ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵡⴰⵙ 16 ⵎⴰⵕⵚ 2023 ⴳ ⵊⵓⵏⵉⴼ, ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⵏⴰⵍⴰ ⵏ ⵉⵏⴰⵥⴰⵕⵏ ⵉⵎⴰⴹⵍⴰⵏⵏ ⴱⴰⵀⵔⴰ ⴽⵔⵙⵏⵉⵏ. ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵍⵍⵉⴳ ⵜⵙⵙⵉⵅⴼ ⵜⴰⵙⵎⵓⵏⵉ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⵍⴰ ⵓⵙⴷⵓⵙ ⵏ ⵜⵏⵙⵉⵎⴰⵏⵜ ⵏ ⵜⵎⵔⵙⴰⵍ ⴰⴷ ⵢⴰⵏ ⵡⴰⴷⴷⵓⵔ ⵓⵙⵍⵉⴷ ⴰⴼⴰⴷ ⴰⴷ ⴳⵏⵜ ⵜⵉⵍⴰⵍⵜ ⵏⵏⵙⵏⵜ ⵜⴰⵏⴰⵎⵎⴰⵙⵜ ⴳ ⵓⵙⵡⵉⵏⴳⵎ ⴳ ⵉⴼⵙⵙⴰⵢⵏ ⵕⵡⴰⵏⵉⵏ ⴷ ⵉⵎⴳⵔⵓⵜⵏ ⵉⴱⴷⴷⵏ ⵅⴼ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵎⵏⴰⴹ ⵏ ⵜⵡⵓⵔⵉ ⵏⵏⵙ ⴰⴽⴷ ⵜⵎⵔⵙⴰⵍ ⴷ ⵜⵎⴰⴷⴷⴰⵙⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵎⵙⵙⵏⵜⵉⵢⵉⵏ ⴷ ⵜⵙⴷⴰⵡⵉⵢⵉⵏ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ.

ⵜⵉⵏⵉ ⵎⴰⵙⵙⴰ ⴱⵓⵄⵢⵢⴰⵛ, ⵏⵏⵉ ⵉⴳⴰⵏ ⵜⴰⵎⴰⵔⵉⵜ ⵏ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ, ⵎⴰⵙ ⴳⴰⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⵉⵎⵉⵙ ⵏ ⵓⵙⵖⴹⴼ ⵙ ⵜⵕⵥⵉⵢⵉⵏ ⴷ ⵉⵎⵉⵙ ⵏ ⵜⵖⴹⴼⵜ ⵉ ⵓⵙⴷⵓⵙ ⵏ ⵉⵣⵔⴼⴰⵏ, ⵎⴰⵛ ⵜⵏⵏⴰ ⵎⴰⵙ, ⴰⵔ ⵖⵉⵍⴰⴷ, ⵙⴳ 193 ⵏ ⵓⵡⴰⵏⴽ ⴰⴳⵎⴰⵎ ⴳ ⵜⵎⵜⵜⴰ ⵉⵎⵓⵏⵏ, 89 ⴷⴰⵢ ⴰⴷ ⵉⴳⴰⵏ ⵜⵉⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵎⵙⴰⵙⴰⵏ ⵙ ⵜⵡⵉⵍⴰ ⵉⵙⵎⴷⵏ ⴰⴽⴷ ⵉⵎⵏⵣⴰⵢⵏ ⵏ ⴱⴰⵔⵉⵙ "ⴰⵙⵎⵉⵍ ⵢⴰ".

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵔⴰⴷ ⵜⵣⴷⵉ ⵜⴰⴹⴰ ⵜⴰⵎⴰⴹⵍⴰⵏⵜ ⵜⴰⵡⵓⵔⵉ ⴰⴽⴷ ⵉⵥⵟⵟⴰⵜⵏ ⵉⵙⴳⴰⵡⴰⵏⵏ ⴷ ⵓⵖⴰⵡⴰⵙ ⵏ ⵜⵎⵜⵜⴰ ⵉⵎⵓⵏⵏ ⴰⵏⴳⵎⵓ ⴷ ⵜⵙⵎⵉⵔⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴷⵔⴰⵡⵏ ⵢⴰⴹⵏⵉⵏ ⵃⵎⴰ ⴰⴷ ⵉⵏⵏⴰⵍ ⵉⵙⴱⵓⵖⵍⵓ ⵜⵉⵣⵎⵎⴰⵔ ⵏ ⵉⴳⵎⴰⵎⵏ ⵏⵏⵙ, ⵜⵉⵍⵉ ⵜⵏⴼⵔⵓⵜ ⵏ ⵜⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵡⵉⵍⴰ ⵜⴰⵏⵙⵉⵎⴰⵏⵜ ⵉⵕⵡⴰⵏ ⴰⴼⴰⴷ ⴰⴷ ⵜⵜⵓⵙⴷⵓⵙⵏ ⵜⵜⵡⴰⴼⵔⴰⴳⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ, ⵙ ⵓⵎⵙⴰⵙⴰ ⴰⴽⴷ ⵜⵙⵜⵔⴰⵜⵉⵊⵉⵜ ⵏⵏⵙ. 

