“ⵉⵎⵉⵙ ⵏ ⵓⵙⵥⵕⴼ ⵏ ⵓⵡⴰⵏⴽ ⵉ ⵡⵓⵜⵛⵉ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴷⴷⴰⵡ ⵜⵏⵎⴰⵜⴰⵔⵜ ⵏⵉⵖ ⵜⵉⴹⴰⴼ ⴷⴰ ⵉⵎⵎⴰⵍ ⴰⵣⵣⵉⴳⵣ ⵏ ⵉⵡⴰⵏⴽⵏ ⵉ ⵜⵎⵔⵉⵙⵉⵏ ⵏⵏⵙⵏ ⵉⵙⵎⵢⴰⵜⴰⵢⵏ ⵙ ⵜⴼⴼⵓⴳⵏⴰ ⴷ ⵉⵣⵔⴼⴰⵏ. ⵉⵖ ⴰⵙ ⵏⴻⵏⵔⵓ ⵙ ⵎⴰⵙ ⵉⴳⴰ ⵢⴰⵏ ⵓⵣⵔⴼ ⵙⴳ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵓⴼⴳⴰⵏ, ⵉⴳⴰ ⴰⵡⴷ ⴳ ⵜⵉⵍⴰⵡⵜ ⵢⴰⵜ ⵜⴼⴰⴷⴰ ⵏ ⵓⵡⵇⵇⵔ ⵏ ⵓⴱⵓⵔⵣ ⴰⵏⴼⴳⴰⵏ ⵎⴽⵏⵏⴰ ⴰⴽⴽⵯ ⴳⴰⵏⵜ ⵜⵎⵙⵓⵜⴰⵍ ⴷ ⵜⵎⵙⴰⵔⵉⵏ.” 

ⵢⵓⵛⴽⴰ ⴷ ⵓⵢⴰ ⴳ ⵜⴳⵓⵔⵉ ⵏⵏⴰ ⵜⵙⵙⵏⴽⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵎⵍⴷⴰ ⵏ ⵓⵏⵏⵓⵕⵥⵎ ⵏ ⵡⵓⵙⵙⴰⵏ ⵉⵣⵔⴰⵡⴰⵏⵏ ⴳ ⵓⵕⵥⵥⵓⵎ ⴰⵎⴰⴷⴷⵓⴷ ⵏ ⵓⵣⵣⴳⵉⵔ ⵏ ⵢⵉⵎⵉⵙ ⵏ ⵓⵙⵥⵕⴼ ⵏ ⵓⵡⴰⵏⴽ ⵉ ⵡⵓⵜⵛⵉ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴷⴷⴰⵡ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⴷ ⵓⵎⵥⵉⵢⵏ ⵉⵜⵜⵡⴰⵢⵃⴹⴰⵏ ⵅⴼ ⵓⴼⵔⴰⴳ ⵏⵏⵙⵏ, ⴰⵙⵙ ⵏ ⵓⵢⵏⴰⵙ 04 ⵢⵓⵍⵢⵓⵣ 2022 ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵍⴱⵓⵍⵉⵙ ⴳ ⵍⵇⵏⵉⵟⵕⴰ. 

ⵓⵜⵛⵉ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴷⴷⴰⵡ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⵏⵉⵖ ⵜⵉⴹⴰⴼ, ⵓⵔ ⵉⴳⵉ ⵉⵎⵔⵙⵉ ⴰⵜⵉⵇⵏⵉ, ⵓⵍⴰ ⵜⵉⵎⴳⴳⵉⵜ ⵜⴰⴼⵔⴰⵔⵜ, ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, “ⵏⵜⵜⴰ ⴷ ⵜⵎⴳⴳⵉⵜ ⵉⵙⵙⵉⵙⴼⵉⵡⵏ ⵜⴰⵎⵔⵉⵙⵜ ⴷ ⵜⵎⴰⵙⴰⵢⵜ ⵜⵓⵍⴳⵉⵏⵜ ⴷ ⵜⵡⵏⴳⵉⵎⵜ ⵏ ⵓⵡⴰⵏⴽ ⵅⴼ ⵓⴼⵔⴰⴳ ⵏ ⵉⵎⴳⴷⵓⵍⵏ ⵙⴳ ⵜⴷⵔⴼⵉ ⵏⵏⵙⵏ ⴷ ⵓⵙⵡⴰⵜⵛⴰ ⵏⵏⵙⵏ ⴷ ⵉⵡⵉⵣ ⵅⵉⴼⵙⵏ ⴷ ⵓⴹⴰⴽⴰⵍ ⵏ ⵜⵏⴼⵔⵓⵜ ⵏⵏⵙⵏ ⵜⴰⴽⵎⴰⵎⵜ ⴷ ⵜⵎⵏⵍⵍⵉⵜ ⴷ ⵓⵙⵙⵓⵊⴷ ⵏ ⵜⵎⵙⵓⵜⴰⵍ ⵏ ⵡⴰⵎⵎⴰⵥ ⵏⵏⵙⵏ ⴰⴷⵓⵙⴰⵏ”, ⵜⵙⵙⴽⵕⵥ ⵎⴰⵙ ⵔⴰⴷ ⵉⴱⴱⵉ ⵓⵙⵎⵀⵍ ⴰⵎⵢⴰⴳⴰⵏ ⵏ ⵓⵎⵕⵚⵓⵎ ⵏ ⵓⵎⵕⵚⵓⵎ ⵉⵥⵍⵉⵏ ⵙ ⵢⵉⵎⵉⵙ ⵏ ⵡⵓⵜⵛⵉ ⴰⴽⴷ ⵢⵉⴳⵉ ⴰⵏⴱⴷⴰⴷ ⴷ ⵓⵏⴰⵎⵓⵏ ⵏⵏⴰ ⵉⵜⵜⴼⴰⵡⵏ ⴳ ⵓⵙⵎⵏⵉⴷ ⵏ ⵜⴰⵡⵊⵉⵡⵉⵏ, ⵏⵉⵖ ⵙ ⵜⵙⵏⵜⴰⵢⵜ ⵙⴳ ⴷⴰⵔ ⵜⵓⴳⵜⵜ ⵏ ⵉⵎⴰⵙⴰⵢⵏ ⵙⴳ ⵡⴰⵎⵎⴰⵙⵏ ⵏ ⵓⴼⵓⵜⵓ ⵙⴳ ⵜⴷⵔⴼⵉ, ⵉ ⵡⵓⵜⵛⵉ ⵉ ⵡⵉⴷⴰ ⵜⵜⵡⴰⵙⵔⵙⵏⵉⵏ ⴷⴷⴰⵡ ⵜⵏⵎⴰⵜⴰⵔⵜ. 

ⵜⵙⵙⴽⵕⵥ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵓⵖⵏ ⵏ ⵜⵉⴽⴽⵉ ⵏ ⵜⵓⴳⴳⵓⵥⵜ ⵜⴰⵣⵓⵛⵛⵍⵜ ⵉ ⵓⵙⵓⵊⴷ ⵏ ⵡⵓⵜⵛⵉ ⵉⵖⵓⴷⴰⵏ ⵉⴳⵓⵎⵏ ⵉⵣⵎⵔⵏ ⴰⴷ ⵉⴼⵔⴳ ⴰⴷⵡⴰⵙ ⵏ ⵓⴳⴳⵉⴷⵏ ⵉⵎⴼⴰⵜⵜⵓⵜⵏ ⵙⴳ ⵜⴷⵔⴼⵉ ⵏⵏⵙⵏ, ⵎⴰⵢⴰ ⵙ ⵓⵣⵣⵉⴳⵣ ⵏ ⵓⵎⴰⴳⵔⴰⴷ 114 ⵙⴳ ⵉⵍⵓⴳⵏⵏ ⵏ ⵏⵉⵍⵚⵓⵏ ⵎⴰⵏⴹⵉⵍⵍⴰ. ⴳ ⵓⵣⵎⵣ ⵏ ⵓⵙⵎⵏⵉⴷ ⵏ ⵉⴹⵕⵉⵚⵏ ⵓⵣⵔⵉⴼⵏ ⵉⵏⴰⵎⵓⵔⵏ ⴷ ⵉⵎⵏⵣⴰⵢⵏ ⴷ ⵉⵍⵓⴳⵏⵏ ⵏ ⵓⵙⵍⴳⵏ ⴰⴳⵔⵖⵍⴰⵏ ⴰⵏⴼⴳⴰⵏ ⵏⵏⴰ ⵙⵔⵙ ⵉⵣⴷⵉⵏ, ⵜⵙⵙⵉⵎⵖⵓⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ ⵙ ⵓⵎⵕⵚⵓⵎ ⴰⴷ, ⵜⴳⴰ ⵜ ⴷ ⵡⴰⵍⴰⵢ ⵉⵙⵜⴰⵡⵀⵎⵎⴰⵏ ⴳ ⵎⴰⴷ ⵉⵥⵍⵉⵏ ⵙ ⵓⴼⵔⴰⴳ ⵏ ⵜⵏⴼⵔⵓⵜ ⵜⴰⴽⵎⴰⵎⵜ ⵏ ⵉⵎⴼⴰⵜⵜⵓⵜⵏ ⵙⴳ ⵜⴷⵔⴼⵉ ⵏⵏⵙⵏ ⴳ ⵡⴰⵎⵎⴰⵙⵏ ⵏ ⵡⴰⵎⵎⴰⵥ ⴷ ⵡⴰⵎⵎⴰⵙⵏ ⵏ ⵓⴼⵓⵜⵓ ⵙⴳ ⵜⴷⵔⴼⵉ, ⵜⵙⴷⴷⵉⴷ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⵉ ⵜⴰⵎⵓⵏⵜ ⴰⴽⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵅⴼ ⵓⵙⵎⵀⵍ ⵏⵏⵙ. 

ⴳ ⵓⵎⵏⴰⴹ ⴰⴷ ⵏⵉⵜ, ⵜⵣⵎⵎⴻⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ ⵎⴰⵙ ⴱⴷⴷⴰ ⵢⵓⵙⵉ ⵓⵙⵇⵇⵉⵎ, ⴳ ⵉⵙⴳⴳⵯⴰⵙⵏ ⴰⴷ ⵣⵔⵉⵏⵉⵏ, ⴰⵏⵣⴳⵓⵎ ⵅⴼ ⵉⵏⵎⵔⴰⵏ ⵏⵏⴰ ⵜⵜⴷⴷⵔⵏ ⵉⵎⴼⴰⵜⵜⵓⵜⵏ ⵙⴳ ⵜⴷⵔⴼⵉ ⵏⵏⵙⵏ ⴳ ⵓⵙⴱⵖⵔ ⵙⴳ ⵓⵣⵔⴼ ⴰⴷ, ⵎⴽⵍⵍⵉ ⵉⵙⵙⴰⵎⵓ ⵉ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵓⵙⴳⴳⵯⴰⵙ 2020 ⵉⵙⵖⵍⴰⴼ ⵅⴼ “ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵎⵚⵕⴰⵢ ⵏ ⵜⵏⴼⵔⵓⵜ”, ⵏⵏⴰ ⴷ ⵉⵙⵙⴰⴼⵖ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵉⴹⴼⵕⵏ ⵉ ⵓⵡⵙⵇⵇⵉⵎ, ⴹⴰⵕⵜ ⵉⵔⵣⴰⴼⵏ ⵏⵏⴰ ⵉⵙⴽⵔ ⵉ ⵜⵓⴳⵜⵜ ⵏ ⵡⴰⵎⵎⴰⵙⵏ ⵉⴹⴼⵕⵏ ⵉ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⵏⴰⵎⵓⵔⵜ, ⵉⵙⵏⵉⵖⵙ ⵉⵎⵉⵙ ⵎⴰⵙ ⴷ ⵜⵉⵡⵊⵉⵡⵉⵏ ⴰⴷ ⵢⴰⴽⴽⴰⵏ ⵜⵉⵔⴰⵎ ⵏ ⵡⵓⵜⵛⵉ ⵏⵉⵖ ⵙ ⵜⵙⵏⵜⴰⵢⵉⵏ ⵢⴰⴹⵏⵉⵏ, ⵙ ⵜⵡⵉⵍⴰ ⵜⴰⵎⵅⴰⵙⵜ, ⵏ ⵉⵎⵙⵖⴰⵏⵏ ⵉⵎⴰⵙⴰⵢⵏ ⵏ ⵜⵎⵙⵙⵓⴳⵓⵔⵜ ⵏ ⵉⴷⵖⴰⵔⵏ ⴰⴷ, ⵉⵣⵔⵉ ⵖⴰⵙ, ⵙ ⵜⵎⵏⵜⵉⵍⵉⵏ ⵏ ⵜⵏⴼⵔⵓⵜ, ⴰⴷ ⵉⵜⵜⵓⵙⵎⵏⵉⴷ ⵓⵖⵔⵓⵎ ⴷ ⵓⴽⴼⴰⵢ ⴷ ⵜⴽⵍⵉⵍⵜ ⴷ ⵡⴰⵎⴰⵏ, ⵙ ⵓⵙⵍⵉⴷ ⵏ ⴽⵓ ⵜⵉⵔⵎⵜ ⵏⵡⴰⵏⵉⵏ. 

ⵉⵜⵜⵡⴰⵥⵍⴰⵢ ⵓⵏⵏⵓⵕⵥⵎ ⵏ ⵜⵡⵓⵔⵉⵡⵉⵏ ⵏ ⵡⵓⵙⵙⴰⵏ ⴰⴷ ⵉⵣⵔⴰⵡⴰⵏⵏ, ⵏⵏⴰ ⵔⴰⴷ ⵉⵖⴰⵎⴰ ⴰⵔ 06 ⵢⵓⵍⵢⵓⵣ ⴷ ⵉⴷⴷⴰⵏ ⴳ ⵜⵖⵔⵎⵜ ⵏ ⵍⵇⵏⵉⵟⵕⴰ, ⵙ ⵜⵉⵍⵉⵜ ⵏ ⵉⴷ ⵎⴰⵙⵙ: ⵎⵓⵃⵎⵎⴰⴷ ⴷⴷⵅⵉⵙⵉ, ⴰⵏⵎⵀⴰⵍ ⴰⵏⴰⵎⵎⴰⵙ ⵏ ⵍⴱⵓⵍⵉⵙ ⴰⵏⵣⵔⴰⴼ, ⴷ ⴼⴰⵡⵣⵉ ⵍⵇⵊⵄ, ⴰⵎⴰⵡⵙⴰⵙ ⵉⵜⵜⵓⵙⵎⴰⴳⴰⵍⵏ ⴷⴰⵔ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵜⵍⵜ, ⴷ ⵎⵓⵍⴰⵢ ⵍⵃⴰⵙⴰⵏ ⴷⴷⴰⴽⵉ, ⴰⴳⵏⵙⴰⵙ ⴰⵎⴰⵜⴰⵢ ⵏ ⵓⴳⵍⵍⵉⴷ ⴷⴰⵔ ⵜⵙⵏⴱⴹⴰⵢⵜ ⵏ ⵜⵕⵓⵥⵉ, ⴷ ⵓⵏⵙⵙⵉⵅⴼ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⴷ ⵉⵙⵎⴷⵢⴰⵜⵏ ⵢⴰⴹⵏ ⵙⴳ ⵜⵎⴰⵡⵙⴰⵙⵉⵏ ⵏ ⵜⴽⵔⵣⴰ ⴷ ⵜⴳⵎⵔⵜ ⵜⴰⵢⵍⴰⵍⵜ ⴷ ⵜⴳⵎⵉ ⵜⴰⴼⴰⵔⴰⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⴷ ⵜⵣⵔⴼⵜ, ⴷ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⵏⵏⴰ ⵉⵙⴷⴷⵉⴷⵏ ⴳ ⵜⴽⵛⵛⵓⵎⵉⵏ ⵏⵏⵙⵏ ⵅⴼ ⵡⴰⴷⴷⵓⵔ ⵏ ⵓⵏⵎⵓⵇⵇⴰⵔ ⴰⴷ ⵏⵏⴰ ⵉⴳⴰⵏ ⴰⵣⵎⵣ ⵉⵖⵓⴷⴰⵏ ⵉ ⵓⴽⵜⵓⵔ ⵏ ⵉⵙⵓⴳⴰⵎ ⴷ ⵜⵓⴳⴳⴰⵣ ⵜⵜⵓⴳⴰⵏⵉⵏ ⴳ ⵓⵣⴷⴰⵢ ⵏ ⵉⵎⵓⵙⵙⵓⵜⵏ ⵏ ⵜⵓⴳⵜ ⵏ ⵜⵣⵓⵏⴰ ⵜⵉⵎⴰⵡⵙⴰⵙⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵉⴳⵎⴰⵎⵏ ⵏ ⵜⵏⴼⵔⵓⵜ ⵏⵜⴰⵢⵏⵉⵏ ⵙ ⵓⵣⵣⴳⵉⵔ ⵏ ⵓⵙⵖⵏⵓ ⴰⴷ, ⴷ ⵡⴰⵏⵏⴰⵍ ⴷ ⵜⵙⵓⵍⴰⵏⵜ ⵏ ⵜⵓⴳⴳⴰⵣ ⴰⴷ ⵉⵙⵡⵓⵜⵜⵙⵏ ⴰⵍⴽⴰⵎ ⵏ ⵢⴰⵏ ⵓⵎⵎⵓⵜⵜⵉ ⴰⵏⴰⵡⴰⵏ ⴳ ⵢⵉⴳⵔ ⵏ ⵓⴼⵔⴰⴳ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵉⵏⵙⵎⵉⵍⵏ ⵏ ⵓⴳⴳⵉⴷⵏ ⴳⴰⵏⵉⵏ ⵉⵎⵏⵜⴰⵢⵏ.