ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ "ⵓⵙⵙⴰⵏ ⵉⵙⴷⴰⵡⴰⵏⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ", ⵏⵏⴰ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵙⵓⵙ-ⵎⴰⵙⵙⵜ ⵙ ⵜⵎⴷⵔⴰⵡⵜ ⴰⴽⴷ ⵜⵙⴷⴰⵡⵉⵜ ⵏ ⵉⴱⵏ ⵣⵓⵀⵔ ⴳ ⵓⴳⴰⴷⵉⵔ ⴷ ⵜⵖⵉⵡⴰⵏⵜ ⵏ ⵜⵓⵜⵍⴰⵢⵉⵏ ⴷ ⵜⵥⵓⵕⵉⵡⵉⵏ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴳ ⴰⵢⵜ ⵎⵍⵍⵓⵍ, ⵙⴳ 7 ⴰⵔ 9 ⵎⴰⵕⵚ 2022. ⵜⴱⵔⵔⵃ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵎⴰⵙ ⵔⴰⴷ ⵙⵏⵎⴰⵍⴰⵏⵜ ⵇⴰⵃ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵏⵎⵓⵇⵇⴰⵔⵏ ⵉⵎⵉⵡⵉⵢⵏ ⵏ ⵓⵎⴹⴰⴽⴰⵕ ⴷ ⵓⵎⴷⵉⵡⵍ ⵅⴼ ⵉⵎⵔⵙⵉ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ, ⴳ ⵓⵣⵎⵣ ⵉⵍⵍⴰⵏ ⵉⵏⴳⵔ ⵎⴰⵕⵚ ⴷ ⵏⵓⵡⴰⵏⴱⵉⵔ 2022, ⴳ ⵓⵙⴰⵜⵉ ⵏ ⵓⵎⵣⵉⵣⵣⵍ ⴰⵙⴳⵯⵙⴰⵏ ⵏⵏⴰ ⵉⵕⵥⵎ ⵓⵙⵇⵇⵉⵎ ⵅⴼ "ⵓⵙⵔⵇⴱ ⵏ ⵉⴳⵏⵙⴰⵙⵏ ⵜⴽⵕⴹⵉ ⵅⴼ ⵓⵙⵙⵉⵡⴹ ⴰⴼⴰⴷ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵔⵡⵍⴰ ⵙⴳ ⵜⵎⵔⵔⵓⵜ".

ⴳ ⵓⵙⴰⵜⵉ ⵏ ⵜⵉⵍⴰⵍ ⵏ ⵡⵓⵙⵙⴰⵏ ⴰⴷ ⵉⵙⴷⴰⵡⴰⵏⵏ, ⵜⴼⴽⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵢⴰⵜ ⵜⵉⵏⴰⵡⵜ ⵏ ⵓⵏⵏⵓⵕⵥ ⵅⴼ ⵉⵎⵔⵙⵉ "ⵜⵉⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ... ⴰⵙⴰⵢⵔⴰⵔ ⴰⵙⴷⴰⵡⴰⵏ ⵙ ⵓⵎⴷⵢⴰ", ⵜⵙⵙⵏⵜⵉ ⵜⵜ ⵙ ⵓⵙⵎⵏⵉⴷ ⵏ ⵉⵙⵏⵎⴽⵜⴰⵜⵏ ⵏ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵏ ⵓⵙⵖⵉⵡⵙ ⵏⵏⴰ ⴷ ⵢⵓⵡⵉⵏ ⵎⴰⵙ 46 ⵏ ⵜⴳⵎⵉⴹⵉ ⵏ ⵜⵡⵜⵎⵉⵏ ⴳ ⵓⵙⴰⵢⵔⴰⵔ ⴰⵡⵊⴰⵡⴰⵏ ⵜⵜⵓⴳⴰ ⴰⵙⵏⵜ ⵜⴽⵕⴹⵉ ⵙ ⵜⵓⴳⵜ ⵡⴰⵏⴰⵡⵏ ⵏⵏⵙ, ⴳ ⵜⴰⵎⵓ ⴰⵡⴷ ⵜⴽⵕⴹⵉ ⵜⴰⵡⵙⵢⴰⵏⵜ, ⴷ ⵓⴳⴳⴰⵔ ⵏ 5 ⵏ ⵉⴷ ⵎⵍⵢⵓⵏ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⴷ ⵓⴳⴳⴰⵔ ⵏ 22 ⵏ ⵜⴳⵎⵉⴹⵉ ⵏ ⵜⵎⵃⴹⴰⵕⵉⵏ ⴷ ⵜⵔⴱⴰⵜⵉⵏ ⴳ ⵉⵙⴰⵢⵔⴰⵔⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴳ ⴰⵎⵓⵏ ⴰⵡⴷ ⵉⵙⴰⵢⵔⴰⵔⵏ ⵉⵙⴷⴰⵡⴰⵏⵏ, ⵜⴻⵜⵜⵓⴳⴰ ⴰⵙⵏⵜ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ.

