ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵖⵍⵉⵙⵜ ⵏ ⵓⵙⵎⵔⵙ ⵏ ⵜⴰⵏⵏⴰⵢⵜ ⵜⴰⴳⵜⵉⵎⵏⵉⴷⵏ ⴳ ⵉⵎⵏⵖⵉ ⵎⴳⴰⵍ ⵏ ⵓⴼⵉⵔⵓⵙ ⵏ ⵙⵙⵉⴷⴰ. ⵉⴷⴷⴰ ⴷ ⵖⴰⵢⴰ ⴷ ⴳ ⵢⴰⵏ ⵡⴰⵙⵙ ⵏ ⵜⵖⵓⵔⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ ⵓⴽⵡⴰⵙ 16 ⵉⵏⵏⴰⵢⵔ 2025, ⴷⴷⴰⵡ ⵏ ⵜⵎⴰⵜⴰⵔⵜ: "ⴰⵙⴱⵉⴷⴷ ⵏ ⵙⵙⵉⴷⴰ ⴳ ⵓⵎⵏⵉⴷ ⵏ 2030: ⴳⵔ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵙⵏⵜⴰⵢⵉⵏ ⵜⵓⵖⵔⵉⵎⵉⵏ", ⵙ ⵜⴷⵔⴰⵡⵜ ⴳⵔ ⵜⵎⵙⵎⵓⵏⵜ ⵏ ⵓⵙⴱⴷⴷⵉ ⵏ ⵙⵙⵉⴷⴰ ⴷ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ ⵏ ⵜⵓⵣⵍⵜ ⵜⴰⵏⵎⵓⵏⴰⵜ.
ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵜⴳⵓⵔⵉ ⵏⵏⵉ ⵉⵙⵎⵏⵉⴷ ⵎⴰⵙⵙ ⵎⵓⵚⵟⴰⴼⴰ ⵏⵊⵎⵉ, ⴰⵏⵎⵀⴰⵍ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵇⵇⵉⵎ, ⵎⴰⵙ ⵓⵔ ⵉⵏⵏⵉ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵙⵙⵉⴷⴰ ⴰⵎⵔ ⵙ ⵜⵓⴳⴳⴰⵣ ⵜⵉⴳⵔⴰⵡⴰⵏⵉⵏ ⵉⵙⴽⴰⵔⵏ ⵙ ⵉⵎⵙⴽⴰⵔⵏ ⵉⵎⵙⵏⵉⵊⵊⵉⵜⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⵉⵜⵜⴹⵉⵚⵏ ⵅⴼ ⵉⵎⵓⴹⴰⵏ ⵏ ⵓⴼⵉⵔⵓⵙ. ⵜⵙⴷⴷⵉⴷ ⴰⵡⴷ ⵅⴼ ⵓⵙⵓⵖⵏ ⵏ ⵓⵙⴱⴷⴷⵉ ⵏ ⵓⵎⵙⵙⴰⴹⴰⵏ ⴰⵏⴰⵎⵓⵏ ⴷ ⵓⵙⵏⵓⵃⵢⵓ ⵉⵙⴳⴷⴰⵍⵏ ⴽⵉⴳⴰⵏ ⵏ ⵓⴳⴳⵉⴷⵏ ⵉⵎⵓⴹⴰⵏ ⴰⴷ ⴰⴷⴼⵏ ⵖⵔ ⵓⵣⵣⵔⴰⵢ ⵏ ⵣⵉⴽ ⴷ ⵓⵙⵙⵓⵊⵊⵉ, ⵎⴰⵢⴰ ⴷⴰ ⵉⵜⵜⴹⵉⵚ ⵙ ⴳⴰⵔ ⵅⴼ ⵜⴷⵓⵙⵉ ⵏⵏⵙⵏ ⴷ ⵉⵣⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ.
