ⴰⵙⵙ ⵏ ⵓⵙⵉⵎⵡⴰⵙ 21 ⵎⴰⵢⵢⵓ 2024, ⵜⵓⵎⵥ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴰⵙⵎⵖⵓⵔⵜ ⵜⴰⵎⵇⵇⵔⴰⵏⵜ ⵏ ⵉⵥⵥⵍⵎⴹ - ⵉⴼⴼⵓⵙ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ 2023, ⴳ ⵢⴰⵜ ⵜⴼⵓⴳⵍⴰ ⵜⴰⵎⴰⴷⴷⵓⴷⵜ ⴳ ⵓⴱⵕⵍⴰⵎⴰⵏ ⴰⴱⵓⵔⵜⵓⵖⴰⵍⵉ ⴳ ⵜⴰⵎⴰⵥⵓⵏⵜ ⵍⵉⵛⴱⵓⵏⴰ, ⵙ ⵜⵏⵙⵙⵉⵅⴼⵜ ⵏ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ, ⵎⴰⵙⵙ ⵎⴰⵔⵙⵉⵍⵍⵓ ⵔⵉⴱⵉⵍⵓ ⴷⵉ ⵙⵓⵣⴰ, ⴷ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵎⴰⵙⵙ ⴱⵉⴷⵔⵓ ⴰⴳⵢⴰⵔ ⴱⵔⴰⵏⴽⵓ, ⵍⵍⵉ ⵜⵜ ⵉⵙⵙⵉⵎⵖⵓⵔⵏ ⵙ ⵢⵉⵅⴼⴰⵡⵏ ⵏⵏⵙⵏ ⵙ ⵜⵙⵎⵖⵓⵔⵜ, ⵙ ⵜⵓⵙⵏⵜ ⵙ "ⵜⵡⵓⵔⵉ ⵏⵏⵙ ⵅⴼ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵜⵉⵍⵉⵜ ⵏ ⵉⵙⴽⵉⵍ ⵉⵏⴳⵔ ⵜⴰⴳⴳⴰⵢⵉⵏ ⴷ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵎⵏⵥⴰⵡ.

ⵜⴳⴰ ⵎⴰⵙⵙⴰ ⴱⵓⵄⵢⵢⴰⵛ ⵜⴰⵎⵖⴰⵔⵜ ⵜⴰⵎⵖⵔⵉⴱⵉⵜ ⵜⴰⵎⵣⵡⴰⵔⵓⵜ ⴷ ⵡⵓⴷⵎ ⴰⵏⴰⵎⵓⵔ ⵡⵉⵙⵙ ⴽⵕⴰⴹ (ⴷⴼⴼⵉⵔ ⵏ ⵓⵎⵛⵛⵉⵡⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙⵙ ⴰⵏⴷⵔⵉ ⴰⵥⵓⵍⴰⵢ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵣⵔⵉⵏ ⵉⵣⵔⵉⵏ, ⵉⴳⵍⵍⵉⵏ ⵎⴰⵙⵙ ⵄⴱⴷ ⵕⵕⴰⵃⵎⴰⵏ ⵍⵢⵓⵙⴼⵉ) ⵏⵏⵉ ⵢⵓⵎⵥⵏ ⵜⴰⵙⵎⵖⵓⵔⵜ ⴰⴷ ⵜⴰⵎⵇⵇⵔⴰⵏⵜ, ⵍⵍⵉ ⵉⵜⵜⵡⴰⴼⴽⴰⵏ ⵉ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⴷ ⵡⵓⴷⵎⴰⵡⵏ ⵙ ⵜⵓⵙⵏⵜ ⵙ ⵜⵉⵍⴰⵍⵉⵏ ⵏⵏⵙⵏ "ⵜⵓⵙⵍⵉⴷⵜ" ⴷ ⴳ ⵓⵙⵓⵜⴳ ⵙ ⵜⵡⵓⵔⵉⵡⵉⵏ ⵏⵏⵙⵏ ⴷ ⵜⵣⵎⵎⴰⵔ ⵏⵏⵙⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵣⴰⵖ ⵅⴼ ⵜⴷⵉⵎⵓⵇⵕⴰⵟⵉⵜ ⴷ ⵜⵏⵎⴰⴳⵓⵜ.

