ⴳ ⵜⵉⵣⵉ ⵏ ⵓⵙⵏⵎⴰⵍⴰ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵙⵏⵜⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵎⵡⴰⵙ 17 ⴱⵕⴰⵢⵕ 2023 ⵙ ⵓⵙⵎⵖⵔ ⵏ ⵡⵓⴷⵎⴰⵡⵏ ⴷ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵍⵎⵖⵔⵉⴱ ⴷ ⵉⵎⵏⴰⴹⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⵙ ⵓⵙⵙⵎⵖⵔ ⵙ ⵜⴷⵔⴰⵡⵉⵏ ⵏⵏⵙⵏ(ⵜ) ⴳ ⵓⵙⴱⵓⵖⵍⵓ ⵏ ⵉⴱⵔⴷⴰⵏ ⵉⵏⴰⵎⵓⵔⵏ ⴷ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ ⴷ ⵓⵙⴷⵓⵙ ⵏ ⵜⵓⵙⵙⵏⴰ ⵏ ⵜⵓⵙⵏⵜ. 

"ⴰⵙⵎⵖⵔ ⵏ ⵚⴹⵉⵚ ⵏ ⵡⵓⴷⵎⴰⵡⵏ ⵉⴽⵙⵡⴰⵜⵏ, ⵙⴳ ⵉⵎⵏⴰⴹⵏ ⵉⵏⴰⵎⵓⵔⵏ ⴷ ⵉⵙⴳⴰⵡⴰⵏⵏ ⵎⵣⴰⵔⴰⵢⵏⵉⵏ ⴳ ⵓⵙⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴳⴰ ⵢⴰⵏ ⵓⵣⵎⵣ ⵏ ⵜⵓⵙⵏⵜ ⴷ ⵓⵙⵙⵉⵎⵖⵓⵔ ⵙ ⵎⴰⴷ ⵙⵎⵏⵉⴷⵏ, ⴰⵔ ⵜ ⵙⵎⵏⵉⴷⵏ ⵙⵓⵍ, ⵉⵏⵎⵖⵓⵔⵏ ⴷ ⵜⵏⵎⵖⵓⵔⵉⵏ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴳ ⵉⵎⵏⴰⴹⵏ ⵉⵏⴰⵎⵓⵔⵏ... ⴰⵣⵎⵣ ⵏ ⵓⵙⵡⵉⵏⴳⵎ ⴳ ⵓⵎⵎⵏⵇⵉ ⵏ ⵉⴱⵔⴷⴰⵏ ⴷ ⵓⵙⵢⵉⵍⵉ ⵏ ⵜⵓⴳⵜ ⵏ ⵜⴷⵔⴰⵡⵉⵏ ⵏ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵓⵎⵎⵏ ⴳ ⵉⴼⵔⵉⵇⵢⴰ ⴷ ⴰⵙⵉⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ, ⴳ ⵓⵙⴱⵓⵖⵍⵓ ⵏ ⵉⵏⴰⵡⴰⵢⵏ ⴷ ⵜⵎⵙⴽⵔⵉⵏ ⴷ ⵜⵎⴰⴳⵍⴰⵢⵉⵏ, ⵙ ⵜⵖⵏⵙⵉⵡⵉⵏ ⵏⵏⵙⵏ(ⵜ) ⴷ ⵜⵏⴼⴽⴰⵢⵉⵏ ⵏⵏⵙⵏ(ⵜ) ⴳ ⵓⵎⵣⴰⵖ ⵅⴼ ⵜⵉⵏⴷⵉⵜⵉⵏ ⴷ ⵉⵎⵏⵣⴰⵢⵏ ⵉⵖⵣⵓⵔⴰⵏⵏ", ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵎⵍⴷⴰ ⵏ ⵓⵙⵎⵖⵔ. 

ⵜⴰⵍⴳⴰⵎⵜ ⵏ ⵡⵓⴷⵎⴰⵡⵏ ⵏⵏⵉ ⵉⵜⵜⵓⵙⵙⵉⵎⵖⵓⵔⵏ ⵙ ⵜⵎⵍⴷⴰ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ : - ⵉⴳⵍⵍⵉⵏ ⵄⴱⴷ ⵍⵇⴰⴷⵔ ⴰⵣⵔⵉⵄ ⴰⵏⴳⵎⴰⵎ ⴰⵎⵣⵡⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴰⵏ ⵏ ⵓⴼⴳⴰⵏ, ⴰⵏⵙⵙⵉⵅⴼ ⵏ ⵓⴼⵔⴷⵉⵙ ⵏ ⵜⵏⴳⵔⵜ ⴷ ⵉⵎⵢⴰⵙⵙⴰⵜⵏ ⴰⴽⴷ ⵓⴱⵕⵍⴰⵎⴰⵏ. ⴰⴱⵕⵍⴰⵎⴰⵏⵉ ⴰⵎⵣⵡⴰⵔ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ. ⵉⴽⴽⴰ ⵎⴰⵙⵙ ⴰⵣⵔⵉⵄ ⵉⴳⴰ ⴰⴳⵎⴰⵎ ⴰⵎⵣⵡⴰⵔ ⴳ ⵓⵙⵉⵔⴰ ⴰⵎⵣⵣⴳⴰⵔ ⵏ ⵜⴽⵓⵏⴼⵉⴷⵉⵕⴰⵍⵉⵜ ⵜⴰⴷⵉⵎⵓⵇⵕⴰⵟⵉⵜ ⵏ ⵜⵡⵓⵔⵉ ⴷ ⵓⴳⵎⴰⵎ ⴳ ⵜⵙⵇⵇⵉⵎ ⵉⵥⵍⵉⵏ ⵙ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵉⵏⵏⵖⵍⴼⵏ ⵙ ⵓⵙⵎⵓⵜⵜⴳ ⵏ ⵜⵓⴳⵔⵉⵡⵜ ⵏ ⵜⵡⵓⵔⵉ. - ⵉⵙⵜⵉⵍⵍⴰ ⴱⴰⵔⵏⵣ ⴷⵉ ⴽⴰⵕⵍⵓⵟⵓ ⵜⴰⵎⵙⵎⵓⵙⵙⵓⵜ ⵜⴰⵕⵊⵓⵏⵜⵉⵏⵉⵜ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵜⵍⵜⴰⵖ ⴳ ⵓⵙⴳⴳⵯⴰⵙ ⵏ 1978 ⴳ ⵜⵎⵙⵎⵓⵏⵜ “ⵉⵙⵜ ⵉⵎⵎⴰ ⵜⵉⵎⵇⵇⵔⴰⵏⵉⵏ ⵏ ⵓⵙⴰⵔⴰⴳ ⵎⴰⵢⵢⵓ”, ⵜⴳⴰ ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⴰⴷ ⵉⵙⵡⵓⵔⵉⵏ ⵅⴼ ⵜⵎⴰⴳⵉⵜ ⵏ ⵡⴰⵣⵣⴰⵏⵏ ⵜⵜⵓⵖⴱⵏⵏⵉⵏ ⴳ ⵓⵙⴳⴳⵯⴰⵙ ⵏ 1989. 

ⵜⵓⵎⵥ ⵜⴰⵙⵎⵖⵓⵔⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴳⴳⵯⴰⵙ ⵏ 2003. - ⴰⵍⴱⵉⵕ ⵙⴰⵙⵓⵏ ⴰⵎⵖⵔⵉⴱⵉ ⴰⵎⵣⵡⴰⵔⵓ ⴰⵎⵙⴰⴷⵓⴼ ⵙⴳ ⵜⵙⴷⴰⵡⵉⵜ ⵏ ⴱⴰⵕⵉⵣ (ⵜⵉⵎⴰⵙⵙⴰⵏⵉⵏ), ⵉⴳⴰ ⴰⵏⴱⴷⴰⴷ ⵏ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⴳ ⵕⵕⴱⴰⵟ ⵉⵏⴳⵔ 1963 ⴷ 1969. ⵉⴷⴷⵔ ⵜⵉⵔⵎⵉⵜ ⴱⴰⵀⵔⴰ ⵉⴳⴰⵏ ⵜⴰⵏⴱⵖⵓⵔⵜ ⴳ ⵍⵢⵓⵏⵉⵙⴽⵓ ⵙⴳ ⵓⵙⴳⴳⵯⴰⵙ ⵏ 1974. ⵏⵜⵜⴰ ⴷ ⵓⵏⴳⵎⴰⵎ ⴰⵎⵙⵔⵙ ⵏ ⵜⴽⴰⴷⵉⵎⵉⵜ ⵏ ⵍⵃⴰⵙⴰⵏ ⵡⵉⵙ ⵙⵉⵏ ⵏ ⵜⵎⴰⵙⵙⴰⵏⵉⵏ ⴷ ⵜⴰⵜⵉⴽⵏⵓⵍⵓⵊⵉⵜ ⴳ ⵍⵎⵖⵔⵉⴱ, ⵉⴳ ⴰⵏⴳⵎⴰⵎ ⴰⵎⵣⵡⴰⵔ ⴳ ⵓⵙⵇⵇⵉⵎ ⴰⵎⵛⵛⵉⵡⵕ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵖⵓⵔⵉⵡⵉⵏ ⵜⵉⵙⵜⵕⴰⵜⵉⵊⵉⵢⵉⵏ, ⴷ ⵓⴳⴳⴰⵔ. - ⵕⴰⵊⵉ ⵚⵚⵓⵕⴰⵏⵉ ⴰⵎⵙⵜⴰⵏ ⴷ ⵓⵎⵖⵏⴰⵙ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⵙⵙⵉⵅⴼ ⴰⵎⵙⵙⵏⵜⵉ ⵉ ⵡⴰⵎⵎⴰⵙ ⴰⴼⴰⵍⴰⵚⵟⵉⵏⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ. 

