ⵔⴰⴷ ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵓⴷⵍⵉⵙ ⵏ ⵡⴰⵣⵣⴰⵏ ⴷ ⵉⵄⵔⵔⵉⵎⵏ, ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⵉⵏⴳⵔ14 ⴷ 22 ⴷⵓⵊⴰⵏⴱⵉⵔ 2024 ⴳ ⵜⵖⵔⵎⵜ ⵏ ⵜⴳⵎⵎⵉ ⵜⵓⵎⵍⵉⵍⵜ. ⵉⵙⵡⵓⵜⵜⴰ ⵓⵙⵇⵇⵉⵎ ⵙⴳ ⵜⴷⵔⴰⵡⵜ ⵏⵏⵙ ⴳ ⵜⵙⵓⵜⵍⵜ ⴰⴷ, ⵏⵏⵉ ⵎⵉ ⵉⵙⵜⵉ ⵜⴰⵎⴰⵜⴰⵔⵜ ⵏ "ⵜⴰⴷⵔⴰⵡⵜ ⵉ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ", ⴰⴼⴰⴷ ⴰⴷ ⵢⵉⵍⵉ ⵓⵙⴷⵓⵙ ⴷ ⵓⵙⵎⵔⵙⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵙ ⵎⴰⵕⵕⴰ ⵜⵉⴼⵔⵉⵙⵉⵏ ⵏⵏⵙ, ⵙ ⵓⵙⴷⵔⵓⵡ ⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⴳ ⵜⵡⵓⵔⵉⵡⵉⵏ ⵏ ⵓⵖⴰⵡⴰⵙ ⵏ ⵜⴷⵔⴰⵡⵜ ⵏⵏⵙ ⴳ ⵜⵙⵓⵜⵍⵜ ⴰⴷ ⴷ ⵜⵙⵉⵍⴰⵡⵜ ⵏ ⵜⵓⵎⴰⵢⵉⵏ ⵏ ⵜⵉⵍⴰⵍ ⵏⵏⵙ, ⴷ ⵓⵙⵢⵉⵍⵉ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⴰⵎ ⴰⵙⵏⵜⵍ ⵏ ⵓⵎⵙⴰⵡⴰⵍ ⴷ ⵓⵎⵔⴰⵔⴰ, ⴳ ⵜⴳⵔⴰⵡⵉⵏ ⵏ ⵓⵎⴹⴰⴽⴰⵕ ⴷ ⵜⵉⵏⴰⵡⵉⵏ ⴷ ⵉⵏⵎⵓⵇⵇⴰⵔⵏ ⵕⵥⵎⵏⵉⵏ ⴷ ⵏⵖⴷ ⴳ ⵜⵉⵍⴰⵍ ⵜⵉⵏⴰⵥⵓⵕⵉⵏ ⴷ ⵜⵙⵓⵡⴰⵔ.

"ⴰⵡⵜⵜⴰⵙ ⴰⵙⵜⵔⴰⵜⵉⵊⵉ ⵏ ⵓⵙⵇⵇⵉⵎ ⵉⴳⴰ ⵜ ⴰⵙⵎⵔⵙⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ, ⵙ ⵓⵏⴰⵎⴽ ⵢⴰⴹⵏⵉⵏ ⴰⵙⴹⵕⵚ ⵏⵏⵙ ⴳ ⵓⵙⵍⴳⵏ ⵙ ⵓⵙⵔⵇⴱ ⵏⵏⵙ ⴷ ⵓⵙⵉⵜⴳ ⵏⵏⵙ ⴰⴼⴰⴷ ⴰⴷ ⴷ ⴳⵎⴰⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⴳⴰⵏⵉⵏ ⵉⵎⵙⴽⴰⵔⵏ ⴳ ⵜⵖⴰⵡⵙⴰ ⵜⴰⵎⴰⵜⴰⵢⵜ''.
ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴰⵔ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵜⴳⴰ ⵜⴷⵔⴰⵡⵜ ⵏⵏⵙ ⴳ ⵜⵙⵓⵜⵍⵜ ⴰⴷ ⴰⵣⵎⵣ ⵏ ⵓⵙⵔⵙ ⴷ ⵓⵎⴹⴰⴽⴰⵕ ⵏ ⵜⵖⴰⵡⵙⵉⵡⵉⵏ ⵉⵣⴷⵉⵏ ⵙ ⵡⴰⴷⴰⴼ ⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⵙ ⵜⵓⵙⵙⵏⴰ, ⵙ ⵎⴰⵕⵕⴰ ⵜⴰⵍⵖⵉⵡⵉⵏ ⵏⵏⵙ, ⵙ ⵜⵡⵏⴳⵉⵎⵜ ⵉⵙⵎⵓⵏⵏ ⴳⵔ ⵓⵙⵎⵀⵍ ⵙ ⵜⵎⵢⴰⴷⴰⵙⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵢⵉⵍⵉ ⵏ ⵜⵖⴰⵡⵙⵉⵡⵉⵏ ⵜⵉⵎⴰⵢⵏⵓⵜⵉⵏ ⵙ ⵉⴹⵉⵚ ⵏ ⵓⵎⵏⴰⴹ ⴰⵎⵓⵟⵟⵓⵏ.

ⴳ ⵜⵥⴰ ⵏ ⵡⵓⵙⵙⴰⵏ, ⴰⵔ ⵉⵙⵏⵖⵎⴰⵙ ⵓⵙⵇⵇⵉⵎ ⴰⵏⵎⵓⵇⵇⴰⵔ ⵉ ⵉⵏⵔⵣⴰⴼ ⵏ ⵓⵙⴰⵢⵔⴰⵔ ⵏⵏⵙ ⴰⵙⵏⵎⴰⵍⴰ ⵏ ⵜⴳⵔⵓⵎⵎⴰ ⵏ ⵉⵏⵎⵓⵇⵇⴰⵔⵏ ⴳ ⵓⴳⵏⵙ ⵏ ⵓⵙⴰⵢⵔⴰⵔ ⴷ ⴱⵕⵕⴰ ⵏⵏⵙ, ⵉⵜⵜⴰⵊⵊⴰⵏ ⴰⵣⵣⴰⵏⵏ ⴷ ⵉⵄⵔⵔⵉⵎⵏ ⴰⴷ ⵙⵉⵡⵍⵏ ⵅⴼ ⵜⴰⵏⵏⴰⵢⵉⵏ ⵏⵏⵙⵏ ⴷ ⵓⵎⵢⴰⵖ ⴰⴽⴷ ⵉⵎⵙⴽⴰⵔⵏ ⵅⴼ ⵜⵖⴰⵡⵙⵉⵡⵉⵏ ⵉⵣⴷⵉⵏ ⵙ ⵓⵙⵎⵀⵍ ⵏ ⵉⵣⵔⴼⴰⵏ ⵏⵏⵙⵏ: ⵜⵉⵙⵓⵡⴰⵔ ⵜⵉⵏⴰⵥⵓⵕⵉⵏ ⴷ ⵜⵎⵙⵡⵏⵏⵉⵜⵉⵏ ⴳ ⵢⵉⴳⵔⴰⵏ ⵏ ⵓⵙⵓⵏⵖ, ⴰⵎⵣⴳⵓⵏ, ⴷ ⵓⵙⵏⴼⵍⵓⵍ ⴰⵎⴳⵔⵓ, ⴰⵎ ⵉⵙⴰⴼⵖⵏ ⵏ ⵓⵙⵎⴷⵢⴰ ⵏ ⵜⴰⵏⵏⴰⵢⵉⵏ ⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⵅⴼ ⵜⵖⴰⵡⵙⵉⵡⵉⵏ ⵏⵏⵙⵏ ⴷ ⵉⵏⵣⴳⵓⵎⵏ ⵏⵏⵙⵏ.

