ⴳ ⵓⴱⵕⵍⴰⵎⴰⵏ ⴰⴱⵕⵉⵟⴰⵏⵉ, ⴰⵔ ⵜⵙⵙⵎⵏⵉⴷ ⴰⵎⵉⵏⴰ ⴱⵓⵄⵢⵢⴰⵛ ⵜⵉⵔⵙⴰⵍ ⵏ ⵜⵉⵎⵉⵔⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⵙⵓⵜⵉ ⴰⵙⴳⴷⴰ.
ⴳ ⵢⴰⵜ ⵜⴽⵛⵛⵓⵎⵜ ⵏ ⵓⵏⵏⵓⵕⵥⵎ ⵜⴰⴷⵙⵍⴰⵏⵜ ⴳ ⵓⵙⵇⵇⵉⵎ ⵏ ⵓⵎⴰⵜⴰ ⴰⴱⵕⵉⵟⴰⵏⵉ, ⵜⵙⵎⵏⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⴰⴷ ⵏ ⵓⴽⵡⴰⵙ 26 ⵎⴰⵕⵚ 2026, ⵜⵉⵔⵙⴰⵍ ⵜⵉⴷⵙⵍⴰⵏⵉⵏ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵡⴰⵔⴰⵢ ⵏ ⵓⵙⴳⴷ ⵣⴳ ⵓⵙⵖⵍⵍⴰ ⴰⵙⵔⵜⴰⵏ, ⵙ ⵓⵙⵎⴰⵜⵔ ⵏ ⵜⵥⵍⴰⵢⵜ ⵏ ⵓⵣⵓⵔⵜ ⴰⵎⵖⵔⵉⴱⵉ ⴳ ⵓⵙⵓⵜⵉ ⵏ ⵢⵉⴳⵔ ⴰⵙⴳⴷⴰⵏ.

"ⴰⵣⵓⵔⵜ ⴰⵎⵖⵔⵉⴱⵉ ⵉⵎⵥⵍⵉ ⴷ ⵉⵣⵣⵉⴳⵣⵏ  ⵓⵎⵔⴰⵔ ⵏⵏⵙ ⴰⴽⴷ ⵓⵙⵓⵜⵉ ⵏ ⵢⵉⴳⵔ ⴰⵙⴳⴷⴰⵏ". ⴰⵢⴰ ⴰⴷ  ⴰⵙ ⵙⵎⵏⵉⴷⵏ ⵉⵎⵙⵓⴷⵙⵏ ⵏ ⵢⴰⵏ ⵓⵏⵎⵓⵇⵇⴰⵔ ⴰⴳⵔⴰⵖⵍⴰⵏ ⵏⵏⴰ ⵜⵜⴼⵔⵉⵔⵔⵙ "ⵜⴷⴰⵍⴰ ⵏ ⵛⵉⵔⵛⵉⵍ" ⴳ ⵓⵙⵇⵇⵉⵎ ⵏ ⵓⵎⴰⵜⴰ ⴰⴱⵕⵉⵟⴰⵏⵉ, ⵎⴰⵙⵙⴰ ⴱⵓⵄⵢⵢⴰⵛ, ⴳ ⵓⵙⴰⵜⵉ ⵏ ⵓⵏⵄⴰⵕ ⵅⴼ ⵢⴰⵜ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵉ ⵓⴳⴷⵓⵍ ⵏ ⵓⵙⵖⵍⵍⴰ ⴰⵙⵔⵜⴰⵏ ⵏ ⵉⵙⴳⴷⴰⵏ, ⴰⵔ ⵙⵎⴽⵜⴰⵢⵏ ⵙ ⵓⵙⵏⵉⵎⵎⵔ ⵉ ⵓⵙⵏⵓⴱⴳ ⵏ ⵍⵎⵖⵔⵉⴱ ⵉ ⵓⴳⵔⴰⵡ ⵏⵏⵙⵏ ⴰⴳⵔⴰⵖⵍⴰⵏ ⴰⵙⴳⴳⵯⴰⵙ ⵍⵍⵉ ⵉⵣⵔⵉⵏ, ⵙ ⵡⴰⵏⵏⴰⵍ ⵣⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ, ⵜⵙⵎⴰⵜⵔ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴱⴷⴷⴰ ⵓⵣⵓⵔⵜ ⴰⵎⵖⵔⵉⴱⵉ ⵅⴼ ⵢⴰⵏ ⵓⵙⵓⵜⵉ ⴰⵎⵔⵙⴰⵍ ⴰⵎⴰⴼⴰⵡ, ⵉⵜⵜⵓⵎⴰⵏⵏ ⵙ ⵓⵎⴰⵜⴰ ⴳ ⵜⵉⵍⴰⵍⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵎⴰⵙⵙⴰⵏⵏ, ⵏⵏⴰ ⵉⵙⵙⵉⵅⵉⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴷ ⵏⵜⵜⴰⵏ ⴰ ⵉⵥⵍⵉⵏ ⵙ ⵓⵙⵓⴼⵖ ⵏ ⵜⴰⵏⵏⴰⵢⵉⵏ (ⵍⴼⴰⵜⴰⵡⴰ), ⴰⵢⵏⵏⴰ ⵉⵜⵜⴰⵊⵊⴰⵏ ⵜⴰⵎⵙⵉⵙⵉⵜ ⵏ ⵓⴼⴰⵙⵔ ⴰⵙⴳⴷⴰⵏ ⴰⴽⴷ ⵜⵣⵣⵉⴳⵣⵜ ⵏ ⵡⴰⵎⵓⵏ.
 

ⴳ ⵓⵙⴰⵜⵉ ⴰⴷ, ⵜⵙⵎⵏⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⵓⵎⵏⵏⴰⵡ ⵏ ⵜⵙⵏⵜⴰⵢⵉⵏ ⵏⵏⴰ ⵉⵙⵏⵄⴰⵜⵏ ⴰⵙⵡⴰⵍⴰ ⴰⴷ, ⵣⵉ ⴳⵔⴰⵙⵏⵜ ⵜⵉⵔⵎⵉⵜ ⵏ "ⵜⵎⴰⵏⴰⵔⵉⵏ ⵜⵉⵙⴳⴷⴰⵏⵉⵏ", ⵉⵥⵍⵉⵏ ⴳ ⵓⵙⴰⵜⵉ ⵏⵏⵖ ⴰⵙⴳⴰⵡⴰⵏ, ⵏⵏⴰ ⵉⵙⵙⵉⵡⵙⵏ ⴳ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵜⵡⵜⵎⵉⵏ ⴳ ⵢⵉⴳⵔ ⴰⵙⴳⴷⴰⵏ, ⴰⴽⴷ ⵓⵙⵎⴽⵏ ⵏ ⵜⵎⵟⵟⵓⴹⵜ ⵣⵉ ⵜⵎⵙⴽⵔⵜ ⵏ ⵜⴰⵣⵣⵓⵍⵜ ⵏ "ⵍⵄⴷⴰⵍ". ⴰⵔ ⵜⵔⵏⵏⵓ ⵎⴰⵙⵙⴰ ⴱⵓⵄⵢⵢⴰⵛ ⴰⵢⴰ ⴰⴷ ⴰⵙ ⵉⴳⴰ ⵍⵎⵖⵔⵉⴱ, ⵣⴳ ⵉⵡⴰⵏⴽⵏ ⵉⴷⵔⵓⵙⵏ, ⴳ ⵍⵍⴰⵏ ⵉⵎⵓⵙⵍⵎⵏ ⵙ ⵜⵓⴳⵜ, ⵏⵏⴰ ⵉⵜⵜⴰⴽⴽⴰⵏ ⵉ ⵜⵡⵜⵎⵉⵏ ⴰⵣⵔⴼ ⵏ ⵓⵏⵜⴰⵎ ⵏ ⵜⵎⴰⵖⵓⵏⵉⵏ ⵏ ⵢⵉⵡⵍ.

ⴰⵔ ⵜⵜⵉⵏⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⵙⵙⵉⵡⵙ ⵓⵙⵓⵜⵉ ⴰⴷ ⴳ ⵓⵙⵓⴷⵔⵙ ⵏ ⵉⴼⴰⵙⵔⵏ ⵉⵎⵟⵟⵓⵕⴼⴰ , ⴷ ⵓⵙⴷⵓⵙ ⵏ ⵢⴰⵏ ⵓⵔⵎⵓⵙ ⴰⵎⵏⵍⵍⵉ ⴷ ⵉⵏⵏⵓⵕⵥⵎⵏ ⵉ ⵓⵙⴳⴷ, ⵉⵙⴱⵔⴰⵡⵏ ⵏ ⵜⵇⵓⵔⵉⵔⵜ ⵏ ⵉⵣⵔⴼⴰⵏ ⴳ ⵓⴷⵖⴰⵔ  ⵏ ⵓⵙⵓⴷⵔⵙ ⵏⵏⵙⵏ.

ⴳ ⵓⵙⵡⵉⵔ ⵓⵍⴳⵉⵏ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵉⵜⵜⵄⵡⵡⴰⵍ ⵍⵎⵖⵔⵉⴱ ⵅⴼ ⵢⴰⵏ ⵓⵙⴰⵜⵉ ⴰⵎⴰⴼⴰⵡ ⵉⴳⴷⴷⵍⵏ ⴰⵙⵏⴼⵍⵓⵍ ⵏ ⵉⵎⵓⵍⵍⵉⵜⵏ ⵉⵙⵔⵜⴰⵏⵏ ⵅⴼ ⵜⵉⵔⵙⴰⵍ ⵜⵉⵙⴳⴷⴰⵏⵉⵏ, ⴰⵔ ⵜⵜⴰⵍⵖ ⴰⵡⴷ  ⵉⵖⴰⵡⴰⵙⵏ ⵏ ⵡⴰⵍⴰⵙ ⵏ ⵓⵙⵖⵔⵜ, ⴰⵎ ⵓⵖⴰⵡⴰⵙ ⵏ ⵓⵎⵙⵄⴷⴰⵍ "ⵎⵓⵚⴰⵍⴰⵃⴰ", ⵏⵏⴰ ⵉⵜⵜⵊⵊⵎⵏ ⵖⵔ ⵓⵙⵉⴷⴼ ⵏ ⵓⵏⴽⵉⴹⵏ ⴳ ⵜⵎⵙⵙⵓⴳⴰⵔ ⵏ ⵜⵉⵟⵟⵓⵔⴼⴰ ⵙ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴷⵔⵓⵜ, ⵉⵙⵎⵓⵏⵏ ⴳⵔ ⵡⴰⵏⵏⴰⵍ ⴰⵏⵉⵎⴰⵏ ⴷ ⵓⵙⴼⵔⴽ ⴷ ⵡⴰⵜⵉⴳⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴰⵔ ⵜⵜⵉⵏⵉ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⴷⴰ ⵉⵙⵏⵄⴰⵜ ⵓⵣⵓⵔⵜ ⴰⵎⵖⵔⵉⴱⵉ, ⵜⴰⵎⵓⵏⵜ ⵏ ⵓⵙⵓⵜⵉ ⴰⵎⵙⵜⴳⴳⴰⵔ ⴰⴽⴷ  ⵡⴰⵔⴰⵢ ⵏ ⵉⵣⵔⴼⴰⵏ ⴷ ⵜⴷⵔⴼⵉⴼⵉⵏ, ⴰⵔ ⵉⵜⵜⴳⴳⴰ ⵢⴰⵏ ⵡⵓⴳⴳⵓⴳ ⵉⴳⴷⴷⵍⵏ ⵎⵏⵉⴷ ⵏ ⵓⵙⵖⵍⵍⴰ ⴰⵙⵔⵜⴰⵏ ⵉ ⵉⵙⴳⴷⴰⵏ.