ⵜⵓⵍⵍⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵙ ⵜⵡⵏⴳⵉⵎⵜ “ⴰⵖⴰⵡⴰⵙ ⵏ ⵜⵙⴷⴰⵡⵉⵜ ⴳ ⵉⵖⵣⵓⵜⵏ”, ⵏⵏⴰ ⵜⵙⵏⵎⴰⵍⴰ ⵜⵙⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ, ⵉⴷⴷⵖ ⵜⵟⵟⴰⴼ ⴽⵉⴳⴰⵏ ⵏ ⵉⵏⵓⵎⴰⴽ ⵏ ⵓⵔⵣⵣⵓ ⴷ ⵓⵎⴹⴰⴽⴰⵕ ⴷ ⵓⵎⵙⴰⵡⴰⵍ ⵏⵏⵉ ⵉⵙⴽⵔⵏ ⵙⴳ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ, ⵙⴳ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ, ⵉⵙⵇⵇⵉⵎⵏ ⵏ ⵓⵎⴹⴰⴽⴰⵕ ⴷ ⵓⵙⵡⵉⵏⴳⵎ ⵓⵔ ⴷ ⵅⵙ ⴰⵙⴳⵓⵎ ⵏ ⵓⵔⵣⵣⵓ ⴷ ⵓⵙⵉⵔⵎ, ⵙⴽⵔⵏⵜ ⵙⴳ ⵜⵎⴳⴳⵓⵣⵉⵏ ⴷ ⵉⵎⴳⴳⵓⵣⵏ ⵏ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ ⵉⵎⴳⴳⴰⵢⵏ ⴳ ⵓⵎⵙⴰⵡⴰⵍ ⴷ ⵓⵎⵢⴰⵖ ⴷ ⵜⵓⴽⴽⵉ ⵏ ⵓⵎⵏⴰⴷ ⴷ ⵓⵎⵏⴰⴷ ⴰⵏⵎⴳⴰⵍ ⴰⴽⴷ ⵉⵎⴷⵔⴰⵡⵏ ⵢⴰⴹⵏⵉⵏ ⴷ ⵉⵎⵉⵏⴰⵡⵏ ⵙⴳ ⴱⵕⵕⴰ ⵏ ⵓⵙⵢⵔⴰⵔ ⴰⵎⵖⵣⵓ. ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵜⴳⵓⵔⵉ ⵏⵏⴰ ⵉⴼⴽⴰ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ, ⵙ ⵜⵎⵍⴷⴰ ⵏ ⵜⵙⴷⴰⵡⵉⵜ ⵏ ⵓⵎⵡⴰⵏ ⵉⵜⵜⵓⵙⵏⵎⴰⵍⴰⵏ ⴳ 21 ⵛⵓⵜⴰⵏⴱⵉⵔ 2022 ⴳ ⵓⵖⵣⵓ ⴰⴷⵖⵔⴰⵏ ⴳ ⵙⵍⴰ, ⵅⴼ ⵉⵎⵔⵙⵉ: “ⴰⵙⴷⵓⵙ ⵏ ⵜⴷⵔⴰⵡⵜ ⵏ ⵡⴰⵎⵓⵏ ⵓⵖⵔⵉⵎ ⴳ ⵓⵙⵖⵔⵜ ⵏ ⵉⵎⵖⵣⵓⵜⵏ ⵉ ⵡⴰⵍⴰⵙ ⵏ ⵓⵙⵉⴷⴼ ⵏⵏⵙⵏ ⴷ ⵡⴰⵔⴰⵢ ⵙⴳ ⵓⵡⵔⵔⵉ”, ⵎⴰⵙ “ⵉⵍⵍⴰ ⵓⵣⴷⴰⵢ ⵓⵙⵔⵉⴷ ⵏ ⵇⴰⵃ ⵜⵎⵙⴰⵔⵉⵏ ⵏⵏⴰ ⵅⴼ ⴷ ⵓⵡⵉⵏⵜ ⵜⵙⵓⵜⴰⵍ ⵣⵔⵉⵏⵉⵏ ⵏ ⵜⵙⴷⴰⵡⵉⵜ ⵙ ⵓⵖⵣⵓ ⴷ ⵉⵎⵖⵣⵓⵜⵏ”, ⵜⵙⴷⴷⵉⴷ ⵎⴰⵙ ⵜⴳⴰ “ⵜⴷⵔⴰⵡⵜ ⵏⵏⵉ ⵉⴳⴰⵏ ⴰⵎⵏⵣⴰⵢ ⴰⵍⴳⴷⵉⵙ ⴳ ⵓⵙⵡⵓⴷⴷⵓ ⴰⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴳ ⴰⵥⵖⵓⵕⴰⵏ ⴳ ⵡⴰⵔⵔⴰⵜⵏ ⵉⴳⵔⴰⵖⵍⴰⵏⵏ ⴷ ⵓⴷⵓⵙⵜⵓⵔ ⴰⵎⵖⵔⵉⴱⵉ.” ⴰⵔ ⵜⵜⴰⵏⵏⴰⵢ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⵓⵙⵜⴰⵢ ⵏ ⵓⵙⴳⵓⵎ ⵏ ⵡⴰⵔⴰⵢ ⵙⴳ ⵓⵡⵔⵔⵉ ⵙ ⵓⴱⴽⴽⵉⴹ ⵃⵎⴰ ⴰⴷ ⵉⴳ ⴰⵙⴳⵓⵎ ⵙⴳ ⵉⵙⴳⵓⵎⵏ ⵏ ⵜⵙⴷⴰⵡⵉⵜ ⴰⴷ ⵜⴰⴷⵔⴰⵡⵜ ⵙ ⵜⵉⴷⵜ ⴳ ⵓⵎⴹⴰⴽⴰⵕ ⵉ ⵓⵔⵎⴰⵙ ⵏ ⵜⵓⵎⴰⵏⵜ ⴰⴷ, ⵍⵓⵎⵎⵏ ⵍⵍⵉⵖ ⵜⵜⵙⵡⵓⵜⵜⴰ ⴱⴰⵀⵔⴰ ⵜⵎⵖⵓⵏⵜ ⵏ ⵓⵔⵣⵣⵓ ⴰⵎⴰⵙⵙⴰⵏ ⵏ ⵓⴱⴰⵔⴰⵣ ⴳ ⵢⵉⴳⵔ ⴰⴷ, ⵎⴰⵢⴰ ⵏⵏ ⴰⴷ ⵉⵜⵜⴰⵏⴼⵏ ⴰⵙⴰⵢⵔⴰⵔ ⵉ ⵉⴱⴹⵉⵢⵏ ⵢⵓⵊⴷⵏ ⵓⵔ ⵉⵙⴽⴰⵔⵏ ⵙ ⵜⴽⵔⵙⵉ ⵏ ⵜⵓⵎⴰⵏⵜ ⵜⴰⵏⴱⴽⴰⴹⵜ ⵙ ⵓⵎⴰⵜⴰ ⴷ ⵉⵎⵓⵖⵍⵏ ⵏⵏⵙ ⴷ ⵜⵎⵏⵜⵉⵍⵉⵏ ⵏⵏⵙ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⵉⵎⴰⵏⵉⵏ ⴷ ⵜⵡⵏⴳⵉⵎⵉⵏ ⴳ ⵉⵜⵙⵏⵜ ⵜⵡⴰⵍ. ⵜⵔⵏⵓ ⵎⴰⵙ ⵓⵔ ⵉⵟⵟⴰⴼ ⵍⵎⵖⵔⵉⴱ ⴰⵡⴷ ⵢⴰⵏ ⵉⵎⵉⵙ ⵉⵜⵜⵓⵙⵎⴰⴳⵍⵏ ⵙ ⵓⵙⴼⵙⵉ ⵏ ⵜⵓⵎⴰⵏⵜ ⵜⴰⵏⴱⴽⴰⴹⵜ, ⴰⴱⵍⴰ ⵉⵙⵏⵎⴽⵜⴰⵜⵏ ⵏⵏⴰ ⴷ ⵙⵙⵓⴼⵓⵖⵏⵜ ⵜⵎⵔⵙⴰⵍ ⵏ ⵓⵙⵎⵀⵍ ⵏ ⵓⵙⵍⴳⵏ, ⴷ ⴳ ⴽⵔⴰ ⵏ ⵜⵡⴰⵍ ⵙⴳ ⵜⵖⵓⵔⵉⵡⵉⵏ ⵣⴷⵉⵏⵉⵏ ⵙ ⵜⵡⵉⵍⴰ ⵏ ⵜⵎⵔⵙⵍⵜ ⴷ ⵉⵙⵙⴰⴼⵖⵏ ⵓⵟⵟⵓⵏⵏ. ⴳ ⵓⵙⴰⵜⵉ ⴰⴷ, ⵜⵙⵎⴰⵢⵏⵓ ⵎⴰⵙⵙⴰ ⴱⵓⵄⵢⵢⴰⵛ ⵜⴰⵖⵓⵔⵉ ⵏ ⵓⵙⵇⵇⵉⵎ ⵙ ⵜⵏⴱⴰⴹⵜ ⵜⴰⵎⵣⵣⴳⴰⵔⵜ ⵙ ⵓⵙⵔⵓⵙ ⵏ “ⵓⵙⴰⴹⴰⴼ ⴰⵏⴰⵎⵓⵔ ⵏ ⵓⴱⴽⴽⴹ” ⵃⵎⴰ ⴰⴷ ⵉⴳ ⵜⵉⵙⵎⵉⴳⴰⵍ ⵏⵏⵙ, ⵜⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵡⴰⵎⵓⵏ ⵓⵖⵔⵉⵎ ⴳ ⵓⵙⵖⵔⵜ ⵏ ⵉⵎⵖⵣⵓⵜⵏ ⵅⴼ ⵡⴰⵍⴰⵙ ⵏ ⵓⵙⵉⴷⴼ ⵏⵏⵙⵏ, ⴳ ⵓⵎⵏⵉⴷ ⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⵢⴰⴹⵏⵉⵏ, ⵅⴼ ⵎⴰⴷ ⵉⵙⴳⵓⴷⵉ ⴳ ⵜⵉⵔⵎⵉⵜ ⴳ ⵢⵉⴳⵔⴰⵏ ⵉⵣⵔⴼⴰⵏⵏ ⴷ ⵉⵏⴰⵎⵓⵏⵏ ⴷ ⵉⵏⴳⵎⵓⵜⵏ, ⵜⵙⵙⴽⵜⵉ ⴳ ⵓⵎⵏⴰⴹ ⴰⴷ ⵏⵉⵜ ⵙ ⵓⵙⵖⵍⴼ ⵏ ⵓⵙⵇⵇⵉⵎ ⴳ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵏ 2021 ⵏⵏⵉ ⵉⵜⵜⵙⴷⴷⵉⴷⵏ ⵅⴼ “ⵓⵙⵓⵖⵏ ⵏ ⵓⵙⵙⵡⵀⵏ ⵏ ⵓⵙⵉⴷⴼ ⵏ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵓⵏⵖⴰⵍ ⵏ ⵜⵎⴷⵔⴰⵡⵜ ⴷⵉⴷⵙ ⵙ ⵎⴰⴷ ⵉⵜⵜⵏⴼⵔⵓⵏ ⴰⵙⵎⵀⵍ ⵏ ⵜⵉⵍⴰⵍⵜ ⵏⵏⵙ ⴳ ⵓⵙⴼⵔⴽ ⵙ ⵉⵣⵔⴼⴰⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ. ⴳ ⵓⵙⵉⵡⵍ ⵏⵏⵙ ⵅⴼ ⵜⵥⵍⴰⵢⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ, ⵏⵏⴰ ⵉⴳⴰⵏ ⵙⴳ ⵜⵉⵔⵎⵉⵜ ⴰⴷ ⵜⵉⵎⵙⴽⵔⵜ ⵜⴰⵎⵓⴼⴰⵢⵜ, ⴰⵔ ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵓⴱⵟⵟⵓ ⵏⵏⵙ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵓⴼⵔⵉⵇⵉ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⵉⵍⴰⵍⵉⵏ ⵏ ⵓⵙⵇⵇⵉⵎ ⵉⴳⴰⵏ ⵜⵉⵎⵔⵙⵍⵜ ⵜⴰⴷⵙⵜⴰⵔⵜ ⵎⵉ ⵉⵙⵎⴰⴳⵍ ⵓⵏⵣⵔⴰⴼ : ⴰⵎⴷⴰⵢ ⴷ ⵓⵎⴰⵜⵔ ⴷ ⵓⴹⴼⴼⵓⵕ ⵏ ⵉⵙⵓⵔⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔⴰⵏⴰⵎⵓⵔ ⴷ ⵓⵏⵎⵏⴰⴹ; ⵉⴳⵉ ⵏ ⵉⵙⴰⴳⴳⵯⵏ ⴷ ⵉⵔⵣⵣⵓⵜⵏ ⵉⵜⵜⵓⵙⵓⵖⵏⵏ ⵅⴼ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ; ⴰⵙⵎⴰⵇⵇⵍ ⴳ ⵇⴰⵃ ⵡⴰⴷⴷⴰⴷⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ; ⵉⵍⵎⵎⴰ ⴰⵔⵣⴰⴼ ⵙ ⵉⴷⵖⴰⵔⵏ ⵏ ⵡⴰⵎⵎⴰⵥ ⴷ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ ⴷ ⵓⵎⴰⵜⵔ ⵏ ⵡⴰⴷⴷⴰⴷⵏ ⵏ ⵉⵎⵖⵣⵓⵜⵏ ⴷ ⵓⵎⵓⴳⴳⵓ ⵏⵏⵙⵏ, ⴷ ⵓⵍⴰ ⴰⵎⵎⴰⵙⵏ ⵏ ⵓⴼⵔⴰⴳ ⵏ ⵜⵎⵥⵉ ⴷ ⵡⴰⵍⴰⵙ ⵏ ⵓⵙⵉⴷⴼ ⴷ ⵜⵎⵔⵙⴰⵍ ⵏ ⵓⵏⵀⵍⵍⴰ ⴰⵏⴰⵎⵓⵏ ⴷ ⵜⵎⵔⵙⴰⵍ ⵜⵉⵎⵙⵏⵉⵊⵊⵉⵜⵉⵏ ⵥⵍⵉⵏⵉⵏ ⵙ ⵓⵙⵎⴽⵍ ⵏ ⵜⵎⴰⴹⵓⵏⵉⵏ ⵜⵉⵎⵏⵍⵍⵉⵜⵉⵏ ⴷ ⵜⵏⵉⵎⴰⵏⵉⵏ ⴷ ⵉⴷⵖⴰⵔⵏ ⵏ ⵓⵃⵟⵟⵓ ⵙ ⵉⴱⵕⵕⴰⵏⵉⵢⵏ ⴳ ⵓⵙⵓⵔⵙ ⴰⵔⵓⵍⴳⵉⵏ, ⴷ ⵓⴳⴳⴰⵔ. ⵜⵜⵡⴰⵙⵙⴰⵏⵏⵜ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ 11 ⵏ ⵜⵙⴷⴰⵡⵉⵜ ⴳ ⵉⵖⵣⵓⵜⵏ, ⵅⴼ ⵉⴳⴳⵉ ⵏ ⵜⴳⵓⵔⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵙ ⵜⴳⵓⵔⵉⵡⵉⵏ ⵏ ⵓⵎⴰⵡⵙⴰⵙ ⴰⵎⴰⵍⴰⵍ ⵉⵜⵜⵓⵙⵎⴰⴳⵍⵏ ⵙ ⵉⵎⵢⴰⵙⵙⴰⵜⵏ ⴰⴽⴷ ⵓⴱⵕⵍⴰⵎⴰⵏ, ⴰⵎⵙⵙⵉⵡⵍ ⴰⵎⴰⴷⴷⵓⴷ ⵙ ⵢⵉⵙⵎ ⵏ ⵜⵏⴱⴰⴹⵜ, ⴰⵎⴰⵔⵉ ⴰⵎⴰⵜⴰⵢ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ, ⴷ ⵍⵡⴰⵍⵉ ⴰⵎⵣⴷⴰⵢ ⴰⵏⴰⵎⵓⵔ ⵏ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵜⴰⵏⴼⴳⴰⵏⵜ, ⵎⴰⵙⵙ ⵎⵓⵃⵎⵎⴰⴷ ⴷⴷⵔⴷⵓⵔⵉ, ⵏⵏⴰ ⵉⵙⴷⴷⵉⴷⵏ ⵅⴼ ⵡⴰⴷⴷⵓⵔ ⵏ ⵜⴷⵔⴰⵡⵜ ⵏ ⵡⴰⵎⵓⵏ ⵓⵖⵔⵉⵎ ⴳ ⵡⴰⵍⴰⵙ ⵏ ⵓⵙⵉⴷⴼ ⵏ ⵉⵎⵖⵣⵓⵜⵏ, ⴷ ⵜⵉⵍⴰⵍⵜ ⵏⵏⵙ ⵜⴰⴽⵙⵡⴰⵜ ⴳ ⵓⵙⴹⵓⴼ ⵏ ⵜⵎⵔⵙⵍⵜ ⵜⴰⵎⵖⵣⵓⵜ ⵉ ⵓⵙⴷⵓⵙ ⵏ ⵓⵏⵏⵓⵕⵥⵎ ⵏⵏⵙ ⵅⴼ ⵜⵡⵏⵏⴰⴹⵜ ⵏⵏⵙ ⵏ ⴱⵕⵕⴰ ⴷ ⵜⴰⵎⵓⵏⵜ ⴰⴽⴷ ⵉⵎⵖⵣⵓⵜⵏ ⴷ ⵡⴰⵏⵏⴰⵍ ⵏⵏⵙ ⴰⵏⵉⵎⴰⵏ ⵃⵎⴰ ⴰⴷ ⵉⵜⵜⵓⵙⵙⵉⴷⵔⵓⵙ ⵓⵎⵣⴰⵔⴰⵢ ⵉⵏⴳⵔⴰⵜⵙⵏ ⴷ ⵓⵙⴰⵢⵔⴰⵔ ⵏ ⴱⵕⵕⴰ ⵃⵎⴰ ⴰⴷ ⵜⵜⵓⵙⵙⵉⵏⴼⵏ ⵡⴰⴷⴷⴰⴷⵏ ⵏ ⵓⵡⵔⵔⵉ.