ⵙⵍⴰ, 8 ⵉⴱⵔⵉⵔ 2025 – ⵜⴰⴷⵔⵙⵉ ⵏ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵡⴰⴷⴰⴼ ⵙ ⵜⵎⵓⵛⴰ ; ⵜⴰⴷⵔⵙⵉ ⵏ ⵜⵙⵓⵖⵍⵜ ⵙ ⵜⵓⵜⵍⴰⵢⵜ ⵏ ⵓⵙⵉⵍⵍⴼ ; ⵜⴰⵏⴰⴱⴱⴰⵢⵜ ⵏ ⵓⵙⵏⵓⵎⵎⵍ ⴰⵎⵙⵍⵉ… ⵜⴰⴳⵔⵓⵎⵎⴰ ⵏ ⵜⵏⵥⴰⵕ ⵉⵙⴱⵉⴹⵉⵕⵏ ⵜⴰⵏⴽⵔⴰ ⵜⴰⵎⵢⴰⴳⴰⵏⵜ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ… ⵙ ⵎⴽⴰ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴳ ⵓⵕⵥⵥⵓⵎ ⵏⵏⵙ ⵉ ⵓⵙⴳⵔⴰⵡ ⴰⵏⴰⵎⵓⵔ 16 ⵏ ⵓⵎⵎⵓⵄⴹⵕ ⵉⵜⵜⵓⵙⵏⵎⴰⵍⴰⵏ ⴷⴷⴰⵡ ⵏ ⵜⵎⴰⵜⴰⵔⵜ "ⵜⴰⵏⵖⵎⴰⵙⵜ ⴷ ⵓⵎⵎⵓⵄⴹⵕ: ⵜⵉⵍⴰⵡⵜ ⴷ ⵜⵏⵥⴰⵕ".
ⵙ ⵓⵣⵎⵣⵣⵓ ⴰⴷ, ⵜⵙⵎⵏⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵉⴽⵉⵣ ⵅⴼ ⵜⵏⵥⴰⵕ ⴷ ⵜⵎⵍⴰⵍⵉⵏ ⵏⵏⴰ ⵜⵣⵎⵔ ⴰⴷ ⵜⵏⵜ ⵜⵓⵔⴰⵔ ⵜⵏⵖⵎⴰⵙⵜ, ⵙ ⵓⵔⵎⵎⵓⵙ ⵏⵏⵙ ⴰⵎⵉⵔⵉⵡ, ⵉ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵖⴰⵢⴰⴷ ⵙ ⵜⵎⵀⵍⵜ ⵏ ⵜⴹⴼⵕⵉ ⵏⵏⴰ ⵙⴽⴰⵔⵏ ⵉⵎⴰⵙⵙⵏ ⵏ ⵓⵙⵇⵇⵉⵎ.
ⴳ ⵉⴳⴳⵉ ⵏ ⵖⴰⵢⴰⴷ, ⵜⵙⵖⴹⴼ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵡⴰⵔⴰⵎⵙⴰⵙⴰ ⵏ ⵜⴰⵍⵖⵉⵡⵉⵏ ⴷ ⵜⴷⴰⴱⵓⵜⵉⵏ ⵜⵉⵎⵓⵟⵟⵓⵏⵉⵏ ⴷ ⵡⴰⵙⵙⴰⵔⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵙⵍⴰⵡⴰⵏ ⴰⴽⴽⵯ ⴰⵍⵎⴰⴹ ⵏ ⵓⵙⵓⵖⵏ ⵏ ⵎⵏⵏⴰⵡ ⵏ ⵉⵙⵉⵜⵏ ⴷ ⵜⵙⵏⵙⵉⵡⵉⵏ ⵜⵉⵏⵖⵎⴰⵙⵉⵏ ⵜⵉⵏⴰⵎⵓⵔⵉⵏ ⵙ ⵉⵏⴰⵡⴰⵢⵏ ⵏ ⵡⴰⴷⴰⴼ ⴰⵎⵓⵟⵟⵓⵏ ⴷ ⵡⴰⵔ ⴰⵎⵙⴰⵙⴰ ⵏ ⴽⵔⴰ ⵏ ⵉⵖⵎⵉⵙⵏ ⴷ ⵜⵙⵖⵓⵏⵉⵏ ⵜⵉⵎⵓⵟⵟⵓⵏⵉⵏ ⴰⴽⴷ ⵉⵖⴰⵡⴰⵙⵏ ⵏ ⵜⵖⵓⵔⵉ ⵏ ⵓⴳⵯⴷⵉⵍ.
