![](/sites/default/files/2024-08/blagh-twdyhy-mn-almdyryt-aljhwyt-llsht-bjht-bny-mlal-khnyfrt-bkhsws-alwfyat-almsjlt-baljht-5.png)
ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵕⴰⵙ 16 ⵖⵓⵛⵜ 2024, ⴳ ⵢⴰⵜ ⵜⵉⵏⴰⵡⵜ ⵜⴰⵏⴰⵎⵓⵔⵜ ⵅⴼ "ⴰⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⴰⵎⴰⵣⵉⵖⵜ ⴳⵔ ⵜⵉⵍⴰⵡⵜ ⴷ ⵓⵙⵉⵔⵎ", ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ ⵓⵙⴰⵜⵉ ⵏ ⵓⵏⵎⵓⴳⴳⴰⵔ " ⵜⵉⴼⴰⵡⵉⵏ ⵏ ⵜⵥⵓⵕⵉⵡⵉⵏ ⵏ ⵓⵙⵓⵏ ", ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ ⵜⵎⴷⵉⵏⵜ ⵏ ⵜⴼⵔⴰⵡⵜ ⴳ ⵜⵉⵣⵉ ⵜⴰⵣⴳⵔⴰⵔⵜ ⴳⵔ 15 ⴷ 18 ⵖⵓⵛⵜ ⴰⴷ.
ⴳ ⵓⵣⵎⵣⵣⵓ ⴷⴷⵖ, ⵉⵙⴷⴷⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵢⴰⵜ ⵜⴳⵓⵔⵉ ⵍⵍⵉ ⵉⴼⴽⴰ ⵎⴰⵙⵙ ⵎⵓⵃⵎⵎⴷ ⵍⵎⵓⵄⵉⵏ, ⴰⵏⵙⵎⴰⴳⴰⵍ ⵙ ⵜⵉⵔⵔⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵇⵇⵉⵎ, ⴰⵙⵓⵖⵏ ⵏⵏⵙ ⵉⴷⵓⵙⵏ ⵙ ⵜⵏⴽⵔⴰ ⵙ ⵉⵣⵔⴼⴰⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ, ⵉⵙⴷⴷⵉⴷ ⵅⴼ ⵡⴰⵜⵉⴳ ⵏ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵓⵙⵎⵀⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔⴰⵏ ⵏ ⵓⵙⴳⵎⵉ ⴷ ⵜⵓⴷⵔⵜ ⵜⴰⵎⴰⵜⴰⵢⵜ, ⵙ ⵓⵙⵢⵉⵍⵉ ⵏ ⵎⴰⴷ ⴷ ⵉⴷⴷⴰⵏ ⴳ ⵓⵎⴰⴳⵔⴰⴷ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵓⴱⵔⵉⴷ ⵏ ⵓⵙⵎⵔⵙⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ, ⵉⴳⴰⵏ ⵙ ⵓⵣⵡⵍ " ⵙⵎⵎⵓⵙ ⵏ ⵉⵙⵔⴰⵙ ⵉⴷⵙⵍⴰⵏⵏ ⴳ ⵜⵜⵓⵙⵉⵍⴰⵡⵏⵜ ⵜⵖⵜⴰⵙⵉⵏ ⵜⵉⵏⴱⴰⴹⵉⵏ ⵉ ⵓⵙⵎⵔⵙⵍ ⵏ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ ⵜⴰⵎⴰⴷⴷⵓⴷⵜ ⴷ ⵜⵓⵙⵙⵏⴰ ⵏⵏⵙ".
ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⴳ ⵓⵎⴰⴳⵔⴰⴷ ⴰⴷ ⵎⴰⵙ ⵉⴳⴰ ⵓⴱⵓⵔⵣ ⵙ ⵜⵓⵙⵙⵏⴰ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵏ ⵓⴳⵣⵣⵓⵎ ⵓⵔ ⵉⵜⵜⵎⵣⴰⵔⴰⵢⵏ ⵅⴼ ⵓⴱⵔⵉⴷ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⵜⵙⵙⵎⵜⵔ ⵎⴰⵙ ⴷⴰ ⵉⵜⵜⵙⵎⴰⴷ ⵓⴱⵔⵉⴷ ⴰⴷ ⴰⴽⴷ ⵢⴰⵜ ⵜⴰⵏⵏⴰⵢⵜ ⵜⴰⵖⵣⵓⵔⴰⵏⵜ ⵉⵙⵡⴰⵜⵜⵙⵏ ⴰⵙⴷⵓⵙ ⵏ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ ⵜⴰⴳⵜ ⵉⴼⵔⴷⵉⵙⵏ ⴷ ⵉⵎⵓⵖⵍⵏ. ⵜⵙⵉⵙⴼⵉⵡ ⵎⴰⵙ ⵏⵣⵖⵏ ⵉⵥⵓⵕⴰⵏ ⵏ ⵜⵎⴰⵣⵉⵖⵜ ⴳ ⵜⵎⵏⴰⴹⵉⵏ ⴰⴽⴽⵯ ⵏ ⵍⵎⵖⵔⵉⴱ, ⴷ ⵎⴰⵙ ⴰⵀⴰ ⵜⴳⴰ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵏ ⵓⵎⵔⵏⵓ ⵏ ⵓⵙⴼⵓⴳⵍⵓ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⴰⵙⴳⴰⵡⴰⵏ.
ⴰⵔ ⵜⵜⴰⵏⵏⴰⵢ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ ⵉⵜⵜⵡⴰⵥⵍⴰⵢ ⵓⴱⵔⵉⴷ ⴰⴷ ⴰⵎⴰⵢⵏⵓ, ⵙ ⵢⵉⵎⵉⵥ ⵏ ⵜⴰⵎⴰⵣⵉⵖⵜ ⴷ ⵜⵓⵙⵙⵏⴰ ⵏⵏⵙ ⴰⵙⴰⵜⵉ ⴰⵎⵔⵙⴰⵍ ⵉⴼⴰⵡⵏ, ⴳ ⵓⵡⴰⵏⴽ ⴷ ⵡⴰⵎⵓⵏ, ⵙ ⵙⵎⵎⵓⵙ ⵏ ⵉⵙⵔⴰⵙ ⵉⴷⵙⵍⴰⵏⵏ, ⵜⵜⵓⵚⴽⴰⵏ ⴽⵔⴰ ⵅⴼ ⴽⵔⴰ, ⵜⵙⵡⵓⵜⵜⵙⵏ ⵎⴰⵙⵙ ⴱⵓⵄⵢⵢⴰⵛ ⴳ ⵎⴰⵢⴰ :
ⴰⵙⵔⵙ ⴰⵎⵣⵡⴰⵔⵓ : ⵉⴼⴰⵡ ⵓⵙⵔⵙ ⴰⴷ ⵙⴳ ⵜⵉⵏⴰⵡⵜ ⵜⴰⴳⵍⴷⴰⵏⵜ ⵜⴰⵎⵣⵔⴰⵢⵜ ⵏ ⴰⵊⴷⵉⵔ ⴰⵙⵙ ⵏ 17 ⴽⵟⵓⴱⵕ 2001, ⵏⵏⴰ ⵉⴳⴰⵏ ⵢⴰⵜ ⵜⴽⵍⵉⵜ ⵜⴰⵅⴰⵜⴰⵔⵜ ⴳ ⵓⵙⵎⵔⵙⵍ ⵏ ⵜⴰⵎⴰⵣⵉⵖⵜ ⵏⵏⵉ ⵉⴳⴰⵏ ⵢⴰⵏ ⵓⴳⵣⵣⵓⵎ ⴰⴷⵙⵍⴰⵏ ⵏ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ. ⴹⴼⵕⵏⵜ ⵜⵉⵏⴰⵡⵜ ⴰⴷ ⴽⵉⴳⴰⵏ ⵏ ⵜⵙⵏⵜⴰⵢⵉⵏ, ⵙⵍⴰⵡⴰⵏ ⴰⴽⴽⵯ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵏⵏⵉ ⵉⴳⴰⵏ ⵢⴰⵜ ⵜⵎⵔⵙⵍⵜ ⵉⵥⵍⵉⵏ ⵙ ⵓⵙⴱⵓⵖⵍⵓ ⴷ ⵓⴼⵔⴰⴳ ⵏ ⵜⵓⵜⵍⴰⵢⵜ ⴰⴷ ⴷ ⵜⵓⵙⵙⵏⴰ ⴰⴷ.
