ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⵥⴹⴰⵕ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵓⵙⵡⵓⴷⴷⵓ ⴰⵏⵉⵎⴰⵏ ⴳ ⵜⵙⴷⴰⵡⵉⵜ ⵜⴰⵎⵖⵔⵉⴱⵉⵜ ⴰⴷ ⵉⵙⴱⴷⴷ ⵉⴱⴽⴽⵉⴹⵏ ⵏ ⵓⵥⵍⵍⴻⵍ ⴷ ⵜⴷⴱⴰⵔⵜ ⵜⴰⵡⵙⵢⴰⵏⵜ, ⴰⴼⴰⴷ ⴰⴷ ⵓⵔ ⵜⴻⵜⵜⵓⵙⵏⴼⵍ ⵜⵙⴷⴰⵡⵉⵜ ⵙⴳ ⵓⵙⴰⵢⵔⴰⵔ ⵏ ⵜⵎⴰⵙⵙⴰⵏⵜ ⴷ ⵜⵓⵙⵙⵏⴰ ⵙ ⵓⵙⴰⵢⵔⴰⵔ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ ⴷ ⵜⵙⴱⴱⴰⴱⵜ ⵙ ⵉⵡⴷⴰⵏ. ⵜⵙⵙⴼⴰⵡ ⴳ ⵜⴳⵓⵔⵉ ⵏⵏⵙ, ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴰⵏⵎⵏⴰⴹ ⵏⵏⴰ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⴳ ⵜⴳⵎⵎⵉ ⵜⵓⵎⵍⵉⵍⵜ-ⵙⵟⵟⴰⵜ, ⵙ ⵜⵎⴷⵔⴰⵡⵜ ⴰⴽⴷ ⵜⵙⴷⴰⵡⵉⵜ ⵍⵃⴰⵙⴰⵏ ⵡⵉⵙ ⵙⵉⵏ ⵅⴼ ⵉⵎⵔⵙⵉ "ⵜⴰⴷⴱⴰⵔⵜ ⵜⴰⵡⵙⵢⴰⵏⵜ: ⵉⵡⵜⵜⴰ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ" ⴳ 28 ⵎⴰⵕⵚ 2022, ⵎⴰⵙ ⵜⴳⴰ ⵜⴷⴱⴰⵔⵜ ⵜⴰⵡⵙⵢⴰⵏⵜ "ⴰⵙⴷⵉⴷⴷⵉⵢ ⵉⵏⵇⵇⴰⵏ ⵜⵉⵔⴰⵜ, ⵍⵓⵎⴰⵕ ⴳ ⵓⵙⴰⵜⵉ ⵏ ⵓⵎⵢⴰⵙⵙⴰ ⴰⵎⵙⵏⵙⵍ ⴰⵎⵣⴰⵎⵓⴳ ⵓⵔ ⵉⵏⴳⴳⴰⴷⴷⴰⵏ". ⵜⵖⵔ ⵉ ⵜⵙⴷⴰⵡⵉⵏ ⵜⵉⵎⵖⵔⵉⴱⵉⵢⵉⵏ ⴰⴷ ⵙⵙⴼⴰⵡⵏⵜ ⴰⵙⴳⵓⵏⴼ ⵉⵜⵜⵓⵙⵎⴰⵢⵏⵓⵏ ⴷ ⵜⵣⵎⵎⴰⵔ ⵜⵉⵎⵣⵡⴰⵔ ⵉ ⵜⵎⵙⴽⵔⵜ ⵏ ⵜⵎⵙⵜⴳⴳⴰⵔⵜ ⵏⵏⵙⵏⵜ ⵜⴰⵏⴰⵎⵓⵏⵜ ⴳ ⵓⵣⵎⵣ ⵏ ⵓⴽⵛⵛⵓⵎ ⵏⵏⵙⵏⵜ ⴳ ⵓⵙⵎⴽⵍ ⵏ ⵜⵎⵙⴰⵔⵉⵏ ⵏ ⵜⵡⵏⵏⴰⴹⵜ ⵏⵏⵙⵏⵜ ⵜⴰⵏⴰⵎⵓⵏⵜ. ⴳ ⵓⵙⵉⵡⵍ ⵏⵏⵙ ⵅⴼ ⵜⵓⴳⴳⴰⵙ ⵏ ⵓⵙⵇⵇⵉⵎ ⴳ ⵓⵙⴱⴷⴷⵉ ⵏ ⵜⵓⵎⴰⵏⵜ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⵏⵏⴰ ⵉⴳⴰⵏ ⵜⵉⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴱⴷⴷⵏⵉⵏ ⵅⴼ ⵡⴰⵏⴰⵡ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵎⵣⵉⵣⵣⵍ ⴰⵏⴰⵎⵓⵔ ⵏⵏⴰ ⵉⵕⵥⵎ ⵓⵙⵇⵇⵉⵎ ⴳ ⵏⵓⵡⴰⵏⴱⵉⵔ 2021 ⴰⵔ ⵏⵓⵡⴰⵏⴱⵉⵔ 2022, ⵏⵏⴰ ⵉⵥⵓⵥⴹⵏ ⴰⵙⵔⵇⴱ ⵏ ⵓⵏⴳⵉⵙⵏ ⵏ ⵜⴽⵕⴹⵉ, ⵙ ⵡⴰⵏⴰⵡ ⵏⵏⵙ ⵇⴰⵃ, ⵅⴼ ⵓⵙⵙⵉⵡⴹ ⵏⵏⴰ ⵉⴳⴰⵏ ⵢⴰⵏ ⵉⵎⵉⵙ ⵉⵕⵡⴰⵏ ⵏ ⵓⵙⵎⵓⵙⵙⵓ ⵏ ⵡⴰⵎⵓⵏ ⵅⴼ ⵓⵙⴱⴷⴷⵉ ⵏ ⵜⴽⵕⴹⵉ ⴷ ⵓⵥⵍⵍⴻⵍ ⴷ ⵜⴷⴱⴰⵔⵜ, ⵎⴽⴷⴰ ⵉⵜⵜⴰⵡⵙ ⴳ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⴷ ⵓⵙⵡⵓⵔⵉ ⵅⴼ ⵜⵓⵎⴰⵏⵜ ⵏ ⵜⴽⵕⴹⵉ ⵙ ⵜⴷⵖⵔⵉⵜ ⵉⵜⵜⵓⵙⵓⵖⵏⵏ ⴷ ⵉⵜⵜⵓⵙⵙⵓⵜⵔⵏ. ⵜⵔⵏⵓ ⵎⴰⵙ ⵉⵙⵡⵓⵜⵜⵙ ⵓⵙⵇⵇⵉⵎ ⵙⴳ ⵓⵎⵣⵉⵣⵣⵍ ⴰⵏⴰⵎⵓⵔ "ⴰⵙⴷⴷⵉⴷ ⵅⴼ ⵡⴰⵔ ⵜⵔⵡⵍⴰ ⵙⴳ ⵜⵎⵔⵔⵓⵜ, ⴷ ⵜⵏⴽⵔⴰ ⵙ ⵓⵙⴰⵜⵉ ⴰⵏⴱⴽⴰⴹ ⵏ ⵇⴰⵃ ⵡⴰⵏⴰⵡⵏ ⵏ ⵜⴽⵕⴹⵉ, ⴰⴼⴰⴷ ⴰⴷ ⵓⵔ ⵉⵎⵙⴰⵙⴰ ⵡⴰⵎⵓⵏ ⴰⴽⴷ ⵉⴱⴽⴽⵉⴹⵏ ⴰⴷ, ⵙ ⵓⵙⵓⵖⵏ ⵏ ⵓⵙⵎⵀⵍ ⵏ ⵉⵍⵓⴳⵏⵏ ⵓⵍⴳⵉⵏⵏ ⴰⵎ ⵉⵎⵉⵙ ⴰⵖⵔⵎⴰⵏ ⵏ ⵓⵣⵓⵛⵛⵍ ⵏ ⵓⵎⵢⴰⵙ ⴰⴳⵯⵏⵙ ⵏ ⵡⴰⵎⵓⵏ ⴷ ⵓⴼⵔⴰⴳ ⵏ ⵜⵡⵜⵎⵉⵏ ⵏⵏⵙ ⴷ ⵜⵔⴱⴰⵜⵉⵏ ⵏⵏⵙ ⵙⴳ ⵜⵕⵥⵉ ⵛⵇⵇⴰⵏⵉⵏ". ⵜⵍⵖⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵓⵙⴳⵔⴰⵡ ⴰⴷ ⴰⵏⵎⵏⴰⴹ ⵢⴰⵜ ⵜⵙⴷⴷⵉⵜ ⵙⴳ ⵜⵙⴷⴷⵉⵜⵉⵏ ⵏ ⵉⵙⴳⵔⴰⵡⵏ ⵉⵏⵎⵏⴰⴹⵏ ⵏⵏⴰ ⵔⴰⴷ ⵙⵏⵎⴰⵍⴰⵏⵜ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵙ ⵜⵎⴷⵔⴰⵡⵜ ⵏ ⵜⵙⴷⴰⵡⵉⵜ ⵜⴰⵎⵖⵔⵉⴱⵉⵜ ⴰⵔ ⴰⵢⵢⵓⵔ ⵏ ⵏⵓⵡⵏⴱⵉⵔ 2022, ⵏⵏⴰ ⵔⴰⴷ ⵉⵙⵎⴷ ⵙ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⵢⴰⵏ ⵓⴷⵡⴰⵍ ⴰⵏⴰⵎⵓⵔ ⵙ ⵓⵙⵓⵍⴼ ⵏ ⵓⵎⵣⵉⵣⵣⵍ ⴰⴳⵔⴰⵖⵍⴰⵏ, ⵔⴰⴷ ⵙⵔⵙ ⵉⵙⵎⴷ ⴰⵎⵣⵉⵣⵣⵍ ⵏⵏⵙ ⴰⵏⴰⵎⵓⵔ ⵏ ⵓⵙⵔⵇⴱ ⵏ ⵓⵏⴳⵉⵙⵏ ⵏ ⵜⴽⵕⴹⵉ ⵅⴼ ⵓⵙⵙⵉⵡⴹ ⴷ ⵓⵙⵔⵇⴱ ⵅⴼ ⵓⵙⴱⴷⴷⵉ ⵏ ⵜⵔⵡⵍⴰ ⵙⴳ ⵜⵎⵔⵔⵓⵜ. ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵓⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵙⴷⴰⵡⵉⵜ ⵍⵃⴰⵙⴰⵏ ⵡⵉⵙ ⵙⵉⵏ, ⵎⴰⵙⵙ ⵎⵓⵃⵎⵎⴰⴷ ⵟⵟⴰⵍⴱⵉ, ⵎⴰⵙ ⵜⴷⵔⵓ ⵜⵙⴷⴰⵡⵉⵜ ⴳ ⵓⵙⴰⵡⵔ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵎⵖⴰⵔⵜ ⵙ ⵇⴰⵃ ⵡⴰⵏⴰⵡⵏ ⵏⵏⵙ ⴳ ⵓⵙⴰⵢⵔⴰⵔ ⴰⵙⴷⴰⵡⴰⵏ, ⵉⴷⴷⵖ ⵜⴳⴰ ⵜⴰⵙⵓⵔⵉⴼⵜ ⵜⴰⴽⵙⵡⴰⵜ ⵉⵜⵜⴰⵡⵉⵏ ⵖⵔ ⵓⵙⵕⵚⵚⴰ ⵏ ⵢⴰⵏ ⵓⵙⴰⵢⵔⴰⵔ ⴰⵙⴷⴰⵡⴰⵏ ⵉⵜⵜⵓⵚⴽⴰⵏ ⵅⴼ ⵉⵙⴽⵉⵍ ⴷ ⵓⵡⵇⵇⵔ ⵉⵜⵜⵓⵙⵏⴼⵍⵏ ⵉⵏⴳⵔ ⵡⴰⵏⴰⵡⵏ ⵙ ⵙⵉⵏ, ⵙ ⵎⴰⴷ ⵉⵙⵙⵓⴳⵓⵔⵏ ⵉⵣⵔⴼⴰⵏ ⵏ ⵜⵎⵖⴰⵔⵜ, ⵉⵙⴷⵓⵙ ⵜⴰⴷⵔⴰⵡⵜ ⵏⵏⵙ ⵉⵙⵎⴷⵏ ⴷ ⵜⴰⴷ ⵉⵕⵡⴰⵏ ⴳ ⵉⵎⵙⴷⴷⵉ ⵏ ⵜⴳⵎⵉ. ⴰⴼⴰⴷ ⴰⴷ ⵉⵜⵜⵡⴰⵍⴽⴰⵎ ⵓⵡⵜⵜⴰⵙ ⴰⴷ, ⵜⵙⵙⵏⵜⵉ ⵜⵙⴷⴰⵡⵉⵜ, ⴰⴷ ⵉⵔⵏⴰ, ⵙ ⵓⵙⵔⵓⵙ ⵏ ⵜⵏⵜⵜⴰⵎⵜ ⵣⴷⵉⵏⵉⵏ ⵙ ⵜⵖⴰⵔⵉⵡⵉⵏ ⴷ ⵜⵖⵔⴰⵙⵜ ⵉ ⵉⵡⵉⵣ ⵅⴼ ⵓⵙⴼⵔⴽ ⴷ ⵓⵎⴷⴰⵢ ⴷ ⵓⴹⴼⴼⵓⵕ ⵏ ⴽⵔⴰⵢⴳⴰⵜ ⵜⵎⵙⴽⵔⵜ ⵣⵎⵔⵏⵉⵏ ⴰⴷ ⵉⵟⵟⴰⵚ ⴰⵏⴰⴳⵔⴰⵡ ⴰⵙⴷⴰⵡⴰⵏ ⵙ ⵓⵎⵙⴰⴷⴰⵖ ⴰⴽⴷ ⵓⵙⵔⵓⵙ ⵏ "ⵜⵙⵇⵇⵉⵎⵜ ⵏ ⵜⵎⵣⵣⴳⵏⵜ ⴷ ⵉⵙⴽⵉⵍ" ⴷ "ⵜⵙⵇⵇⵉⵎⵜ ⵏ ⵓⵙⵉⴷⴼ ⴷ ⵜⴷⵔⴰⵡⵜ ⵜⴰⵙⴷⴰⵡⴰⵏⵜ".