ⵉⵇⵇⴰⵏ ⴷ ⴰⴷ ⵉⵜⵜⵓⵙⵙⴽⵜⵉ ⵎⴰⵙ, ⴳ ⵜⵙⵓⵜⵍⵉⵏ ⵏⵏⵙ ⵉⵣⵔⵉⵏ, ⵜⵜⵓⴼⴽⴰ ⵜⵙⵎⵖⵓⵔⵜ ⴰⴷ ⵉ ⵡⵓⴷⵎⴰⵡⵏ ⵢⴰⵜⵜⵓⵢⵏ, ⴳⵉⵙⵏ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⴷ ⵉⵏⵙⵙⵉⵅⴼⵏ ⵢⴰⵜⵜⵓⵢⵏ (ⵅⵓⵔⵅⵉ ⵙⴰⵎⴱⴰⵢⵓ, ⴰⵏⵙⵙⵉⵅⴼ ⵉⵣⵔⵉⵏ ⵏ ⵍⴱⵓⵕⵜⵓⵖⴰⵍ ⴷ ⵓⴳⵏⵙⴰⵙ ⴰⵏⴰⴼⵍⵍⴰ ⵏ ⵜⵎⵜⵜⴰ ⵉⵎⵓⵏⵏ ⵉ ⵜⴰⴹⴰ ⵏ ⵜⵖⵔⵎⴰⵡⵉⵏ, ⵜⴰⴳⵍⵍⵉⴷⵜ ⵕⴰⵏⵢⴰ (ⵍⵓⵕⴹⵓⵏ), ⵍⵡⵉⵙ ⵉⵏⴰⵙⵢⵓ ⵍⵓⵍⴰ ⴷⴰ ⵙⵉⵍⴼⴰ (ⴰⵏⵙⵙⵉⵅⴼ ⵡⵉⵙⵙ 35 ⵏ ⵍⴱⵔⴰⵣⵉⵍ), ⴱⵓⵕⵉⵙ ⵜⴰⴷⵉⵜⵛ, ⴰⵏⵙⵙⵉⵅⴼ ⵉⵣⵔⵉⵏ ⵏ ⵚⵉⵕⴱⵢⴰ, ⵎⴰⵔⵉ ⵕⵓⴱⵉⵏⵚⵓⵏ, ⵜⴰⵏⵙⵙⵉⵅⴼⵜ ⵉⵣⵔⵉⵏ ⵏ ⵉⵕⵍⴰⵏⴷⴰ...).

ⴰⵎⵓⵏ ⴰⵡⴷ ⴳ ⵜⵍⴳⴰⵎⵜ ⵏ ⵡⵉⴷ ⵢⵓⵎⵥⵏ ⵜⴰⵙⵎⵖⵓⵔⵜ; ⴰⵏⴼⵍⵓⵙ ⴰⵎⴰⵜⴰⵢ ⵡⵉⵙⵙ ⵙⴰ ⵏ ⵜⵎⵜⵜⴰ ⵉⵎⵓⵏⵏ, ⴽⵓⴼⵉ ⵄⴰⵏⴰⵏ, ⴷ ⵙⵓⵣⴰⵏ ⵊⴱⴱⵓⵕ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⵖⵉⵍⴰⴷ.

ⴷⴰ ⵜⵜⵓⴼⴽⴰ ⵜⵙⵎⵖⵓⵔⵜ ⵏ ⵉⵥⵥⵍⵎⴹ - ⵉⴼⴼⵓⵙ  ⴽⵓ ⴰⵙⴳⴳⵯⴰⵙ ⵙⴳ 1995 ⵉ ⵙⵉⵏ ⵉⵎⵃⵉⵣⵡⴰⵔⵏ (ⵡⵓⴷⵎⴰⵡⵏ, ⵉⵎⵖⵏⴰⵙⵏ ⴷ ⵉⵎⵙⴽⴰⵔⵏ, ⵏⵉⵖ ⵜⵉⵎⴰⴷⴷⴰⵙⵉⵏ) ⵅⴼ ⵓⵎⵓⵔⵙ ⴷ ⵓⵙⵓⵖⵏ ⴰⵎⴰⴷⵓⵙ ⴷ ⵓⵙⵍⵉⴷ ⵙ ⵓⵙⴷⵓⵙ ⵏ ⵜⴱⴷⴰⴷⵜ ⴷ ⵜⵎⴷⵔⴰⵡⵜ ⵉⵏⴳⵔ ⵉⵥⵥⵍⵎⴹ ⴷ ⵉⴼⴼⵓⵙ.
 

ⴰⴳⴰⵎ ⵏ ⵜⴳⵓⵔⵉ ⵏ ⵜⵏⵙⵙⵉⵅⴼⵜ (ⵙ ⵜⴰⵄⵕⴰⴱⵜ)