ⴰⵙⵔⵙ ⵡⵉⵙⵙ ⵙⵉⵏ : ⵉⵙⵙⵏ ⵓⵙⵔⵙ ⴰⴷ ⵜⵉⴳⵎⵉ ⵉⵅⴰⵜⴰⵔⵏ ⴳ ⵓⵔⵣⵣⵓ ⴰⴽⴰⴷⵉⵎⵉ ⵅⴼ ⵜⴰⵎⴰⵣⵉⵖⵜ, ⵎⴰⵢⴰ ⴰⴷ ⵢⵉⵡⵙⵏ ⴳ ⵓⵎⵓⵜⵜⵉ ⵏ ⵜⵎⴰⵣⵉⵖⵜ ⵙⴳ ⵜⴼⵔⴽⵜ ⵏ ⵜⵓⵙⵏⵜ ⵙⵔⵙ ⴰⵎⵎ ⵜⵓⵜⵍⴰⵢⵜ ⵜⴰⵏⴰⵎⵓⵔⵜ ⵙ ⵜⴼⵔⴽⵜ ⵏ ⵓⵙⵎⵔⵙ ⵏⵏⵙ ⴰⵎⵎ ⵜⵓⵜⵍⴰⵢⵜ ⵏ ⵓⵙⵍⵎⴷ ⴷ ⵜⵉⵔⵔⴰ ⴷ ⵓⴷⵉⵡⵍ ⵙ ⵓⵙⴽⴽⵉⵍ ⵏ ⵜⵉⴼⵉⵏⴰⵖ, ⴷ ⵓⵙⵉⴷⴼ ⵏⵏⵙ ⴳ ⵓⵏⴳⵔⴰⵡ ⴰⵏⵎⵍⴰⵏ ⵙⴳ ⵓⵙⴳⴳⵯⴰⵙ ⵏ 2003.
ⴰⵙⵔⵙ ⵡⵉⵙⵙ ⴽⵕⴰⴹ : ⵉⵜⵜⵡⴰⵙⵙⵏ ⵙ ⵓⵙⵖⵜⵙ ⴰⴷⵙⵜⴰⵔ ⴳ ⵓⵙⴳⴳⵯⴰⵙ ⵏ 2011, ⵏⵏⴰ ⵉⵙⴽⵔⵏ ⵙⴳ ⵜⵎⴰⵣⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵓⵡⴰⵏⴽ ⴷ ⵡⴰⵎⵓⵏ, ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵏⵏⴰ ⵉⵙⴷⵓⵙⵏ ⴰⵙⵖⵓⵏ ⵏ ⵍⵎⵖⵔⵉⴱ ⵙ ⵓⵙⴷⵓⵙ ⵏ ⵓⵎⵢⴰⵏⴰⵡ ⵏⵏⵙ ⴰⴷⵍⵙⴰⵏ ⴷ ⵓⵙⵏⵉⵍⵙ.
ⴰⵙⵔⵙ ⵡⵉⵙⵙ ⴽⴽⵓⵥ : ⵉⴼⴰⵡ ⴳ ⵓⵙⵎⵀⵍ ⵓⵣⵔⵉⴼ ⵙ ⵓⵙⵙⵓⴼⵖ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⴳ ⵓⵙⴳⴳⵯⴰⵙ ⵏ 2019, ⵉⵣⴷⵉⵏ ⵙ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙ ⴳ ⵢⵉⴳⵔⴰⵏ ⵏ ⵓⵙⵍⵎⴷ ⴷ ⵜⵓⴷⵔⵜ ⵜⴰⵎⴰⵜⴰⵢⵜ.
ⴰⵙⵔⵙ ⵡⵉⵙⵙ ⵙⵎⵎⵓⵙ : ⵉⵜⵜⵡⴰⵙⵙⵏ ⵙ ⵓⵙⵖⵜⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴰⴷ ⵉⴳ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵢⴰⵏ ⵡⴰⵙⵙ ⵏ ⵜⵏⵓⵕⵥⵎⵜ ⵜⴰⵎⴰⴷⴷⵓⴷⵜ, ⵜⴰⵙⵓⵔⵉⴼⵜ ⵜⴰⵅⴰⵜⴰⵔⵜ ⵖⵔ ⵓⵙⴷⵓⵙ ⵏ ⵓⵙⵎⵔⵙⵍ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵜⵓⵙⵏⵜ ⵙⵔⵙ ⴰⵎⵎ ⵢⴰⵏ ⵓⴳⵣⵣⵓⵎ ⵓⵔ ⵉⵜⵜⵡⴰⵥⵍⴰⵢⵏ ⵙⴳ ⵜⵎⴰⴳⵉⵜ ⵜⴰⵏⴰⵎⵓⵔⵜ.
![Description missing for this image.](https://www.cndh.ma/sites/default/files/inline-images/IMG-20240820-WA0000.jpg)
ⵜⵙⵙⵎⵜⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴳ ⵓⵎⴰⴳⵔⴰⴷ ⵏⵏⵙ ⵎⴰⵙ ⵉⵍⵍⴰ ⵓⵎⵣⴰⵔⴰⵢ ⴳ ⵓⵙⵖⵍ ⵏ ⵓⵙⵎⵀⵍ ⵏ ⵜⵙⵔⵜⴰⵢ ⵉⵣⴷⵉⵏ ⵙ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⵉⵏⴳⵔ ⵢⵉⴳⵔⴰⵏ ⵎⵣⴰⵔⴰⵢⵏⵉⵏ, ⵜⵙⵉⵙⴼⵉⵡ ⵎⴰⵙ ⴷ ⵜⵉⵏⵥⵕⵜ ⵜⴰⵎⵇⵇⵔⴰⵏⵜ ⴷ ⵓⴹⴰⴽⴰⵍ ⵏ ⵓⵣⵣⴳⵉⵔ ⴰⵎⵢⴰⴳⴰⵏ ⵏ ⵜⵙⵔⵜⴰⵢ ⴷ ⵜⵙⵏⵜⴰⵢⵉⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⵙⵙⵓⵊⴷ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵉⵥⵕⴼⴰⵏⵏ ⵉⵅⵚⵚⴰⵏ ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵎⵔⵙ ⵏⵏⵙ ⴳ ⵜⵓⴳⵜ ⵏ ⵢⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ. ⵜⵔⵏⵓ ⵎⴰⵙ ⵉⵣⵎⵔ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔⴰⵏ ⵏ ⵓⵙⵎⵔⵙ ⴰⴽⵓⵢⴰⵙⵙ ⵏ ⵓⵙⵉⵣⵡⵔ ⴰⴷ ⵉⵙⴷⴷⵔⴼ ⴰⵙⵖⵍ ⵏ ⵓⵙⵎⵀⵍ ⴰⵎⴰⴷⴷⵓⴷ ⴷ ⵓⵎⵢⴰⴳⴰⵏ ⴷ ⵜⵏⴼⵔⵓⵜ ⵏ ⵜⵎⵢⴰⴳⴰⵏⵜ ⵏ ⵓⴼⵊⵊⵉⵊ ⵏ ⵉⵎⵖⵔⵉⴱⵉⵢⵏ ⵙ ⵉⵣⵔⴼⴰⵏ ⵏⵏⵙⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ ⵓⵙⵎⵉⴷⵏ.
