ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵢⵏⴰⵙ 12 ⵉⴱⵔⵉⵔ 2022 ⴳ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵓⵍⴳⵉⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵕⵕⴱⴰⵟ-ⴰⴳⴷⴰⵍ, ⴰⵏⵎⵓⵇⵇⴰⵔ ⴰⵎⵢⴰⵖ ⵅⴼ "ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷ ⵉⵎⵉⴷⵏ ⵏ ⵓⵙⴷⵓⵙ ⵏ ⵓⵎⵢⴰⵖ ⴰⴽⴷ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵉⵜⵜⵡⴰⵙⵙⵏ ⵙ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵎⴰⵙⵙ ⵔⵉⵎⵉ ⵏⴳⵓⵢ ⵍⵓⵎⴱⵓ, ⴷ ⴽⵕⴰⴹ ⵉⵎⴰⵍⴰⵍⵏ ⵙⴳ ⵜⵙⵇⵇⵉⵎⵜ ⴷ ⵓⵎⴰⵔⵉ ⵏ ⵓⵏⴱⴷⴰⴷ ⵏ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵓⵍⴳⵉⵏⵉⵏ ⴷ ⵜⴷⴰⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵏ ⵕⵕⴱⴰⵟ-ⴰⴳⴷⴰⵍ, ⴷ ⵓⵍⴰ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵉⴳⵏⵙⴰⵙ ⵏ ⵜⵣⵓⵏⴰ ⵜⵓⵏⴱⵉⴹⵉⵏ ⴷ ⵡⴰⵎⵓⵏ ⵓⵖⵔⵉⵎ ⴷ ⵉⴽⴰⴷⵉⵎⵉⵢⵏ.

ⵉⴷⴷⴰ ⴷ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵓⵏⵄⴰⵕ ⵏⵏⴰ ⵉⵏⴱⴹ ⵓⵙⵇⵇⵉⵎ ⴷ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⵙⵙⵉⵅⴼ ⵏⵏⵙ ⴰⴼⴰⴷ ⴰⴷ ⵉⵙⵖⵣⵏ ⵍⵎⵖⵔⵉⴱ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵍⵓⵎⴰⵕ ⵍⵍⵉⴳ ⵉⴽⴽⴰ ⵉⵖⵔⴰ ⵓⵙⵇⵇⵉⵎ ⵉ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ, ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵏ ⵉⵙⴳⴳⵯⴰⵙⵏ 2019 ⴷ 2020 ⴷ ⵉⵙⵖⵍⴰⴼⵏ ⵏⵏⵙ ⴷ ⵜⵙⵓⵎⴰⵔ ⵏⵏⵙ ⵣⴷⵉⵏⵉⵏ ⵙ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏⵏⴰ ⵉⵜⵜⵓⵙⵡⴰⵍⴰⵏ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵃⵎⴰ ⴰⴷ ⵜⵙⵖⵣⵏ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷ ⵓⵙⵓⴷⵙ ⵏ ⵜⴷⵔⴰⵡⵜ ⴳ ⵓⵏⴰⴳⵔⴰⵡⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⵏ ⵓⵏⵏⵓⵕⵥⵎ ⵏ ⵓⵏⵎⵓⵇⵇⴰⵔ ⴰⴷ, ⵜⵙⵙⴼⴰⵡ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ "ⵜⵣⵎⵔ ⵜⵙⵖⵣⵏⵜ ⵏ ⵍⵎⵖⵔⵉⴱ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴰⴷ ⵉⵙⴷⵓⵙ ⴰⵎⵢⴰⵡⴰⵙ ⵏ ⵉⵎⴳⴳⴰⵢⵏ, ⵡⵉⴷ ⴳⴰⵏⵉⵏ ⵉⵔⵙⴰⵍⵏ ⵏⵉⵖ ⵡⴰⵔ ⵉⵎⵔⵙⴰⵍⵏ, ⴰⴽⴷ ⵓⵏⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⵔⵉⵇⵉ ⵎⴽⴷⴰ ⵔⴰⴷ ⵉⵙⵎⵙⵉ ⵉⵏⵏⵖⵍ ⴰⵙⴰⵜⵉ ⵏ ⵉⵎⵢⴰⵖⵏ ⵏⵏⵖ ⴰⴽⴷ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⴷ ⵓⵏⴰⴳⵔⴰⵡ ⴰⵎⴰⵏⵥⴰⵡ". ⴳ ⵓⵎⵏⴰⴹ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵏⵄⴰⵕ ⵏⵏⴰ ⵉⵜⵜⴳⴳⴰ ⵓⵙⵇⵇⵉⵎ ⵅⴼ ⵓⵙⴷⵓⵙ ⵏ ⵜⵙⵖⵣⵏⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴱⴷⴷ ⵅⴼ ⵜⵓⴳⵜ ⵏ ⵜⵔⵙⴰⵍ, ⵙⴳⵉⵙⵏⵜ ⴰⵏⵄⴰⵕ ⵉⵛⵛⴰⵕⵏ ⵣⵖ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⴷ ⵜⵎⵀⴰⵍ ⵏ ⵓⵎⵢⴰⵖ ⵙⵓⵍⵏⵉⵏ ⴰⴽⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⴷ ⵉⵎⴰⵍⴰⵍⵏ ⵏⵏⵙ ⴷ ⵜⵎⵔⵙⴰⵍ ⵏⵜⴰⵢⵏⵉⵏ.