ⵢⵓⵎⵥ ⵜⴰⵙⵎⵖⵓⵔⵜ ⵏ ⴼ. ⴽⵉⵏⵉⴷⵉ ⵉ ⵉⵣⵔⴼⴰⵏ ⵏ ⵓⴼⴳⴰⵏ. ⵉⴳⴰ ⴰⵏⴳⵎⴰⵎ ⴳ ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ ⵏ ⵉⵏⵣⵔⴰⴼⵏ ⴷ ⵓⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⴼⵉⴷⵉⵕⴰⵍⵉⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵇⵇⵉⵎ ⵏ ⵉⵏⴼⵍⴰⵙ ⵏ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ. - ⵚⵓⵢⴰⵟⴰ ⵎⴰⵢⴳⴰ ⵜⴰⵏⴰⴼⵓⵖⵜ ⵏ ⵜⵉⵏⵎⵍ ⵜⴰⵏⴰⵎⵓⵔⵜ ⵏ ⵜⵏⴱⴹⴰⵢⵜ ⴳ ⴱⴰⵔⵉⵣ, ⴷ ⵜⵉⵏⵎⵍ ⵜⴰⵏⴰⵎⵓⵔⵜ ⵏ ⵜⵎⵙⵙⵓⴳⵓⵔⵜ ⴳ ⴱⴰⵎⴰⴽⵓ, ⵜⴻⵜⵜⵓⵙⵏⵎⵍ ⴰⴷ ⵜⴳ ⵜⴰⵎⴰⵔⵉⵜ ⵏ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ. ⵜⴳ ⵜⴰⵏⵖⵜⴰⵙⵜ ⵜⴰⵎⵥⵍⵉⵜ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴳ ⵉⵔⵉⵇⵢⴰ (2007-2015), ⵜⵙⵙⵉⵅⴼ ⵜⴰⵔⴰⴱⴱⵓⵜ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵉⵎⵣⴷⴰⵖⵏ ⵉⵕⵚⵍⵉⵢⵏ ⴳ ⵉⴼⵔⵉⵇⵢⴰ (2011-2019) ⴷ ⵓⵍⴰ ⵜⴰⵙⵇⵇⵉⵎⵜ ⵏ ⵉⵎⵜⵡⴰⵖⵏ ⵙ ⵙⵙⵉⴷⴰ (2015-2019). - ⵍⴰⵟⵉⴼⴰ ⵊⵊⴱⴰⴱⴷⵉ ⵜⴰⵏⴰⵎⵣⴰⵖⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵖⴰⵔⵜ, ⵜⴰⴳⵎⴰⵎⵜ ⵏ ⵓⵙⵇⵇⵉⵎ ⴰⵎⵛⵛⵉⵡⵕ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴳⵎⴰⵎⵜ ⵏ ⵓⵙⵓⵎⵓ ⴷ ⵓⵎⵙⴼⵔⵓ. 

