ⴳ ⵢⴰⵜ ⵜⵙⵏⵜⴰⵢⵜ ⵏⵏⴰ ⵉⵙⵎⴰⵜⴰⵔⵏ ⵅⴼ ⵜⵓⵙⵏⵜ ⵜⴰⴳⵔⴰⵖⵍⴰⵏⵜ ⵙ ⵜⵏⴰⵔⴰ ⵏ ⵜⵎⵖⴰⵔⵉⵏ  ⵉⴷ ⵎⵎ ⵉⴹⵉⵚ, ⴰⵔ ⵜⵜⴼⵔⵉⵔⵔⵉⵙ ⵓⵙⵖⵉⵎ ⵏ ⵜⵎⵜⵜⴰ ⵉⵎⵓⵏⵏ ⴳ ⵊⵓⵏⵉⴼ ⵢⴰⵏ ⵓⵙⴼⵙⵔ ⵏ ⵜⵡⵍⴰⴼⵉⵏ ⵏⵏⴰ ⵉⵙⵙⵎⵖⵓⵔⵏ 75 ⵏ ⵜⵎⵟⵟⵓⴹⵜ ⵣⴳ ⵎⴰⵕⵕⴰ ⵉⴷⵖⴰⵔⵏ ⵏ ⵓⵎⴰⴹⴰⵍ, ⴷⴷⴰⵡ ⵏ ⵓⵣⵡⵍ "ⵜⵉⵡⵜⵎⵉⵏ ⵏⵏⴰ ⵉⵙⵙⵉⵅⴼⵏ ⵉⵡⴰⵏⴽⵏ ⴷ ⵡⴰⵎⵓⵏⵏ", ⵣⵉ ⴷⵉⴳⵙⵏⵜ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

— — — 
ⵜⵉⵎⵓⵛⴰ ⵅⴼ ⵜⵡⵍⴰⴼⵉⵏ ⵏ ⵓⵙⴼⵙⵔ
75 ⵏ ⵜⵎⵟⵟⵓⴹⵜ / ⵜⴰⵡⵍⴰⴼⵜ ;
ⵢⴰⵜ ⵜⵎⵟⵟⵓⴹⵟ ⵜⴰⵎⵖⵔⵉⴱⵉⵜ ⵜⴰⵎⴰⵣⵉⵖⵜ ;
ⴽⵕⴰⴹⵜ ⵜⵡⵜⵎⵉⵏ ⵣⴳ ⴽⵕⴰⴹ ⵏ ⵉⵡⴰⵏⴽⵏ ⴰⵄⵔⴰⴱⵏ, ⵣⵉ ⴷⵉⴳⵙⵏ ⵍⵎⵖⵔⵉⴱ ;
ⴽⵕⴰⴹⵜ ⵜⵡⵜⵎⵉⵏ ⵣⴳ ⴽⵕⴰⴹ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ, ⵣⴳ ⴷⵉⴳⵙⵏ ⵍⵎⵖⵔⵉⴱ ;
47 ⵏ ⵓⵡⴰⵏⴽ ⵉⴳⴰⵏ ⴰⴳⵎⴰⵎ ⴳ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵏⵉⴼ.
— — —
 

ⵉⵙⵎⵓⵏ ⵓⵙⴼⵙⵔ, ⵏⵏⴰ ⵉⵏⵏⵓⵕⵥⵎⵏ ⴰⵙⵙ ⴰⴷ ⵏ ⵓⵙⵉⵏⴰⵙ 30 ⵢⵓⵏⵢⵓ ⴰⴷ, ⵜⵉⵡⵍⴰⴼⵉⵏ ⵏ ⵉⵡⵔⵉⴽⵏ ⵏ ⵜⵙⴷⵏⴰⵏ ⵉⵜⵜⵡⴰⵙⵙⵏ ⴳ ⵉⴳⵔⴰⵏ ⵏ ⵜⵣⵡⵉⵔⵜ, ⴳ ⵓⵙⵡⵉⵔ ⵏ ⵜⵏⵙⵙⵉⵅⴼⵜ ⵏ ⵉⵡⴰⵏⴽⵏ ⴷ ⵜⵏⴱⴰⴹⵉⵏ ⴷ ⵜⵎⴰⴷⴷⴰⵙⵉⵏ ⵜⵉⵙⴳⴰⵡⴰⵏⵉⵏ, ⴷ ⵓⵎⵣⴰⵖ ⵅⴼ ⵉⵣⵔⴼⴰⵏ, ⴷ ⵜⵎⴳⵓⵔⵉ ⵏ ⵜⵙⵔⵜⴰⵢ, ⴷ ⵜⵡⵓⵔⵉ ⵜⵓⵖⵔⵉⵎⵜ, ⴰⵔ ⴳⵣⵣⴰⵏⵜ 47 ⵏ ⵓⵡⴰⵏⴽ ⵉⴳⴰⵏ ⴰⴳⵎⴰⵎ ⴳ ⵓⵙⵇⵇⵉⵎ ⵏ ⵜⵎⵜⵜⴰ. ⴰⵔ ⵜⵜⵉⵍⵉ ⵜⵡⵍⴰⴼⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴰⵎ ⵜⵎⵖⵔⵉⴱⵉⵜ ⵜⴰⵎⴰⵡⵏⵜ ⴳ ⵓⴳⵏⵙⵓ ⵏ ⵜⵍⴳⴰⵎⵜ ⴰⴷ, ⴷ ⵢⴰⵜ ⵣⴳ ⴽⵕⴰⴹ ⵉⵡⵔⵉⴽⵏ ⴰⵄⵔⴰⴱⵏ, ⴷ ⴽⵕⴰⴹⵜ ⵜⵏⴰⵔⴰ ⵏ ⵜⵎⵖⴰⵔⵉⵏ ⵜⵉⴼⵔⵉⵇⵉⵢⵉⵏ ⵉ ⵜⴷⵔⴰⵡⵜ ⴳ ⵓⵙⵎⵖⵔ ⴰⴷ ⵏ ⵜⵎⵜⵜⴰ ⵙ ⵜⵣⵡⵉⵔⵜ ⵏ ⵜⵎⵖⴰⵔⵉⵏ.