ⴳ ⵓⵙⴰⵜⵉ ⵏ ⵉⵡⵉⵣ ⵏⵏⵙ ⵅⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵎⵢⴰⵖ ⴰⴽⴷ ⵜⵙⵇⵇⵉⵎⵜ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⵓⴳⵜ ⵏ ⵜⵙⵏⵜⴰⵢⵉⵏ ⵏⵏⴰ ⵉⵜⵜⴳⴳⴰ ⵓⵙⵇⵇⵉⵎ, ⵍⵓⵎⴰⵕ ⵎⴰⴷ ⵉⵥⵍⵉⵏ ⵙ ⵓⵙⴷⵓⵙ ⵏ ⵜⴷⵔⴰⵡⵜ ⵏⵏⵙ ⴳ ⵜⵓⴳⵜ ⵏ ⵜⵙⵓⵜⴰⵍ ⵏ ⵓⵙⴳⵔⴰⵡ ⴰⵙⵔⵜⴰⵏ ⴷ ⵓⵙⴱⵓⵖⵍⵓ ⵏ ⵉⵙⵖⵏⵓⵜⵏ ⵏ ⵓⵎⵢⴰⵡⴰⵙ ⴰⴽⴷ ⵉⵎⴰⵍⴰⵍⵏ ⵏ ⵜⵙⵇⵇⵉⵎⵜ, ⴰⵙⵏⵎⴰⵍⴰ ⵏ ⵜⵙⵓⵜⴰⵍ ⵉ ⵓⵙⴷⵓⵙ ⵏ ⵜⵣⵎⵎⴰⵔ ⵅⴼ ⵉⵎⵔⵙⵉⵜⵏ ⵏ ⵓⵏⵣⴳⵓⵎ ⵉⵛⵛⴰⵕⵏ, ⴰⵎ ⵜⴰⵎⵣⵡⴰⴳⵜ ⴷ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵏⴰⵡ ⴰⵏⴰⵎⵓⵏ, ⴷ ⵓⵍⴰ ⵜⴰⴷⵔⴰⵡⵜ ⴳ ⵓⵣⵣⴳⵉⵔ ⵏ ⵜⵎⵙⵙⴽⵜⵉⵜ ⵏ 2063 ⴷ ⵓⵣⵣⴳⵉⵔ ⵏ ⵜⵡⵓⵔⵉ ⵏ ⵜⵎⵓⵏⵉ ⵜⴰⴼⵔⵉⵇⵉⵜ ⵅⴼ ⵜⵣⵔⴼⵜ ⵜⴰⵎⵓⵜⵜⵉⵢⵜ.

ⵙⴳ ⵜⵙⴳⴰ ⵏⵏⵙ, ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵉⵣⵔⵉⵔⵉⴳⵏ ⵉⵎⵇⵇⵔⴰⵏⵏ ⵏ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵏⵏⴰ ⵉⵙⵡⵓⵔⵉⵏ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ ⴳ ⵓⵎⵏⵥⴰⵡ ⴰⴼⵔⵉⵇⵉ. ⵢⵉⵏⵉ ⵎⴰⵙ ⵉⴳⴰ ⵓⵔⵣⴰⴼ ⵏⵏⵙ ⵖⵉⵍⴰ ⵙ ⵍⵎⵖⵔⵉⴱ, ⵏⵏⴰ ⴷ ⵉⴷⴷⴰⵏ ⴹⴰⵕⴰⵜ ⴰⵔⵣⴰⴼ ⵏⵏⵙ ⴰⵎⵣⵡⴰⵔⵓ ⴳ 2019, ⵢⴰⵎⵓ ⴳ ⵓⵙⴰⵜⵉ ⵏ ⵜⵙⵎⵉⴳⴰⵍ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏⵏⵉ ⵉⵙⵡⵓⵜⵜⵙⵏ ⴰⵙⵏⵎⵍ ⵙ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵏⵏⴰ ⵉⵙⵖⵣⵏ ⵓⵙⵇⵇⵉⵎ ⵏ ⵉⵏⵙⵙⵉⵅⴼⵏ ⵉⴼⵔⵉⵇⵉⵢⵏ ⴳ ⵜⵙⵓⵜⵍⵜ ⵏⵏⵙ ⵜⵓⵏⵣⵉⵍⵜ 18 ⴳ ⵏⴰⵢⵕⵓⴱⵉ ⴰⵙⴳⴳⵯⴰⵙ ⵏ 1981, ⴷ ⵓⵙⵏⵎⵉⵍⵉ ⵏ ⵉⵙⴱⴷⴰⴷⵏ ⵏⵏⵙ ⴷ ⵉⵎⵏⵏⵉⵜⵏ ⵏⵏⵙ ⵉ ⵜⵓⴳⵜ ⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵡⴰⵔ ⵉⵎⵔⵙⴰⵍⵏⴳ ⵉⵡⴰⵏⴽⵏ ⵏⵏⴰ ⵓⵔⵜⴰ ⵜⵜ ⵙⵖⵣⵉⵏⵏⵉⵏ.

