ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵡⴰⵙ 03 ⴽⵟⵓⴱⵕ 2024, ⵜⴰⵙⴰⵡⵔⵜ ⵜⵉⵙ ⵙⵏⴰⵜ ⵙⴳ ⵜⵙⵓⵡⴰⵔ ⵏ ⵓⵙⵎⵓⵜⵜⴳ ⵏⵏⴰ ⵉⵙⵙⵏⵜⵉ ⵉ ⵉⵄⵔⵔⵉⵎⵏ ⴷⴷⴰⵡ ⵏ ⵜⵎⴰⵜⴰⵔⵜ "ⴰⴷ ⵏⵙⵉⵡⵍ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ" ⵏⵏⴰ ⵉⵙⵏⵎⴰⵍⴰ ⵙ ⵜⵎⴷⵔⴰⵡⵜ ⴰⴽⴷ "ⵜⵎⵚⵕⵉⵢⵜ ⵜⴰⵄⵔⵔⵉⵎⵜ ⵜⴰⴳⵔⴰⵖⵍⴰⵏⵜ" (JCI RABAT).

ⵢⵓⵡⵉ ⴷ ⵓⵙⵏⵜⵍ ⵏ ⵜⵙⴰⵡⵔⵜ ⴰⴷ ⵏⵏⴰ ⵉⵙⵙⵓⵜⵉⵢ ⵓⵙⵍⵎⴰⴷ ⴰⵎⵙⴷⴰⵡ ⴰⴷⵓⴽⵜⵓⵕ ⵎⴰⵙⵙ ⵄⵍⵉ ⴽⴰⵔⵉⵎⵉ, ⴰⴱⵔⵉⴷ ⵏ ⵜⵣⵣⵉⴳⵣⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⵙⴳ ⵜⵖⵏⵙⴰ ⵅⴼ ⵜⵙⵉⵎⴰⵏⵜ ⴰⵔ ⴰⴷⵓⵙⵜⵓⵔ ⵏ 2011.

ⵉⵙⴰⵡⵍ ⵎⴰⵙⵙ ⴽⴰⵔⵉⵎⵉ ⴳ ⵜⴳⵓⵔⵉ ⵏⵏⵙ ⵅⴼ ⵓⵎⵏⴰⴹ ⴰⵎⵣⵔⴰⵢ ⵏ ⵜⵉⵍⴰⵡⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵜⵉⵣⵉ ⴰⴷ ⴷ ⵉⵙⵔⴰⵙ ⵉⵎⵇⵇⵓⵔⵏ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴰⴽⴷ ⵜⵣⵣⵉⴳⵣⵜ ⵏ ⵓⵏⵏⵓⵕⵥⵎ ⴰⴷⵉⵎⵓⴽⵕⴰⵟⵉ ⴷ ⵓⵎⵢⴰⵖ ⵏ ⵍⵎⵖⵔⵉⴱ ⴰⴽⴷ ⵉⵙⵏⴼⵍⵓⵍⵏ ⵉⵙⵔⵜⴰⵏⵏ ⴷ ⵉⴳⵔⴰⵖⵍⴰⵏⵏ ⴷ ⵉⵙⴳⴰⵡⴰⵏⵏ.

ⵉⵙⴰⵡⵍ ⵎⴰⵙⵙ ⴽⵔⵉⵎⵉ ⴰⵡⴷ ⵅⴼ ⵜⴰⵙⵙⴰⵙⵉⵏ ⵏ ⵉⵣⵔⴼⴰⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⴳ ⵓⵏⴰⴳⵔⴰⵡ ⴰⴷⴰⵎⵙⴰⵏ ⴰⵎⴰⴹⵍⴰⵏ ⴰⵎⴰⵢⵏⵓ. ⵙⴳ ⵜⵙⴳⴰ ⵢⴰⴹⵏ, ⵉⵙⴰⵡⵍ ⵎⴰⵙⵙ ⵄⵍⵉ ⴽⴰⵔⵉⵎⵉ ⵅⴼ ⵓⴱⵔⵉⴷ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵜⵉⵍⴰⵍⵜ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ.

ⴰⴷ ⵏⵙⴽⵜⵉ ⵎⴰⵙ ⵙⵡⴰⵜⵜⵙⵏⵜ ⵜⵙⵓⵡⴰⵔ ⴰⴷ ⵏ ⵓⵙⵎⵓⵜⵜⴳ ⴰⴷ ⵙⵎⵖⵔⵏⵜ ⵜⵉⵣⵎⵎⴰⵔ ⴷ ⵜⵓⵙⵙⵏⴰ ⵏ ⵉⵄⵔⵔⵉⵎⵏ ⴷⵔⵓⵏⵉⵏ ⴳ ⵎⴰⴷ ⵉⵥⵍⵉⵏ ⵙ ⵉⵔⵎⵎⵓⵙⵏ ⵉⴷⵙⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴼⵔⴽ ⵏⵏⵙ ⵙ ⵉⵎⵙⵓⵔⴰⵙ ⴷ ⵜⵏⵥⴰⵕ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵎⴽⴷⴰ ⵙ ⵜⵜⵡⴰⵙⵙⴰⵏⵏ ⴳ ⵓⵙⵡⵉⵔ ⴰⵖⵣⵓⵔⴰⵏ.

ⴰⵎⵓⵏⵜ ⵜⵙⵓⵡⴰⵔ ⴰⴷ ⵏ ⵓⵙⵎⵓⵜⵜⴳ, ⵍⵍⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴽⵓ ⴰⵙⵙ ⵏ ⵓⴽⵡⴰⵙ ⴰⵔ 7 ⵏⵓⵡⴰⵏⴱⵉⵔ 2024, ⴳ ⵓⵙⴰⵜⵉ ⵏ ⵢⴰⵏ ⵓⵙⵏⵜⵉ ⵉⵛⵛⴰⵔⵏ ⵉⵏⴳⵔ ⵓⵙⵇⵇⵉⵎ ⴷ ⵜⵎⵙⵎⵓⵏⵜ ⵏ "ⵜⵎⵚⵕⵉⵢⵜ ⵜⴰⵄⵔⵔⵉⵎⵜ ⵜⴰⴳⵔⴰⵖⵍⴰⵏⵜ ⴳ ⵕⵕⴱⴰⵟ", ⵙⵡⴰⵜⵜⵙⵏ ⵉⵔⵉⵎ ⵏ ⵉⵄⵔⵔⵉⵎⵏ ⴳ ⵢⵉⴳⵔ ⵏ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵓⵜⵜⴳ ⵏⵏⵙⵏ ⵙ ⵉⵎⴰⵙⵙⵏ ⵉⵏⴱⵣⴰⵣⵏ ⴰⴼⴰⴷ ⴰⴷ ⴳⵉⵏ ⵉⵎⵙⴽⴰⵔⵏ ⵉⵎⵙⵙⵓⵖⵏⵏ ⴳ ⵡⴰⵎⵓⵏ ⵓⵖⵔⵉⵎ.