⵣⴱⴰⵢⵜ ⴷ ⵜⵉⵔⵔⵓⴳⵣⴰ" ⵏⵏⴰ ⵉⵙⵙⵎⴰⵜⴰⵔⵏ ⵉⵔⵉ ⴰⵏⴼⴳⴰⵏ ⴰⵎⴳⵔⵓ ⵖⵔ ⵜⴷⵔⴼⵉ ⴷ ⵡⴰⴷⴷⵓⵔ.

ⵜⵔⵏⵓ ⴰⵡⴷ  ⵎⴰⵙ ⵎⵙⴰⵙⴰⵏ ⵡⴰⵜⵉⴳⵏ ⴰⴷ ⴰⴽⴷ ⵉⵎⵏⵣⴰⵢⵏ ⵉⵖⵣⵓⵔⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵅⴼ ⵏⵜⵜⵏⵄⴰⵕ, ⴳ ⵜⵣⵡⵉⵔⵉ ⵏⵏⵙⵏ ⵜⴰⴷⵔⴰⵡⵜ ⴷ ⵓⵎⵢⴰⵡⴰⵙ ⴷ ⵉⵙⴽⵉⵍ.

ⵜⵙⴰⵡⵍ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⵏⴰⵎⴽ ⴰⵎⵙⵙⵉⵏⵉ ⵏ ⵜⵙⴰⵔⵓⵜ ⵏ ⵜⵎⴷⵉⵏⵜ,ⵜⵏⵏⴰ ⵎⴰⵙ ⵓⵔ ⵜⴳⵉ ⵖⴰⵙ ⵉⵏⵉⴳⵍ ⵏ ⵓⵙⵏⵓⴱⴳ, ⵎⴰⵛⴰ ⵜⴳⴰ ⴰⵡⴷ ⵜⴰⵎⴰⵜⴰⵔⵜ ⵏ ⵜⵎⵙⵜⴳⴳⴰⵔⵜ, ⴰⵛⴽⵓ "ⴰⵔ ⴰⵖ ⵜⵇⵇⴰⵔ ⵖⵔ ⵓⵙⴷⵓⵙ ⵏ ⵓⵕⵥⵥⵓⵎ ⵏ ⵜⴳⴳⵓⵔⴰ ⵏ ⵓⵎⵙⴰⵡⴰⵍ ⴷ ⵓⵙⵉⴷⴼ ⴷ ⵜⵣⵔⴼⵜ ⴷ ⵓⴼⵔⴰ". ⵎⴽⵍⵍⵉ ⵜⵙⵉⵡⵍ ⵅⴼ ⵓⵙⵏⵉⵎⵎⵔ  ⵏⵏⵙ ⴰⵎⵇⵇⵔⴰⵏ ⵜⴼⵓⴳⵍⴰ ⵏⵏⴰ ⴷ ⵉⴼⴼⵖⵏ ⵣⴳ ⵜⵖⵓⴱⵉ ⵏ ⵜⵡⵔⴳⵍⵉⵏ ⵜⵉⴷⵖⴰⵔⴰⵏⵉⵏ ⵜⵉⵎⵉⴽⵙⵉⴽⵉⵢⵉⵏ ⵏⵏⴰ ⵉⵜⵜⵓⵙⵏⵎⴰⵍⴰⵏ ⵅⴼ ⵡⴰⴷⴷⵓⵔ ⵏⵏⵙ, ⵏⵏⴰ ⵉⵙⵎⴰⵜⵔⵏ ⴰⵣⴷⴷⵓⵢ ⵉⴷⵓⵙⵏ ⴳⵔ ⵡⴰⴷⴷⵓⵔ ⴰⵏⴼⴳⴰⵏ ⴷ ⵜⵡⵔⴳⵍⵉⵏ ⴷ ⵡⴰⴽⴰⵍ ⴷ ⵡⴰⵎⵓⵏ.

ⴰⵎ ⵓⵢⵏⵏⴰ ⵙ ⵜⴳⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⵜⵙⵎⴰⵢⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴰⵙⵖⵓⵏ ⵙ ⵓⵍⵓⵎⵎⴰ ⵏ ⵜⵡⵓⵔⵉ ⴰⴼⴰⴷ ⴰⴷ ⵉⵜⵜⵓⴳⴰ ⵡⴰⵔⴰⵢ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵙⵡⵉⵔⵏ ⵉⵏⴰⵎⵓⵔⵏ ⴷ ⵉⵙⴳⵉⵡⴰⵏ ⴷ ⵉⴳⵔⴰⵖⵍⴰⵏⵏ, ⵜⵙⴷⴷⵉⴷ ⵎⴰⵙ ⴷ ⴰⵙⵙⵎⵖⵔ ⴰⴷ ⴰⵔ ⵉⴳⴰ ⵢⴰⵏ ⵓⵙⵙⵔⵇⴱ ⵢⴰⴹⵏ ⵉ ⵓⵍⵓⵎⵎⴰ ⵏ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵎⴰⵕⵕⴰ ⵓⴳⴳⵉⴷⵏ ⴱⵍⴰ ⵓⵙⵍⵉⴷ.