ⵜⴰⵍⵍⵖ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵙ 75 ⵏ ⵓⵙⴳⴳⵯⴰⵙ ⵅⴼ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ 30 ⵏ ⵓⵙⴳⴳⵯⴰⵙ ⵅⴼ ⵉⵎⵏⵣⴰⵢⵏ ⵏ ⴱⴰⵔⵉⵙ, ⵓⵎⵄⵉⵏⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵢⵓⵡⵙⵏ ⴳ ⵓⵙⴷⵓⵙ ⵏ ⵓⵏⴱⴰⴷ ⵏ ⵓⵙⵍⴳⵏ ⴷ ⵓⵙⴱⵓⵖⵍⵓ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴱⵔⵔⵃ ⵎⴰⵙ ⵜⵓⵙⵉ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵙⵉⵏ ⵉⵙⵖⵏⵓⵜⵏ ⵉⴽⵙⵡⴰⵜⵏ, ⵜⵏ ⵉⴳⴰⵏ ⴷ ⵓⵙⵙⵉⴷⴼ ⵏ ⵉⵙⵏⴼⵍⵏ ⵅⴼ ⵓⵏⴰⴳⵔⴰⵡ ⴰⴷⵙⵍⴰⵏ ⵃⵎⴰ ⴰⴷ ⵣⵎⵔⵏⵜ ⵜⵎⵔⵙⴰⵍ ⴰⴷ ⵜⵜⴳⴳⴰⵏⵜ ⴰⵙⵎⴰⵎⵎⵉ ⴰⵔⵏⵣⵔⴰⴼ ⵉ ⵓⵏⴳⵉⵙⵏ, ⴷ ⵜⵙⵖⵣⵏⵜ ⵏ ⵓⵖⴰⵡⴰⵙ ⵏ ⵜⵙⵜⵔⴰⵜⵉⵊⵉⵜ ⵏ ⵜⵡⵓⵔⵉ ⵏⵏⵉ ⵉⵜⵜⴰⵡⵙⵏ ⴳ ⵓⵙⵎⴽⵍ ⵏ ⵜⵎⵙⴰⵔⵉⵏ ⵜⵉⵎⴰⵢⵏⵓⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. 

ⵙ ⵓⵣⴷⴰⵢ ⴷ ⵉⵏⴰⵥⴰⵕⵏ ⵏⵏⵉ ⵜⵜⵎⵏⴰⵍⴰⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴳⴳⵓⴷⵉⵢⵏ ⵉⵏⴰⵥⴰⵕⵏ ⴰⴷ, ⴽⵔⵙⵏ ⵓⴳⴳⴰⵔ, ⴰⵎ ⵜⵓⵙⵓⵔⵉⵏ ⵏ ⵓⴱⴰⵢⵢⵓⵔ ⵏ ⴽⵓⴼⵉⴷ, ⴰⵙⵏⴼⵍ ⵏ ⵓⵏⵣⵡⵉ, ⵜⴰⵙⵙⴰⵙⵜ ⵜⴰⴷⴰⵎⵙⴰⵏⵜ, ⵉⵏⴰⵥⴰⵕⵏ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⴰⵣⵣⵉⴳⵣ ⵏ ⵓⵙⴽⴰⵏ ⵎⴳⴰⵍ ⵉⴱⵕⵕⴰⵏⵉⵢⵏ ⴷ ⵜⵎⵙⵙⴰⵥⵓⵕⵜ ⴷ ⵓⵙⵉⵎⵎⵕ ⵅⴼ ⵜⴽⵕⴹⵉ, ⴷ ⵓⴱⵕⵕⵎ ⵏ ⵜⵡⵓⵔⵉ ⵜⴰⵖⵔⵎⴰⵏⵜ ⴷ ⵓⵏⴱⴰⴹ ⵏ ⵓⵙⵍⴳⵏ. 

ⴳ ⵎⴰⴷ ⵉⵥⵍⵉⵏ ⵙ ⵉⵎⵛⴰⵡⴰⵕⵏ ⵏⵏⵉ ⵜⵙⵏⵎⴰⵍⴰ ⵜⴰⴹⴰ ⵜⴰⵎⴰⴹⵍⴰⵏⵜ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⴰⴷⴷⵓⵔ ⵏ ⵓⵎⵢⴰⵖ ⴰⵡⵙⵙⴰⵏ ⵉⵏⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⴱⴷⴷⵉ ⵏ ⵜⵎⵔⵔⵓⵜ ⵙⴳ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⵜⴰⵎⵔⵔⵓⵜ ⵏ ⵓⴷⵔⵡⵙ, ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ, ⴷ ⵜⵉⵍⴰⵍⵜ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴳ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴷ ⵉⵎⵏⴰⴷⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⴰⴷ. 

ⵓⵔ ⵜⴻⵜⵜⵓ ⵎⴰⵙⵙⴰ ⴱⵓⵄⵢⵢⴰⵛ ⴰⴷ ⵜⵙⴷⴷⵉⴷ ⵎⴰⵙ ⴳⴰⵏ ⵉⵎⵓⵙⵙⵓⵜⵏ ⵏ ⵜⴰⴹⴰ ⴷ ⵉⵏⵎⵓⵇⵇⴰⵔⵏ ⵏⵏⵉ ⵉⵜⵜⵓⵙⵏⵎⴰⵍⴰⵏ ⴳ ⵓⵎⴰⵍⵓ ⵏⵏⵙ, ⵢⴰⵏ ⵓⵣⵎⵣ ⵏ ⵓⵙⵉⴷⵙ ⵏ ⵉⵎⴷⵔⴰⵡⵏ ⵙ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵓⵙⴰⵜⵉ ⴰⵎⵔⵙⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵙ ⵔⴰⵏⵜ ⵜⵓⴳⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴰⴷ ⵙⴳⵉⵙ ⴰⴳⵯⵎⵏⵜ ⵉⴷⴷⵖ ⵉⴳⴰ ⴰⵣⵓⵔⵜ ⵢⵓⴽⵍⴰⵍⵏ ⴰⴷ ⵉⵜⵜⴱⴹⴰⵡ.