ⴳ ⵓⵙⵉⵡⵍ ⵏⵏⵙ ⵅⴼ ⵜⵉⵍⴰⵍⵜ ⵜⴰⵎⵇⵇⵔⴰⵏⵜ ⵏ ⵜⵙⴷⴰⵡⵉⵜ ⴳ ⵜⵏⴰⴼⵓⵜ ⵏ ⵡⴰⵎⵓⵏ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⴳⴰ "ⵜⴷⵔⴰⵡⵜ ⵏ ⵜⵙⴷⴰⵡⵉⵜ ⴳ ⵓⵎⴹⴰⴽⴰⵕ ⵅⴼ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⵏⵏⴰ ⵉⴳⴰⵏ ⵢⴰⵏ ⵓⴳⵣⵣⵓⵎ ⵓⵔ ⵢⴰⵟⵟⵓⵏ ⴰⴽⴷ ⵜⵎⵙⵜⴳⴳⴰⵔⵜ ⵏⵏⵙ ⵜⴰⵏⴰⵎⵓⵏⵜ, ⵏⵏⴰ ⵉⵜⵜⵓⵙⵡⵓⵜⵜⴰⵏ ⴳ ⵜⵉⵍⵍⴰⵡⵜ ⵙⴳ ⵜⵣⵎⵔⵜ ⵏⵏⵙ ⵅⴼ ⵉⴳⵉ ⵏ ⵢⴰⵜ ⵜⵡⵓⵔⵉ ⵜⵉⵙⵙ ⴽⵕⴰⴹⵜ, ⵙ ⵜⵔⵏⴰⵡⵜ ⵉ ⵜⵡⵓⵔⵉⵡⵉⵏ ⵏⵏⵙ ⵜⵉⵎⵇⵇⵔⴰⵏⵉⵏ, ⴰⵙⵍⵎⴷ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵜⵜ ⵉⴳⴰⵏ ⴷ ⵜⵏⴰⴼⵓⵜ ⵏ ⵡⴰⵎⵓⵏ, ⵏⵏⴰ ⵏⵏ ⵏⵜⵜⴰⴼⴰ ⴰⵏⴰⵎⴽ ⵏⵏⵙ ⴰⵏⵖⴱⵓ ⴳ ⵜⴷⵔⴰⵡⵜ ⴳ ⵓⵙⴽⵓ ⵏ ⵡⴰⵎⵓⵏ ⵏ ⵜⵓⵙⵙⵏⴰ, ⴰⵙⵎⵓⵜⵜⴳ ⵏ ⵜⵙⵓⴳⴰⵔ, ⴰⵙⴽⵓ ⵏ ⵜⵓⵙⵙⵏⴰ ⵏ ⵜⵎⵓⵔⵉ, ⵜⴰⵎⵓⵏⵜ ⴰⴽⴷ ⵉⵙⵏⴼⵍⵏ ⵏ ⵜⵉⵏⴷⵉⵜⵉⵏ ⵙ ⵉⵔⵣⵣⵓⵜⵏ ⴷ ⵜⵣⵔⴰⵡⵉⵏ ⵅⴼ ⵜⴰⵎⵓⵏⵜ ⴷ ⵓⵎⵢⴰⵡⴰⵙ ⵉ ⵡⴰⵎⵓⵏ ⴳ ⵓⵎⵢⴰⵖ ⴷⵉⴷⵙ ⵙ ⵜⵡⵉⵍⴰ ⵜⵓⵎⵏⵉⴳⵜ, ⵙ ⵓⴹⴼⴼⵓⵕ ⵏ ⵜⵉⵏⴷⵉⵜⵉⵏ ⵏ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵡⵏⴳⵉⵎⵉⵏ ⴷ ⵜⵎⵙⴽⵔⵉⵏ ⴷ ⵓⵏⵎⴰⵍⴰⵏ".