ⵉ ⵓⵣⵔⴰⵢ ⵏ ⵜⵏⵥⴰⵕ ⴰⴷ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵜⴰⵎⴳⴳⴰⵢⵜ ⵏ ⵜⵏⵖⵎⴰⵙⵜ ⴳ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⵙⵎⵉⵍ ⴰⴷ, ⵜⵖⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵙⵖⵣⵏ ⵏ ⵓⵖⴰⵡⴰⵙ ⴰⵏⵖⵎⴰⵙ ⵉⵡⵀⵏⵏ ⴷ ⵓⵎⵙⵉⴷⴼ, ⵉⵜⵜⵏⴽⴰⵔⵏ ⵙ ⵓⵙⵏⵓⵃⵢⵓ ⵉⴱⴷⴷⵏ ⵅⴼ ⵓⵎⵎⵓⵄⴹⵕ ⴷ ⵉⵙⴽⴰⵔⵏ ⵙ ⵜⵏⵥⴰⵕ ⵏ ⵡⴰⴷⴰⴼ ⴰⵎⵓⵟⵟⵓⵏ, ⵜⵙⴷⴷⵉⴷ ⵎⴰⵙ ⴰⵙⴷⵓⵙ ⵏ ⵜⴰⵙⵉⵎⴰⵏⵜ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵜⵏⴼⵔⵓⵜ ⵏ ⵓⵣⵔⴼ ⵏⵏⵙⵏ ⴳ ⵡⴰⴷⴰⴼ ⵙ ⵜⵎⵓⵛⴰ ⴷ ⵓⵎⵢⴰⵡⴰⴹ ⴷ ⵜⴷⵔⴰⵡⵜ ⵜⴰⵎⴳⴳⴰⵢⵜ ⴳ ⵓⵙⴰⴽⴰ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵓⵔ ⵉⵣⵎⵉⵔ ⴰⴷ ⵢⵉⵍⵉ ⴱⵍⴰ ⵜⴰⵏⵖⵎⴰⵙⵜ ⵉⵏⵏⵓⵕⵥⵎⵏ ⴷ ⵓⵎⵙⵜⴳⴳⴰⵔ ⵉⵜⵜⵡⵇⵇⴰⵔⵏ ⵉⵣⵔⴼⴰⵏ ⵏ ⵇⴰⵃ.
ⵉ ⵓⵙⵙⴽⵜⵉ, ⴰⵙⴳⵔⴰⵡ ⴰⵏⴰⵎⵓⵔ 16 ⵏ ⵓⵎⵎⵓⵄⴹⵕ ⵉⵙⵏⵎⴰⵍⴰ ⵡⴰⵎⵎⴰⵙ ⴰⵏⴰⵎⵓⵔ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵏ ⵉⵎⵎⵓⵄⴹⵕⵏ, ⵙ ⵜⴷⵔⴰⵡⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵉⴳⴰ ⵓⵙⴳⵔⴰⵡ ⴰⴷ ⴰⵙⴳⴳⵯⴰⵙ ⴰⴷ ⵜⴰⴷⴰⴱⵓⵜ ⵏⵏⴰ ⵙⴳ ⵜⴱⵔⵔⵃ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵅⴼ ⵓⵕⵥⵥⵓⵎ ⵏ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵜⵔⴰⵏⴰⵡⵜ ⴳ ⵢⵉⴳⵔ ⵏ ⵓⵎⵎⵓⵄⴹⵕ, ⵉⵥⵍⵉⵏ ⴳ ⵜⴼⵔⴽⵜ ⵜⴰⵎⵣⵡⴰⵔⵓⵜ ⵙ ⵉⵏⵖⵎⴰⵙⵏ/ⵜⵉⵏⵖⵎⴰⵙⵉⵏ. ⵜⵡⴰⵜⵜⵙ ⵜⴰⵙⵏⵜⴰⵢⵜ ⴰⴷ ⴰⴷ ⵜⵙⴷⵓⵙ ⵜⴰⴷⵔⴰⵡⵜ ⵏ ⵉⵏⵖⵎⴰⵙⵏ/ⵜⵉⵏⵖⵎⴰⵙⵉⵏ ⴳ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵓⵙⵎⵖⵔ ⵏ ⵉⵎⵣⴰⵖⵏ/ⵜⵉⵎⵣⴰⵖⵉⵏ ⵙⴳⵉⵙⵏ ⵜⵜ ⵉⵜⵜⴰⵡⵉⵏ ⴳ ⵜⵎⵙⴰⵔⵉⵏ ⵏ ⵓⵎⵎⵓⵄⴹⵕ.
