ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵎⵡⴰⵙ 24 ⵎⴰⵕⵚ 2023, ⵜⴰⴽⵛⵛⵓⵎⵜ ⵏⵏⵙ ⵜⴰⵎⵉⵡⴰⵏⵜ ⵙ ⵜⵎⵍⴷⴰ ⵏ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ 54 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⴰⵜⵉ ⵏ ⵜⵙⵖⵣⵏⵜ ⵏ ⵜⵏⵜⴰⵎⵜ ⵜⴰⵎⴳⴳⴰⵔⵓⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵏⵏⵉ ⵉⵜⵜⵓⴳⴰⵏ ⴳ 8 ⵏⵓⵡⴰⵏⴱⵉⵔ 2022. ⵉⵙⴱⵔⵔⴽ ⵓⵙⵇⵇⵉⵎ, ⵏⵏⵉ ⵉⵜⵜⵓⵙⵎⴷⵢⴰⵏ ⵙ ⵓⵏⴼⵍⵓⵙ ⵏⵏⵙ ⴰⵎⴰⵜⴰⵢ, ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⵙ ⵓⵎⵢⴰⵖ ⵓⵎⵏⵉⴳ ⵏ ⵜⵏⴱⴰⴳⵯⵜ ⵜⴰⵎⵖⵔⵉⴱⵉⵜ ⴰⴽⴷ 232 ⵏ ⵓⵙⵖⵍⴼ ⵏⵏⵉ ⵉⵜⵜⵓⵙⵢⵢⵉⵀⵏ, ⵎⴽⴷⴰ ⵉⵙⵔⵇⴱ ⵜⴰⵏⴱⴰⴹⵜ ⵃⵎⴰ ⴰⴷ ⵜⴰⵍⵙ ⴰⵙⵎⴰⵇⵇⵍ ⴳ ⵓⵎⵏⴰⴷ ⵏⵏⵙ ⵉⵣⴷⵉⵏ ⵙ ⴽⵔⴰ ⵏ ⵉⵙⵖⵍⴰⴼ ⵏⵏⵉ ⵜⵓⴳⵉ ⵙ ⵉⵎⵉⴽ ⵏⵉⵖ ⵇⴰⵃ ⴳ ⵓⵎⵏⵉⴷ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵓⵙⵍⴳⵏ ⴷ ⵜⵎⵙⴽⵔⵜ ⴷ ⵜⵙⵖⵣⵏⵜ ⵏ ⵓⵏⴰⴳⵔⴰⵡ ⵏ ⵕⵓⵎⴰ ⴰⴷⵙⵍⴰⵏ ⵏ ⵜⵙⵏⴱⴹⴰⵢⵜ ⵜⴰⵏⴱⴽⴰⴹⵜ ⵜⴰⴳⵔⴰⵖⵍⴰⵏⵜ ⴷ ⵓⵙⴱⴽⴽⵉⴹ ⵏ ⵓⴽⵓⵙ ⵏ ⵜⵡⴰⵛⵓⵏⵜ ⴷ ⵜⵓⵙⵙⵔⴰ ⵏ ⵓⵙⵢⵉⵡⵍ ⵏ ⵡⴰⵣⵣⴰⵏⵏ ⴷ ⵓⵍⴰ ⴰⵙⵏⴼⵍ ⵏ ⵓⵙⵍⴳⵏ ⵏ ⵜⵡⵊⴰ ⵙ ⵓⵎⵙⴰⵙⴰ ⴰⴽⴷ ⵉⵙⴱⴷⴰⴷⵏ ⵏ ⵓⴷⵓⵙⵜⵓⵔⵏ, ⴷ ⵓⴳⴳⴰⵔ. ⵎⴽⴷⴰ ⵉⵣⵎⵎⴻⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵓⵎⵔⵜ ⵍⵍⵉⵖ ⵜⵙⵢⵢⵉⵀ ⵜⵏⴱⴰⴹⵜ 107 ⵏ ⵉⵙⵖⵍⴰⴼ ⵉⴽⴽⴰ ⵓⵙⵇⵇⵉⵎ ⵉⵙⵓⵎⵔⵜⵏ ⴳ ⵜⴰⵏⴰⴹⵜ ⵏⵏⵙ ⵜⴰⵎⵙⴷⴰⵖⵜ ⵉⵜⵜⵓⵙⵎⵏⵉⴷⵏ ⴳ ⵎⴰⵕⵚ 2022 ⵙ ⵜⵎⵍⴷⴰ ⵏ ⵜⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⴷ ⵎⴰⵙ ⵉⵙⵙⴰⵎⵓ 125 ⵏ ⵉⵙⵖⵍⴰⴼ ⵢⴰⴹⵏⵉⵏ ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⴷ ⵜⵙⴳⵓⵎⴰⵏⵉⵏ ⴷ ⵉⵎⵏⴰⴷⵏ ⵏⵏⵙ ⵏ ⵓⵎⵛⴰⵡⴰⵕ. 