ⵉⵙⴷⴷⵉⴷ ⵎⴰⵙ ⵜⴳⴰ ⵜⵏⵜⵜⴰⵎⵜ ⴰⴷ ⵜⴰⵏⵜⴰⵎⵜ ⵜⴰⵙⴰⵖⵓⵍⵜ ⵜⴰⴼⵔⴷⵉⵜ ⴳ ⵉⴼⵔⵉⵇⵢⴰ ⵏⵏⴰ ⵉⵏⵜⴰⵢⵏ ⵙ ⵓⵎⵣⴰⵖ ⵏ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵉⵙⵙⴼⴰⵡ ⵎⴰⵙ ⵔⵉⵎⵉ ⵏⴳⵡⵉ ⵍⵓⵎⴱⵓ ⵎⴰⵙ ⴷⴰ ⵜⵙⵡⵓⵔⵉ ⵜⵙⵇⵇⵉⵎⵜ ⵏⵏⴰ ⵉⵜⵜⵙⵙⵉⵅⴼ ⵅⴼ ⵓⵙⵏⵎⵍ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ ⴳ ⵡⴰⵎⵓⵏⵏ ⵉⴼⵔⵉⵇⵉⵢⵏ, ⴰⵔ ⵜⵙⵡⵓⵔⵉ ⵅⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵏⴳⵔ ⵜⵓⴳⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⵢⴰⴹⵏⵉⵏ ⵏⵏⴰ ⴷ ⴷⴰⵔ ⴰⵣⴷⴰⵢ, ⵉⴷⴷⵖ ⵜⴳⴰ ⵜⵉⵎⵔⵙⵍⵜ ⵙⵡⵓⵔⵉⵏⵉⵏ ⵅⴼ ⵜⴷⵉⴱⵍⵓⵎⴰⵙⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵓⵎⴰⵔⵉ ⵏ ⵓⵏⴱⴷⴰⴷ ⵏ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵓⵍⴳⵉⵏⵉⵏ ⴷ ⵜⴷⴰⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵕⵕⴱⴰⵟ-ⴰⴳⴷⴰⵍ, ⴰⵙⵍⵎⴰⴷ ⵄⴱⴷ ⵍⵄⵣⵉⵣ ⵍⵄⵕⵓⵙⵉ, ⵅⴼ ⵡⴰⴷⴷⵓⵔ ⵏ ⵜⵙⴷⴰⵡⵉⵜ ⴳⴰⵏⵉⵏ ⴰⵙⴰⵢⵔⴰⵔ ⵏ ⵓⵎⴹⴰⴽⴰⵕ ⴷ ⵓⵎⵔⴰⵔⴰ ⴷ ⵓⴱⵟⵟⵓ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴷ ⵜⵉⵔⵎⵉⵜⵉⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵉⴷⴷⵖ ⵜⴳⴰ ⴰⵎⴷⵔⴰⵡ ⴰⵙⵜⵕⴰⵜⵉⵊⵉ ⴳ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵕⵚⵚⴰ ⵏ ⵉⵎⵏⵣⴰⵢⵏ ⵏⵏⵙ. ⵉⵔⵏⵓ ⵎⴰⵙ ⵜⵣⵎⵔ ⵜⵙⵖⵣⵏⵜ ⵏ ⵍⵎⵖⵔⵉⴱ ⵜⴰⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴰⴷ ⵜⵙⴷⵓⵙ ⵜⴰⴷⵔⴰⵡⵜ ⴳ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵢⵍⵍⵉ ⵔⴰⴷ ⵉⵙⴱⵓⵖⵍⵓ ⵜⵉⵎⵙⴽⵔⵜ ⵜⴰⵎⵢⴰⵇⵇⴰⵏⵜ ⵜⴰⵏⴰⵎⵓⵔⵜ ⴳ ⵢⵉⴳⵔ ⴰⴷ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⵉⵏⴳⵔ ⵜⵓⴳⵜ ⵏ ⵉⵎⴳⴳⴰⵢⵏ. ⵉⵜⵜⵡⴰⵙⵙⵏ ⵓⵏⵎⵓⵇⵇⴰⵔ ⴰⴷ ⵙ ⵓⵎⵢⴰⵖ ⵏ ⵉⵎⴷⵔⴰⵡⵏ ⴰⴽⴷ ⵜⴽⵛⵛⵓⵎⵜ ⵏ ⵎⴰⵙⵙ ⵔⵉⵎⵉ ⵏⴳⵓⵢ ⵍⵓⵎⴱⵓ, ⴷⴷⵓⵏⵜ ⴷ ⵜⵓⴳⵜ ⵏ ⵜⴽⵛⵛⵓⵎⵉⵏ ⵅⴼ ⴽⵔⴰ ⵏ ⵉⵎⵏⵏⵉⵜⵏ ⴷ ⵉⵙⴱⴷⴰⴷⵏ ⵏ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵣⴷⵉⵏⵉⵏ ⵙ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⵍⵍⴰⵏⵉⵏ ⴳ ⵓⴱⴰⵔⴰⵣ ⴰⵏⴰⵎⵓⵔ, ⴷ ⵓⵍⴰ ⵉⵣⵎⴰⵣ ⴷ ⵜⵎⵔⵉⵙⵉⵏ ⵏⵏⴰ ⵔⴰⴷ ⵉⴳⴳⵔⵓ ⵉ ⵜⵙⵖⵣⵏⵜ ⵏ ⵍⵎⵖⵔⵉⴱ ⴼⵍⵍⴰⵙ, ⴷ ⵜⴱⵔⵉⴷⵉⵏ ⵏ ⵓⵎⵢⴰⵖ ⵏ ⵉⴼⵔⴷⵉⵙⵏ ⵏ ⵓⵏⴰⴳⵔⴰⵡ ⴰⵣⵔⴼⴰⵏ ⴰⵏⴰⵎⵓⵔ ⴰⴽⴷ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴳⴳⴰⵔ.

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ, ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵙⴰⵡⴰⵍ ⵉⵏⴳⵔ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⴷ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⴳ ⵍⵎⵖⵔⵉⴱ ⴷ ⵡⴰⵎⵓⵏ ⵓⵖⵔⵉⵎ, ⵔⴰⴷ ⵉⵙⵏⵎⴰⵍⴰ ⵓⴽⴰⴱⴰⵕ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⴳ ⵜⴰⵎⵓ ⵜⵎⴰⵍⴰⵍⵜ ⴷ ⵜⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵅⴼ ⵉⵣⵔⴼⴰⵏ ⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵉⴼⵔⵉⵇⵢⴰ, ⵜⴰⵏⴽⴽⴰⴹⵜ ⵜⴰⵎⵥⵍⵉⵜ ⵉⵏⵜⴰⵢⵏ ⵙ ⵜⴷⵔⴼⵉ ⵏ ⵓⵡⵏⵏⵉ ⴷ ⵓⵙⵉⴷⴼ ⵙ ⵓⵎⵍⵉ, ⴷ ⵓⵎⴰⵍⴰⵍ ⴷ ⵓⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵅⴼ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵎⴰⵙⵙⴰ ⴰⵏⴰ ⴼⵓⵔⵙⵜⵔ, ⵜⴰⵏⵎⵀⴰⵍⵜ ⵜⴰⵎⵣⵣⴳⵉⵔⵜ ⵏ ⵡⴰⵎⵎⴰⵙ ⴰⴼⵔⵉⵇⵉ ⵉ ⵜⴷⵉⵎⵓⵇⵕⴰⵟⵉⵜ ⴷ ⵜⵖⵓⵔⵉⵡⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵏⵎⵓⵇⵇⴰⵔ ⴰⴽⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵡⴰⵢⵢⴰⴹ ⴰⴽⴷ ⵓⵏⵙⵙⵉⵅⴼ ⵏ ⵉⵎⵛⵛⵉⵡⴰⵕ, ⴷ ⵓⵍⴰ ⵉⵏⵎⵓⵇⵇⴰⵔⵏ ⵉⵙⴳⵓⵎⴰⵏⵏ ⴰⴽⴷ ⵜⴰⴹⴰⵡⵉⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⵎⵖⵔⵉⴱⵉⵢⵉⵏ ⵙⵡⵓⵔⵉⵏⵉⵏ ⴳ ⵢⵉⴳⵔⴰⵏ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⴰⴷⵔⴼⵉ ⵏ ⵓⵡⵏⵏⵉ ⴷ ⵓⵣⵔⴼ ⴳ ⵓⵙⵉⴷⴼ ⵙ ⵓⵎⵍⵉ, ⵓⴳⴳⵉⴷⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ.