ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵏⵎⵓⵇⵇⴰⵔ ⵏ ⵓⵕⵥⵥⵓⵎ ⵏ ⵓⵖⴰⵡⴰⵙ ⵏ ⵓⵙⵎⵓⵜⵜⴳ ⵉ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵏⴱⴱⴰⴹⵏ ⴳ ⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⴳⵓⵎ "ⴰⴱⵕⵓⵟⵓⴽⵓⵍ ⵏ ⵉⵙⵟⴰⵏⴱⵓⵍ (ⵜⵓⵏⵖⵉⵍⵜ ⵉⵜⵜⵓⵙⵏⴼⵍⵏ): ⵜⵉⵍⴰⵍⵜ ⵏ ⵜⵙⵏⵉⵊⵊⵜ ⵜⵓⵍⴳⵉⵏⵜ ⴳ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵡⴰⵔⴰⵢ ⵙⴳⵉⵙ", ⴰⵙⵙ ⵏ ⵓⵙⵉⵏⴰⵙ 7 ⴽⵟⵓⴱⵕ 2024 ⴳ ⵕⵕⴱⴰⵟ, ⵎⴰⵙ ⵜⵍⵍⴰ ⵢⴰⵜ ⵜⵣⴷⴰⵢⵜ ⵉⴷⵓⵙⵏ ⴳⵔ ⵓⴱⵕⵓⵟⵓⴽⵓⵍ ⵏ ⵉⵙⵟⴰⵏⴱⵓⵍ ⴷ ⵜⵙⵏⵉⵊⵊⵜ ⵜⵓⵍⴳⵉⵏⵜ, ⵜⵙⵙⵉⴷⴷ ⵅⴼ ⵜⵉⵍⴰⵍⵜ ⵏⵏⵙⵏ ⵜⵓⵙⵎⵉⴷⵜ ⴳ ⵉⴳⵉ ⵏ ⵜⵣⵔⴼⵜ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⵏⴳⵉⵙⵏ ⵏ ⵓⵙⵔⴼⵓⴼⵏ.

ⴳ ⵜⴽⵛⵛⵓⵎⵜ ⵏⵏⵙ ⴳ ⵓⵣⵎⵣⵣⵓ ⵢⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ "ⴷⴰ ⵢⴰⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷⴷⵓⵔ ⴰⵅⴰⵜⴰⵔ ⵉ ⵓⵙⵏⵜⵍ ⴰⴷ", ⵜⵙⵙⵎⵜⵔ ⵎⴰⵙ ⴷⴰ ⵉⵜⵜⴰⵡⵣ ⴱⴷⴷⴰ ⵓⵙⵇⵇⵉⵎ ⵅⴼ ⵓⵙⵎⴰⵢⵏⵓ ⵏ ⵉⵙⵖⵍⴰⴼ ⵏⵏⵙ ⵅⴼ ⵓⵙⵓⵖⵏ ⵏ ⵜⵙⵖⵣⵏⵜ ⵏ ⵉⵎⴰⵙⵙⵏ ⵉⵕⵡⴰⵏ ⵉ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵓⵙⴳⴷⵍ ⵏⵏⵙ, ⵜⵙⵉⵙⴼⵉⵡ ⵅⴼ ⵡⴰⴷⴷⵓⵔ ⵏ ⵓⵙⵏⵜⵍ ⴰⴷ ⴳ ⵓⵙⴱⵓⵖⵍⵓ ⵏ ⵜⵎⵢⴰⴷⴰⵙⵉⵏ ⴷ ⵉⵎⴰⵙⵙⵏ ⵏ ⵓⴼⵔⴰⴳ ⵏ ⵜⵖⵜⴰⵙⵜ ⵜⴰⵏⴰⴼⵍⵍⴰⵜ ⴷ ⵜⵎⵅⴰⵙⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⴷ.

ⵜⵉⵏⵉ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⴱⵕⵓⵟⵓⴽⵓⵍ ⵏ ⵉⵙⵟⴰⵏⴱⵓⵍ ⵢⴰⵜ ⵜⵏⵜⴰⵎⵜ ⵜⴰⴳⵔⴰⵖⵍⴰⵏⵜ ⵉⵍⴰⵏ ⴰⴷⴷⵓⵔ ⵉⴱⵉⴷⴷⵏ ⵅⴼ ⵙⴰ ⵏ ⵉⵙⴱⴷⴰⴷⵏ ⵉⵎⵇⵇⵔⴰⵏⵏ "ⵙⴳ ⵢⵉⴽⵉⵣ ⴷ ⵓⵏⵜⴰⵎ ⵏ ⵡⴰⴷⴷⴰⴷ ⵏ ⵉⴱⵔⵔⵉⵡⵏ ⵏ ⵓⵙⵔⴼⵓⴼⵏ, ⴷ ⵓⵙⵖⵓⵏ ⵙ ⵉⵎⵏⵣⴰⵢⵏ ⵏ ⵜⵔⴰⵡⵙⴰⵏⵜ ⴷ ⵜⵙⵉⵎⴰⵏⵜ, ⴷ ⵜⵏⴼⵔⵓⵜ ⵏ ⵜⵎⴳⴳⵉⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ, ⵉⴳⵉ ⵏ ⵓⵣⵣⵔⴰⵢ ⴰⵎⵏⵏⵍⵍⵉ, ⴰⵙⵔⵓⵙ ⵏ ⵓⵎⵍⴰⵏⵉ ⵉ ⵉⴳⵉ ⵏ ⵉⵎⵙⴰⴳⴰⵔⵏ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵓⵙⴼⵔⴽ", ⵜⴳ ⵢⴰⵏ ⵓⵙⴰⵜⵉ ⴰⵙⵏⵡⴰⵢ ⵉⵜⵜⵓⵙⵖⵣⵏⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵉ ⵡⴰⵏⵏⴰⵍ ⵏ ⵉⵙⴰⴳⴳⵯⵏ ⵅⴼ ⵉⴱⵔⵔⵉⵡⵏ ⵏ ⵓⵙⵔⴼⵓⴼⵏ.

ⵜⵔⵏⵓ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⴱⵕⵓⵟⵓⴽⵓⵍ ⵏ ⵉⵙⵟⴰⵏⴱⵓⵍ ⴷ ⵜⵙⵏⵉⵊⵊⵉⵜ ⵜⵓⵍⴳⵉⵏⵜ ⵙⵏⴰⵜ ⵜⵔⵙⴰⵍ ⵜⵉⴷⵙⵍⴰⵏⵉⵏ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⴳⴰⵔ ⴰⵎⵓⴳⴳⵓ ⴷ ⵡⴰⵔⴰⵢ ⵙⴳⵉⵙⵏ ⵙ ⵉⵎⴰⵙⵙⵏ ⵏⵏⵙⵏ ⵉⵙⵏⴰⵡⴰⵢⵏ ⴷ ⵉⵎⴰⵙⵙⴰⵏⵏ, ⴰⵔ ⵜⵜⴰⵡⵙⵏ ⵙ ⵙⵉⵏ ⴳ ⵜⵏⴼⵔⵓⵜ ⵏ ⵜⵣⵔⴼⵜ ⴷ ⵓⵙⵓⵎⵓ ⵏ ⵓⵏⴳⵉⵙⵏ ⴷ ⵜⵙⵖⵣⵏⵜ ⵏ ⵜⵎⴳⴳⵉⵜⵉⵏ ⵜⵉⵏⴱⴽⴰⴹⵉⵏ ⵜⵉⵎⵜⵜⴰⵖⴰⵍⵉⵏ ⴷ ⵜⵙⵉⵎⴰⵏⵉⵏ".