ⵥⵍⵉⵏ ⵉⵙⵖⵍⴰⴼ ⴰⴷ ⵙ ⵓⵥⵍⴰⵢ ⵙ ⵓⵙⴷⵓⵙ ⵏ ⵜⵎⵙⴽⵔⵜ ⵜⴰⵎⵢⴰⵇⵇⴰⵏⵜ ⴷ ⵉⵙⵓⵜⴰⵢ ⵓⵍⴳⵉⵏⵏ ⴷ ⵉⵎⵔⵙⴰⵍⵏ ⴷ ⵉⵙⵜⵔⴰⵜⵉⵊⵉⵢⵏ ⵉⵣⴷⵉⵏ ⵙ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ. ⵥⵍⵉⵏ ⵉⵙⵖⵍⴰⴼ ⴰⴷ (232 ⵏ ⵓⵙⵖⵍⴼ) ⵙ ⵉⵙⴳⵓⵎⵏ ⵏ : ⴰⵎⵢⴰⵖ ⴰⴽⴷ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ ; ⴰⵙⴷⵓⵙ ⵏ ⵓⵙⵎⵙⴰⵙⴰ ⵏ ⵓⵙⴰⵜⵉ ⵓⵍⴳⵉⵏ ⴰⵏⴰⵎⵓⵔ ⴰⴽⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ; ⴰⵙⴳⴳⴷ ⵏ ⵓⵏⴰⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ; ⴰⴼⵔⴰⴳ ⴰⵏⴰⵎⵓⵏ ; ⴰⵙⴷⵓⵙ ⵏ ⵜⵏⴼⵔⵓⵜⵉⵏ ⵉⵣⴷⵉⵏ ⵙ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ; ⴰⵣⴷⴰⵢ ⵏ ⵓⵙⵖⵓⴷⵓ ⵏ ⵓⵙⵓⵔⵙ ⵏ ⵉⵎⵖⵣⵓⵜⵏ ; ⵜⵉⵎⵙⴽⵔⵜ ⵏ ⵜⴷⵔⴼⵉⵏ ⵏ ⵜⵏⵖⵎⴰⵙⵜ ⴷ ⵓⵎⵏⴰⴷ ⴷ ⵓⵡⵏⵏⵉ ⴷ ⵓⵙⴳⴷⵓⴷ ⴷ ⵓⵙⵎⵓⵜⵜⴳ ⵏ ⵜⵎⵙⵎⵓⵏⵉⵏ. ⵎⴽⴷⴰ ⵣⴷⵉⵏ ⵉⵙⵖⵍⴰⴼ ⴰⴷ ⵙ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⵙⵡⵓⵜⵜⵙⵏ ⵜⴰⵏⴽⵔⴰ ⵙ ⵉⵣⵔⴼⴰⵏ ⵉⵏⵙⵎⵉⵍⵏ, ⵣⵓⵏⴷ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵉⵎⵣⵡⴰⴳⵏ, ⴷ ⵜⵎⵙⴰⵔⵉⵏ ⴷ ⵉⵙⴽⵉⵍ ⴷ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⴷⵓⵙ ⵏ ⵓⵙⴰⵜⵉ ⵓⵍⴳⵉⵏ ⴰⵎⵔⵙⴰⵍ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ. 

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵙⵖⵣⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⴷⴳⴳⵯⴰⵜ ⵏ ⵓⵙⵉⵎⵡⴰⵙ 24 ⵎⴰⵕⵚ ⴳ ⵊⵓⵏⵉⴼ, ⵜⴰⵏⴰⴹⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⴽⴽⵓⵥⵜ, ⴳ ⵜⵖⵉⵎⵉⵜ ⵏⵏⵉ ⵜⵙⵙⵉⵅⴼ ⵜⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ 52 ⵏ ⵓⵙⵇⵇⵉⵎ. ⵉⵙⵢⴰⴼⴰ ⵓⵙⵖⵣⵏ ⴰⴷ ⵜⵓⴳⴳⴰⵣ ⵏⵏⵉ ⵏⵏ ⵉⴳⴰ ⵍⵎⵖⵔⵉⴱ ⵅⴼ ⵓⵙⴷⵓⵙ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵢⴰⵖ ⵏⵏⵙ ⵓⵎⵏⵉⴳ ⴰⴽⴷ ⵉⵎⴰⵙⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ. 

ⵉⴼⵓⴽ ⴰⴷ ⵏⵙⵙⵎⵜⵔ ⵎⴰⵙ ⵉⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵙⵎⵏⵉⴷ ⵜⴰⵏⴰⴹⵜ ⵏⵏⵙ ⵜⴰⵎⵙⴷⴰⵖⵜ ⵙ ⵜⵎⵍⴷⴰ ⵏ ⵜⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ, ⵏⵏⵉ ⴳ ⵉⵙⵙⴰⵎⵓ 26 ⵏ ⵓⵙⵖⵍⴼ ⵉ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⴱⴹⴰⵏⵉⵏ ⵅⴼ ⴽⴽⵓⵥ ⵏ ⵉⵙⴳⵓⵎⵏ ⵉⴷⵙⵍⴰⵏⵏ ⵉⵣⴷⵉⵏ ⵙ : ⴰⵙⴷⵓⵙ ⵏ ⵜⵎⵙⴽⵔⵜ ⵜⴰⵎⵢⴰⵇⵇⴰⵏⵜ ⵙ ⵜⵙⵖⵣⵏⵜ ⵏ ⵎⴰⴷ ⵉⵇⴰⵎⴰⵏ ⵙⴳ ⵡⴰⵔⵔⴰⵜⵏ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ; ⴰⵙⴷⵓⵙ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⵃⵎⴰ ⴰⴷ ⵜⵉⵍⵉ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ; ⴰⵙⴱⵓⵖⵍⵓ ⵏ ⵓⵙⴰⵜⵉ ⴰⵎⵔⵙⴰⵍ ⵉⵏⵏⴰⵍⵏ ⴰⵏⴳⵔⴰⵡ ⴰⵏⴰⵎⵓⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ; ⵉⵍⵎⵎⴰ ⴰⵙⴷⵓⵙ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉ ⵜⵏⴼⵔⵓⵜ ⵏ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙ ⵜⵓⵙⵙⵏⴰ ⵏⵏⵙ.