ⵉⵜⵜⵡⴰⵥⵍⴰⵢ ⵓⴱⵔⵉⴷ ⵏ ⵓⵙⵎⵔⵙⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵎⴰⴷⴷⵓⴷⵜ ⵙ ⵡⴰⵎⵎⴰⵥ ⵏ ⵜⵎⴰⵣⵉⵖⵜ ⴷ ⵜⵓⵙⵙⵏⴰ ⵏⵏⵙ ⴰⵙⴰⵜⵉ ⴰⵎⵔⵙⴰⵍ ⵉⴼⴰⵡⵏ, ⴳ ⵓⵡⴰⵏⴽ ⴷ ⵡⴰⵎⵓⵏ, ⵙ ⵙⵎⵎⵓⵙ ⵏ ⵉⵣⵔⴰⵙ ⵉⴷⵙⵍⴰⵏⵏ, ⵉⵜⵜⵓⵙⵎⴷⵢⴰⵏ  ⴳ ⵓⵙⵔⵓⵙ ⵏ ⵜⵎⴰⵣⵉⵖⵜ ⴳ ⵜⵓⵥⵥⵓⵎⵜ ⵏ ⵜⵖⵜⴰⵙⵜ ⵜⴰⵙⵔⵜⴰⵏⵜ ⴷ ⵜⵙⵉⵍⴰⵡⵜ ⵏ ⴽⵉⴳⴰⵏ ⵏ ⵜⵙⵏⵜⴰⵢⵉⵏ ⵢⵓⵡⵙⵏ ⴳ ⵓⵙⴷⵓⵙ ⵏ ⵡⴰⵏⵙⴰ ⵏ ⵜⵎⴰⵣⵉⵖⵜ, ⴷ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⵏ ⵓⵔⵣⵣⵓ ⴰⴽⴰⴷⵉⵎⵉ ⴷ ⵓⵎⵣⵔⴰⵢ ⴷ ⵓⵏⴰⵎⵓⵏ ⴼ ⵜⵎⴰⵣⵉⵖⵜ.

ⵉⵜⵜⵡⴰⵙⵙⵏ ⵓⴱⵔⵉⴷ ⴰⴷ ⴰⵡⴷ ⵙ ⵓⵙⵖⵜⵙ ⴰⴷⵓⵙⵜⵓⵔⵉ ⴳ ⵓⵙⴳⴳⵯⴰⵙ ⵏ 2011, ⵉⵙⴽⵔⵏ ⵙⴳ ⵜⵎⴰⵣⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵓⵡⴰⵏⴽ ⴷ ⵡⴰⵎⵓⵏ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵢⴰⵏ ⵓⵙⵔⵙ ⵉⵙⴷⴷⵉⴷⵏ  ⴰⵙⵓⵖⵏ ⵏ ⵍⵎⵖⵔⵉⴱ ⵉⴹⵚⴰⵏ ⵙ ⵓⵙⴷⵓⵙ ⵏ ⵓⵎⵢⴰⵏⴰⵡ ⵏⵏⵙ ⴰⴷⵍⵙⴰⵏ ⴷ ⵓⵙⴱⵓⵖⵍⵓ ⵏ ⵜⵓⵜⵍⴰⵢⵜ ⵏⵏⵙ ⵜⴰⵎⴰⵣⵉⵖⵜ ⴷ ⵓⵙⵎⵔⵙ ⵏⵏⵙ ⴳ ⵜⵓⴳⵜ ⵏ ⵢⵉⴳⵔⴰⵏ ⵏ ⵜⵓⴷⵔⵜ. ⴰⵙⴳⴳⵯⴰⵙ ⵏ 2019, ⵉⴼⴼⵖ ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⵉⵙⵡⵓⵜⵜⴰⵏ ⵜⵉⴼⵔⴽⵉⵡⵉⵏ  ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵜⵎⴰⵎⴽⵉⵏ  ⵏ ⵓⵙⵉⴷⴼ  ⵏⵏⵙ ⴳ ⵜⵓⴷⵔⵜ ⵜⴰⵎⴰⵜⴰⵢⵜ, ⵙⵍⴰⵡⴰⵏ ⴰⴽⴽⵯ ⴳ ⵉⴳⵔⴰⵏ ⵏ ⵓⵙⵍⵎⴷ ⴷ ⵜⴷⵓⵙⵉ ⴷ ⵜⵣⵔⴼⵜ ⴷ ⵜⵏⵖⵎⴰⵙⵜ.
ⵙⵎⴷⵏ ⴰⴽⴽⵯ ⵉⵙⵔⴰⵙ ⴰⴷ ⵙ ⵓⵙⵖⵜⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵅⴼ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵙⵙ ⵏ ⵜⵏⵓⵕⵥⵎⵜ ⴰⵎⴰⴷⴷⵓⴷ ⵉⵜⵜⵡⴰⴼⵔⴰⵏ ⴳ ⵓⵙⴳⴳⵯⴰⵙ 2023, ⴳ ⵢⴰⵜ ⵜⵙⵓⵔⵉⴼⵜ ⵜⴰⵎⵥⵍⴰⵢⵜ ⵉⵙⴽⵔⵏ ⵢⴰⵏ ⵓⵙⴰⵜⵉ ⵉⵥⵍⵉⵏ ⵉ ⵓⴱⵔⵉⴷ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ.

"ⴰⵙⵖⵜⵙ ⵏ ⵢⵉⵅⴼ ⵓⵙⴳⴳⵯⴰⵙ ⴰⵎⴰⵣⵉⵖ ⴳ ⵓⵙⴳⴳⵯⴰⵙ ⵏ 2023 ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵡⴰⵙⵙ ⵏ ⵜⵏⵓⵕⵥⵎⵜ ⵜⴰⵎⴰⴷⴷⵓⴷⵜ ⵉⵜⵜⵡⴰⴼⵔⴰⵏ ⵉⴳⴰ ⵢⴰⵜ ⵜⵉⵣⵉ ⵜⴰⵎⵥⵍⴰⵢⵜ ⵉⵙⵢⴰⴼⴰⵏ ⴰⴱⵔⵉⴷ ⵏ ⵓⵙⵎⵔⵙⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴷⵓⵙ ⵏ ⵓⵏⴰⵎⴽ ⵉⵜⵜⵓⵙⵎⴰⵢⵏⵓⵏ ⵉ ⵓⵙⴰⵜⵉ ⴰⵎⵢⴰⵏⴰⵡ ⵏ ⵜⵎⴰⴳⵉⵜ ⵜⴰⵏⴰⵎⵓⵔⵜ ⵜⴰⵕⵚⵍⵉⵜ ⴷ ⵜⵏⴱⵖⵓⵔⵜ ⵙ ⵜⵓⴳⵜ ⵏ ⵉⵎⵓⵖⵍⵏ ⵏⵏⵙ". ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴷ ⴳ ⵓⵙⴷⵓⵙ ⵏ ⵓⵎⵄⵉⵏⵏ ⵉⵜⵜⵡⴰⵙⴽⴰⵔⵏ ⴳ ⵢⵉⴳⵔ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵎ ⵢⴰⵏ ⵓⵙⴰⴷⴼ ⵙⴳ ⵉⵙⴰⴷⴰⴼⵏ ⵏ ⵜⵏⴽⵔⴰ ⵙ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵙⵏⵉⵍⵙ ⵏ ⵍⵎⵖⵔⵉⴱ, ⵉⵙⵙⵓⴼⵖ ⴷ ⵓⵙⵇⵇⵉⵎ ⴳ ⵜⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ (2019-2023) ⵎⵏⵏⴰⵡ ⵏ ⵉⵙⵖⵍⴰⴼ ⵉⵜⵜⵔⵏ ⴰⵣⵣⵓⴳⵣ ⵏ ⵏ ⵓⵙⴰⵜⵉⵏ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴳ ⵜⵎⵓⵔⵜ ⵏⵏⵖ ⴳ ⴰⴽⴽⵯ ⵉⴳⵔⴰⵏ. ⵙⴳ ⵉⵙⵖⵍⴰⴼ ⴰⴷ, ⴰⵣⵣⵓⴳⵣ ⵏ ⵉⵙⵖⵍⴰⴼ ⵏ ⵜⴰⵏⴰⴹⵜ ⵉⵥⵍⵉⵏ ⵙ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ, ⴰⵙⵎⵀⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵍⴰⵢⵉⵏ ⴷ ⵜⵓⵙⵙⵏⴰ ⵜⴰⵎⵖⵔⵉⴱⵉⵜ, ⴰⵙⵎⴰⴷ ⵏ ⵓⵙⴷⵓⵙ ⵏ ⵜⵓⴳⴳⴰⵣ ⵉⵡⴰⵜⵙⵏ ⴰⵙⴷⵓⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵉⵏⵎⴰⵍ ⴷ ⵜⵙⴷⴰⵡⵉⵢⵉⵏ, ⴷ ⴳ ⵜⵙⵏⴱⴹⴰⵢⵉⵏ, ⴷ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⵢⴰⴹⵏ; ⵜⵓⴽⴽⵉ ⵏ ⵓⵙⵉⵣⵡⵔ ⴰⴽⵙⵡⴰⵜ ⵉ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵓⵣⵉⵏⵉⵡⵉⵏ ⵏ ⵓⵙⵍⵎⴷ ⴰⴷⵙⵍⴰⵏ ⴷ ⴳ ⵢⵉⴳⵔⴰⵏ ⵉⵍⴰⵏ ⴰⵙⵉⵣⵡⵔ ⴳ ⵜⵓⴷⵔⵜ ⵜⴰⵎⴰⵜⴰⵢⵜ; ⴰⵙⴷⵓⵙ ⵏ ⵜⵉⵍⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵔⵙⴰⵍ ⵜⵉⵏⵖⵎⴰⵙⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ; ⴰⵃⵟⵟⵓ ⵏ ⵓⵢⴷⴰ ⴰⵎⴰⵣⵉⵖ ⴰⴽⵎⴰⵎ ⴷ ⴰⵔⴰⴽⵎⴰⵎ ⴳ ⵍⵎⵖⵔⵉⴱ ⵙ ⵢⴰⵜ ⵜⵡⵉⵍⴰ ⵜⴰⵖⵥⵓⵕⴰⵏⵜ, ⴷ ⵓⴳⴳⴰⵔ.

ⵎⴽⴷⴰ ⵉⵙⵙⴽⵕⵥ ⵓⵙⵇⵇⵉⵎ ⴳ ⵉⵙⵖⵍⴰⴼ ⵏⵏⵙ ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵉⴼⵓⴽⵙⵏ ⵉⵙⵏⵉⵍⵙⵏ ⵏ ⵉⵎⵙⵖⴰⵏⵏ ⵉⵏⴱⴹⴰⵏⵏ ⴷ ⵉⵎⵙⵙⵓⴳⵓⵔⵏ ⵏⵏⴰ ⵢⴰⴽⴽⴰⵏ ⵜⵉⵏⵓⴼⴰ ⵜⵉⵎⴰⵜⴰⵢⵉⵏ ⴳ ⵜⵎⵏⴰⴹⵉⵏ ⵉⵙⴰⵡⴰⵍⵏ ⵙ ⵜⵎⴰⵣⵉⵖⵜ, ⴷ ⴳ ⵉⵎⵙⵖⴰⵏⵏ ⵏ ⵉⵏⴱⴹⴰⵏⵏ ⴷ ⵉⵎⵙⵜⴰⵏⵏ, ⴷ ⵓⵙⵎⵀⵍ ⵏ ⵉⵎⵙⵙⵓⵖⵍⵏ ⴷⴰⵔ ⵜⵙⵏⴱⴹⴰⵢⵉⵏ, ⴷ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵜⵙⵇⵇⵉⵎⵜ ⵜⴰⵏⵎⵜⵜⴰⵜ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⵏⵏⴰ ⴷ ⵉⴼⴼⵖⵏ ⴹⴰⵕⴰⵜ ⴰⵣⵣⵔⴰⵢ ⵏ ⵜⴰⵏⴰⴹⵜ ⵜⴰⵣⵎⵣⴰⵏⵜ ⵜⵉⵙ ⴽⴽⵓⵥⵜ ⵏ ⵜⴳⵍⴷⵉⵜ ⴳ ⵓⵙⴳⴳⵯⴰⵙ ⵏ 2015 ⵉⵣⴷⵉⵏ ⵙ ⵓⵙⵡⵀⵏ ⵏ ⵡⴰⴷⴰⴼ ⵖⵔ ⵜⵓⵙⵙⵏⴰ ⴷ ⵜⵎⴰⵙⵙⴰⵏⵉⵏ ⵉ ⵇⴰⵃ, ⵙ ⵓⵢⵏⵏⴰ ⴳ ⵉⵍⵍⴰ ⵡⴰⴷⴰⴼ ⵖⵔ ⵡⴰⵏⵜⵉⵔⵏⵉⵜ, ⴷ ⵓⵣⵔⴼ ⴳ ⵜⴷⵔⴰⵡⵜ ⵜⴰⴷⵍⵙⴰⵏⵜ.