ⵉⵙⵖⵍⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵖⴰⵡⵍ ⵏ ⵜⴱⵔⵉⴷⵜ ⵏ ⵜⵙⵖⵣⵏⵜ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵉⵙⵏⴼⴰⵍⵏ ⴷ ⵉⵙⵎⴰⴷⵏ ⴰⵙⵍⴳⵏ ⵓⵟⵟⵓⵏ 28.00 ⴰⵔ ⵉⵇⵇⴰⵔ ⵙ ⵓⵙⵙⴰⵎⵓ ⵏ ⵉⵄⵔⵔⵉⵎⵏ ⴳ ⵜⵓⴳⴳⴰⵙ ⵏ ⵜⵏⴼⵔⵓⵜ ⵏ ⵜⵡⵏⵏⴰⴹⵜ ⵉⵣⴷⴷⵉⴳⵏ. ⵉⴷⴷⴰ ⴷ ⵎⴰⵢⴰ ⵏⵏ ⴳ ⵓⵙⴰⵜⵉ ⵏ ⵜⴷⵔⴰⵡⵜ ⵏ ⵓⵙⵇⵇⵉⵎ, ⴰⵙⵙ ⵏ ⵓⵙⵉⵎⵡⴰⵙ 11 ⵎⴰⵕⵚ 2022, ⵙ ⵜⴳⵏⵙⴰⵙⵜ ⵏ ⵎⴰⵙⵙ ⵎⵚⵟⴰⴼⴰ ⵍⵎⵕⵉⵥⵇ, ⴰⴳⵎⴰⵎ ⵏ ⵓⵙⵇⵇⵉⵎ, ⴳ ⵜⵡⵓⵔⵉⵡⵉⵏ ⵏ ⵓⵎⵙⴰⵡⴰⵍ ⴰⵎⵢⴰⵖ ⴰⴽⴷ ⵓⵏⴽⴽⴰⴹ ⴰⵎⵥⵍⵉ ⵉⵏⵜⴰⵢⵏ ⵙ ⵜⵎⵙⵍⴰⵢⵜ ⵏ ⵜⵎⵔⵉⵙⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵣⴷⵉⵏⵉⵏ ⵙ ⵓⴼⵊⵊⵉⵊ ⵙ ⵜⵡⵏⵏⴰⴹⵜ ⵜⴰⵏⴼⵔⵓⵜ ⴷ ⵜⵎⵣⴷⴰⴳⵜ ⴷ ⵜⴷⵓⵙⴰⵏⵜ ⴷ ⵜⵙⵓⵍⴰⵏⵜ, ⵉⵜⵜⵓⵙⵏⵎⴰⵍⴰⵏ ⴳ ⵓⵙⴰⵜⵉ ⵏ ⵜⵙⵓⵜⵍⵜ 49 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ. 

ⴳ ⵓⵎⵢⴰⵖ ⵏⵏⵙ ⴳ ⵜⵓⴳⴳⵓⴳⵜ ⴰⴽⴷ ⵓⵏⴽⴽⴰⴹ ⴰⵎⵥⵍⵉ, ⵢⵓⵍⵖ ⵓⵙⵇⵇⵉⵎ ⵙ ⵜⵓⵙⵏⵜ ⵏ ⵜⵎⵜⵜⴰ ⵉⵎⵓⵏⵏ ⵙ ⵓⵣⵔⴼ ⴳ ⵜⵡⵏⵏⴰⴹⵜ ⴰⴷ ⵉⴳ ⵢⴰⵏ ⵓⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ, ⵢⵓⵍⵖ ⵙ ⵜⵙⵏⴰⵡⴰⵢⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⴼⵙⵏⴰ ⵜⵉⵙⵙ ⴽⴽⵓⵥⵜ ⴳ ⵎⴰⴷ ⵉⵣⴷⵉⵏ ⵙ ⵜⵡⵓⵔⵉ ⵏⵏⵙ ⵅⴼ ⵓⵏⵣⵡⵉ ⴳ ⵓⵙⵡⵉⵔ ⴰⵎⴰⴹⵍⴰⵏ. ⴹⴰⵕⴰⵜ ⴰⵙⴱⵔⵔⴽ ⵙ ⵜⵓⴳⴳⴰⵙ ⵏⵏⴰ ⵉⵜⵜⵓⴳⴰⵏ ⴳ ⵓⵙⵡⵉⵔ ⴰⵏⴰⵎⵓⵔ ⴳ ⵢⵉⴳⵔ ⴰⴷ, ⵍⵓⵎⴰⵕ ⵜⴰⵙⵖⵣⵏⵜ ⵏ ⵓⵙⵍⴳⵏ ⵓⵟⵟⵓⵏ 49.17 ⵉⵣⴷⵉⵏ ⵙ ⵓⵙⵓⵜⴳ ⴰⵡⵏⴹⴰⵏ, ⵉⵏⵏⴰ ⵎⴰⵙⵙ ⵍⵎⵕⵉⵥⵇ ⵎⴰⵙ ⵉⵙⵓⵍ ⴷⴰ ⵉⵎⴷⴰⵢ ⴰⵣⵔⴼ ⴳ ⵜⵡⵏⵏⴰⴹⵜ ⵣⴷⴷⵉⴳⵏⵉⵏ, ⵙ ⴽⵉⴳⴰⵏ ⵏ ⵜⵎⴳⴳⵉⵜⵉⵏ, ⵣⵓⵏⴷ, ⴰⵏⵄⴰⵕ ⵏⵏⵙ ⴷⴰⵔ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⵃⵎⴰ ⴰⴷ ⴳⵏⵜ ⴰⴳⴷⴷⵓⵍ ⵏ ⵓⵙⵔⵓⵙ ⵏ ⵢⴰⵏ ⵓⵙⵔⵙ ⵏ ⵓⴼⵕⴰⴹ ⵉⴳⴳⵉ ⵏ ⵢⴰⵜ ⵜⵎⵏⴰⴹⵜ ⵜⴰⴽⵔⵣⴰⵏⵜ ⵉⵍⴰⵏ ⴽⵉⴳⴰⵏ ⵏ ⵜⵔⴰⵔⵓⵜ, ⴷ ⵓⴳⴳⴰⵔ.

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⴽⴽⴰ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ, ⵉⴱⵔⵔⵃ ⴰⵙⵙ ⵏ ⵓⵙⵉⵎⵡⴰⵙ 8 ⴽⵟⵓⴱⵕ 2021, ⵎⴰⵙ ⵉⴳⴰ ⵓⴼⵊⵊⵉⵊ ⵙ ⵜⵡⵏⵏⴰⴹⵜ ⵜⴰⵎⵣⴷⴰⴳⵜ ⴷ ⵜⵏⴼⵔⵓⵜ ⴷ ⵜⵙⵓⵍⴰⵏⵜ ⵢⴰⵏ ⵓⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ. 

ⵉⵖⵔ ⵓⵙⵇⵇⵉⵎ ⴳ ⵜⵖⵜⴰⵙⵜ ⵏⵏⵙ ⵓⵟⵟⵓⵏ 13/48 ⵉ ⵇⴰⵃ ⵉⵡⴰⵏⴽⵏ ⵏ ⵓⵎⴰⴹⴰⵍ ⵃⵎⴰ ⴰⴷ ⵙⵡⵓⵔⵉⵏ ⴰⴽⴽⵯ, ⴰⴽⴷ ⵜⵓⴳⵜ ⵏ ⵉⵎⴳⴳⴰⵢⵏ, ⵃⵎⴰ ⴰⴷ ⵙⵙⴰⴳⴳⵓⵣⵏ ⴰⵣⵔⴼ ⴰⴷ ⵙ ⵜⵉⵍⵍⴰⵡⵜ, ⴼⵊⵊⵉⵊⵏ ⵙⵉⵔⵙ ⵉⵎⵣⴷⴰⵖⵏ ⵏ ⵓⵎⴰⴹⴰⵍ ⴰⵎ ⴰⴽⴽⵯ ⵉⵣⵔⴼⴰⵏ ⵏ ⵓⴼⴳⴰⵏ ⵉⵖⵣⵓⵔⴰⵏⵏ. ⵜⴻⵜⵜⵓⵙⵖⵣⵏ ⵜⵖⵜⴰⵙⵜ ⴰⴷ, ⵏⵏⴰ ⵉⵙⵓⵎⵔ ⵍⵎⵖⵔⵉⴱ ⴷ ⴽⵓⵙⵜⴰⵕⵉⴽⴰ ⴷ ⵜⴳⵣⵉⵔⵉⵏ ⵏ ⵍⵎⴰⵍⴷⵉⴼ ⴷ ⵙⵍⵓⴼⵉⵏⵢⴰ ⴷ ⵙⵡⵉⵙⵔⴰ, ⵙ ⵜⵓⴳⵜ ⵏ 43 ⵏ ⵓⵙⵜⴰⵢ.