ⵉⵎⵓⵏ ⴰⴽⴷ ⵜⵡⵍⴰⴼⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵢⴰⵏ ⵓⵙⵎⵏⵉⴷ ⵏⵏⴰ ⵉⵙⵎⴰⵜⴰⵔⵏ ⴰⵣⴰⵣⵓ ⴰⵣⵔⴼⴰⵏ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎ ⵢⴰⵏ ⵣⴳ ⵉⴳⵕⴹⴰⵏ ⵉⴳⵔⴰⵖⵍⴰⵏⵏ ⵉⵅⴰⵜⴰⵔⵏ  ⵉⵜⵜⴰⵡⵙⵏ ⴰⵣⵔⴼ ⴳ ⵜⵓⴷⵔⵜ, ⴷ ⵓⵙⴼⵓⴳⵍⵓ ⴰⵡⴷⵙ ⵜⵉⵍⴰⵍⵜ ⵏⵏⵙ ⴳ ⵓⵏⵄⴰⵕ ⴷ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵉⵏⴳⵉⵙⵏ ⴷ ⵉⵙⵎⵉⵍⵏ ⵉⵎⴽⵙⵙⵉⵙⵏ. ⴰⵎ ⵓⵢⵏⵏⴰ ⵉⵙⵎⴰⵜⵔ ⵓⵙⵎⵏⵉⴷ ⵅⴼ ⵜⴱⵣⴰⵔⵉⵏ ⵏⵏⵙ ⴳ ⵓⵙⴷⵓⵙ ⵏ ⵜⴷⵍⵙⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⵄⴰⵕ ⵅⴼ ⵓⵙⴷⵓⵙ ⵏ ⵜⵉⵍⴰⵍ ⵏ ⵡⴰⵎⵓⵏ ⵓⵖⵔⵉⵎ, ⴳ ⵍⵎⵖⵔⵉⴱ ⵏⵖⴷ ⵅⴼ ⵜⴰⵖⵣⵉ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ ⴷ  ⴰⵡⴷ ⴳ ⵓⵙⵡⵉⵔ ⴰⴳⵔⴰⵖⵍⴰⵏ.
 

ⵢⵓⵛⴽⴰ ⴷ ⵓⵙⵎⵖⵔ ⴰⴷ ⵙ ⵢⴰⵜ ⵜⵙⵏⵜⴰⵢⵜ ⵣⴳ ⵜⵎⵜⵜⴰ ⵉⵎⵓⵏⵏ ⴳ ⵊⵓⵏⵉⴼ ⴷ ⵓⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⵉ ⵜⵎⵖⴰⵔⵜ ⴷ ⵉⵛⵔⵉⴽⵏ ⵉⴳⵔⴰⵖⵍⴰⵏⵏ, ⴳ ⵢⴰⵏ ⵓⵎⵏⴰⴹ ⵉⵙⵙⵉⵎⵖⵓⵔⵏ ⵣⴳ ⵜⵓⵙⵏⵜ ⵙ ⵜⵉⵍⵉⵜ ⵏ ⵜⵙⵓⴳⴰⵔ ⵏ ⵜⵡⵜⵎⵉⵏ ⴳ ⵉⴷⵖⴰⵔⵏ ⵏ ⵉⴹⵉⵚ ⴷ ⵜⵎⴳⵓⵔⵉ ⵏ ⵜⵖⵜⴰⵙⵜ, ⴷ ⵜⵉⵍⴰⵍⵜ ⵏⵏⴰ ⵙⴽⴰⵔⵏⵜ ⵜⵎⵖⴰⵔⵉⵏ ⴷ ⵜⵉⵔⵎⵉⵜⵉⵏ ⵏⵏⵙⵏⵜ ⵉⵎⵓⵔⵙⵏ ⴳ ⵜⵣⵡⵉⵔⵜ ⴷ ⴳ ⵓⵙⵕⵚⵚⴰ ⵏ ⵡⴰⵜⵉⴳⵏ ⵏ ⵜⵣⵔⴼⵜ ⴷ ⵡⴰⴷⴷⵓⵔ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵉⵙⵡⵉⵔⵏ ⵉⵏⴰⵎⵓⵔⵏ ⴷ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ.