ⵣⵉ ⵊⴰⵊ ⵏ ⵜⴷⴰⵍⴰ ⵏ "ⵜⵛⵔⵛⵉⵍ" ⴳ ⵓⵙⵇⵇⵉⵎ ⵏ ⵓⵎⴰⵜⴰ ⵏ ⵢⴰⵜ ⵣⵉ ⵜⴷⵉⵎⵓⵇⵕⴰⵟⵉⵢⵉⵏ ⵜⵉⵇⴱⵓⵔⵉⵏ ⴳ ⵓⵎⴰⴹⴰⵍ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵣⵉ ⵓⵎⵏⵉⴷⵏ ⴰⵖⵣⵓⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵓⵙⵓⵖⵏ ⵏ ⵓⵙⴷⵓⵙ ⵏ ⵓⵙⵕⵚⵚⴰ ⵏ ⵓⵣⵔⴼ ⴳ ⵓⵙⴳⴷ ⴷ ⵡⴰⵔⴰⵢ ⵏ ⵉⵙⴳⴷⴰⵏ ⵣⵉ ⵓⵙⵖⵍⵍⴰ ⴰⵙⵔⵜⴰⵏ, ⴰⵔ ⵜⵙⵙⵉⵡⵉⴷ ⵣⵉ ⵓⵙⵏⴼⵍ ⵉⵙⴳⴷⴰⵏ ⵖⵔ ⵉⵎⴰⵙⵙⵏ ⵏ ⵓⵙⵏⵓⵃⵢⵓ ⵏⵖⴷ ⴰⵙⵉⴳⴳⵯⵊ.

ⵜⵙⵙⵎⵜⵔ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵓⵙⴰⵜⵉ ⴰⴷ, ⵎⴰⵙ ⴷⴰ ⵢⴰⴽⴽⴰ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⵓⵙⴰⵜⵉ ⴰⵎⴰⴼⴰⵡ ⵏⵏⴰ ⵉⵙⵙⵕⵚⴰⵡⵏ ⵜⴰⴷⵔⴼⵉ ⵏ ⵜⴰⵖⴰⵍⵜ, ⴰⵔ ⵉⴳⴷⴷⵍ ⴰⵙⵏⵓⵃⵢⵓ ⵅⴼ ⵓⵙⵡⵉⵔ ⵏ ⵓⵙⴳⴷ, ⵎⴰⵛⴰ ⵉⵙⵓⵍ ⵓⵔ ⵉⴷⴷⴳⴰ ⵎⵛ ⵓⵔ ⵜⵜⵓⴳⵉⵏⵜ ⵜⵖⴰⵔⴰⵙⵉⵏ ⵜⵉⴽⵎⴰⵎⵉⵏ ⵉ ⵜⵉⴹⴰⴼ ⵣⵉⴽ ⵏ ⵉⵏⵎⵎⴰⵍⵏ ⵏ ⵓⵙⵖⵍⵍⴰ ⴰⵙⵔⵜⴰⵏ ⵏ ⵉⵙⴳⴷⴰⵏ, ⴷ ⵓⵎⵏⴰⵍⴰ ⵏ ⵉⵏⴰⵡ ⵏ ⵓⴽⵙⴰⵏ ⴷ ⵓⵙⵙⵎⵎⵕ ⵅⴼ ⵜⴽⵕⴹⵉ.

ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⵓⵕⵚⵚⴰ ⵏ ⵡⴰⵜⵉⴳⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵊⴰⵊ ⵏ ⵡⴰⵎⵓⵏⵏ ⴰⴹⴰⴽⴰⵍ ⵉⴷⵓⵙⵏ ⵎⵏⵉⴷ ⵏ ⵓⵙⵎⵔⵙ ⵏ ⵉⵙⴳⴷⴰⵏ ⵉ ⵉⵡⵜⵜⴰⵙⵏ ⵉⵙⵔⵜⴰⵏⵏ, ⴰⵔ ⵜⵜⵉⵏⵉ ⵎⴰⵙ ⴷⴰ ⵉⵜⵜⴽⴽⴰ ⵡⴰⵔⴰⵢ ⵏ ⵉⵙⴳⴷⴰⵏ ⵣⵉ ⵡⴰⵔⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵕⵚⵚⴰ ⵏ ⵜⵎⵢⴰⴳⴰⵏⵜ ⵏⵏⵙⵏ.

ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵖⵔ ⵢⴰⵜ ⵜⵎⵢⴰⴷⴰⵙⵜ ⵜⴰⴽⵎⴰⵎⵜ ⵜⴰⴳⵔⴰⵖⵍⴰⵏⵜ ⵜⴰⵎⴰⴼⴰⵡⵜ ⵏⵏⴰ ⵉⴱⴷⴷⴰⵏ ⵅⴼ ⵓⵙⵏⵓⵃⵢⵓ ⴳⵔ ⵓⵡⵏⵏⵉ ⴰⵙⴳⴷⴰⵏ ⵓⵣⵔⵉⴼ ⴷ ⵓⵙⵖⵍⵍⴰ ⵏ ⵓⵙⴳⴷ ⵉ ⵜⵙⴽⵔⴰⵡⵜ ⵏ ⵉⵡⵜⵜⴰⵙⵏ ⵅⴼ ⵡⴰⵛⵛⵉⵍ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵉ ⵓⵎⵏⴰⵍⴰ ⵏ ⵜⵉⵟⵟⵓⵔⴼⴰ ⵉⵣⴳⵔⵏ ⵉ ⵉⵡⵓⵜⵜⴰ.

ⵜⴰⵏⵥⵕⵜ ⵜⴰⵏⵉⵍⴰⵡⵜ ⵏⵏⴰ ⴷⴰ ⵏⵜⵜⵍⵎⴰⵡⴰⵢ, ⴳ ⵢⴰⵏ ⵓⵎⴰⴹⴰⵍ ⵉⵜⵜⵉⴷⵔⵏ ⴰⵙⵙ ⴰ ⴷⴷⴰⵡ ⵏ ⵉⵙⵏⴼⵍⵏ ⵉⵎⵇⵇⵔⴰⵏⵏ, ⵏⵏⴰ ⴷⴰ ⵜ ⵎⵛⴽⵛⴰⵎⵏ ⴷⵉⴳⵙ ⵉⵎⵏⵣⴰⵖⵏ ⴰⴽⴷ ⵜⴰⵣⵣⵉⴳⵣⵉⵏ ⵜⵉⵜⵉⴽⵏⵓⵍⵓⵊⵉⵢⵉⵏ, ⵙ ⵢⴰⵜ ⵜⵍⵖⴰ ⵉⵙⵔⵓⵙⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉ ⵏ ⵜⴰⵖⴰⵍⵜ, ⵎⵏⵉⴷ ⵏ ⵉⵔⵉⵎⵏ ⵉⵏⵉⵍⴰⵡⵏ, ⵜⵍⵍⴰ ⴳ ⵓⵙⴽⴰⵔ ⵣⵉ ⵉⵙⴳⴷⴰⵏ ⴰⵎ ⵢⴰⵏ ⵓⵙⴰⴳⵎ ⵏ ⵓⵎⵢⴰⵎⴰⵥ ⴷ ⵓⴼⵔⴰ, ⵓⵔ ⵉⴷ ⴰⵎⵎⴰⴽ ⵏ ⵜⵉⵟⵟⵉⵜ ⴷ ⵓⵎⵏⵣⴰⵖ.