ⵜⵙⴷⴷⵉⴷ ⵅⴼ ⵓⵎⵙⴰⴳⴰⵔ ⵏ ⵓⴱⵕⵓⵟⵓⴽⵓⵍ ⴷ ⵜⵙⵏⵉⵊⵊⵉⵜ ⵜⵓⵍⴳⵉⵏⵜ ⴳ ⵓⵡⵜⵜⴰⵙ ⵉⵜⵜⵓⵙⵎⴷⵢⴰⵏ ⴳ ⵜⵏⴼⵔⵓⵜ ⵏ ⵜⵣⵔⴼⵜ ⵉ ⵓⵏⴳⵉⵙⵏ ⵏ ⵓⵙⵔⴼⵓⴼⵏ ⵙ ⵓⵙⵉⵜⴳ ⴰⵎⴰⵙⵙⴰⵏ ⵏ ⵉⴱⵔⵔⵉⵡⵏ ⵏ ⵓⵙⵔⴼⵓⴼⵏ. ⵜⵙⵉⵙⴼⵉⵡ ⵎⴰⵙ ⴳⴰⵏ ⵉⵎⵙⴳⵏⴰⴼⵏ ⵓⵍⴳⵉⵏⵏ ⵢⴰⵏ ⵓⴼⵔⴷⵉⵙ ⴰⵅⴰⵜⴰⵔ ⴳ "ⵓⵏⵜⴰⵎ ⵓⵏⵖⵉⴷ ⴷ ⵓⵙⵜⴰⵍ ⴰⵎⴰⵙⵙⴰⵏ ⵏ ⵜⵎⵉⵜⴰⵔ ⵏ ⵓⵙⵔⴼⵓⴼⵏ ⵏ ⵜⴼⴳⴳⴰ ⴷ ⵢⵉⵎⴰⵏ". ⵜⵉⵏⵉ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵉⵜⵜⴰⵡⵙ ⵓⵎⵢⴰⵙⵙⴰ ⴰⴷ ⴳ ⵓⵙⵎⵏⵉⴷ ⵏ ⵡⴰⵏⵥⴰⵜⵏ ⵉⵎⴰⵙⵙⴰⵏⵏ ⵉⵎⵙⵖⴰⵔⵓⵜⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⴼⵔⴰⴳ ⵉⵏⴱⴱⴰⴹⵏ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⵏⴳⵉⵙⵏ ⴷ ⵜⵏⴼⵔⵓⵜ ⵙⴳ ⵓⴼⴼⵔⵜⵍ ⵙⴳ ⵜⵎⵔⵔⵓⵜ, ⵜⵙⵉⵙⴼⵉⵡ ⵎⴰⵙ ⴷⴰ ⵜⵙⵙⵏⴽⴰⴷ ⵜⵓⵏⵖⵉⵍⵜ ⵏ ⵓⴱⵕⵓⵟⵓⴽⵓⵍ ⵏ ⵙⵟⴰⵏⴱⵓⵍ ⵉⵜⵜⵓⵙⵏⴼⵍⵏ ⴳ ⵓⵙⴳⴳⵯⴰⵙ ⵏ 2022 ⵓⵎⵍⴰⵏ ⵉⵥⵍⵉⵏ ⵉ ⵉⵎⵙⴳⵏⴰⴼⵏ ⵓⵍⴳⵉⵏⵏ ⵎⵔⴰ ⴰⴷ ⵉⵙⴰⵏⵏ ⵉⴷⵔⵉⵣⵏ ⵏ ⵓⵙⵔⴼⵓⴼⵏ ⴷ ⵓⵙⵓⵜⴳ ⵏⵏⵙⵏ ⵙ ⵓⵏⵖⴰⴷ, ⴰⵢⵍⵍⵉ ⵉⵜⵜⵏⴼⵔⵓⵏ ⴰⵎⵓⴳⴳⵓ ⴰⵎⵜⵜⴰⵖⴰⵍ ⴷ ⵓⵎⴰⵙⵙⴰⵏ ⴰⴽⴷ ⵉⴱⵔⵔⵉⵡⵏ ⵏ ⵓⵙⵔⴼⵓⴼⵏ.

ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⵍⴳⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴰⵙⴰⵜⵉ ⴰⵎⵓⴼⴰⵢ ⵏ ⵓⵙⵙⴹⵕⵚ ⵏ ⵜⵎⴳⴳⵉⵜⵉⵏ ⵏ ⵓⵙⴱⴷⴷⵉ ⴷ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵎⵇⵇⴰⵔ ⵉⵙⵙⴰⵎⵓ ⵓⵙⴰⵜⵉ ⵏ ⵖⵉⵍⴰⴷ ⴽⵔⴰ ⵏ ⵉⵙⴱⴷⴰⴷⵏ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵙ ⴽⵔⴰ ⵏ ⵉⵙⵖⵍⴰⴼ ⵏⵏⴰ ⵉⵙⵔⵙ ⵓⵙⵇⵇⵉⵎ ⴳ ⵓⵎⵏⴰⴷ ⵏⵏⵙ, ⵣⵓⵏ ⴷ ⵉⴳⵉ ⵏ ⵢⴰⵏ ⵓⵣⵣⵔⴰⵢ ⴰⵎⵙⵏⵉⵊⵊⵉ ⴰⵡⵓⵔⵎⴰⵏ ⵖ ⴽⵓ ⴰⴱⵔⵔⵉⵡ ⵏ ⵓⵙⵔⴼⵓⴼⵏ, ⴷ ⵓⵙⵏⵖⵎⵙ ⵏ ⵓⵏⴳⵉⵙⵏ ⵙ ⵓⵣⵔⴼ ⵏⵏⵙⵏ ⴳ ⵉⴳⵉ ⵏ ⵢⴰⵏ ⵎⴰⵔ ⴰⵣⵣⵔⴰⵢ ⴰⵎⵙⵏⵉⵊⵊⵉ, ⴷ ⵓⵙⴱⴰⴱⴱ ⵏ ⵡⴰⴳⴳⵯⴰ ⵏ ⵜⵉⵍⴰⵡⵜ ⴳ ⵜⵎⵙⴰⵔⵉⵏ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ ⵉ ⵜⵏⴱⴰⴹⵉⵏ ⵉⵜⵜⵓⵙⵎⴰⴳⵍⵏ ⵙ ⵓⵣⵣⴳⵉⵔ ⵏ ⵓⵙⵍⴳⵏ ⴷ ⵡⴰⵔ ⴰⵙⴱⴰⴱⴱ ⵏⵏⵙ ⵉ ⵓⵏⴳⵉⵙⵏ.

ⵉⵇⵇⴰⵏⴷ ⴰⴷ ⵏⵙⵙⴽⵜⵉ ⵎⴰⵙ ⵙⵙⴽⵕⵥⵏ ⴰⴽⴽⵯ ⵉⵎⴷⵔⴰⵡⵏ ⵏ ⵜⵉⵏⴰⵡⵜ ⴰⴷ, ⵏⵏⴰ ⵜⵙⵏⵎⴰⵍⴰ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⵙ ⵜⵎⴷⵔⴰⵡⵜ ⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵏⴱⴽⴰⴹⵜ, ⴷ ⵙ ⵡⴰⵏⵏⴰⵍ ⵏ ⵡⴰⵎⵎⴰⵙ ⵏ ⵊⵓⵏⵉⴼ ⵏ ⵜⵏⴱⴰⴹⵜ ⵏ ⵢⵉⴳⵔ ⵏ ⵜⵏⴼⵔⵓⵜ,  ⵅⴼ ⵡⴰⴷⴷⵓⵔ ⵏ ⵓⵙⵎⵀⵍ ⵏ ⵓⴱⵕⵓⵟⵓⴽⵓⵍ ⵏ ⵉⵙⵟⴰⵏⴱⵓⵍ ⴷ ⵜⵉⵍⴰⵍⵜ ⵏ ⵜⵙⵏⵉⵊⵊⵉⵜ ⵜⵓⵍⴳⵉⵏⵜ ⴳ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵜⵏⴼⵔⵓⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵙⴽⵜⵉⵏ ⵙ ⵓⵙⵓⵖⵏ ⵏ ⵓⵙⴷⵓⵙ ⵏ ⵜⵓⴳⴳⴰⵣ ⴰⴼⴰⴷ ⴰⴷ ⵜⵉⵍⵉ ⵜⵣⵔⴼⵜ ⴷ ⵓⵙⵓⵎⵓ ⵉ ⵓⵏⴳⵉⵙⵏ ⵙ ⵓⵙⵔⵓⵙ ⵏ ⵉⵎⴰⵙⵙⵏ ⵓⵍⴳⵉⵏⵏ ⴷ ⵉⵎⴰⵙⵙⴰⵏⵏ ⵉⵎⵜⵜⴰⵖⴰⵍⵏⵏ ⵉⵜⵜⵏⴼⵔⵓⵏ ⵡⴰⵔ ⴰⴼⴼⵔⵜⵍ ⵙⴳ ⵜⵎⵔⵔⵓⵜ ⴷ ⵜⵉⵍⵉⵜ ⵏ ⵉⵙⴽⵉⵍ ⴷ ⵜⵉⵣⵉ ⵉ ⵇⴰⵃ.