ⵉⵇⵇⴰⵏ ⴷ ⴰⴷ ⵏⴱⴷⴷ ⵎⴰⵙ ⴷ ⵊⴰⵏⵜⵉⵜⵉⵍⵉⴽⵓ ⵜⵜⵓⵢⵉⵙⵙⵏ ⴰⵎ ⵢⴰⵜ ⵜⵎⴷⵉⵏⵜ  ⵜⴰⵎⵣⵔⴰⵢⵜ, ⵜⴳ ⵜⴰⵎⴰⵜⴰⵔⵜ ⵏ ⵢⴰⵏ ⵓⵣⴰⵣⵓ ⴰⵖⵣⵣⴰⴼ ⵏ ⵜⵖⵏⵙⴰ ⵜⵓⵖⵔⵉⵎⵜ ⴷ ⵓⵙⴱⴷⴷⵉ ⴰⵎⴳⵔⵓ. ⴷ ⵣⵉ ⵓⵙⵙⵎⵖⵔ ⵏ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⵙⴰⵔⵓⵜ ⵏ ⵜⵎⴷⵉⵏⵜ, ⴰⵔ ⵉⵜⵜⵉⵏⵉ ⵓⵏⵙⵙⵉⵅⴼ ⵏⵏⵙ, ⴰⵔ ⵏⵙⵙⴷⵓⵙ ⵜⴰⵎⴰⴳⵉⵜ ⵏⵏⵖ ⴰⵎ ⵢⴰⵏ ⵓⵙⴰⵢⵔⴰⵔ ⵉⴷⴷⵔⵏ ⵉ ⵓⵎⵣⴰⵖ ⵅⴼ ⵡⴰⴷⴷⵓⵔ ⴰⵏⴼⴳⴰⵏ, ⵎⴽⵍⵍⵉ ⵏⵙⵙⴷⵓⵙ ⴳ ⵡⴰⴽⵓⴷ ⴰⴷ ⵏⵉⵜ ⵜⵉⵍⴳⴳⵯⵉⵏ ⵏ ⵓⵎⵢⴰⵡⴰⴹ ⴳⵔ ⵜⵎⴽⵜⵉⵜ ⵜⴰⴷⵖⴰⵔⴰⵏⵜ ⴷ ⵜⵖⵏⵙⴰ ⵜⴰⵎⴰⴹⵍⴰⵏⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵓⵣⵎⵣ ⵏ ⵜⵉⵍⵉⵜ ⵏⵏⵙ ⴳ ⵎⵉⴽⵙⵉⴽ, ⵜⴳⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⵏⵏⴰⵡ ⵏ ⵉⵏⵎⵓⵇⵇⴰⵔⵏ ⴰⴽⴷ ⵉⵎⵙⵜⴳⴳⴰⵔⵏ ⵉⵎⵉⴽⵙⵉⴽⵉⵢⵏ, ⴷⵉⴽⵙⵏ ⵉⵏⵙⵙⵉⵅⴼⵏ ⵏ ⵜⵙⵏⴱⴹⴰⵢⵉⵏ ⵜⵉⵏⵎⵏⴰⴹⵉⵏ ⴷ ⵓⵏⵙⵙⵉⵅⴼ ⵏ ⵜⵙⵏⴱⴹⴰⵢⵜ ⵜⴰⴼⵉⴷⵉⵔⴰⵍⵉⵜ. ⵎⴽⵍⵍⵉ ⵜⴼⴽⴰ ⵢⴰⵜ ⵜⴳⵓⵔⵉ ⴳ ⵓⵙⵖⵉⵎ ⵏ ⵜⵙⵏⴱⴹⴰⵢⵜ ⵜⴰⵏⴰⵎⵓⵔⵜ ⵜⴰⵏⴰⴼⵍⵍⴰⵜ ⴳ ⵎⵉⴽⵙⵉⴽ, ⵏⵏⴰ ⴳ ⵜⵙⵎⵏⵉⴷ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵡⴰⵔⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵉⵙⵏ, ⴷ ⵜⵔⵙⴰⵍ ⵏ ⵜⵜⵎⵢⴰⴷⴰⵙⵜ ⵏ ⵜⴳⵍⴷⵉⵜ ⴳ ⴰⵙⵏⵎ, ⵓⵍⴰ  ⴰⵙⵎⴽⵜⵉ ⵙ ⴽⵔⴰ ⵏ ⵜⵎⵙⴽⴰⵔ  ⵏ ⵍⵎⵖⵔⵉⴱ ⵉⵛⵏⴰⵏ, ⵍⵓⵎⵎⵏ ⵜⵉⵔⵎⵉⵜ ⵏ ⵓⵙⵓⵎⵓ ⴷ ⵓⵎⵙⵄⴷⴰⵍ  ⴷ ⵉⵣⴰⵣⵓⵜⵏ ⵏ ⵓⵙⵏⵎ ⵏⵏⴰ ⴷ ⵣⵉⴳⵙ ⵉⴼⴼⵖⵏ.