ⵜⴷⵔⵓ ⴳ ⵓⵙⵔⵓⵙ ⵏ ⵜⵓⴳⵜ ⵏ ⵜⵎⵙⵎⵓⵏⵉⵏ ⵜⵉⵣⵔⴼⴰⵏⵉⵏ, ⴷ ⵜⴳⵎⴰⵎⵜ ⴳ ⵜⵓⴳⵜ ⵏ ⵜⵎⴰⴷⴷⴰⵙⵉⵏ ⵜⵉⵣⵔⴼⴰⵏⵉⵏ. ⵜⴻⵜⵜⵓⵙⵏⵎⵍ ⴰⵙⴳⴳⵯⴰⵙ ⵏ 1998 ⴷ ⵜⵎⵙⵇⴰⴷⵜ ⵏ ⵡⴰⵎⵓⵏ ⵓⵖⵔⵉⵎ ⵖ ⴷⴰⵔ ⵜⵙⵇⵇⵉⵎⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵜⵜⴰ ⵉⵎⵓⵏⵏ, ⵉⵍⵎⵎⴰ ⵜⴰⵎⵣⴷⴰⵢⵜ ⵏ ⵜⵡⴰⴷⴰ ⵜⴰⵎⴰⴹⵍⴰⵏⵜ ⵏ ⵜⵡⵜⵎⵉⵏ ⴳ ⵍⵎⵖⵔⵉⴱ ⴷ ⵓⵎⴰⴹⴰⵍ ⴰⵄⵕⴰⴱ. ⵜⴽⴽⴰ ⵜⴳⴰ ⴰⵡⴷ ⵜⴰⵎⵣⴷⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵙⴳⴳⴷ ⵏ ⵓⵙⵍⴳⵏ ⵏ ⵡⴰⴷⴷⴰⴷⵏ ⵓⴷⵎⴰⵡⴰⵏⵏ ⴰⵙⴳⴳⵯⴰⵙ ⵏ 1992. ⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⴰⵕⵊⵓⵏⵜⵉⵏ (CIPDH-UNESCO), ⴰⵎⴷⵔⴰⵡ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵏⵎⴰⵍⴰ ⵏ ⵓⵙⴳⵔⴰⵡ ⵏ ⵕⵕⴱⴰⵟ, ⴷ ⵓⵎⵙⵙⵓⵜⵉ ⵅⴼ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵍⴰⵕⵊⵓⵏⵜⵉⵏ ⴳ ⵎⴰⵕⵚ ⴷ ⵉⴷⴷⴰⵏ. 

ⵉ ⵓⵙⴽⵜⵉ, ⴷⵔⵓⵏ ⴳ ⵓⵏⵎⵓⵇⵇⴰⵔ ⴰⵎⵣⵡⴰⵔⵓ - ⴰⵙⴳⵔⴰⵡ ⴰⵎⴰⴹⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵓⴳⴳⴰⵔ ⵏ 300 ⵏ ⵜⵎⴷⵔⴰⵡⵉⵏ ⴷ ⵓⵎⴷⵔⴰⵡⵏ ⵏ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⴷⴷⴰⵏ ⵙⴳ 50 ⵏ ⵓⵡⴰⵏⴽ, ⵏⵏⵉ ⵉⵜⵜⵓⵙⵏⵎⴰⵍⴰⵏ ⴳ ⵙⵉⵏ ⵡⵓⵙⵙⴰⵏ, ⵃⵎⴰ ⴰⴷ ⵎⴹⴰⴽⴰⵕⵏ ⵅⴼ ⵜⵎⵙⴰⵔⵉⵏ ⵏ ⵜⵣⵔⴼⵜ ⵏ ⵓⵎⵓⵜⵜⵉ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵎⵣⵡⴰⴳⵜ. ⴷⵔⵓⵏ ⴳⵉⵙ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ, ⵏⵏⵉ ⵔⴰⴷ ⵉⴼⴼⵖ ⵙ ⵉⵙⵖⵍⴰⴼ ⴷ ⵜⵙⵓⵎⵔⵉⵏ ⴷ ⵜⵙⵏⵜⴰⵢⵉⵏ ⵜⵉⵎⵢⴰⴳⴰⵏⵉⵏ ⵕⵡⴰⵏⵉⵏ, ⵔⴰⴷ ⴳⵏ ⵜⴰⴷⴰⵙⵉⵍⵜ ⵏ ⵓⵏⵄⴰⵕ ⴰⴳⵔⴰⵖⵍⴰⵏ ⵉⵜⵜⵓⵙⵎⴰⵢⵏⵓⵏ ⵉⵙⴽⴰⵔⵏ ⵙⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴰⵙⵏⵜⵉ ⴷ ⵓⵎⵔⵏⵓ ⴷ ⵓⵡⵜⵜⴰⵙ, ⵉⵙⵖⵍⴰⴼ ⴰⴷ ⵔⴰⴷ ⵜⵜⵓⵙⵎⵏⵉⴷⵏ ⴳ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵍⴰⵕⵊⵓⵏⵜⵉⵏ.