ⵜⵙⴷⴷⵉⴷ ⵎⴰⵙ ⴷⴰ ⵜⵜⴰⴷⵊⴰ ⵜⵉⵍⴰⵍⵜ ⴰⴷ ⵜⴰⵙⴷⴰⵡⵉⵜ ⴰⴷ ⵜⴳ ⵜⴰⵎⴷⴷⴰⴽⴽⵯⵍⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵉⵖ ⴰⴽⴽⵯ ⴰⵙⵎⵓⵏ ⴰⵙⵜⵕⴰⵜⵉⵊⵉ ⵏ ⵉⵏⵎⵣⴰⵖⵏ ⵅⴼ ⵉⵣⵔⴼⴰⵏ ⴷ ⵜⴷⵔⴼⵉⵏ, ⵓⵔ ⴷ ⵅⵙ ⴰⵎⵛⵛⵔⴽ. ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵢⴰⵖⵓⵍ ⴷⴰ ⵉⵙⵇⵙⴰ ⵓⵣⵣⵉⴳⵣ ⵏ ⵜⵎⵓⵛⴰ ⵜⵉⴳⴷⵓⴷⴰⵏⵉⵏ ⵅⴼ ⵡⴰⴷⴷⴰⴷⵏ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴳ ⵓⵙⴰⵢⵔⴰⵔ ⴰⵙⴷⴰⵡⴰⵏ ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵡⴰⵔ ⵉⵎⵔⵙⴰⵍⵏ ⵅⴼ ⵓⵙⴱⴷⴷⵉ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ, ⵉⴷⴷⵖ "ⴷⴰ ⵉⵛⴰⵛⴽⴰ, ⴰⵔ ⵉⵕⵥⵥⴰ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵜⵡⵜⵎⵉⵏ ⴳ ⵓⵙⵍⵎⴷ, ⴳ ⵜⵓⵙⵙⵏⴰ, ⴳ ⵜⴷⵓⵙⵉ, ⴳ ⵜⵡⵓⵔⵉ, ⵉⴳ ⵢⴰⵏ ⵙⴳ ⵜⵢⴰⴼⵓⵜⵉⵏ ⵜⴰⵔⵓⵙⵔⵉⴷⵉⵏ ⵏⵏⴰ ⵉⵙⴱⵉⴹⵉⵕⵏ ⴰⵣⵔⴼ ⴳ ⵜⴷⵔⴰⵡⵜ".

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⴰⵎⵓⵏ ⵡⵓⵙⵙⴰⵏ ⴰⴷ ⵉⵙⴷⴰⵡⴰⵏⵏ ⵉⵎⵣⵡⵓⵔⴰ, ⵏⵏⴰ ⵉⵜⵜⵡⴰⵥⵍⴰⵢⵏ ⵙ ⵉⵎⵔⵙⵉ ⵏ "ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ", ⴳ ⵓⵙⴰⵜⵉ ⵏ ⵓⵙⵎⵀⵍ ⵏ ⵓⵖⴰⵡⴰⵙ ⴰⵙⴳⵯⵙⴰⵏ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵙⵓⵙ-ⵎⴰⵙⵙⵜ, ⵙⵡⵓⵜⵜⵙⵏ ⵜⴰⵥⵕⵉⴳⵜ ⴷ ⵓⵙⴷⵓⵙ ⵏ ⵜⵓⵙⵙⵏⴰ ⴷ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴰⵢⵔⴰⵔ ⴰⵙⴷⴰⵡⴰⵏ, ⴷ ⵓⵍⴰ ⴰⵙⵔⵇⴱ ⵏ ⵓⵙⵔⵓⵙ ⵏ ⵜⵓⵙⴽⵉⵡⵉⵏ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵔⵇⴱ ⵅⴼ ⵓⵙⵔⵓⵙ ⵏ ⵉⵙⴳⵔⴰⵡⵏ ⵏ ⵉⵎⵃⴹⴰⵕⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.