ⵉⵙⴰⵡⵍ ⵓⵙⵇⵇⵉⵎ ⴳ ⵜⵉⵏⴰⵡⵜ ⴰⴷ ⵅⴼ ⵜⵓⴳⴳⴰⵣ ⵉⵜⵜⵓⵙⴽⴰⵔⵏ ⴳ ⵢⵉⴳⵔ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵜⵏⵥⴰⵕ ⵍⵍⵉ ⵉⵜⵜⵎⵏⴰⵍⴰⵏ ⵎⴰⵢⴰ ⵏⵏ, ⵍⵍⵉ ⴷ ⵢⵓⵡⵉ ⴳ ⵜⴰⵏⴰⴹⵜ ⵏⵏⵙ ⴰⵙⴳⴳⵯⴰⵙ ⵏ 2023.
ⴳ ⵓⵙⴰⵜⵉ ⵏ ⵓⵙⵢⴰⴼⴰ ⵙ ⵓⵎⵄⵉⵏⵏ ⵉⵜⵜⵢⴰⵡⴰⴹⵏ ⴳ ⵢⵉⴳⵔ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵙⵙⴽⵜⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵉⵙⵖⵍⴰⴼ ⵍⵍⵉ ⴷ ⵉⴷⴷⴰⵏ ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵏ ⵓⵙⵇⵇⵉⵎ, ⵍⵍⵉ ⵉⵣⴷⵉⵏ ⵙ ⵓⵥⵍⴰⵢ ⵙ ⵓⵣⵣⵓⴳⵣ ⵏ ⵉⵙⵖⵍⴰⴼ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵍⵍⵉ ⵉⵙⵉⵙⴼⵉⵡⵏ ⴰⵜⵉⴳ ⵏ ⵜⵓⵙⵙⵏⴰ ⴳ ⵜⴳⵎⵉ ⵜⴰⵖⵣⵓⵔⴰⵏⵜ, ⴷ ⵓⵙⵎⵀⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⵓⵙⵙⵏⴰ ⵜⴰⵎⵖⵔⴰⴱⵉⵜ, ⴷ ⵜⵙⵓⵍⴰⵏⵜ ⵏ ⵓⵙⴷⵓⵙ ⵏ ⵜⵓⴳⴳⴰⵣ ⵏ ⵙⵡⴰⵜⵜⵙⵏⵉⵏ ⴰⵙⵓⴷⴻⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵓⴳⵜ ⵏ ⵢⵉⴳⵔⴰⵏ, ⴷ ⵜⵓⴽⴽⵉ ⵏ ⵓⵙⵉⵣⵡⵔ ⴰⴽⵙⵡⴰⵜ ⵉ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵣⵓⵏⵉⵡⵉⵏ ⵏ ⵓⵙⵍⵎⴷ ⴰⴷⵍⵙⴰⵏ, ⴷ ⴳ ⵢⵉⴳⵔⴰⵏ ⵉⵎⵣⵡⵓⵔⴰ ⴳ ⵜⵓⴷⵔⵜ ⵜⴰⵎⴰⵜⴰⵢⵜ, ⴰⵎⵎ ⵜⵉⵎⵙⵙⵓⴳⵓⵔⵉⵏ ⴷ ⵡⴰⵏⵙⵉⵡⵏ ⵉⵎⴰⵜⴰⵢⵏ, ⴷ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵔⵙⴰⵍⵉⵏ ⵜⵉⵏⵖⵎⴰⵙⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ, ⴷ ⵓⴳⴳⴰⵔ.