ⵜⵔⵏⵓ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵉⵙⵔⴰⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵣⵔⴼⴰⵏ ⵉⴷⵙⵍⴰⵏⵏ, ⴷ ⴳ ⵜⵣⵡⵉⵔⵉ ⵏⵏⵙⵏ ⴰⵣⵔⴼ ⴳ ⵜⴷⵓⵙⵉ, ⴳ ⵡⴰⵎⵎⴰⵙ ⵏ ⵜⵙⵜⵔⴰⵜⵉⵊⵉⵜ ⵏⵏⵙ ⵉ ⵡⴰⵏⵏⴰⵍ ⵏ ⵜⵓⴳⴳⴰⵣ ⵜⵉⵏⴰⵎⵓⵔⵉⵏ ⵉ ⵓⵙⴱⴷⴷⵉ ⵏ ⵙⵙⵉⴷⴰ. ⵜⵙⵙⴼⵔⵓ ⵎⴰⵙ ⵉⵣⴷⵉ ⵓⵣⵔⴼ ⴰⴷ ⵙ ⵢⴰⵜ ⵜⵡⵉⵍⴰ ⵉⴷⵓⵙⵏ ⴷ ⵉⵣⵔⴼⴰⵏ ⵢⴰⴹⵏⵉⵏ ⵣⵓⵏ ⴷ ⴰⵣⴷⴷⵓⵖⴷ ⵢⵓⵙⴰⵏ, ⵜⴰⵡⵓⵔⵉ ⵉⵏⴼⵔⵓⵏ, ⴷ ⵜⵡⵏⵏⴰⴹⵜ ⵉⵣⴷⴷⵉⴳⵏ, ⵜⵙⵙⵎⵜⵔ ⵎⴰⵙ ⴷ ⵜⴰⵏⴼⵔⵓⵜ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴰⴷ ⴷⴰ ⵉⵙⵙⵓⵜⵓⵔ ⴰⵙⵎⵀⵍ ⵏ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⵉⵙⴽⴰⵔⵏ ⵙ ⵜⵎⵙⵓⵜⴰⵍ ⵏ ⵜⵓⴷⵔⵜ ⵏ ⵓⴼⵔⵉⴷⵏ ⴷ ⵜⵙⵙⵓⵖⵏ ⵙ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ.
ⴳ ⵓⵎⵏⴰⴹ ⵏ ⵜⴳⵓⵔⵉ ⵏⵏⵙ ⵅⴼ ⵜⵖⴰⵔⴰⵙⵉⵏ ⵏ ⵓⵙⴱⴷⴷⵉ ⵏ ⵙⵙⵉⴷⴰ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷ ⴰⵣⵣⴳⵉⵔ ⵏ ⵜⵙⵜⵔⴰⵜⵉⵊⵉⵜ ⵉⵕⵡⴰⵏ ⵉⵙⵖⴰⵡⵙⴰ ⵙ ⵓⵎⵏⴰⵍⴰ ⵏ ⵡⴰⵔ ⵉⵙⴽⵉⵍ, ⵎⴰⵢⴰ ⴷ ⵉⵙⵙⵓⵜⵓⵔⵏ ⴰⵙⵉⴷⴼ ⵏ ⵜⵎⵢⴰⴷⴰⵙⵉⵏ ⵜⵉⴷⵓⵙⴰⵏⵉⵏ ⴷ ⵜⵉⵣⵔⴼⴰⵏⵉⵏ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ. ⵜⵙⵎⵖⵔ ⴰⵡⴷ ⵜⵓⴳⴳⴰⵣ ⵉⵜⵜⵡⴰⵙⴽⴰⵔⵏ ⴳ ⵓⵙⴰⵜⵉ ⵏ ⵜⴷⵔⴰⵡⵜ ⴳⵔ ⵉⴳⵣⵣⵓⵎⵏ ⵉⵏⴱⴰⴹⵏ ⴷ ⵡⴰⵎⵓⵏ ⵓⵖⵔⵉⵎ, ⵜⵖⵔ ⵙ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉ ⵓⵙⵔⵙ ⵏ ⵢⴰⵏ ⵜⵡⵏⵏⴰⴹⵜ ⵉⵜⵜⵏⴼⵔⵓⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷⴷⵔⵏ ⴷ ⵓⴼⵉⵔⵓⵙ ⴷ ⵜⵔⵓⴱⴱⴰ ⵏⵏⵉ ⴱⴰⵀⵔⴰ ⵉⵜⵜⴰⵖ.
ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ ⵜⴰⴳⵓⵔⵉ ⵏⵏⵙ ⵙ ⵜⵖⵓⵔⵉ ⵉ ⴰⴽⴽⵯ ⵉⵎⵙⴽⴰⵔⵏ ⴰⴼⴰⴷ ⴰⴷ ⵣⴷⵉⵏ ⴰⵙⵡⵓⵔⵉ ⵉⵛⵛⴰⵔⵏ ⴰⴼⴰⴷ ⴰⴷ ⵜⵜⵡⴰⵍⴽⴰⵎⵏ ⵉⵡⵜⵜⴰⵙⵏ ⵉⵏⴰⵎⵓⵔⵏ ⵉⵍⵍⴰⵏ ⴳ ⵓⵙⴱⴷⴷⵉ ⵏ ⵙⵙⵉⴷⴰ ⵙ ⵉⵖ ⴷ ⵉⵍⴽⵎ ⵓⵙⴳⴳⵯⴰⵙ ⵏ 2030, ⵎⴰⵢⴰ ⴷ ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵎⵔⵉⵙⵉⵏ ⵏ ⵍⵎⵖⵔⵉⴱ ⵜⵉⴳⵔⴰⵖⵍⴰⵏⵉⵏ, ⵉⵎⵍ ⴰⵙⵓⵖⵏ ⴰⴳⵔⴰⵡⴰⵏ ⵎⵏⵉⴷ ⵏ ⵓⵙⵖⵓⴷⵓ ⵏ ⵜⵓⴷⵔⵜ ⵏ ⵉⵎⵓⴹⴰⵏ ⴷ ⵜⵏⴼⵔⵓⵜ ⵏ ⵡⴰⴷⴷⵓⵔ ⵏⵏⵙⵏ.
ⵙⴳ ⵜⵙⴳⴰ ⵢⴰⴹⵏ, ⵉⵙⵎⵏⵉⴷ ⵓⵙⵇⵇⵉⵎ ⴳ ⵜⵖⵉⵎⵉⵜ ⵜⵉⵙⵙ ⵙⵏⴰⵜ ⵏ ⵓⵏⵎⵓⵇⵇⴰⵔ ⴰⴷ, ⵢⴰⵜ ⵜⴳⵓⵔⵉ ⵏⵏⵉ ⴳ ⵉⵙⵙⵉⴷⴷ ⵅⴼ "ⵜⵉⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵙⵙⵉⴷⴰ ⵙ ⵓⵙⴷⴷⴻⴷ ⵅⴼ ⵓⵣⵣⵔⴰⵢ ⵏ ⵣⵉⴽ ⴳⵔ ⵓⵎⵥⵉⵢⵏ".
ⵉⵜⵜⵡⴰⵙⵙⵏ ⵡⴰⵙⵙ ⴰⴷ ⵏ ⵜⵖⵓⵔⵉ, ⵏⵏⴰ ⴳ ⴷⵔⵓⵏ ⴽⵉⴳⴰⵏ ⵏ ⵉⴳⵏⵙⴰⵙ ⵏ ⵉⴳⵔⴰⵏ ⵓⵏⴱⵉⴹⵏ ⴷ ⵉⵎⵓⵣⴰⵢⵏ ⴳ ⵢⵉⴳⵔ ⴰⴷⵓⵙⴰⵏ ⴷ ⵉⵎⵖⵏⴰⵙⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵎⴰⴷⴷⴰⵙⵉⵏ ⵜⵉⵣⵔⴼⴰⵏⵉⵏ, ⵙ ⵓⵎⵔⴰⵔⴰ ⵏ ⵜⴰⵏⵏⴰⵢⵉⵏ ⴷ ⵜⵉⵔⵎⵉⵜⵉⵏ ⵅⴼ ⵜⵖⴰⵔⴰⵙⵉⵏ ⵏ ⵓⵙⴷⵓⵙ ⵏ ⵜⵓⴳⴳⴰⵣ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⴰⴼⴰⴷ ⴰⴷ ⵉⴷⵔⵓⵙ ⵓⴼⵙⴰⵔ ⵏ ⵙⵙⵉⴷⴰ ⵙ ⵓⵙⵙⵉⴷⴷ ⵅⴼ ⵜⵏⵥⴰⵕ ⴷ ⵉⵎⵙⵓⵔⴰⵙ ⵏⵏⴰ ⵉⵜⵜⵎⵏⴰⵍⴰⵏ ⵜⴰⴳⵍⴷⵉⵜ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵙⵙⵉⴷⴰ, ⴷ ⵓⵍⴰ ⴰⵙⵎⵏⵉⴷ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵙⵏⵜⴰⵢⵉⵏ ⵜⵓⵖⵔⵉⵎⵉⵏ ⵉⵜⵜⴰⵡⵙⵙⵏ ⴳ ⵓⵍⴽⴰⵎ ⵙ ⵓⵡⵜⵜⴰⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⴰⴷ ⵙ ⵉⵖ ⴷ ⵉⵍⴽⵎ ⵓⵙⴳⴳⵯⴰⵙ ⵏ 2030.
