ⵉⵙⵎⴷ ⴰⵙⵙ ⴰ ⵓⵙⵎⵓⵜⵜⴳ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵉⵙⵓⵜⴰⵢ ⵏ ⵜⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, ⵏⵏⴰ ⵉⵣⵔⵉⵏ ⴳ ⵓⵣⵎⵣ ⵏ ⵉⵎⴰⵍⴰⵙⵙ ⵉⵣⵔⵉⵏ ⴳ ⵓⵙⴰⵜⵉ ⵏ ⵓⵔⵣⴰⴼ ⴰⵎⴰⴷⴷⵓⴷ ⵏⵏⴰ ⵉⵙⴽⵔ ⵓⴽⴰⴱⴰⵔ ⵉ ⵍⵎⵖⵔⵉⴱ, ⵢⴰⵎⵓⵏ ⴰⵙⵎⴷⵢⴰ ⴰⵣⵔⴼⴰⵏ ⴷ ⵓⵙⵔⵜⴰⵏ ⵏ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ.

ⵉⵜⵜⵡⴰⵙⵙⴰⵏ ⵓⴳⵔⴰⵡ ⴰⵎⴳⴳⴰⵔⵓ, ⵏⵏⴰ ⵜⵙⵙⵉⵅⴼ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵎⴰⵙⵙ ⴰⵃⵎⴰⴷ ⵙⴰⵄⵉⴷ ⵜⵜⴰⵎⵉⵎⵉ, ⴰⵏⵙⵙⵉⵅⴼ ⵏ ⵜⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, ⵙ ⵓⵙⴳⵎⴹ ⵅⴼ ⵓⴱⵔⵓⵟⵓⴽⵓⵍ ⵏ ⵓⵎⵢⴰⵡⴰⵙ ⵏⴳⵔ ⵜⴼⵓⵍⵉⵏ ⵙ ⵙⵏⴰⵜ.

ⵉⵡⴰⵜⵜⵙ ⵓⴱⵔⵓⵟⵓⴽⵓⵍ ⴰⴷ ⴰⴷ ⵉⵙⵔⵙ ⵉⵙⴱⵓⵖⵍⵓ ⴰⵙⴰⵜⵉ ⴷ ⵉⵎⴰⵙⵙⵏ ⵏ ⵜⵡⵓⵔⵉ ⵜⴰⵎⴰⵣⴰⵔⵜ ⴷ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ ⴳ ⵢⵉⴳⵔⴰⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵙⵏ, ⵙ ⵓⵙⵎⵀⵍ ⵏ ⵉⵖⴰⵡⴰⵙⵏ ⵓⵎⵀⵉⵍⵏ ⵉⵡⴰⵜⵜⵙⵏ ⴰⴷ ⵚⴽⵓⵏ ⵜⵉⵥⴹⴰⵕⵉⵏ ⴷ ⵓⵙⵎⵢⴰⵏⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ, ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⵥⵍⵉⵏ ⵙ ⵓⵎⵢⴰⵖ ⴷ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⵜⴰⵎ ⵏ ⵜⵕⵥⵉⵢⵉⵏ ⴷ ⵓⴹⴼⴼⵓⵕ ⴷ ⵓⵏⵄⴰⵕ ⴷ ⵓⵙⵎⵓⵜⵜⴳ ⵏ ⵜⴰⵏⴰⴹⵉⵏ.

ⴰⴱⵔⵓⵟⵓⴽⵓⵍ ⴰⴷ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵓⵔ ⵉⴳⵉ ⵖⴰⵙ ⵜⴰⵏⵜⴰⵎⵜ ⵜⴰⵙⴰⵜⵉⵜ, ⵎⴰⵛⴰ ⵉⴳⴰ ⴰⵡⵏⵏⵉ ⵉⵣⴷⴷⵉⴳⵏ ⵅⴼ ⵜⵉⵔⴰⵜ ⵜⴰⴳⵔⴰⵡⴰⵏⵜ ⵉ ⵓⵙⵔⵙ ⵏ ⵓⵎⵢⴰⵡⴰⵙ ⴰⵙⵓⵍⴰⵏ, ⵉⵎⵎⴰⵍⵏ ⴰⵙⵓⵖⵏ ⵉⵕⵚⴰⵏ ⵙ ⵓⵙⵡⵓⵔⵉ ⵅⴼ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⴷⵓⵙ ⵏ ⵉⵙⴰⴽⴰⵜⵏ ⵏ ⵓⴼⵔⴰⴳ ⵏⵏⵙⵏ ⴷ ⵜⵏⴽⵔⴰ ⵙⵉⵙⵏ.

ⵏⴽⴽⵯⵏⵉ ⵏⴼⵔⴽ ⴽⵉⴳⴰⵏ, ⵜⵔⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵙ ⵓⴷⴷⵓⵔ ⵏ ⵜⵏⵥⴰⵕ ⵜⵉⵅⴰⵜⴰⵔⵉⵏ ⵏⵏⴰ ⵜⵜⵎⵏⴰⵍⴰⵏⵜ ⵜⵎⵔⵙⴰⵍ ⵜⵉⵣⵔⴼⴰⵏⵉⵏ ⵜⵉⴼⴰⵍⴰⵚⵟⵉⵏⵉⵢⵉⵏ, ⴳ ⵓⵎⵏⴰⴹ ⴳ ⵉⵍⵍⴰ ⵓⵙⵏⵢⵓⵎⵓ ⵉⵜⵜⵡⴰⵔⵏⴰⵏ ⵅⴼ ⵓⵙⴰⵢⵔⴰⵔ ⵓⵖⵔⵉⵎ, ⴷ ⵓⵡⴰⵜⵜⵙ ⴰⵙⵓⵍⴰⵏ ⵏ ⵉⵏⵎⵣⴰⵖⵏ/ⵜⵉⵏⵎⵣⴰⵖⵉⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ. ⵏⵙⵙⵏ ⴰⵡⴷ, ⵜⵔⵏⴰ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ, ⵎⴰⵙ ⴷ ⵉⵙⵖⵓⵏⵏ ⵏ ⵓⵎⵣⴰⵖ ⵅⴼ ⵉⵎⵏⵣⴰⵢⵏ ⵉⵖⵣⵓⵔⴰⵏⵏ, ⴰⴷ ⴰⵖ ⵉⵇⵇⴰⵔⵏ ⵏⴽⴽⵯⵏⵉ ⵏⵏⵉ ⵉⴳⴰⵏ ⵜⵉⵎⵔⵙⴰⵍ ⴰⴷ ⵏⵙⴷⵓⵙ ⵉⵎⵏⵉⴷⵏ ⵏ ⵓⵎⵢⴰⵡⴰⵙ ⴰⴼⴰⴷ ⴰⴷ ⵏⵙⵙⴰⵍⵉ ⴰⵏⵄⴰⵕ ⵏⵏⵖ ⵃⵎⴰ ⴰⴷ ⵢⵉⵍⵉ ⵡⴰⵏⵏⴰⵍ ⵏ ⵜⵓⴳⴳⴰⵣ ⵉⵡⴰⵜⵜⵙⵏ ⴰⴷ ⵍⴽⵎⵏⵜ ⵙ ⵜⵣⵔⴼⵜ ⴷ ⵜⵏⴼⵔⵓⵜ ⵏ ⵓⵙⵓⵎⵓ.

ⵉ ⵓⵙⵙⴽⵜⵉ, ⵔⴰⴷ ⵢⵉⵍⵉ ⵓⵎⵢⴰⵡⴰⵙ ⵏⴳⵔ ⵉⵙⵎⵉⵍⵏ ⵙ ⵙⵉⵏ, ⵙ ⵓⵎⵙⴰⵙⴰ ⴷ ⵓⵎⵛⴰⵛⴽⴰ ⴰⴷ ⵅⴼ ⵜⵙⴽⵔⴰⵡⵜ ⵜⴰⵎⴰⵣⴰⵔⵜ ⴷ ⵜⵎⵣⴷⴰⵢⵜ ⴳ ⵎⵏⵏⴰⵡ ⵏ ⵉⵙⴰⵡⵔⵏ, ⵢⴰⵎⵓⵏ ⴰⵚⴽⵓ ⴷ ⵓⵙⴷⵓⵙ ⵏ ⵜⵥⴹⴰⵕⵉⵏ, ⴰⵙⵎⵢⴰⵏⴰⵡ ⵏ ⵓⵎⵍⴰⵏ ⴷ ⵜⵓⵙⵙⵏⴰ ⵉ ⵓⵙⴱⵖⵔ ⵙⴳ ⵜⵉⵔⵎⵉⵜⵉⵏ ⵜⵉⵏⵙⵏⵎⵣⴰⵣⴰⵍⵉⵏ, ⴷ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵓⵎⵙⴰⵡⴰⵍ ⴷ ⵓⴹⴼⴼⵓⵕ ⵏ ⵜⵎⴰⴳⵍⴰⵢⵉⵏ ⴷ ⵜⵎⴳⴳⵉⵜⵉⵏ ⵜⵉⵏⵎⵜⵜⴰⵏⵉⵏ ⵏⵏⵉ ⴷⴰⵔ ⴰⵣⴷⴰⵢ.

ⵢⴰⵜ ⵜⵙⵓⵜⵍⵜ ⵏ ⵓⵙⵎⵓⵜⵜⴳ, ⵏⵏⵉ ⵉⴳⴰⵏ ⵜⴰⵎⵣⵡⴰⵔⵓⵜ ⴳ ⵡⴰⵏⴰⵡ ⵏⵏⵙ, ⴷ ⵓⴱⵔⵓⵟⵓⴽⵓⵍ ⵏ ⵓⵎⵢⴰⵡⴰⵙ ⴰⵎⵖⵔⵉⴱⵉ-ⴰⴼⴰⵍⴰⵚⵟⵉⵏⵉ ⵉⴽⵛⵎⵏ ⴳ ⵓⵙⴰⵜⵉ ⵏ ⵓⵙⵓⵖⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⴳⴰⵏ ⵜⴰⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⴷⵙⵜⴰⵔⵜ ⵜⴰⵙⵉⵎⴰⵏⵜ, ⵙ ⵡⴰⵏⵏⴰⵍ ⵏ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵉⵎⴰⵙⵙⵏ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵜⴱⴷⴰⴷⵜ, ⴷ ⵓⵙⴷⵓⵙ ⵏ ⵓⵎⵢⴰⵖ ⴰⴽⴷ ⵉⵎⵙⴽⴰⵔⵏ ⵉⵙⴳⴰⵡⴰⵏⵏ ⴳ ⵜⵎⵙⴰⵔⵉⵏ ⵏ ⵜⵖⵏⵙⴰ ⵜⴰⵣⵔⴼⴰⵏⵜ ⴷ ⵓⵎⵣⴰⵖ ⴷ ⵓⴼⵔⴰⴳ ⵏ ⵉⵏⵎⵣⴰⵖⵏ/ⵜⵉⵏⵎⵣⴰⵖⵉⵏ, ⴳ ⵢⵉⵅⴼ ⵏⵏⵙⵏⵜ ⵜⴰⵎⵙⴰⵔⵜ ⵜⴰⴼⴰⵍⴰⵚⵟⵉⵏⵉⵜ ⵏⵏⴰ ⵉⵙⵓⵍⵏ ⴳ ⵡⴰⵎⵎⴰⵙ ⵏ ⵜⵉⵡⵉⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ, ⵙ ⵜⵡⵉⵍⴰ ⵜⴰⵎⴰⴷⴷⵓⴷⵜ ⴷ ⵜⵎⴷⵏⴰⵏⵜ.