ⵎⴽⴷⴰ ⵔⴰⴷ ⵉⵜⵜⵡⴰⵙⵙⴰⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵏ ⵜⵙⵓⵜⵍⵜ ⴰⴷ ⵜⵉⵙ ⵙⵏⴰⵜ ⵙ ⵓⵙⵏⵎⴰⵍⴰ ⵏ ⵜⴳⵔⴰⵡⵉⵏ ⵏ ⵓⵎⴹⴰⴽⴰⵕ ⵏⵏⵉ ⵉⵔⴰ ⵉⵙⵙⵉⴷⴷ ⵅⴼ ⵉⵙⵏⵜⴰⵍ ⴰⵎ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵥⵍⵉⵏ ⵙ ⵉⵄⵔⵔⵉⵎⵏ, ⵜⴰⴷⵔⴰⵡⵜ ⵜⴰⵖⵔⵎⴰⵏⵜ, ⵉⵣⵎⴰⵣ ⴷ ⵜⵏⵥⵕⵉⵏ ⵏ ⵜⵖⵉⵙⵜ ⵜⵉⵎⵍⵥⵉⵜ, ⵜⴰⵡⵓⵔⵉ ⵜⴰⵎⵅⴰⵙⵜ; ⴷ ⵉⵏⵎⵓⵇⵇⴰⵔⵏ ⴰⴽⴷ ⵉⵎⴰⵔⴰⵜⵏ ⴷ ⵉⵎⵥⵕⴰⴳ ⴰⴼⴰⴷ ⴰⴷ ⵕⵥⵎⵏ ⴰⵎⴹⴰⴽⴰⵕ ⵅⴼ ⵜⵉⵔⵔⴰ ⴷ ⵜⵥⵕⵉⴳⵜ ⴰⵎ ⵉⵎⵉⵙ ⵏ ⵓⵙⴷⵓⵙ ⵏ ⵓⵙⵏⴼⵍⵓⵍ ⴷ ⵡⴰⴷⴰⴼ ⵙ ⵜⵓⵙⵙⵏⴰ, ⴷ ⵓⴳⴳⴰⵔ. ⵉⵥⵍⵉ ⵓⵙⵇⵇⵉⵎ ⵉⵙⴰⵢⵔⴰⵔⵏ ⵉⵎⵢⴰⵏⴰⵡⵏ, ⴰⴼⴰⴷ ⴰⴷ ⵉⵙⵏⵎⴰⵍⴰ ⵢⵉⵍⴰⵍ ⴰⴷ ⴷⴷⴰⵡ ⵉⵙⵎⴰⵡⵏ ⵉⴽⵜⵓⵔⵏ ⵙ ⵉⴻⵔⴼⴰⵏ ⴷ ⵜⵉⵏⴷⵉⵜⵉⵏ ⴰⵎ: ⵜⴰⵎⵓⵔⵉ, ⵉⵙⴽⵉⵍ, ⵜⴰⴱⴷⴰⴷⵜ, ⴰⵙⵉⴷⴼ, ⴰⵎⵢⴰⵡⴰⴹ ⵉ ⵓⵙⵔⵇⴱ ⵏ ⵜⴷⵔⴰⵡⵜ ⵏ ⵇⴰⵃ.

ⴳ ⵜⵙⵓⵜⵍⵜ ⴰⴷ ⵜⵉⵙ ⵙⵏⴰⵜ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵓⴷⵍⵉⵙ ⵏ ⵡⴰⵣⵣⴰⵏ ⴷ ⵉⵄⵔⵔⵉⵎⵏ, ⵉⵙⵖⵣⵏ ⵓⵙⵇⵇⵉⵎ ⵜⴰⵎⵢⴰⴷⴰⵙⵜ ⵜⴰⵏⵊⵎⵓⵜ ⴰⴽⴷ ⵜⵎⵔⵙⴰⵍ ⴷ ⵜⵙⴳⴳⵯⵉⵏ ⵜⵉⴽⴰⴷⵉⵎⵉⵢⵉⵏ ⴷ ⵜⵓⵖⵔⵉⵎⵉⵏ ⵜⵉⵎⴷⵔⴰⵡⵉⵏ : ⵜⴰⴽⴰⴷⵉⵎⵉⵜ ⵜⴰⵏⵎⵏⴰⴹⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴷ ⵜⵖⵉⵡⴰⵏⵜ ⵏ ⵜⵙⴽⵍⴰ ⴱⵏ ⵎⵙⵉⴽ ⴳ ⵜⴳⵎⵎⵉ ⵜⵓⵎⵍⵉⵍⵜ, ⴷ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵓⵍⴳⵉⵏⵉⵏ ⴷ ⵜⴷⴰⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵍⵎⵓⵃⵎⵎⴰⴷⵉⵢⴰ, ⴷ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵓⵍⴳⵉⵏⵉⵏ ⴷ ⵜⴷⴰⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵊⵊⴰⴷⵉⴷⴰ, ⴷ ⵜⵎⵙⵎⵓⵏⵜ "ⴱⴰⵢⵜⵉ", ⴷ ⵜⵎⵔⵙⵍⵜ ⵉⴷⵎⴰⵊ ⵉ ⵜⵏⴼⵍⵉⵜ, ⴷ ⵜⵎⵙⵎⵓⵏⵜ "ⴳⵓⵔⴰⵔⴰ" ⵏ ⵜⵥⵓⵕⵉⵡⵉⵏ ⴷ ⵜⵓⵙⵙⵏⵉⵡⵉⵏ, ⴷ ⵡⴰⵎⵎⴰⵙⵏ ⵏ ⵓⴼⵔⴰⴳ ⴰⵏⴰⵎⵓⵏ ⵄⴱⴷⵍⵄⵣⵉⵣ ⴱⵏⵏⴰⵏⵉ ⴷ ⴱⵏ ⵙⵍⵉⵎⴰⵏ ⴷ ⴱⵔⵔⵛⵉⴷ.

ⵉ ⵓⵙⵙⴽⵜⵉ, ⵜⴳⴰ ⵜⴷⵔⴰⵡⵜ ⵢⴰⵏ ⵙⴳ ⴽⴽⵓⵥ ⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ. ⵎⵎⴽⵛⴰⵎⵏ ⴳ ⵜⵓⵎⴰⵢⵜ ⵏⵏⵙ ⴰⴽⴷ ⵉⵎⵏⵣⴰⵢⵏ ⵢⴰⴹⵏⵉⵏ ⵉⵜⵜⵓⵙⵎⴷⵢⴰⵏ ⴳ ⵡⴰⵔ ⴰⵙⵏⵓⵃⵢⵓ, ⴷ ⵓⵣⵔⴼ ⴳ ⵜⵓⴷⵔⵜ ⴷ ⵜⴳⵎⵉ, ⴷ ⵜⵖⴰⵡⵙⵉⵡⵉⵏ ⵜⵎⵓⴼⴰⵢⵉⵏ ⵏ ⵓⴼⵔⵓⵅ. ⵙ ⵎⴰⵏⴰⵢⴰ ⵉⴳⴰ ⵓⵙⵎⵔⵙⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵙⴳ ⵉⵡⵜⵜⴰⵙⵏ ⵉⵙⵜⵔⴰⵜⵉⵊⵉⵢⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵉⵜⵜⵏⵄⴰⵕ ⵅⴼ ⵓⵙⵎⵔⵙⵍ ⵏⵏⵙ, ⵉⵙⵡⵓⵔⴰ ⵅⴼ ⵓⵙⴷⵓⵙ ⵏⵏⵙ ⴳ ⵉⵎⵛⴰⵡⴰⵕⵏ ⵉⵏⵎⵏⴰⴹⵏ ⴰⴽⴷ ⵡⴰⵣⵣⴰⵏⵏ ⵉⵜⵜⵓⵙⴽⴰⵔⵏ ⴳ ⵜⵎⵏⴰⴹⵉⵏ ⵙ ⵙⵏⴰⵜ ⴷ ⵎⵔⴰⵡⵜ ⵏ ⵜⴳⵍⴷⵉⵜ ⴳ ⵓⵙⴳⴳⵯⴰⵙ ⵏ 2023.

ⴰⵏⵙⵓⴼ ⵉⵙⵓⵏⵜ ⴷ ⵉⵙⵓⵏ ⴳ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵓⴷⵍⵉⵙ ⵏ ⵡⴰⵣⵣⴰⵏ ⴷ ⵉⵄⵔⵔⵉⵎⵏ ⴳ ⵜⴳⵎⵎⵉ ⵜⵓⵎⵍⵉⵍⵜ.

ⴰⴳⴰⵎ ⵏ ⵓⵖⴰⵡⴰⵙ