ⵜⵙⵉⵙⴼⵉⵡ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⴳⵓⵔⵉ ⵏⵏⵙ ⵏ ⵓⵕⵥⵥⵓⵎ ⵙ ⵜⵎⵍⴷⴰ ⵏ ⵜⵉⵏⴰⵡⵜ ⵜⴰⵏⴰⵎⵓⵔⵜ ⵅⴼ "ⵜⵉⵎⴷⵉⵏⵉⵏ ⵉⵙⵙⴼⴽⴰⵏ ⴳ ⵍⵎⵖⵔⵉⴱ : ⵉⵎⵏⵉⴷⵏ ⴷ ⵉⵏⴰⵥⴰⵕⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ" ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵙⵙ ⴱ ⴰⴽⵕⴰⵚ 12 ⵢⵓⵍⵢⵓⵣ 2023 ⴳ ⵕⵕⴱⴰⵟ, ⵎⴰⵙ "ⴷⴰ ⵙⴱⵉⴹⵉⵕⵏ ⵉⵎⵣⴰⵔⴰⵢⵏ ⵉⵏⵊⵎⵓⵜⵏ ⵜⴰⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵓⴼⵊⵊⵉⵊ ⵙⵉⵔⵙⵏ", ⵜⵙⴷⴷⵉⴷ ⵎⴰⵙ "ⴷ ⵢⵓⴳⴳⴰ ⵓⵙⵔⵓⵙ ⵏ ⵜⵎⴷⵉⵏⵜ ⵉⵜⵜⵙⴷⴰⵍⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵥⵍⴰⵢ ⵙⴳ ⵓⵣⵔⴼ ⴳ ⵜⵎⴷⵉⵏⵜ, ⵉⴷⴷⵖ ⴷⴰ ⵉⵎⵎⴰⵍ ⵓⵙⵎⵀⵍ ⵏ ⵓⵣⵔⴼ ⴰⴷ ⴰⵙⵡⵉⵔ ⵏ ⵓⵙⵎⵀⵍ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⴷ ⵉⵡⵏⴹⴰⵏⵏ".

ⵜⵔⵏⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ "ⵉⴳⴰ ⵓⵣⵔⴼ ⴳ ⵜⵎⴷⵉⵏⵜ ⴰⵣⵔⴼ ⴰⵎⴳⵔⵓ, ⵉⵣⴷⵉ ⵙⵉⵔⵙ ⵡⴰⴷⴰⴼ ⵙ ⵓⵣⵔⴼ ⴳ ⵜⵣⴷⵓⵖⵜ ⴷ ⵜⴷⵓⵙⵉ ⴷ ⵓⵙⵍⵎⴷ ⴷ ⵡⴰⵎⴰⵏ ⴷ ⵜⵡⵏⵏⴰⴹⵜ ⵉⵣⴷⴷⵉⴳⵏ ⴷ ⵡⴰⴷⴰⴼ ⵙ ⵜⵏⵓⴼⴰ ⴷ ⵉⴷⵖⴰⵔⵏ ⵉⴳⴷⵓⴷⴰⵏⵏ ⴷ ⵜⵏⴼⵔⵓⵜ ⵏ ⵢⵉⴷⵉⵔ ⴰⵎⴰⴽⴽⴰⵢ ⴷ ⵓⵏⴳⵉⴷⴷⵉ ⵏ ⵉⵣⵎⴰⵣ." ⵜⵙⴷⴷⵉⴷ ⴰⵡⴷ ⴳ ⵓⵎⵏⴰⴹ ⴰⴷ ⵎⴰⵙ "ⵏⵙⵖⴰⵡⵙⴰ ⵙ ⵜⵙⵜⵕⴰⵜⵉⵊⵉⵜ ⵜⴰⵖⵔⵎⴰⵏⵜ ⵉⴼⴼⵓⵍⵙⵏ ⵉⴱⴷⴷⵏ ⵅⴼ ⵜⵎⵢⴰⴷⴰⵙⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵎⴷⵉⵏⵉⵏ ⵜⵉⵎⵙⵙⵉⴷⴼⵉⵏ ⵜⵉⵖⵣⵓⵔⴰⵏⵉⵏ, ⵜⵉⵙⵓⵍⴰⵏⵉⵏ ⵡⵀⵏⵏⵉⵏ".

ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⵎⵚⵟⴰⴼⴰ ⵍⵎⵕⵉⵥⵇ, ⴰⵎⵣⴷⴰⵢ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⵓⵚⴽⴰ ⵜⴰⴷⵉⴽⵉⵎⵓⵇⵕⴰⵟⵉⵜ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵜⴳⴰ ⵜⵉⵏⴰⵡⵜ ⴰⴷ ⴰⵙⵙⵏⵜⵉ ⵙ ⵓⵎⵙⴳⴷⴰⵍ ⵅⴼ ⵜⵎⵢⴰⴷⴰⵙⵉⵏ ⴳⴳⵓⵜⵏⵉⵏ ⵏ ⵜⵎⴷⵉⵏⵉⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴳⴰⵏⵜ ⵜⵎⴷⵉⵏⵉⵏ ⵜⵉⵎⴰⵢⵏⵓⵜⵉⵏ "ⵉⵎⵉⴷⵔ ⴷ ⵡⴰⴷⴷⴰⴷ ⴰⵏⴼⴳⴰⵏ" ⵉⵣⴷⵉⵏ ⵙ ⴷ ⵇⴰⵃ ⵜⴼⵓⵍⵉⵏ ⵏ ⵡⴰⵎⵓⵏ.

ⴳ ⵓⵙⴰⵜⵉ ⴰⴷ, ⵉⵖⵔⴰ ⵙ "ⵓⴼⵊⵊⵉⵊ ⵏ ⵜⵎⴷⵉⵏⵉⵏ ⴰⴷ ⵙ ⵜⵉⴳⵣⵉ ⵜⴰⵏⵉⵎⴰⵏⵜ, ⴷ ⴰⴷ ⵓⵔ ⴹⴼⵓⵕⵏⵜ ⵉ ⵜⵉⵢⵢⴰⴹ, ⵜⴹⵎⵏ ⵢⵉⴷⵉⵔ ⴰⵎⴰⴽⴽⴰⵢ ⵉ ⵇⴰⵃ ⵙ ⵓⵙⴷⴰⴳ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵓⵙⵡⵉⵔ ⵏ ⵓⵙⵍⵎⴷ ⴷ ⵜⴷⵓⵙⵉ ⴷ ⵜⵡⵓⵔⵉ ⴷ ⵜⵣⴷⵓⵖⵜ ⴷ ⵜⵡⵏⵏⴰⴹⵜ.

ⵉⴳⴰ ⵓⵏⵎⵓⵇⵇⴰⵔ ⴰⴷ, ⵏⵏⵉ ⴳ ⴷⵔⵓⵏ ⴽⵉⴳⴰⵏ ⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵡⴰⵔ ⵉⵎⵔⵙⴰⵍⵏ ⴷ ⵉⵎⵓⵣⴰⵢⵏ ⴳ ⵓⵙⵖⵉⵡⵙ ⴰⵖⵔⵎⴰⵏ ⴷ ⵓⵚⴽⵉⵡ ⴷ ⵉⵎⵔⵙⴰ ⴳ ⵢⵉⴳⵔ ⴰⴷ, ⵜⴰⵎⵍⴷⴰ ⵉ ⵜⵎⵢⴰⴷⴰⵙⵜ ⵏ ⵜⵎⵖⵓⵏⵜ ⵏ ⵓⵖⴰⵡⴰⵙ ⵏ ⵜⵖⵔⵎⵉⵏ ⵜⵉⵎⴰⵢⵏⵓⵜⵉⵏ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵖⵔⵎⴰⵏⵉⵏ ⴳ ⵍⵎⵖⵔⵉⴱ, ⵙ ⵓⵙⵙⵉⴷⴷ ⵅⴼ ⵜⵎⵢⴰⴷⴰⵙⵉⵏ ⵣⴷⵉⵏⵉⵏ ⵙ ⵓⵙⵎⵙⴰⵙⴰ ⵓⵚⴽⵉⵡ, ⵉⵣⴷⵉⵏ ⵙ ⵓⵥⵍⴰⵢ ⵙ ⵜⴰⴷⴷⵔⵡⵉⵏ ⵏ ⵉⵄⵔⵔⵉⵎⵏ ⴷ ⵡⴰⴷⴷⵓⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵉⵙⴰⴷⴰⴼⵏ ⴳ ⵜⵎⴷⵉⵏⵉⵏ ⵉⵙⵙⴼⴽⴰⵏ, ⴷ ⵜⴱⵔⵉⴷⵉⵏ ⵎⵓⵏⵏⵉⵏ ⴰⴽⴷ ⵜⵣⵣⵉⴳⵣⵜ ⵜⵓⵚⴽⵉⵡⵜ, ⴷ ⵓⵙⵎⵓⵔⵙ ⵏ ⵜⵎⵀⵍⵜ ⵏ ⵓⵎⵓⵜⵜⵉ ⵖⵔ ⵜⵎⴷⵉⵏⵉⵏ ⵜⵉⵙⵓⵍⴰⵏⵉⵏ, ⴷ ⵓⵔⵎⵎⵓⵙ ⵏ ⵜⵎⴷⵉⵏⵉⵏ ⵜⵉⵎⴰⵢⵏⵓⵜⵉⵏ ⴳ ⵍⵎⵖⵔⵉⴱ, ⴷ ⵓⴳⴳⴰⵔ.

ⴰⴳⴰⵎ ⵏ ⵜⴳⵓⵔⵉ ⵏ ⵜⵏⵙⵙⵉⵅⴼⵜ (ⵙ ⵜⴰⵄⵕⴰⴱⵜ)