ⵉⵙⵓⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷⴰ ⵉⵙⴷⵓⵙ ⵜⵉⵣⵎⵎⴰⵔ ⵏⵏⵙ ⵅⴼ ⵜⴷⵔⴰⵡⵜ ⴳ ⵜⵏⴽⵔⴰ ⵙ ⵉⵣⵔⴼⴰⵏ ⵉⴷⵍⵙⴰⵏⵏ ⴷ ⵓⵃⵟⵟⵓ ⵏ ⵜⴰⵢⵙⵉ ⵙ ⵇⴰⵃ ⵉⵎⵓⵖⵍⵏ ⵏⵏⵙ ⴷ ⵓⵙⵖⵓⵖⵍⵓ ⵏ ⵓⵎⴹⴰⴽⴰⵕ ⵅⴼ ⵉⵙⵡⵓⴷⴷⵓⵜⵏ ⵏ ⵓⵙⵎⵀⵍ ⵏ ⵓⵙⵍⴳⵏ ⴰⵎⵙⵙⵓⴷⵙ ⵓⵟⵟⵓⵏ 26.16 ⵉⵥⵍⵉⵏ ⵙ ⵓⵙⵡⵓⵜⵜⵓ ⵏ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵎⴰⵎⴽⵉⵏ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔ ⵏ ⵓⵙⵍⵎⴷ ⴷ ⵉⴳⵔⴰⵏ ⵏ ⵜⵓⴷⵔⵜ ⵏ ⵓⵙⵉⵣⵡⵔ. ⴳ ⵓⵙⴰⵜⵉ ⴰⴷ, ⵉⴷⵔⵓ ⵓⵙⵇⵇⵉⵎ ⴳ ⵓⵏⵎⵓⵇⵇⴰⵔ ⵏⵏⴰ ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵙ ⵏ ⵓⵢⵏⴰⵙ 23 ⵎⴰⵢⵢⵓ 2022 ⴳ ⵕⵕⴱⴰⵟ, ⵙ ⵜⵎⵍⴷⴰ ⵏ ⵡⴰⵙⵙ ⴰⴳⵔⴰⵖⵍⴰⵏ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⵅⴼ ⵓⵎⵙⴰⵡⴰⵍ ⴷ ⵜⴳⵎⵉ, ⵅⴼ ⵉⵎⵔⵙⵉ “ⴰⵙⵡⵓⴷⴷⵓ ⴰⵎⴰⴷⴷⵓⴷ ⵏ ⵓⵎⵢⴰⵏⴰⵡ ⴰⵙⵏⵉⵍⵙ ⴷ ⵓⴷⵍⵙⴰⵏ”, ⴳ ⵢⴰⵜ ⵜⴳⵓⵔⵉ ⵉⵖⵔⴰ ⵜⵜ ⵙ ⵜⵎⵓⵔⴰⵢⵜ ⵎⴰⵙⵙ ⵎⵓⵃⵎⵎⴰⴷ ⵍⵎⵓⵄⵉⵏ, ⴰⵙⴰⵜⵉ ⴳ ⵓⵙⵇⵇⵉⵎ, ⵉⵙⴷⴷⵉⴷ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵏ ⵓⵙⴰⴷⴰⴼ ⵙⴳ ⵉⵙⴰⴷⴰⴼⵏ ⵏ ⵜⵏⴽⵔⴰ ⵙ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵙⵏⵉⵍⵙ ⵏ ⵍⵎⵖⵔⵉⴱ. ⵙ ⵓⵎⵢⴰⵙⵙⴰ ⴷ ⵉⵙⵡⵓⴷⴷⵓⵜⵏ ⵏ ⵓⵙⵎⵀⵍ ⵏ ⵓⵙⵍⴳⵏ ⴰⵎⵙⵙⵓⴷⵙ ⵓⵟⵟⵓⵏ 26.16, ⵢⵓⵍⵍⵖ ⵎⴰⵙⵙ ⴱⵏⵚⴰⵍⵃ ⵙ ⵡⴰⴷⴷⵓⵔ ⵏⵏⴰ ⵜⵡⵛⴰ ⵜⵏⴱⴰⴹⵜ ⵉ ⵓⵖⴰⵡⴰⵙ ⵏⵏⵙ ⵅⴼ ⵜⵎⵙⵍⴰⵢⵜ ⵜⴰⴷⵍⵙⴰⵏⵜ ⵙ ⵜⵏⴼⵔⵓⵜ ⵏ ⵓⴱⵓⵖⵍⵓ ⵏ ⵜⵎⴰⴳⵉⵜ ⵜⴰⵎⵏⵏⴰⵡⵜ ⵏ ⵍⵎⵖⵔⵉⴱ ⴷ ⵓⵙⴷⵓⵙ ⵏ ⵜⵉⵏⴷⵉⵜⵉⵏ ⵏ ⵜⵎⵓⵔⵉ ⴷ ⵓⵙⵡⵀⵏ ⵏ ⵓⵙⵉⴷⴼ ⵙ ⵉⵡⵏⵏⵉⵜⵏ ⵉⵏⴰⵥⵓⵕⵏ ⴷ ⵓⵙⵔⵇⴱ ⵅⴼ ⵓⵙⵏⴼⵍⵓⵍ, ⴷ ⵓⵣⵣⵉⴳⵣ ⵏ ⵓⵙⴰⵡⵔ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴳ ⴽⵉⴳⴰⵏ ⵏ ⵉⴳⵔⴰⵏ (ⴰⵙⵍⵎⴷ, ⵜⴰⵣⵔⴼⵜ, ⵜⴰⴷⵍⵙⴰ ⴷ ⵓⵎⵢⴰⵡⴰⴹ, ⴷ ⵉⴳⵔⴰⵏ ⵢⴰⴹⵏⵉⵏ), ⵉⵣⵎⵔ ⵓⵣⵣⵓⴳⵣ ⵏ ⵜⵎⴳⴳⵉⵜⵉⵏ ⴰⴷ ⵉⵙⴷⵓⵙ ⵉⵣⵔⴼⴰⵏ ⵉⴷⵍⵙⴰⵏⵏ ⴷ ⵓⴼⵔⴰⴳ ⵏⵏⵙⵏ. ⵎⴰⵛ ⵉⵣⵎⵎⴻⵎ ⵓⵙⵇⵇⵉⵎ ⵉⵙⴷⴷⵔⴼⵏ ⵉⵎⵣⴰⵔⴰⵢⵏ ⵉⵏⴳⵔ ⵜⵎⴰⵡⴰⵙⵉⵏ ⴳ ⵓⵔⵎⴰⵙ ⵏ ⵉⵙⴱⴷⴰⴷⵏ ⵉⴷⵙⵜⴰⵔⵏ ⴷ ⴳ ⵡⴰⵏⴰⵡⵏ ⵏ ⵓⵙⵖⵉⵡⵙ ⵉ ⵜⵎⵀⴰⵍ ⵏ ⵓⵣⵣⵓⴳⵣ ⵏⵏⵙ. ⵎⵇⵇⴰⵔ ⵜⵜⵓⴳⴰⵏⵜ ⴽⵉⴳⴰⵏ ⵏ ⵜⵓⴳⴳⴰⵙ ⴳ ⵢⵉⴳⵔ ⵏ ⵓⵙⵓⴷⴻⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵡⵉⵔ ⵓⵣⵔⵉⴼ ⴷ ⵓⵙⵡⵉⵔ ⴰⵎⵔⵙⴰⵍ ⴷ ⵓⵙⵡⵉⵔ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵉⵙⵙⵎⵜⵔ ⵎⴰⵙ ⵉⵣⵎⵎⴻⵎ ⵓⵙⵇⵇⵉⵎ ⴳ ⵜⴰⵏⴰⴹⵜ ⵏⵏⵙ, ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2021, ⵡⴰⵔ ⴰⵙⵎⵀⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⵓⵙⵙⵏⴰ ⵜⴰⵎⵖⵔⵉⴱⵉⵜ ⵏⵏⴰ ⵉⴳⴰⵏ ⵢⴰⵏ ⵙⴳ ⵉⵙⴰⵢⵔⴰⵔⵏ ⵏ ⵓⴷⵉⵡⵍ ⴷ ⵜⵖⵜⴰⵙⵜ ⴳ ⵜⵎⵙⵍⴰⵢⵉⵏ ⵜⵉⵙⵏⵉⵍⵙⵉⵏ ⴷ ⵜⴷⵍⵙⴰⵏⵉⵏ, ⵎⴽⴷⴰ ⵉⵣⵎⵎⴻⵎ ⵡⴰⵔ ⴰⵙⴰⴷⵎⵔ ⵉ ⵜⵓⵜⵜⵔⴰ ⵏ ⵉⴳⵉ ⵏ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ (ⵉⴹ ⵉⵏⵏⴰⵢⵔ) ⴰⵎⵓⴷ ⴰⵏⴰⵎⵓⵔ ⵎⵇⵇⴰⵔ ⴷ ⵉⵙⵓⵜⵔⵏ ⵏ ⴳⴳⵓⵜⵏⵉⵏ ⵏ ⵉⵙⵔⵜⴰⵏⵏ ⴷ ⵓⵖⵔⵉⵎⵏ ⴷ ⵉⵎⵓⵙⵙⴰⵏⵏ, ⴷ ⵓⵍⴰ ⵉⵏⵎⵔⴰⵏ ⵣⴷⵉⵏⵉⵏ ⵙ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ. ⴳ ⵓⵙⴰⵜⵉ ⵏ ⵓⵙⵡⵓⵔⵉ ⵏⵏⵙ ⵅⴼ ⵓⵣⵣⵓⴳⵣ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵙⵙⴼⴰⵡ ⵎⴰⵙⵙ ⴰⵏⴼⵍⵓⵙ ⴰⵎⴰⵜⴰⵢ ⵎⴰⵙ ⵉⵙⴷⵓⵙ ⵓⵙⵇⵇⵉⵎ ⴰⵎⵢⴰⵡⴰⴹ ⵏⵏⵙ ⵙ ⵜⵓⵜⵍⴰⵢⵉⵏ ⵜⵉⵎⴰⴷⴷⵓⴷⵉⵏ ⵙ ⵙⵏⴰⵜ, ⴹⴰⵕⴰⵜ ⵎⴰⴷ ⵉⵙⵡⵓⵔⵉ ⵢⴰⵏ ⵓⵙⴰⵜⵉ ⴳ ⵓⵙⵇⵇⵉⵎ ⵅⴼ ⵜⵉⵔⵔⴰ ⴷ ⵓⵙⵓⵖⵍ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵢⵓⴳⴳⴰ ⴷ ⵎⴰⵢⴰ ⵏⵏ ⵖ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⵏ ⵓⵙⵇⵇⵉⵎ ⴳ ⵡⴰⵏⵙⴰ ⵏⵏⵙ ⴰⵎⴰⴷⴷⵓⴷ ⴷ ⵡⴰⵏⵙⴰ ⵏ ⵉⵏⵥⵉ ⵏ ⵡⴰⵙⵜⴰⵢⵏ ⴷ ⵜⴰⵙⵏⵉⵡⵉⵏ ⵏ ⵓⵙⵇⵇⵉⵎ ⴳ ⵡⴰⵏⵙⵉⵡⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ. ⵅⴼ ⵓⵙⴷⵓⵙ ⵏ ⵓⵎⵄⵉⵏⵏ ⵜⵜⵡⴰⵍⴽⴰⵎⵏⵉⵏ ⴳ ⵢⵉⴳⵔ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵉⴳⴰⵏ ⵢⴰⵏ ⵓⵙⴰⴷⴰⴼ ⵙⴳ ⵉⵙⴰⴷⴰⴼⵏ ⵏ ⵜⵏⴽⵔⴰ ⵙ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵙⵏⵉⵍⵙ ⴳ ⵍⵎⵖⵔⵉⴱ, ⴰⵔ ⵉⵙⵖⵍⴰⴼ ⵓⵙⵇⵇⵉⵎ ⴳ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵏ 2021 ⵙ ⵓⵣⵣⵓⴳⵣ ⵏ ⵉⵙⵖⵍⴰⴼ ⵏ ⵜⴰⵏⴰⴹⵜ ⵉⵥⵍⵉⵏ ⵙ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵏⵏⴰ ⵉⵙⵙⴼⴰⵡⵏ ⴰⴷⴷⵓⵔ ⵏ ⵜⴷⵍⵙⴰ ⴳ ⵜⴳⵎⵉ ⵜⴰⵖⵣⵓⵔⴰⵏⵜ; ⴰⵙⵎⵀⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⵓⵙⵙⵏⴰ ⵜⴰⵎⵖⵔⵉⴱⵉⵜ; ⴰⵣⵣⵉⴳⵣ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵉⵙⵡⵓⵜⵜⵙⵏ ⴰⵙⵓⴷⴻⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵉⵏⵎⴰⵍ ⴷ ⵜⵙⴷⴰⵡⵉⵢⵉⵏ, ⴷ ⵜⵙⵏⴱⴹⴰⵢⵉⵏ ⴷ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⵢⴰⴹⵏⵉⵏ; ⴷ ⵓⴳⴳⴰⵔ. ⵉⵜⵜⵡⴰⵙⵙⵏ ⵓⵏⵎⵓⵇⵇⴰⵔ ⴰⴷ ⵙ ⵜⵉⵍⵉⵜ ⵏ ⵎⴰⵙⵙ ⴰⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵏⴼⵍⵓⵙ ⵏⵏⵙ ⴰⵎⴰⵜⴰⵢ ⴷ ⵡⵓⴷⵎⴰⵡⵏ ⵉⴽⴰⴷⵉⵎⵉⵢⵏ ⴷ ⵉⵎⵔⵙⴰⵍⵏ ⴷ ⵉⵎⵙⵎⵓⵏⵏ.
ⵉⵜⵜⵡⴰⴼⵙⴰⵔ ⴳ
