ⵜⴷⵔⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵏⴰⵙ 19 ⴱⵕⴰⵢⵕ 2024 ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵜⴰⵎⵜ ⵏ ⵓⵙⴳⵔⴰⵡ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⵏ ⵜⵣⵔⴼⵜ ⵜⴰⵏⴰⵎⵓⵏⵜ, ⵍⵍⵉ ⵉⵜⵜⵓⵙⵏⵎⴰⵍⴰⵏ ⴷⴷⵓ ⵏ ⵜⵓⴳⴳⴰⵥⵜ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⵙ ⵜⵎⴷⵔⴰⵡⵜ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ, ⴷⴷⵓ ⵏ ⵜⵎⴰⵜⴰⵔⵜ " ⵜⴰⵡⵓⵔⵉ ⴷ ⵢⵓⵙⴰⵏ ⵉ ⵜⴳⵎⵉ ⵜⴰⵙⵓⵍⴰⵏⵜ ", ⵙ ⵜⵉⵍⵉⵜ ⵏ ⵉⴳⵎⴰⵎⵏ ⵏ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ, ⴷ ⵉⴳⵏⵙⴰⵙⵏ ⵏ ⵉⵏⴳⵎⴰⵎⵏ ⵉⴷⵙⵜⴰⵔⵏ ⴷ ⵜⵙⵏⵓⵔⴰⵢⵉⵏ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵜⴷⵔⴰⵡⵜ ⵏ ⵎⵏⵏⴰⵡ ⵏ ⵉⵎⵙⴽⴰⵔⵏ ⵉⵎⵔⵙⴰⵍⵏ ⴷ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵓⵖⵔⵉⵎⵏ ⴷ ⵉⵎⵓⵣⴰⵢⵏ ⴷ ⵉⵎⵙⴷⴰⵡⵏ.

ⵉⵙⵙⵓⵜⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵜⵙⵓⵜⵍⵜ ⴰⴷ ⴰⴷ ⵉⵙⵔⵙ ⵜⵉⵎⵢⴰⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵉⵥⴹⴰⵕⵏ ⴰⴷ ⵢⵉⵍⵉ ⴳ ⵉⴳⵔ ⵏ ⵓⵙⵙⵓⵊⴷ ⴷ ⵓⵙⴱⵓⵖⵍⵓ ⵏ ⵜⵡⵓⵔⵉ ⴷ ⵢⵓⵙⴰⵏ, ⴳ ⵓⵙⵎⴽⵜⴰⵢ ⵡⴰⵍⴰ ⴰⵏⵎⴰⵎⴽ, ⵏⵏⵉ ⵉⴳⴰⵏ ⵜⴰⵏ ⵙⴳ ⵜⵔⵙⴰⵍ ⵜⵉⴷⵙⵍⴰⵏⵉⵏ ⵏ ⵓⵙⴷⵓⵙ ⵏ ⵜⵙⵉⵍⴰ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵓⵙⴷⵓⵙ ⵏ ⵉⵎⴰⵏⴰⵔⵏ ⵏ ⵓⵡⴰⵏⴽ ⴰⵏⴰⵎⵓⵏ, ⵙ ⵓⵎⵙⴰⵙⴰ ⴷ ⵜⴰⵔⴰⵜⵉⵏ ⵜⵉⴳⵍⴷⴰⵏⵉⵏ ⵜⵉⵎⴰⵜⴰⵢⵉⵏ ⵍⵍⵉ ⵉⵜⵜⴰⵏⵏⴰⵢⵏ ⵎⴰⵙ ⵉⴳⴰ ⵓⵙⴽⴰⵔ ⵏ ⵉⵙⵓⵍⴼⵏ ⵏ ⵜⵡⵓⵔⵉ ⴰⵎⵙⵙⵓⴼⵖ ⴷ ⵓⵎⵏⴼⵔⵓ ⵏ ⵡⴰⴷⴷⵓⵔ ⵢⴰⵜ ⵙⴳ ⵜⴰⵍⵖⵉⵡⵉⵏ ⵢⴰⵜⵜⵓⵢⵏ ⵏ ⵓⴼⵔⴰⴳ ⴰⵏⴰⵎⵓⵏ. ⵉⵙⵡⵓⵜⵜⵙ ⵓⵙⴳⵔⴰⵡ ⴰⴳⵔⴰⵖⵍⴰⵏ ⴰⴱⵕⵍⴰⵎⴰⵏⵉ ⴰⴷ ⵉⵙⵙⵉⴷⴷ ⵉ ⵜⵉⵍⴰⵡⵜ ⵏ ⵜⵡⵓⵔⵉ ⴷ ⵢⵓⵙⴰⵏ ⴳ ⵜⴳⵍⴷⵉⵜ, ⴷ ⵜⵎⵓⴽⵔⵉⵙⵉⵏ ⵜⵉⵎⵢⴰⵏⴰⵡⵉⵏ ⵍⵍⵉ ⴷ ⵜⴼⴼⴰⵍ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⵙⵖⴰⵍ ⵏ ⵜⴷⵔⴰⵡⵜ ⵏ ⵜⵡⵓⵔⵉ ⴷ ⵢⵓⵙⴰⵏ ⴳ ⵓⵜⴰⵎ ⵏ ⵉⵡⵜⵜⴰⵙⵏ ⵏ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵜⴰⵙⵓⵍⴰⵏⵜ, ⴳ ⵢⴰⵜ ⵜⵙⴳⴰ, ⴷ ⴰⴷ ⵉⴱⵉⴷⴷ ⵅⴼ ⵉⵎⵏⵉⴷⵏ ⵉⵎⵇⵇⵔⴰⵏⵏ ⵏ ⵜⵙⵏⵜⴰⵢⵉⵏ ⵜⵉⵏⴳⵎⵓⵜⵉⵏ ⵏⵏⵉ ⵜⵙⵙⵏ ⵜⴳⵍⴷⵉⵜ, ⴳ ⵜⵙⴳⴰ ⵢⴰⴹⵏ.

ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⴷ ⵎⴰⵙ ⵉⵜⵜⴷⵔⵓ ⵓⵙⵙⵓⵊⴷ ⵏ ⵜⵡⵓⵔⵉ ⴷ ⵢⵓⵙⴰⵏ ⴳ ⵓⵙⴷⵓⵙ ⵏ ⵓⴷⴳⴰⵔ ⴰⵏⴼⴳⴰⵏ ⴷ ⵜⵓⴹⵕⴰⵕⵜ ⵏ ⵜⵣⵔⴼⵜ ⵜⴰⵏⴰⵎⵓⵏⵜ, ⵏⵏⵉ ⵉⴳⴰⵏ ⴰⵙⵜⴰⵢ ⴰⵙⵜⵔⴰⵜⵉⵊⵉ ⵉⵙⵙⵓⵖⵏⵏ ⴰⵍⴰⵙ ⵏ ⵓⵙⵏⵎⴰⵍⴰ ⵏ ⵉⵙⵉⵣⵡⵉⵔⵏ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴰⴼⴰⴷ ⴰⴷ ⵙⵏⴰⵍⵏⵜ ⵅⴼ ⵜⵣⵣⵉⴳⵣⵜ ⵏ ⵓⴼⴳⴰⵏ ⴷ ⵓⵙⵙⵉⴷⵔⵓⵙ ⵏ ⵉⵎⵣⴰⵔⴰⵢⵏ, ⵎⴰⵢⴰ ⴷ ⵉⵙⵖⴰⵡⵙⴰ ⵙ ⵓⵙⵔⵓⵙ ⵏ ⵜⵖⴰⵔⵉⴼⵉⵏ ⵜⵉⵥⵕⴼⴰⵏⵉⵏ ⵜⵉⵅⴰⵜⴰⵔⵉⵏ ⵉ ⵓⵙⵓⵡⴰⵔ ⵏ ⵓⵎⵓⴽⵏ ⴷ ⵓⵙⵙⴰⵔⵓ ⴳ ⵓⴷⴳⴰⵔ ⴰⵏⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵓⵙⵍⵎⴷ ⴷ ⵜⴷⵓⵙⵉ, ⴷ ⵓⵙⴷⵓⵙ ⵏ ⵓⴼⵔⴰⴳ ⴰⵏⴰⵎⵓⵏ ⴳ ⵉⴼⵔⴷⵉⵙⵏ ⵏⵏⵙ ⵙ ⴽⴽⵓⵥ.

ⵜⵔⵏⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⴷⴰ ⵉⵜⵜⴰⵡⵙ ⵓⵙⵙⵓⵊⴷ ⵏ ⵓⴳⴳⴰⵔ ⵏ ⵜⵡⵓⵔⵉⵡⵉⵏ ⴷ ⵢⵓⵙⴰⵏ ⴳ ⵜⵓⴹⵕⴰⵕⵜ ⵏ ⵜⵣⵣⵉⴳⵣⵜ ⵜⴰⴷⵎⵙⴰⵏⵜ ⵉⵅⵚⵚⴰⵏ ⴰⴼⴰⴷ ⴰⴷ ⵢⵉⵍⵉ ⵓⵙⵙⵉⴷⵔⵓⵙ ⵏ ⵜⵎⵉⵜⴰⵔ ⵏ ⵥⵥⵍⴹ, ⵙⵍⴰⵡⴰⵏ ⴰⴽⴽⵯ ⴳⵔ ⵉⵙⵎⵉⵍⵏ ⴽⵓⴽⴹⵏⵉⵏ, ⵎⴽⴷⴰ ⴰⵙⵏ ⵉⵜⵜⵏⴼⵔⵓ ⵜⴰⵣⵎⵔⵜ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⴼⵔⴰⴳ ⵎⴳⴰⵍ ⵓⵙⵏⵓⵃⵢⵓ ⴷ ⵓⴷⵔⵡⵙ. ⵜⵙⵙⵎⵜⵔ ⵎⴰⵙ "ⵜⵎⵙⴰⴳⴰⵔ ⵜⵏⴼⵔⵓⵜ ⵜⴰⵏⴰⵎⵓⵏⵜ ⴷ ⵜⵡⵓⵔⵉ ⴷ ⵢⵓⵙⴰⵏ ⵙ ⵜⵡⵉⵍⴰ ⵉⴷⵓⵙⵏ, ⵉⵖ ⵉⴳⴰ ⴳ ⵜⵏⴼⵔⵓⵜ, ⴷ ⵓⵙⴼⵍⵙ ⵏ ⵜⴰⵔⵡⵓⵔⵉ, ⴷ ⵜⵏⴰⴼⵜ ⴷ ⵜⴳⴳⴰⵥⵜ ⵜⴰⴷⵓⵙⴰⵏⵜ, ⴷ ⵓⴼⵔⴰⴳ ⵎⴳⴰⵍ ⵏ ⵉⵎⵉⵣⴰⵏ ⵉⵥⵕⴼⴰⵏⵏ, ⴷ ⵓⵙⴷⵓⵙ ⵏ ⵜⵎⵙⵓⵜⴰⵍ ⴷ ⵢⵓⵙⴰⵏ ⵉ ⵜⵡⵓⵔⵉ ⴷ ⵢⵓⵙⴰⵏ, ⴷ ⵜⵏⴼⵔⵓⵜ ⵏ ⵓⵙⵙⵓⵊⴷ ⵏ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵇⴰⵃ ⵉⵙⵎⵉⵍⵏ ⵏ ⵉⵎⵡⵓⵔⵉⵏ, ⵉⴼⴰⵡ ⵓⵣⴷⴰⵢ ⴰⴷ ⵅⴼ ⵜⵎⵉⵜⴰⵔ ⵏ ⵜⴳⵎⵉ ⵏ ⴽⵔⴰⵢⴳⴰⵜ ⵜⵎⴰⵣⵉⵔⵜ".

"ⴰⵙⵙⵓⵊⴷ ⵏ ⵜⵡⵓⵔⵉ ⵉⵖⵓⴷⴰⵏ ⴷ ⵜⵓⵚⴽⴰ ⵏ ⵓⴷⴳⴰⵔ ⴰⵏⴼⴳⴰⵏ ⵉⴷⴷⴳ ⵉⴳⴰ ⵢⴰⵏ ⵙⴳ ⵉⵎⵙⴰⵔⴰⵙⵏ ⵏ ⵜⵣⵔⴼⵜ ⵜⴰⵏⴰⵎⵓⵏⵜ, ⵏⵏⴰ ⵉⴱⵉⴷⴷⵏ ⵙ ⵓⵙⵓⵖⵏ ⵅⴼ ⵓⵏⵀⵍⵍⴰ ⵏ ⵡⴰⴷⴷⵓⵔ ⵏ ⵓⴼⴳⴰⵏ, ⵏⵏⴰ ⵓⵔ ⵉⴳⵉⵏ ⵢⴰⵜ ⵜⴳⵓⵔⵉ ⵏ ⵜⴼⵍⵙⴰⴼⵜ ⵜⴰⵡⵏⴳⵉⵎⵜ, ⵎⴰⵛⴰ ⵉⵙⵏⴰⵎⴽ ⵙ ⵢⴰⵏ ⵡⴰⵍⵓⴳ ⵏ ⵡⴰⴳⴳⵯⴰⵜⵏ ⴰⵣⵔⴼⴰⵏ ⴰⵖⵣⵓⵔⴰⵏ  ⵓⵙⵎⵉⴷ ⵓⵔ ⵉⵣⵎⵔⵏ ⴰⴷ ⵉⵜⵜⵡⴰⴱⴹⴰⵡ", ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

 ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵜⵜⵡⴰⵥⵍⴰⵢ ⵓⴳⴰⴷⴰⵣ ⵏ ⵜⵡⵓⵔⵉ ⴰⵏⴰⵎⵓⵔ ⵙ ⵜⵓⴳⵜ ⵏ ⵜⵡⵓⵔⵉ ⵜⴰⵔⵓⵚⴽⵉⵡⵜ, ⵏⵜⵜⴰⵜ ⴷ ⵜⵡⵓⵔⵉ ⵉⵍⵎⴹⵏ ⵉⵜⵜⴰⵎⵥⵏ ⵜⵉⵖⵔⴰⴷ ⵉⴳⴳⵓⵎⵔⴰⵏ, ⵜⴻⵜⵜⵡⴰⵙⵙⴰⵏ ⵙ ⵉⵎⵣⴰⵔⴰⵢⵏ ⵉⵎⵇⵇⵔⴰⵏⵏ ⴳ ⵓⵙⵡⵉⵔ ⵏ ⵓⵟⵟⵓⵏ ⵏ ⵜⵙⵔⴰⴳⵉⵏ ⵏ ⵜⵡⵓⵔⵉ ⴷ ⵜⵖⵔⴰⴷ ⴷ ⵓⴼⴰⵔⵙ, ⵎⴰⵢⴰ ⴷ ⴰⴷ ⵉⵙⴳⴷⴰⵍⵏ ⵉⵙⵎⵉⵍⵏ ⴳⴳⵓⵜⵏⵉⵏ ⵏ ⵉⵏⵎⵓⵔⴰⵏ ⴰⴷ ⴼⵊⵊⵉⵊⵏ ⵙ ⵓⵣⵔⴼ ⵏⵏⵙⵏ ⴳ ⵜⵡⵓⵔⵉ ⴷ ⵢⵓⵙⴰⵏ ⵉⴼⵔⴰⴳⵏ ⴰⴷⴷⵓⵔ ⵏⵏⵙⵏ, ⵙⵍⴰⵡⴰⵏ ⴰⴽⴽⵯ ⵜⵉⵡⵜⵎⵉⵏ ⴷ ⵉⵄⵔⵔⵉⵎⵏ, ⴷ ⵓⵍⴰ ⴽⵉⴳⴰⵏ ⵏ ⵉⵙⵎⵉⵍⵏ ⵏ ⵉⵎⵣⵡⴰⴳⵏ ⵍⵍⵉ ⵉⵏⵎⵔⴰⵏ ⵙⴳ ⵓⴽⵓⴽⴹ ⴰⴳⵜⵉⵎⵏⵉⴷⵏ.

ⴳ ⵜⵙⴳⵓⵔⵉ ⵏⵏⵙ ⵅⴼ ⵉⴼⵔⴷⵉⵙⵏ ⵏ ⵜⴳⵎⵉ, ⵜⵙⵙⴼⴰⵡ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ ⴷⴰ ⵜⵜⵉⵍⵉ ⵜⵎⵢⴰⴳⴰⵏⵜ ⵏ ⵜⵡⵓⵔⵉ ⴷ ⵢⵓⵙⴰⵏ ⵙ ⵓⵙⵉⴷⴼ ⵏⵏⵙ ⴰⵎ ⵓⴼⵔⴷⵉⵙ ⵏ ⵜⴳⵎⵉ ⴷ ⵢⴰⵏ ⵙⴳ ⵉⵏⴰⵡⴰⵢⵏ ⵏ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ, ⵙ ⵓⵙⵙⵓⵊⴷ ⵏ ⵜⵏⴼⵔⵓⵜⵉⵏ ⵜⵉⵣⵔⴼⴰⵏⵉⵏ ⴷ ⵜⵏⴰⵎⵓⵏⵉⵏ ⵍⵍⵉ ⵉⴼⵔⴰⴳⵏ ⵉⵣⵔⴼⴰⵏ ⵏ ⵉⵎⵡⵓⵔⵉⵏ ⴰⵡⵙⵏⵜ ⴳ ⵓⵙⴷⵓⵙ ⵏⵏⵙ, ⴷ ⵙ ⵓⵙⵙⵓⵊⴷ ⵏ ⵜⴼⴰⴷⵉⵡⵉⵏ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵜⵉⵏⴱⵣⴰⵣⵉⵏ ⵉ ⵓⵙⴱⴷⴷⵉ ⵏ ⵇⴰⵃ ⵜⵡⵉⵍⴰⵜⵉⵏ ⵏ ⵓⵙⵏⵓⵃⵢⵓ ⵣⴷⵉⵏⵉⵏ ⵙ ⵡⴰⵏⴰⵡ ⴰⵏⴰⵎⵓⵏ, ⴷ ⵜⵓⴹⵕⴰⵕⵜ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⴼⵔⴽⴰⵏⵜ. ⵜⵔⵏⵓ ⵎⴰⵙ ⴷ "ⵉⵖ ⵉⵣⴷⵉ ⵓⵙⴽⴽⵉⵏ ⵙ ⵜⵎⵖⴰⵔⵉⵏ ⵏⵉⵖ ⵉⵄⵔⵔⵉⵎⵏ, ⵉⵖ ⵓⵔ ⵍⵍⵉⵏⵜ ⵜⵎⵙⵓⵜⴰⵍ ⵏ ⵜⵡⵓⵔⵉⵡⵉ ⴷ ⵢⵓⵙⴰⵏ ⵏⵖⴷⴷ ⵓⵔ ⴰⵙⵏ ⵍⵍⵉⵏ ⵉⵙⵓⵍⴼⵏ ⵏ ⵜⵡⵓⵔⵉ ⵜⵉⵏⵥⵕⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⵎⴽⴷⴰ ⵙⴷⴷⵉⴷⵏⵜ ⵜⴰⵏⴰⴹⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵍⵉⵖ ⵣⴷⵉⵏⵜ ⵉⵙⵎⵉⵍⵏ ⴰⴷ ⵙ ⵙⵉⵏ ⵙ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⵏ ⵜⵉⵍⴰⵍⵜ ⵏⵏⵙⵏⵜ ⴳ ⵡⴰⵏⵏⴰⵍ ⵏ ⵓⵙⵕⵚⵚⴰ ⴰⵏⴰⵎⵓⵏ ⴷ ⵜⴳⵎⵉ ⵜⴰⵙⵓⵍⴰⵏⵜ".

ⵉ ⵓⵙⴽⵜⵉ, ⵔⴰⴷ ⵎⵔⴰⵔⴰⵏⵜ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⴷ ⴽⵉⴳⴰⵏ ⵏ ⵉⵙⵇⵙⵉⵜⵏ ⴷ ⵜⵎⵓⴽⵔⵉⵙⵉⵏ ⵍⵍⵉ ⴷ ⵉⵣⴷⵉⵏ ⵙ ⵓⵙⵏⵜⵍ, ⵙ ⵓⵙⵏⵜⵓ ⵅⴼ ⵜⵖⵓⵔⵉ ⵏ ⵓⵎⵢⴰⵙⵙⴰ ⴰⵎⵢⴰⵖ ⵏⴳⵔ ⵜⵡⵓⵔⵉ ⴷ ⵢⵓⵙⴰⵏ ⴷ ⵜⴳⵎⵉ ⵜⴰⵙⵓⵍⴰⵏⵜ ⴳ ⵍⵎⵖⵔⵉⴱ. ⵎⴽⴷⴰ ⵔⴰⴷ ⵉⵎⵔⴰⵔⴰ ⵓⵙⴳⵔⴰⵡ ⵅⴼ ⵙⵉⵏ ⵉⵙⴳⵓⵎⵏ ⵉⴷⵙⵍⴰⵏⵏ ⵉⵎⵎⵣⴷⵉⵏ ⵙ ⵓⵙⵎⴰⴷ ⴷ ⵓⵙⵓⵖⵏ ⵏ ⵜⵡⵓⵔⵉ ⴷ ⵢⵓⵙⴰⵏ ⴰⴽⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⴷ ⵉⵏⴰⵎⵓⵔⵏⵏ, ⴷ ⵜⵏⵥⴰⵕ ⵏ ⵓⵙⵖⵔⵜ ⴷ ⵓⵙⵉⴷⴼ ⵏ ⵜⴷⴰⵎⵙⴰ.