ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ "ⵉⴳⴰ ⵓⵣⵔⴼ ⴳ ⵜⴷⵓⵙⵉ ⵢⴰⵏ ⵉⵙⴳⵔ ⴰⴷⵙⵍⴰⵏ ⵉ ⵓⵡⴰⴹ ⵏ ⵓⴼⵔⴰⴳ ⴰⵏⴰⵎⵓⵏ, ⵢⵉⵍⵉ ⴳ ⵜⵓⵥⵥⵓⵎⵜ ⵏ ⵉⵏⵣⴳⵓⵎⵏ ⵏ ⵜⵎⵔⵙⵍⵜ ⴷ ⵢⵉⴳⵔ ⵏ ⵡⴰⴷⴰⴼ ⵏⵏⵙ ⴳ ⵢⵉⴳⵔ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ". ⵉⴷⴷⴰ ⴷ ⵎⴰⵢⴰ ⵏⵏ ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵉ ⵜⵉⵏⴰⵡⵜ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵡⴰⵙ 29 ⵛⵓⵜⴰⵏⴱⵉⵔ 2022 ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵙ ⵜⵎⴷⵔⴰⵡⵜ ⴰⴽⴷ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵉ ⵜⵎⵜⵜⴰ ⵉⵎⵓⵏⵏ ⴷ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⵎⵣⵡⴰⴳⵜ ⴳ ⵍⵎⵖⵔⵉⴱ ⵅⴼ ⵓⵙⴳⵓⵎ ⴰⵙⵉⴷⴼ ⵏ ⵉⴱⵕⵕⴰⵏⵉⵢⵏ ⴳ ⵓⵙⴰⵡⵔ ⵏ ⵓⴼⵔⴰⴳ ⴰⵏⴰⵎⵓⵏ : ⵉⵎⵏⵣⴰⵢⵏ ⴷ ⵉⵏⴰⵥⴰⵕⵏ ⵏ ⵓⵙⵎⵀⵍ". 

ⵙ ⵜⵎⵍⴷⴰ ⴰⴷ, ⵜⵙⵎⴰⵢⵏⵓ ⵎⴰⵙⵙⴰ ⴱⵓⵄⵢⵢⴰⵛ ⴰⵎⵏⴰⴷ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵉⴷⴼ ⵏ (ⵜ)ⵉⵎⵣⵡⴰⴳⵏ(ⵜ) ⴳ ⴽⴽⵓⵥ ⵏ ⵉⴼⵔⴷⵉⵙⵏ ⵏ ⵓⵏⴰⴳⵔⴰⵡ ⵏ ⵓⴼⵔⴰⴳ ⴰⵏⴰⵎⵓⵏ ⵉⵜⵜⵡⴰⵙⴹⵕⵚⵏ ⴳ ⵓⵙⵍⴳⵏ ⴰⵙⴰⵜⵉ ⵏⵏⴰ ⵉⵙⵖⵣⵏ ⵓⴱⵕⵍⴰⵎⴰⵏ ⵏⴹⴰⴹⴰⵏⵉ. ⵜⵙⵉⵙⴼⵉⵡ ⵎⴰⵙ "ⵉⵣⴷⵉ ⵓⵙⴽⴽⵉⵏ ⴰⵡⴷ ⴷ ⵓⴼⵔⴰⴳ ⵙⴳ ⵉⵎⵉⵣⵉⵜⵏ ⵏ ⵜⵎⴰⴹⵓⵏⵉⵏ, ⵉⵎⵉⵣⵉⵜⵏ ⵏ ⵜⴰⵡⵙⵔⵜ, ⵉⵎⵉⵣⵉⵜⵏ ⵏ ⵓⴼⵓⵖ ⵙⴳ ⵜⵡⵓⵔⵉ ⴷ ⵓⴼⵔⴰⴳ ⵙⴳ ⵉⵎⵉⵣⵉⵜⵏ ⵣⴷⵉⵏⵉⵏ ⵙ ⵜⵎⵥⵉ ⴷ ⵜⵓⴽⴽⵉ ⵏ ⵡⴰⵔⵔⴰⵣ ⵉ ⵜⵡⵊⵉⵡⵉⵏ ⵓⵔ ⵉⵜⵜⴱⵖⴰⵔⵏ ⵙⴳ ⵓⴼⵔⴰⴳ ⴰⴷ". ⵜⵙⵙⵎⵜⵔ ⴳ ⵓⵎⵏⴰⴹ ⴰⴷ ⵏⵉⵜ ⵎⴰⵙ ⵉⵅⵚⵚⴰ ⴰⴼⴰⴷ ⴰⴷ ⴰⵎⵓⵏ (ⵜ)ⵉⵎⵣⵡⴰⴳⵏ(ⵜ) ⴳ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ "ⴰⴷ ⴳⵏⵜ ⵜⵏⴱⴰⴹⵉⵏ ⴳⴰⵏⵉⵏ ⵜⵉⵎⵏⵜⴰⵢⵉⵏ ⵜⵉⵎⴳⴳⵉⵜⵉⵏ ⵉⵜⵜⵓⵙⵙⵓⵖⵏⵏ ⵃⵎⴰ ⴰⴷ ⵜⵜⵡⴰⵣⵔⴰⵢⵏ ⴽⵉⴳⴰⵏ ⵏ ⵉⵣⴰⴽⴰⵏ ⴷ ⵉⵏⵎⵔⴰⵏ ⵓⵍⴳⵉⵏⵏ ⴷ ⵓⵎⵀⵉⵍⵏ ⴳ ⴽⵔⴰ ⵏ ⵜⵡⴰⵍ" ⵉⴷⴷⵖ ⵉⴱⴷⴷ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ ⵅⴼ ⴽⵉⴳⴰⵏ ⵏ ⵉⵎⵏⵣⴰⵢⵏ ⵉⵜⵜⵏⴼⵔⵓⵏ ⴰⵙⵉⴷⴼ ⴰⵎ ⴰⵎⵏⵣⴰⵢ ⵏ ⵜⴱⴷⴰⴷⵜ ⴷ ⵓⵎⵏⵣⴰⵢ ⵏ ⵡⴰⵔ ⴰⵙⵏⵓⵃⵢⵓ". 

ⴳ ⵓⵙⵙⵉⴷⴷ ⵏ ⵉⵎⵏⵣⴰⵢⵏ ⴰⴷ ⵏⵏⴰ ⵅⴼ ⵉⴱⴷⴷ ⵓⵙⴰⵡⵔ ⵏ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ ⵎⴽⴷⴰ ⵙ ⵜⵏ ⵉⵙⵡⵓⵜⵜⴰ ⵓⵙⵍⴳⵏ ⴰⵙⴰⵜⵉ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ 'ⵉⵥⴹⴰⵕ ⵍⵎⵖⵔⵉⴱ ⴰⴷ ⵉⵣⵔⵉ ⵉⵣⴰⴽⴰⵏ, ⵉⵙⵔⵙ ⴰⵏⴳⵔⴰⵡ ⴰⵎⵙⵙⵓⵎⵓ ⵉ ⵓⴼⵔⴰⴳ ⴰⵏⴰⵎⵓⵏ ⵃⵎⴰ ⴰⴷ ⵓⵔ ⵢⴰⴷⵊ ⴰⵡⴷ ⵢⴰⵏ ⴹⴰⵕⴰⵜ ⵏ ⵓⴽⴰⴱⴰⵕ". ⵙⴳ ⵜⵙⴳⴰ ⵏⵏⵙ, ⵢⵓⵍⵍⵖ ⵎⴰⵙⵙ ⴼⵕⵓⵏⵚⵡⴰ ⵔⵉⴱⵉ ⴷⵉⴽⴰ, ⴰⴳⵏⵙⴰⵙ ⵏ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵉ ⵜⵎⵜⵜⴰ ⵉⵎⵓⵏⵏ ⵉ ⵜⵖⴰⵡⵙⵉⵡⵉⵏ ⵏ ⵉⵎⵔⴳⵓⵙⵏ ⴳ ⵍⵎⵖⵔⵉⴱ, ⵙ ⵜⵎⵥⵕⴰ ⵜⴰⵎⵖⵔⵉⴱⵉⵜ ⵉ ⵜⵎⵣⵡⴰⴳⵜ ⴷ ⵜⵓⵔⴳⵙⴰ, ⵏⵏⵉ ⵉⵙⵏⵓⵎⵎⵍ ⵙ "ⵜⵎⵙⵙⵓⵎⵓⵜ, ⴷ ⵜⵏⴰⴼⴳⴰⵏⵜ ⴷ ⵜⴰⴷ ⵉⴱⴷⴷⵏ ⵅⴼ ⵓⵙⵍⴳⵏ ⴰⴳⵔⴰⵖⵍⴰⵏ", ⵉⵙⵙⵎⵜⵔ ⵙ ⵡⴰⴷⴷⵓⵔ ⵏ ⵓⵙⴰⵡⵔ ⴰⴳⵍⴷⴰⵏ ⴳ ⵓⵙⵕⵚⵚⴰ ⵏ ⵓⵏⴳⵔⴰⵡ ⵏ ⵓⴼⵔⴰⴳ ⴰⵏⴰⵎⵓⵏ ⴳ ⵓⵎⵏⵉⴷ ⵏ 2025 ⵉ ⵇⴰⵃ ⵉⵏⵎⵓⵔⴰⵏ ⵙ ⵓⵙⵏⵓⵃⵢⵓ ⵓⵎⵏⵉⴳ ⵉ ⵉⵎⵣⴷⴰⵖⵏ ⴽⵓⴽⴹⵏⵉⵏ, ⵉⵙⵙⵎⵜⵔ ⵙ ⵜⵉⵔⵎⵉⵜ ⵉⵎⵓⵔⵙⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵙⵉⴷⴼ ⵏ ⵉⵎⵣⵡⴰⴳⵏ ⴷ ⵉⵎⵔⴳⵓⵙⵏ ⴳ ⵓⵎⵣⵉⵣⵣⵍ ⵏ ⵓⴳⵣⵣⴰⵢ ⴰⵏⴰⵎⵓⵔ ⵎⴳⴰⵍ (ⴽⵓⴼⵉⴷ-19). 

ⴳ ⵓⵎⵏⵉⴷ ⴰⴷ, ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⴽⴰⴱⴰⵕ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⵎⵣⵡⴰⴳⵜ ⴳ ⵍⵎⵖⵔⵉⴱ, ⵎⴰⵙⵙⴰ ⵍⵓⵕⴰ ⴱⵍⴰⵜⵉⵏⵉ, ⵎⴰⵙ ⵉⴳⴰ "ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵓⴼⵔⴰⴳ ⴰⵏⴰⵎⵓⵏ ⴳ ⵍⵎⵖⵔⵉⴱ ⵜⵉⴼⵔⴽⵜ ⵜⴰⴷⵙⵍⴰⵏⵜ ⵉ ⵓⴱⵓⵖⵍⵓ ⴷ ⵓⵙⵎⴰⵜⴰ ⵏ ⵓⵏⴳⵔⴰⵡ ⵏ ⵜⵉⵣⵉ ⴰⴷ ⵃⵎⴰ ⴰⴷ ⴱⵖⵔⵏ ⴽⵉⴳⴰⵏ ⵏ ⵓⴳⴳⵉⴷⵏ ⵙⴳ ⵜⵏⵓⴼⴰ ⵏⵏⵙ ⴷ ⵜⴱⵖⵓⵔⵉⵏ". ⵜⵙⵙⵎⵜⵔ ⵎⴰⵙⵙⴰ ⴱⵍⴰⵜⵉⵏⵉ ⵎⴰⵙ ⵜⴱⴷⴷ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⵎⵣⵡⴰⴳⵜ ⴷ ⵜⵓⵔⴳⵙⴰ, ⵉⵜⵜⵡⵇⵇⴰⵔⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵜⵎⵢⴰⴷⴰⵙⵜ ⵜⴰⵎⵙⵙⵓⵎⵓⵜ ⵉ (ⵜ)ⵉⵎⵣⵡⴰⴳⵏ(ⵜ) ⵙ ⵓⵙⵓⵊⴷ ⵏ ⵜⵣⴷⵓⵖⵜ, ⴰⵙⵎⵓⵜⵜⴳ, ⵜⴰⵡⵓⵔⵉ ⴷ ⵜⵏⵓⴼⴰ ⵜⵉⴷⵓⵙⴰⵏⵉⵏ". 

ⵉ ⵓⵙⴽⵜⵉ, ⵢⴰⵎⵓ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵓⵣⵣⵉⴳⵣ ⵏ ⵉⵎⵓⵙⵙⵓⵜⵏ ⵏ ⵓⵙⵇⵇⵉⵎ ⴷ ⵜⵡⵓⵔⵉⵡⵉⵏ ⵏⵏⵙ ⵙⴳ ⵓⵙⴳⴳⵯⴰⵙ ⵏ 2019 ⵅⴼ ⵓⵙⴳⵓⵎ ⵏ ⵓⵖⴰⵎⵓⵙ ⴰⴷⵓⵙⴰⵏ ⴰⵖⵣⵓⵔⴰⵏ: ⵉⵎⵙⴰⵔⴰⵙⵏ ⴷ ⵉⵏⴰⵥⴰⵕⵏ ⵏ ⵓⵙⵉⴷⴼ ⵏ ⵉⴱⵕⵕⴰⵏⵉⵢⵏ ⵙ ⵡⴰⵏⵏⴰⵍ ⵏ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵉ ⵜⵎⵜⵜⴰ ⵉⵎⵓⵏⵏ ⵉ ⵜⵖⴰⵡⵙⵉⵡⵉⵏ ⵏ ⵉⵎⵔⴳⵓⵙⵏ ⴳ ⵍⵎⵖⵔⵉⴱ. ⵉⵙⵡⵓⵜⵜⵙ ⴰⴹⴼⴼⵓⵕ ⵏ ⵉⵙⵖⵍⴰⴼ ⵏⵏⴰ ⴷ ⵉⵙⵙⴰⴼⵖ, ⵉⵏⵏⵓⵔⵣ ⴰⴷ ⵢⵉⵍⵉ ⵓⵙⴽⴰⵔ ⵙ ⵡⴰⵙⵙⴰⵔⵏ ⵏ ⵉⴱⵕⵕⴰⵏⵉⵢⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵓⵙⴰⵡⵔ ⴰⴳⵍⴷⴰⵏ ⵉ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ.