ⵉⵙⴷⴷⵉⴷ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⵣⵎⵎⴻⵎ ⵓⵙⵇⵇⵉⵎ ⴳ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2020, ⴰⴳⴳⵓⴷⵉⵢ ⵉⴼⴰⵡⵏ ⴳ ⵡⴰⴷⴷⴰⴷⵏ ⵏ ⵜⴽⵕⴹⵉ ⵉⵜⵜⵓⴳⴰⵏ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⵍⵓⵎⴰⵕ ⴳ ⵓⵣⵎⵣ ⵏ ⵜⵓⵇⵇⵏⴰ ⵜⴰⴷⵓⵙⴰⵏⵜ, ⴷ ⵓⵍⵎⴰⴹ ⵏ ⵡⴰⴷⴰⴼ ⵏⵏⵙⵏⵜ ⵙ ⵓⵙⵎⴰⵎⵎⵉ, ⵎⴰⵢⴰ ⵏⵏ ⴰⴷ ⵢⵓⴷⵊⴰⵏ ⴰⵙⵇⵇⵉⵎ ⴰⴷ ⵉⵕⵥⵎ, ⴳ ⵓⵙⴳⴳⵯⴰⵙ ⵏ 2021, ⵢⴰⵏ ⵓⵎⵣⵉⵣⵣⵍ ⴰⵏⴰⵎⵓⵔ ⵉⵍⵍⴰⵏ ⵅⴼ ⵓⵙⴳⴳⵯⴰⵙ ⵉⵙⵎⴷⵏ ⵙⴳ 25 ⵏⵓⵡⴰⵏⴱⵉⵔ 2021, ⴷⴷⴰⵡ ⵜⵎⴰⵜⴰⵔⵜ "ⴰⴷ ⵓⵔ ⵏⴼⵉⵙⵙ ⵅⴼ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ", ⴰⴼⴰⴷ ⴰⴷ ⵜⵜⵓⵙⴼⵔⴽⵏ ⵉⵎⴳⴳⴰⵢⵏ ⵇⴰⵃ ⵅⴼ ⵜⵎⵓⴽⵔⵉⵙⵉⵏ ⵏ ⵜⵙⴰⵖⵓⵍⵜ ⵏ ⵜⵡⵜⵎⵉⵏ ⵜⵓⵏⴳⵉⵙⵏ ⵏ ⵜⴽⵕⴹⵉ ⵙ ⵜⵏⴱⴹⴰⵢⵜ. ⵉⵙⴷⴷⵉⴷ ⵓⵏⴼⵍⵓⵙ ⴰⵎⴰⵜⴰⵢ, ⴳ ⵜⴳⵓⵔⵉ ⵏⵏⴰ ⵜⵏⵏⴰ ⵎⴰⵙⵙⴰ ⵣⵀⵓⵔ ⵍⵃⵓⵕⵕ ⵙ ⵜⵙⵎⵉⵔⵉⵜ ⵅⵉⴼⵙ, ⵜⴰⴳⵎⴰⵎⵜ ⵏ ⵓⵙⵇⵇⵉⵎ, ⴳ ⵓⵕⵥⵥⵓⵎ ⵏ ⵓⵙⴳⵔⴰⵡ "ⴰⵡⴰⴹ ⵏ ⵜⵎⵖⴰⵔⵜ ⵙ ⵜⵣⵔⴼⵜ ⴳ ⵜⵎⵉⵣⴰⵔ ⵜⵉⵎⵖⴰⵔⴱⵉⵢⵉⵏ: ⵜⴰⵖⵓⵔⵉ ⵏ ⵡⴰⴷⴷⴰⴷ ⵏ ⵍⵎⵖⵔⵉⴱ", ⵜⵉⴼⴰⵡⵜ ⵏ ⵡⴰⵙⵙ ⴰⴷ ⴰⵢⵏⴰⵙ 20 ⵢⵓⵏⵢⵓ 2022, ⵎⴰⵙ ⴷⴰ ⵉⵙⵡⵓⵔⵉ ⵓⵙⵇⵇⵉⵎ ⴳ ⵓⵙⴰⵜⵉ ⵏ ⵓⵎⵣⵉⵣⵣⵍ ⴰⴷ ⵅⴼ "ⵓⵙⵎⵓⵏ ⵏ ⵜⵎⵓⵛⴰ ⴷ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⵅⴼ ⵉⵎⵔⵙⵉ, ⴳ ⵓⵙⵡⵉⵔ ⴰⴷⵖⵔⴰⵏ ⴷ ⵓⵏⴰⵎⵓⵔ, ⵙ ⵓⵙⵢⵉⵍⵉ ⵏ ⵜⵉⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵎⵓⴼⴰⵢⵉⵏ". ⴳ ⵓⵎⵏⴰⴹ ⵏ ⵓⵙⵉⵡⵍ ⵏⵏⵙ ⵅⴼ ⵓⴱⵔⵉⴷ ⵏ ⵓⴱⵓⵖⵍⵓ ⵏ ⵉⵎⵔⵙⵉ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴳ ⵜⵎⴰⵣⵉⵔⵜ ⵏⵏⵖ, ⵉⵙⵙⴼⴰⵡ ⵎⴰⵙⵙ ⴱⵏⵚⴰⵍⵃ ⵎⴰⵙ ⵉⵙⵙⵏ ⵍⵎⵖⵔⵉⴱ ⵙⴳ ⵓⴳⴳⴰⵔ ⵏ ⵡⴰⴳⵏⴰⵔ ⴷ ⵎⵔⴰⵡ ⵏ ⵉⵙⴳⴳⵯⴰⵙⵏ ⴰⴷ ⵣⵔⵉⵏⵉⵏ ⵢⴰⵏ ⵓⴱⵓⵖⵍⵓ ⴰⴽⵙⵡⴰⵜ ⴳ ⵓⵙⵡⵉⵔ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ, ⵉⴷⴷⵖ ⵜⵙⵙⵏ ⵜⵣⵡⵉⵔⵉ ⵏ ⵉⵙⴳⴳⵯⴰⵙⵏ ⵏ ⵉⴷ ⵜⵥⴰ ⵎⵔⴰⵡ ⵏ ⵜⵙⵓⵜⴰ ⵜⵉⵙ ⵙⵉⵎⵔⴰⵡⵜ ⵢⴰⵏ ⵓⵣⵎⵣ ⴰⴽⵙⵡⴰⵜ ⵏ ⵓⵏⵄⴰⵕ ⵏ ⵉⵏⴳⵎⴰⵎⵏ ⵉⵣⵔⴼⴰⵏⵏ ⴷ ⵡⵉⴷ ⵥⵍⵉⵏⵉⵏ ⵙ ⵜⵡⵜⵎⵉⵏ ⴳ ⵉⵎⵔⵙⵉ ⴰⴷ, ⵢⵉⵏⵉ ⵎⴰⵙ " ⵜⴰⵎⵓ ⵜⴳⵍⴷⵉⵜ ⴳ ⵓⵣⵎⵣ ⴰⵏⵏ ⴳ ⵜⵎⵢⴰⵇⵇⴰⵏⵜ ⵏ "ⵙⵉⴷⴰⵡ", ⵎⴽⴷⴰ ⵜⵓⵙⵉ ⵉⴳⴳⵓⵎⵎⵉⵜⵏ ⵏⵏⵙ ⵅⴼ ⴽⵔⴰ ⵏ ⵜⵎⵜⵜⴰⵏⵉⵏ ⵏⵏⵙ. ⵜⴰⵎⵓ ⴰⵙⴳⴳⵯⴰⵙ ⴰⴷ ⴳ ⵓⴱⵕⵓⵜⵓⴽⵓⵍ ⴰⵔⵓⵛⵛⵉⵍ ⵏⵏⴰ ⴰⵙ ⵉⴹⴼⵕⵏ". ⴳ ⵓⵙⴰⵜⵉ ⵏ ⵜⵣⵉⴳⵣⵜ ⴰⴷ ⵜⴰⵎⵣⵔⴰⵢⵜ, ⵜⵙⴷⵓⵙ ⵜⵓⴳⵔⵉⵡⵜ ⵏ ⵜⵡⵊⴰ ⵜⴰⴷⵔⴰⵡⵜ ⵏ ⵍⵎⵖⵔⵉⴱ ⴳ ⵜⵏⴼⵔⵓⵜ ⵏ ⵉⵙⴽⵉⵍ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵏ ⵜⵡⵜⵎⵉⵏ, ⴰⴷ ⵉⵏⵏⴰ ⵎⴰⵙⵙ ⴰⵏⴼⵍⵓⵙ ⴰⵎⴰⵜⴰⵢ, ⵉⵔⵏⵓ ⵎⴰⵙ ⵉⵇⵔⵔⴰ ⵓⴷⵓⵙⵜⵓⵔ ⵏ 2011 ⵙ ⵉⵎⵏⵣⴰⵢⵏ ⵏ ⵜⵎⵣⵣⴳⵏⵜ ⴷ ⵉⵙⴽⵉⵍ ⵉⵏⴳⵔ ⵜⴰⴳⴳⴰⵢⵉⵏ ⴷ ⵉⵎⵏⵣⴰⵢⵏ ⵢⴰⴹⵏⵉⵏ ⴷ ⵉⵣⵔⴼⴰⵏ ⴷ ⵜⴷⵔⴼⵉⵏ ⵏⵏⴰ ⵉⵙⴷⵓⵙ ⵉ ⵇⴰⵃ. ⴰⴼⴰⴷ ⴰⴷ ⵜⵜⵓⵙⵙⵎⵀⵍⵏⵜ ⵇⴰⵃ ⵜⵙⵓⵔⵉⴼⵉⵏ ⴰⴷ, ⵉⵙⵙⴼⴰⵡ ⵎⴰⵙ "ⵉⴽⴽⴰ ⵉⵍⵍⴰ ⵅⴼ ⵓⵏⵣⵣⴰⵔⴼⵓ ⴰⴷ ⵉⴼⵔⴳ ⵜⴰⵎⵖⴰⵔⵜ ⵙⴳ ⵜⴽⵕⴹⵉ ⵏⵏⴰ ⵉⵜⵜⵓⴳⴰⵏ ⵎⴳⴰⵍ ⵏⵏⵙ, ⵓⵔ ⴷ ⵅⵙ ⴰⵎ ⵜⴽⵕⴹⵉ ⵜⵓⵏⵣⵉⵍⵜ ⵏⵏⴰ ⵅⴼ ⵉⵙⵎⵔⵔⴰⵜ ⵓⵙⵍⴳⵏ "ⵓⵏⵣⵉⵍ", ⵎⴰⵛ ⴰⵎ ⵜⴽⵕⴹⵉ ⵉⵜⵜⵓⵚⴽⴰⵏ ⵅⴼ ⵡⴰⵏⴰⵡ ⴰⵏⴰⵎⵓⵏ, ⵙ ⵓⴼⵓⵖ ⵏ ⵓⵙⵍⴳⵏ 103 - 13 ⵣⴷⵉⵏⵉⵏ ⵙ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ", ⴰⵣⵎⵎⴻⵎ ⴰⴷⴷⵓⵔ ⵏ ⵓⵙⵖⴰⵍ ⵏ ⵜⵎⵢⴰⴳⴰⵏⵜ ⵏ ⵓⵙⵉⴷⴼ ⵏ ⵜⵡⵜⵎⵉⵏ ⵙ ⵉⵣⵔⴼⴰⵏ ⵏⵏⵙⵏⵜ, ⵍⵓⵎⵎⵏ ⴰⵙⵉⴷⴼ ⵏⵏⵙⵏⵜ ⵙ ⵓⵙⵎⴰⵎⵎⵉ ⴰⵏⵣⵔⴰⴼ ⴹⴰⵕⴰⵜ ⵉⵙⴳⴳⵯⴰⵙⵏ ⵉⵎⵣⵡⵓⵔⴰ ⵏ ⵜⵙⵏⵙⵉ ⵏ ⵓⵙⵍⴳⵏ ⴰⴷ ⵙⴳ ⵛⵓⵜⴰⵏⴱⵉⵔ 2018. ⵙⴳ ⵜⵙⴳⴰ ⵏⵏⵙ, ⵉⵏⵏⴰ ⵓⵏⵙⵙⵉⵅⴼ ⵏ ⵜⵙⴷⴰⵡⵉⵜ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ, ⵎⴰⵙⵙ ⵎⵓⵃⵎⵎⴰⴷ ⵍⵖⴰⵛⵉ, ⵎⴰⵙ ⵢⴰⵎⵓ ⵓⵙⵏⵎⴰⵍⴰ ⵏ ⵓⵙⴳⵔⴰⵡ ⴰⴷ ⴳ ⵓⵙⴰⵜⵉ ⵏ ⵓⵙⴰⵜⵉ ⵏ ⵜⴰⵡⵉⵜ ⵏ ⵍⵎⵖⵔⵉⴱ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⵣⵔⴼⴰⵏ ⵏ ⵜⵡⵜⵎⵉⵏ ⵙ ⵓⵥⵍⴰⵢ, ⵉⵔⵏⵓ ⵎⴰⵙ ⵙⴹⵕⵚⵏ ⵉⵙⴱⴷⴰⴷⵏ ⵏ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵙ ⵜⵡⵉⵍⴰ ⵉⴼⴰⵡⵏ ⵅⴼ ⵉⵙⴽⵉⵍ ⵉⵏⴳⵔ ⵓⵔⴳⴰⵣ ⴷ ⵜⵎⵖⴰⵔⵜ ⴳ ⵉⵣⵔⴼⴰⵏ ⴷ ⵜⴷⵔⴼⵉⵏ ⵏⵏⴰ ⴷ ⵉⴷⴷⴰⵏ ⴳ ⵜⵎⵢⴰⵇⵇⴰⵏⵉⵏ ⴷ ⵉⴹⵕⵉⵚⵏ ⵉⴳⵔⴰⵖⵍⴰⵏⵏ ⵏⵏⴰ ⵉⵙⵖⵣⵏ ⵍⵎⵖⵔⵉⴱ, ⵎⴽⴷⴰ ⵉⵙⴹⵕⵚ ⵓⵎⴰⴳⵔⴰⴷ 19 ⵏ ⵓⴷⵓⵙⵜⵓⵔ ⵅⴼ ⵓⵙⵏⴰⵢ ⵏ ⵓⵏⴳⵎⴰⵎ ⵏ ⵜⵎⵣⵣⴳⵏⵜ ⴷ ⵓⵙⴱⴷⴷⵉ ⵏ ⵇⴰⵃ ⵜⵡⵉⵍⴰⵜⵉⵏ ⵏ ⵓⵙⵏⵓⵃⵢⵓ. ⵎⴰⵙⵙⴰ ⵍⴰⵢⵍⴰ ⵃⴰⵏⴰⴼⵉ, ⵜⴰⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵏ ⵓⵙⵍⴳⵏ ⴰⴳⵔⴰⵖⵍⴰⵏ (ARPA), ⵏⵜⵜⴰⵜ ⵜⵙⵙⴼⴰⵡ ⴳ ⵜⴳⵓⵔⵉ ⵏⵏⵙ ⴰⴷⴷⵓⵔ ⵏ ⵓⵙⴳⵔⴰⵡ ⴰⴷ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⵙⴳ 20 ⴰⵔ 22 ⵢⵓⵏⵢⵓ 2022, ⴳ ⵜⵖⵓⵔⵉ ⵏ ⵓⵙⵏⵏⵣⵉ ⵏ ⵉⵎⵏⵉⴷⵏ ⵓⵍⴳⵉⵏⵏ ⴷ ⵉⵙⵔⵜⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵉⴹⵉⵚ ⵏⵏⵙ ⵅⴼ ⵓⵙⵉⴷⴼ ⵏ ⵜⵎⵖⴰⵔⵜ ⵙ ⵜⵣⵔⴼⵜ, ⴷ ⵓⵙⴷⵓⵙ ⵏ ⵓⵏⴱⴰⴹ ⵏ ⵓⵙⵍⴳⵏ ⴳ ⵉⵡⴰⵏⴽⵏ ⵉⵎⵖⴰⵔⴱⵉⵢⵏ, ⴷ ⵜⴳⵎⵉ ⵏ ⵉⵣⴷⴰⵢⵏ ⵉⵏⴳⵔ ⵜⵡⵜⵎⵉⵏ ⵜⵉⵏⵎⵖⵓⵔⵉⵏ ⴳ ⵉⵡⴰⵏⴽⵏ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵍⵓⴱⵏⴰⵏ ⴷ ⴼⵉⵍⵉⵙⵟⵉⵏ, ⴰⴼⴰⴷ ⴰⴷ ⵉⴱⵓⵖⵍⵓ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⴷⵓⵙ ⵏ ⵡⴰⴷⴰⴼ ⵏ ⵜⵎⵖⴰⵔⵜ ⵙ ⵓⵙⵎⴰⵎⵎⵉ ⴰⵏⵣⵔⴰⴼ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵜⵉⵔⵎⵉⵜⵉⵏ. ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵔⴰⴷ ⵉⵙⵡⵓⵔⵉ ⵓⵙⴳⵔⴰⵡ ⴰⴷ, ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⴷⴰⵡⵉⵜ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⴳ ⵕⵕⴱⴰⵟ ⴷ ⵓⵖⴰⵡⴰⵙ ⵏ ⵓⵡⴰⵏⴽ ⵏ ⵓⵙⵍⴳⵏ ⴳ ⵜⵎⵏⴰⴹⵜ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵓⴳⵎⵎⵓⴹ ⴰⵏⴰⵎⵎⴰⵙ ⵉⴹⴼⵕⵏ ⵉ ⵜⵎⵔⵙⵍⵜ ⴽⵓⵏⵕⴰⴷ ⴰⴷⵉⵏⴰⵡⵕ ⴷ ⵜⴳⵔⵓⵎⵎⴰ ⵏ ⵓⵙⵍⴳⵏ ⴰⴳⵔⴰⵖⵍⴰⵏ (ARPA), (ⵔⴰⴷ ⵉⵙⵡⵓⵔⵉ) ⴳ ⵡⵓⵙⵙⴰⵏ ⵏⵏⵙ ⵙ ⴽⵕⴰⴹ ⵅⴼ ⵓⵙⵙⵉⴷⴷ ⵅⴼ ⵉⵙⴳⵓⵎⵏ ⵉⵏⴹⴼⴰⵕⵏ: "ⵉⵙⴳⴳⴷⵏ ⵏ ⵜⵣⵔⴼⵜ ⴷ ⵉⵣⵔⴼⴰⵏ ⵏ ⵜⵎⵖⴰⵔⵜ: ⵜⴰⵖⵓⵔⵉ ⵏ ⵡⴰⴷⴷⴰⴷ ⵏ ⵜⵎⵖⴰⵔⵜ"; "ⵜⵉⴱⵔⵉⴷⵉⵏ ⵏ ⵓⵡⴰⴹ ⵖⵔ ⵜⵣⵔⴼⵜ ⵉⵏⴳⵔ ⵜⴰⴳⴳⴰⵢⵉⵏⴳ ⵉⵡⴰⵏⴽⵏ ⵉⵎⵖⴰⵔⴱⵉⵢⵏ"; "ⵎⴰⵅ ⴰⵍⵍⵉⵖ ⵜⵍⴰ ⵜⵏⴱⴰⴹⵜ ⵏ ⵓⵙⵍⴳⵏ ⴰⴷⴷⵓⵔ ⵖⵔ ⵜⵡⵜⵎⵉⵏ?"; "ⵜⵉⴱⵔⵉⴷⵉⵏ ⵏ ⵓⵡⴰⴹ ⵖⵔ ⵉⵖⴰⵡⴰⵙⵏ ⵏ ⵜⵣⵔⴼⵜ ⵙ ⵓⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ".